੧੦. ਚੂਲ਼ਸੁਗਨ੍ਧਤ੍ਥੇਰਅਪਦਾਨਂ

੨੭੨. ‘‘ਇਮਮ੍ਹਿ ਭਦ੍ਦਕੇ ਕਪ੍ਪੇ, ਬ੍ਰਹ੍ਮਬਨ੍ਧੁ ਮਹਾਯਸੋ;

ਕਸ੍ਸਪੋ ਨਾਮ ਗੋਤ੍ਤੇਨ, ਉਪ੍ਪਜ੍ਜਿ ਵਦਤਂ ਵਰੋ.

੨੭੩. ‘‘ਅਨੁਬ੍ਯਞ੍ਜਨਸਮ੍ਪਨ੍ਨੋ, ਬਾਤ੍ਤਿਂਸਵਰਲਕ੍ਖਣੋ;

ਬ੍ਯਾਮਪ੍ਪਭਾਪਰਿਵੁਤੋ, ਰਂਸਿਜਾਲਸਮੋਤ੍ਥਟੋ.

੨੭੪. ‘‘ਅਸ੍ਸਾਸੇਤਾ ਯਥਾ ਚਨ੍ਦੋ, ਸੂਰਿਯੋਵ ਪਭਙ੍ਕਰੋ;

ਨਿਬ੍ਬਾਪੇਤਾ ਯਥਾ ਮੇਘੋ, ਸਾਗਰੋਵ ਗੁਣਾਕਰੋ.

੨੭੫. ‘‘ਧਰਣੀਰਿਵ ਸੀਲੇਨ, ਹਿਮਵਾਵ ਸਮਾਧਿਨਾ;

ਆਕਾਸੋ ਵਿਯ ਪਞ੍ਞਾਯ, ਅਸਙ੍ਗੋ ਅਨਿਲੋ ਯਥਾ.

੨੭੬. ‘‘ਤਦਾਹਂ ਬਾਰਾਣਸਿਯਂ, ਉਪਪਨ੍ਨੋ ਮਹਾਕੁਲੇ;

ਪਹੂਤਧਨਧਞ੍ਞਸ੍ਮਿਂ, ਨਾਨਾਰਤਨਸਞ੍ਚਯੇ.

੨੭੭. ‘‘ਮਹਤਾ ਪਰਿਵਾਰੇਨ, ਨਿਸਿਨ੍ਨਂ ਲੋਕਨਾਯਕਂ;

ਉਪੇਚ੍ਚ ਧਮ੍ਮਮਸ੍ਸੋਸਿਂ, ਅਮਤਂਵ ਮਨੋਹਰਂ.

੨੭੮. ‘‘ਦ੍ਵਤ੍ਤਿਂਸਲਕ੍ਖਣਧਰੋ, ਸਨਕ੍ਖਤ੍ਤੋਵ ਚਨ੍ਦਿਮਾ;

ਅਨੁਬ੍ਯਞ੍ਜਨਸਮ੍ਪਨ੍ਨੋ, ਸਾਲਰਾਜਾਵ ਫੁਲ੍ਲਿਤੋ.

੨੭੯. ‘‘ਰਂਸਿਜਾਲਪਰਿਕ੍ਖਿਤ੍ਤੋ, ਦਿਤ੍ਤੋਵ ਕਨਕਾਚਲੋ;

ਬ੍ਯਾਮਪ੍ਪਭਾਪਰਿਵੁਤੋ, ਸਤਰਂਸੀ ਦਿਵਾਕਰੋ.

੨੮੦. ‘‘ਸੋਣ੍ਣਾਨਨੋ ਜਿਨਵਰੋ, ਸਮਣੀਵ [ਰਮ੍ਮਣੀਵ (ਸ੍ਯਾ.)] ਸਿਲੁਚ੍ਚਯੋ;

ਕਰੁਣਾਪੁਣ੍ਣਹਦਯੋ, ਗੁਣੇਨ ਵਿਯ ਸਾਗਰੋ.

