੯. ਬੋਧਿਸਿਞ੍ਚਕਤ੍ਥੇਰਅਪਦਾਨਂ

੪੬. ‘‘ਵਿਪਸ੍ਸਿਸ੍ਸ ਭਗਵਤੋ, ਮਹਾਬੋਧਿਮਹੋ ਅਹੁ;

ਪਬ੍ਬਜ੍ਜੁਪਗਤੋ ਸਨ੍ਤੋ, ਉਪਗਚ੍ਛਿਂ ਅਹਂ ਤਦਾ.

੪੭. ‘‘ਕੁਸੁਮੋਦਕਮਾਦਾਯ, ਬੋਧਿਯਾ ਓਕਿਰਿਂ ਅਹਂ;

ਮੋਚਯਿਸ੍ਸਤਿ ਨੋ ਮੁਤ੍ਤੋ, ਨਿਬ੍ਬਾਪੇਸ੍ਸਤਿ ਨਿਬ੍ਬੁਤੋ.

੪੮. ‘‘ਏਕਨਵੁਤਿਤੋ ਕਪ੍ਪੇ, ਯਂ ਬੋਧਿਮਭਿਸਿਞ੍ਚਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੋਧਿਸਿਞ੍ਚਾਯਿਦਂ ਫਲਂ.

੪੯. ‘‘ਤੇਤ੍ਤਿਂਸੇ ਵਤ੍ਤਮਾਨਮ੍ਹਿ, ਕਪ੍ਪੇ ਆਸੁਂ ਜਨਾਧਿਪਾ;

ਉਦਕਸੇਚਨਾ ਨਾਮ, ਅਟ੍ਠੇਤੇ ਚਕ੍ਕਵਤ੍ਤਿਨੋ.

੫੦. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਬੋਧਿਸਿਞ੍ਚਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਬੋਧਿਸਿਞ੍ਚਕਤ੍ਥੇਰਸ੍ਸਾਪਦਾਨਂ ਨਵਮਂ.