੯. ਵਨਵਚ੍ਛਤ੍ਥੇਰਅਪਦਾਨਂ

੨੫੧. ‘‘ਇਮਮ੍ਹਿ ਭਦ੍ਦਕੇ ਕਪ੍ਪੇ, ਬ੍ਰਹ੍ਮਬਨ੍ਧੁ ਮਹਾਯਸੋ;

ਕਸ੍ਸਪੋ ਨਾਮ ਗੋਤ੍ਤੇਨ, ਉਪ੍ਪਜ੍ਜਿ ਵਦਤਂ ਵਰੋ.

੨੫੨. ‘‘ਤਦਾਹਂ ਪਬ੍ਬਜਿਤ੍ਵਾਨ, ਤਸ੍ਸ ਬੁਦ੍ਧਸ੍ਸ ਸਾਸਨੇ;

ਯਾਵਜੀਵਂ ਚਰਿਤ੍ਵਾਨ, ਬ੍ਰਹ੍ਮਚਾਰਂ ਤਤੋ ਚੁਤੋ.

੨੫੩. ‘‘ਤੇਨ ਕਮ੍ਮੇਨ ਸੁਕਤੇਨ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸਮਗਚ੍ਛਹਂ.

੨੫੪. ‘‘ਤਤੋ ਚੁਤੋ ਅਰਞ੍ਞਮ੍ਹਿ, ਕਪੋਤੋ ਆਸਹਂ ਤਹਿਂ;

ਵਸਤੇ ਗੁਣਸਮ੍ਪਨ੍ਨੋ, ਭਿਕ੍ਖੁ ਝਾਨਰਤੋ ਸਦਾ.

੨੫੫. ‘‘ਮੇਤ੍ਤਚਿਤ੍ਤੋ ਕਾਰੁਣਿਕੋ, ਸਦਾ ਪਮੁਦਿਤਾਨਨੋ;

ਉਪੇਕ੍ਖਕੋ ਮਹਾਵੀਰੋ, ਅਪ੍ਪਮਞ੍ਞਾਸੁ ਕੋਵਿਦੋ.

੨੫੬. ‘‘ਵਿਨੀਵਰਣਸਙ੍ਕਪ੍ਪੇ, ਸਬ੍ਬਸਤ੍ਤਹਿਤਾਸਯੇ;

ਵਿਸਟ੍ਠੋ ਨਚਿਰੇਨਾਸਿਂ, ਤਸ੍ਮਿਂ ਸੁਗਤਸਾਵਕੇ.

੨੫੭. ‘‘ਉਪੇਚ੍ਚ ਪਾਦਮੂਲਮ੍ਹਿ, ਨਿਸਿਨ੍ਨਸ੍ਸ ਤਦਾਸ੍ਸਮੇ;

ਕਦਾਚਿ ਸਾਮਿਸਂ ਦੇਤਿ, ਧਮ੍ਮਂ ਦੇਸੇਸਿ ਚੇਕਦਾ.

੨੫੮. ‘‘ਤਦਾ ਵਿਪੁਲਪੇਮੇਨ, ਉਪਾਸਿਤ੍ਵਾ ਜਿਨਤ੍ਰਜਂ;

ਤਤੋ ਚੁਤੋ ਗਤੋ ਸਗ੍ਗਂ, ਪਵਾਸੋ ਸਘਰਂ ਯਥਾ.

੨੫੯. ‘‘ਸਗ੍ਗਾ ਚੁਤੋ ਮਨੁਸ੍ਸੇਸੁ, ਨਿਬ੍ਬਤ੍ਤੋ ਪੁਞ੍ਞਕਮ੍ਮੁਨਾ;

ਅਗਾਰਂ ਛਡ੍ਡਯਿਤ੍ਵਾਨ, ਪਬ੍ਬਜਿਂ ਬਹੁਸੋ ਅਹਂ.

੨੬੦. ‘‘ਸਮਣੋ ਤਾਪਸੋ ਵਿਪ੍ਪੋ, ਪਰਿਬ੍ਬਜੋ ਤਥੇਵਹਂ;

ਹੁਤ੍ਵਾ ਵਸਿਂ ਅਰਞ੍ਞਮ੍ਹਿ, ਅਨੇਕਸਤਸੋ ਅਹਂ.

