੪. ਪਰਪ੍ਪਸਾਦਕਤ੍ਥੇਰਅਪਦਾਨਂ

੨੦. ‘‘ਉਸਭਂ ਪਵਰਂ ਵੀਰਂ, ਮਹੇਸਿਂ ਵਿਜਿਤਾਵਿਨਂ;

ਸੁਵਣ੍ਣਵਣ੍ਣਂ ਸਮ੍ਬੁਦ੍ਧਂ, ਕੋ ਦਿਸ੍ਵਾ ਨਪ੍ਪਸੀਦਤਿ.

੨੧. ‘‘ਹਿਮਵਾਵਾਪਰਿਮੇਯ੍ਯੋ, ਸਾਗਰੋਵ ਦੁਰੁਤ੍ਤਰੋ;

ਤਥੇਵ ਝਾਨਂ ਬੁਦ੍ਧਸ੍ਸ, ਕੋ ਦਿਸ੍ਵਾ ਨਪ੍ਪਸੀਦਤਿ.

੨੨. ‘‘ਵਸੁਧਾ ਯਥਾਪ੍ਪਮੇਯ੍ਯਾ, ਚਿਤ੍ਤਾ ਵਨਵਟਂਸਕਾ;

ਤਥੇਵ ਸੀਲਂ ਬੁਦ੍ਧਸ੍ਸ, ਕੋ ਦਿਸ੍ਵਾ ਨਪ੍ਪਸੀਦਤਿ.

੨੩. ‘‘ਅਨਿਲਞ੍ਜਸਾਸਙ੍ਖੁਬ੍ਭੋ [ਅਨਿਲਜੋਵ ਅਸਙ੍ਖੋਭੋ (ਸੀ.)], ਯਥਾਕਾਸੋ ਅਸਙ੍ਖਿਯੋ;

ਤਥੇਵ ਞਾਣਂ ਬੁਦ੍ਧਸ੍ਸ, ਕੋ ਦਿਸ੍ਵਾ ਨਪ੍ਪਸੀਦਤਿ.

੨੪. ‘‘ਇਮਾਹਿ ਚਤੁਗਾਥਾਹਿ, ਬ੍ਰਾਹ੍ਮਣੋ ਸੇਨਸਵ੍ਹਯੋ;

ਬੁਦ੍ਧਸੇਟ੍ਠਂ ਥਵਿਤ੍ਵਾਨ, ਸਿਦ੍ਧਤ੍ਥਂ ਅਪਰਾਜਿਤਂ.

੨੫. ‘‘ਚਤੁਨ੍ਨਵੁਤਿਕਪ੍ਪਾਨਿ, ਦੁਗ੍ਗਤਿਂ ਨੁਪਪਜ੍ਜਥ;

ਸੁਗਤਿਂ ਸੁਖਸਮ੍ਪਤ੍ਤਿਂ [ਸੁਗਤੀਸੁ ਸੁਸੁਮ੍ਪਤ੍ਤਿਂ (ਸੀ. ਸ੍ਯਾ.)], ਅਨੁਭੋਸਿਮਨਪ੍ਪਕਂ.

੨੬. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਥਵਿਤ੍ਵਾ ਲੋਕਨਾਯਕਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਥੋਮਨਾਯ [ਥੋਮਨਸ੍ਸ (ਸ੍ਯਾ.)] ਇਦਂ ਫਲਂ.

੨੭. ‘‘ਚਾਤੁਦ੍ਦਸਮ੍ਹਿ ਕਪ੍ਪਮ੍ਹਿ, ਚਤੁਰੋ ਆਸੁਮੁਗ੍ਗਤਾ;

ਸਤ੍ਤਰਤਨਸਮ੍ਪਨ੍ਨਾ, ਚਕ੍ਕਵਤ੍ਤੀ ਮਹਬ੍ਬਲਾ.

੨੮. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਪਰਪ੍ਪਸਾਦਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਪਰਪ੍ਪਸਾਦਕਤ੍ਥੇਰਸ੍ਸਾਪਦਾਨਂ ਚਤੁਤ੍ਥਂ.