੨੮੧. ‘‘ਲੋਕਵਿਸ੍ਸੁਤਕਿਤ੍ਤਿ ਚ, ਸਿਨੇਰੂਵ ਨਗੁਤ੍ਤਮੋ;

ਯਸਸਾ ਵਿਤ੍ਥਤੋ ਵੀਰੋ, ਆਕਾਸਸਦਿਸੋ ਮੁਨਿ.

੨੮੨. ‘‘ਅਸਙ੍ਗਚਿਤ੍ਤੋ ਸਬ੍ਬਤ੍ਥ, ਅਨਿਲੋ ਵਿਯ ਨਾਯਕੋ;

ਪਤਿਟ੍ਠਾ ਸਬ੍ਬਭੂਤਾਨਂ, ਮਹੀਵ ਮੁਨਿਸਤ੍ਤਮੋ.

੨੮੩. ‘‘ਅਨੁਪਲਿਤ੍ਤੋ ਲੋਕੇਨ, ਤੋਯੇਨ ਪਦੁਮਂ ਯਥਾ;

ਕੁਵਾਦਗਚ੍ਛਦਹਨੋ, ਅਗ੍ਗਿਖਨ੍ਧੋਵ ਸੋਭਸਿ [ਸੋਭਤਿ (ਸੀ.), ਸੋ ਵਸਿ (ਸ੍ਯਾ. ਕ.)].

੨੮੪. ‘‘ਅਗਧੋ ਵਿਯ ਸਬ੍ਬਤ੍ਥ, ਕਿਲੇਸਵਿਸਨਾਸਕੋ;

ਗਨ੍ਧਮਾਦਨਸੇਲੋਵ, ਗੁਣਗਨ੍ਧਵਿਭੂਸਿਤੋ.

੨੮੫. ‘‘ਗੁਣਾਨਂ ਆਕਰੋ ਵੀਰੋ, ਰਤਨਾਨਂਵ ਸਾਗਰੋ;

ਸਿਨ੍ਧੂਵ ਵਨਰਾਜੀਨਂ, ਕਿਲੇਸਮਲਹਾਰਕੋ.

੨੮੬. ‘‘ਵਿਜਯੀਵ ਮਹਾਯੋਧੋ, ਮਾਰਸੇਨਾਵਮਦ੍ਦਨੋ;

ਚਕ੍ਕਵਤ੍ਤੀਵ ਸੋ ਰਾਜਾ, ਬੋਜ੍ਝਙ੍ਗਰਤਨਿਸ੍ਸਰੋ.

੨੮੭. ‘‘ਮਹਾਭਿਸਕ੍ਕਸਙ੍ਕਾਸੋ, ਦੋਸਬ੍ਯਾਧਿਤਿਕਿਚ੍ਛਕੋ;

ਸਲ੍ਲਕਤ੍ਤੋ ਯਥਾ ਵੇਜ੍ਜੋ, ਦਿਟ੍ਠਿਗਣ੍ਡਵਿਫਾਲਕੋ.

੨੮੮. ‘‘ਸੋ ਤਦਾ ਲੋਕਪਜ੍ਜੋਤੋ, ਸਨਰਾਮਰਸਕ੍ਕਤੋ;

ਪਰਿਸਾਸੁ ਨਰਾਦਿਚ੍ਚੋ, ਧਮ੍ਮਂ ਦੇਸਯਤੇ ਜਿਨੋ.

੨੮੯. ‘‘ਦਾਨਂ ਦਤ੍ਵਾ ਮਹਾਭੋਗੋ, ਸੀਲੇਨ ਸੁਗਤੂਪਗੋ;

ਭਾਵਨਾਯ ਚ ਨਿਬ੍ਬਾਤਿ, ਇਚ੍ਚੇਵਮਨੁਸਾਸਥ.