੨੬੧. ‘‘ਪਚ੍ਛਿਮੇ ਚ ਭਵੇ ਦਾਨਿ, ਰਮ੍ਮੇ ਕਪਿਲਵਤ੍ਥਵੇ;

ਵਚ੍ਛਗੋਤ੍ਤੋ ਦਿਜੋ ਤਸ੍ਸ, ਜਾਯਾਯ ਅਹਮੋਕ੍ਕਮਿਂ.

੨੬੨. ‘‘ਮਾਤੁ ਮੇ ਦੋਹਲ਼ੋ ਆਸਿ, ਤਿਰੋਕੁਚ੍ਛਿਗਤਸ੍ਸ ਮੇ;

ਜਾਯਮਾਨਸਮੀਪਮ੍ਹਿ, ਵਨਵਾਸਾਯ ਨਿਚ੍ਛਯੋ.

੨੬੩. ‘‘ਤਤੋ ਮੇ ਅਜਨੀ ਮਾਤਾ, ਰਮਣੀਯੇ ਵਨਨ੍ਤਰੇ;

ਗਬ੍ਭਤੋ ਨਿਕ੍ਖਮਨ੍ਤਂ ਮਂ, ਕਾਸਾਯੇਨ ਪਟਿਗ੍ਗਹੁਂ.

੨੬੪. ‘‘ਤਤੋ ਕੁਮਾਰੋ ਸਿਦ੍ਧਤ੍ਥੋ, ਜਾਤੋ ਸਕ੍ਯਕੁਲਦ੍ਧਜੋ;

ਤਸ੍ਸ ਮਿਤ੍ਤੋ ਪਿਯੋ ਆਸਿਂ, ਸਂਵਿਸਟ੍ਠੋ ਸੁਮਾਨਿਯੋ.

੨੬੫. ‘‘ਸਤ੍ਤਸਾਰੇਭਿਨਿਕ੍ਖਨ੍ਤੇ, ਓਹਾਯ ਵਿਪੁਲਂ ਯਸਂ;

ਅਹਮ੍ਪਿ ਪਬ੍ਬਜਿਤ੍ਵਾਨ, ਹਿਮਵਨ੍ਤਮੁਪਾਗਮਿਂ.

੨੬੬. ‘‘ਵਨਾਲਯਂ ਭਾਵਨੀਯਂ, ਕਸ੍ਸਪਂ ਧੁਤਵਾਦਿਕਂ;

ਦਿਸ੍ਵਾ ਸੁਤ੍ਵਾ ਜਿਨੁਪ੍ਪਾਦਂ, ਉਪੇਸਿਂ ਨਰਸਾਰਥਿਂ.

੨੬੭. ‘‘ਸੋ ਮੇ ਧਮ੍ਮਮਦੇਸੇਸਿ, ਸਬ੍ਬਤ੍ਥਂ ਸਮ੍ਪਕਾਸਯਂ;

ਤਤੋਹਂ ਪਬ੍ਬਜਿਤ੍ਵਾਨ, ਵਨਮੇਵ ਪੁਨਾਗਮਂ [ਪੁਨਾਗਮਿਂ (ਸੀ. ਪੀ.), ਪੁਨੋਕ੍ਕਮਂ (ਸ੍ਯਾ.)].

੨੬੮. ‘‘ਤਤ੍ਥਾਪ੍ਪਮਤ੍ਤੋ ਵਿਹਰਂ, ਛਲ਼ਭਿਞ੍ਞਾ ਅਫਸ੍ਸਯਿਂ [ਅਪਸ੍ਸਯਿਂ (ਸ੍ਯਾ. ਕ.)];

ਅਹੋ ਸੁਲਦ੍ਧਲਾਭੋਮ੍ਹਿ, ਸੁਮਿਤ੍ਤੇਨਾਨੁਕਮ੍ਪਿਤੋ.

੨੬੯. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੨੭੦. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੨੭੧. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਵਨਵਚ੍ਛੋ ਥੇਰੋ ਇਮਾ ਗਾਥਾਯੋ

ਅਭਾਸਿਤ੍ਥਾਤਿ.

ਵਨਵਚ੍ਛਤ੍ਥੇਰਸ੍ਸਾਪਦਾਨਂ ਨਵਮਂ.