੮. ਪਾਟਲਿਪੁਪ੍ਫਿਯਤ੍ਥੇਰਅਪਦਾਨਂ

੩੬. ‘‘ਸੁਵਣ੍ਣਵਣ੍ਣਂ ਸਮ੍ਬੁਦ੍ਧਂ, ਗਚ੍ਛਨ੍ਤਂ ਅਨ੍ਤਰਾਪਣੇ;

ਕਞ੍ਚਨਗ੍ਘਿਯਸਙ੍ਕਾਸਂ, ਬਾਤ੍ਤਿਂਸਵਰਲਕ੍ਖਣਂ.

੩੭. ‘‘ਸੇਟ੍ਠਿਪੁਤ੍ਤੋ ਤਦਾ ਆਸਿਂ, ਸੁਖੁਮਾਲੋ ਸੁਖੇਧਿਤੋ;

ਉਚ੍ਛਙ੍ਗੇ ਪਾਟਲਿਪੁਪ੍ਫਂ, ਕਤ੍ਵਾਨ [ਕਤ੍ਵਾ ਤਂ (ਸੀ. ਸ੍ਯਾ.)] ਅਭਿਸਂਹਰਿਂ.

੩੮. ‘‘ਹਟ੍ਠੋ ਹਟ੍ਠੇਨ ਚਿਤ੍ਤੇਨ, ਪੁਪ੍ਫੇਹਿ ਅਭਿਪੂਜਯਿਂ;

ਤਿਸ੍ਸਂ ਲੋਕਵਿਦੁਂ ਨਾਥਂ, ਨਰਦੇਵਂ ਨਮਸ੍ਸਹਂ.

੩੯. ‘‘ਦ੍ਵੇਨਵੁਤੇ ਇਤੋ ਕਪ੍ਪੇ, ਯਂ ਕਮ੍ਮਮਕਰਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਪੁਪ੍ਫਪੂਜਾਯਿਦਂ ਫਲਂ.

੪੦. ‘‘ਇਤੋ ਤੇਸਟ੍ਠਿਕਪ੍ਪਮ੍ਹਿ, ਅਭਿਸਮ੍ਮਤਨਾਮਕੋ;

ਸਤ੍ਤਰਤਨਸਮ੍ਪਨ੍ਨੋ, ਚਕ੍ਕਵਤ੍ਤੀ ਮਹਬ੍ਬਲੋ.

੪੧. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਪਾਟਲਿਪੁਪ੍ਫਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਪਾਟਲਿਪੁਪ੍ਫਿਯਤ੍ਥੇਰਸ੍ਸਾਪਦਾਨਂ ਅਟ੍ਠਮਂ.