੩. ਕੁਰੁਰਾਜਚਰਿਯਾ

੨੦. ‘‘ਪੁਨਾਪਰਂ ਯਦਾ ਹੋਮਿ, ਇਨ੍ਦਪਤ੍ਥੇ [ਇਨ੍ਦਪਤ੍ਤੇ (ਸੀ. ਕ.)] ਪੁਰੁਤ੍ਤਮੇ;

ਰਾਜਾ ਧਨਞ੍ਚਯੋ ਨਾਮ, ਕੁਸਲੇ ਦਸਹੁਪਾਗਤੋ.

੨੧. ‘‘ਕਲਿਙ੍ਗਰਟ੍ਠਵਿਸਯਾ, ਬ੍ਰਾਹ੍ਮਣਾ ਉਪਗਞ੍ਛੁ ਮਂ;

ਆਯਾਚੁਂ ਮਂ ਹਤ੍ਥਿਨਾਗਂ, ਧਞ੍ਞਂ ਮਙ੍ਗਲਸਮ੍ਮਤਂ.

੨੨. ‘‘‘ਅਵੁਟ੍ਠਿਕੋ ਜਨਪਦੋ, ਦੁਬ੍ਭਿਕ੍ਖੋ ਛਾਤਕੋ ਮਹਾ;

ਦਦਾਹਿ ਪਵਰਂ ਨਾਗਂ, ਨੀਲਂ ਅਞ੍ਜਨਸਵ੍ਹਯਂ.

੨੩. ‘‘‘ਨ ਮੇ ਯਾਚਕਮਨੁਪ੍ਪਤ੍ਤੇ, ਪਟਿਕ੍ਖੇਪੋ ਅਨੁਚ੍ਛਵੋ;

ਮਾ ਮੇ ਭਿਜ੍ਜਿ ਸਮਾਦਾਨਂ, ਦਸ੍ਸਾਮਿ ਵਿਪੁਲਂ ਗਜਂ’.

੨੪. ‘‘ਨਾਗਂ ਗਹੇਤ੍ਵਾ ਸੋਣ੍ਡਾਯ, ਭਿਙ੍ਗਾਰੇ [ਭਿਙ੍ਕਾਰੇ (ਸੀ.)] ਰਤਨਾਮਯੇ;

ਜਲਂ ਹਤ੍ਥੇ ਆਕਿਰਿਤ੍ਵਾ, ਬ੍ਰਾਹ੍ਮਣਾਨਂ ਅਦਂ ਗਜਂ.

੨੫. ‘‘ਤਸ੍ਸ ਨਾਗੇ ਪਦਿਨ੍ਨਮ੍ਹਿ, ਅਮਚ੍ਚਾ ਏਤਦਬ੍ਰਵੁਂ;

‘ਕਿਂ ਨੁ ਤੁਯ੍ਹਂ ਵਰਂ ਨਾਗਂ, ਯਾਚਕਾਨਂ ਪਦਸ੍ਸਸਿ.

੨੬. ‘‘‘ਧਞ੍ਞਂ ਮਙ੍ਗਲਸਮ੍ਪਨ੍ਨਂ, ਸਙ੍ਗਾਮਵਿਜਯੁਤ੍ਤਮਂ;

ਤਸ੍ਮਿਂ ਨਾਗੇ ਪਦਿਨ੍ਨਮ੍ਹਿ, ਕਿਂ ਤੇ ਰਜ੍ਜਂ ਕਰਿਸ੍ਸਤਿ.

੨੭. ‘‘‘ਰਜ੍ਜਮ੍ਪਿ ਮੇ ਦਦੇ ਸਬ੍ਬਂ, ਸਰੀਰਂ ਦਜ੍ਜਮਤ੍ਤਨੋ;

ਸਬ੍ਬਞ੍ਞੁਤਂ ਪਿਯਂ ਮਯ੍ਹਂ, ਤਸ੍ਮਾ ਨਾਗਂ ਅਦਾਸਹ’’’ਨ੍ਤਿ.

ਕੁਰੁਰਾਜਚਰਿਯਂ ਤਤਿਯਂ.