੨੯੦. ‘‘ਦੇਸਨਂ ਤਂ ਮਹਸ੍ਸਾਦਂ, ਆਦਿਮਜ੍ਝਨ੍ਤਸੋਭਣਂ;

ਸੁਣਨ੍ਤਿ ਪਰਿਸਾ ਸਬ੍ਬਾ, ਅਮਤਂਵ ਮਹਾਰਸਂ.

੨੯੧. ‘‘ਸੁਤ੍ਵਾ ਸੁਮਧੁਰਂ ਧਮ੍ਮਂ, ਪਸਨ੍ਨੋ ਜਿਨਸਾਸਨੇ;

ਸੁਗਤਂ ਸਰਣਂ ਗਨ੍ਤ੍ਵਾ, ਯਾਵਜੀਵਂ ਨਮਸ੍ਸਹਂ.

੨੯੨. ‘‘ਮੁਨਿਨੋ ਗਨ੍ਧਕੁਟਿਯਾ, ਓਪੁਞ੍ਜੇਸਿਂ [ਉਬ੍ਬਟ੍ਟੇਸਿਂ (ਸ੍ਯਾ.)] ਤਦਾ ਮਹਿਂ;

ਚਤੁਜ੍ਜਾਤੇਨ ਗਨ੍ਧੇਨ, ਮਾਸੇ ਅਟ੍ਠ ਦਿਨੇਸ੍ਵਹਂ.

੨੯੩. ‘‘ਪਣਿਧਾਯ ਸੁਗਨ੍ਧਤ੍ਤਂ, ਸਰੀਰਵਿਸ੍ਸਗਨ੍ਧਿਨੋ [ਸਰੀਰਸ੍ਸ ਵਿਗਨ੍ਧਿਨੋ (ਸੀ. ਸ੍ਯਾ. ਪੀ.)];

ਤਦਾ ਜਿਨੋ ਵਿਯਾਕਾਸਿ, ਸੁਗਨ੍ਧਤਨੁਲਾਭਿਤਂ.

੨੯੪. ‘‘‘ਯੋ ਯਂ ਗਨ੍ਧਕੁਟਿਭੂਮਿਂ, ਗਨ੍ਧੇਨੋਪੁਞ੍ਜਤੇ ਸਕਿਂ;

ਤੇਨ ਕਮ੍ਮਵਿਪਾਕੇਨ, ਉਪਪਨ੍ਨੋ ਤਹਿਂ ਤਹਿਂ.

੨੯੫. ‘‘‘ਸੁਗਨ੍ਧਦੇਹੋ ਸਬ੍ਬਤ੍ਥ, ਭਵਿਸ੍ਸਤਿ ਅਯਂ ਨਰੋ;

ਗੁਣਗਨ੍ਧਯੁਤ੍ਤੋ ਹੁਤ੍ਵਾ, ਨਿਬ੍ਬਾਯਿਸ੍ਸਤਿਨਾਸਵੋ’.

੨੯੬. ‘‘ਤੇਨ ਕਮ੍ਮੇਨ ਸੁਕਤੇਨ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸਮਗਚ੍ਛਹਂ.

੨੯੭. ‘‘ਪਚ੍ਛਿਮੇ ਚ ਭਵੇ ਦਾਨਿ, ਜਾਤੋ ਵਿਪ੍ਪਕੁਲੇ ਅਹਂ;

ਗਬ੍ਭਂ ਮੇ ਵਸਤੋ ਮਾਤਾ, ਦੇਹੇਨਾਸਿ ਸੁਗਨ੍ਧਿਤਾ.

੨੯੮. ‘‘ਯਦਾ ਚ ਮਾਤੁਕੁਚ੍ਛਿਮ੍ਹਾ, ਨਿਕ੍ਖਮਾਮਿ ਤਦਾ ਪੁਰੀ [ਪੁਰਂ (ਸ੍ਯਾ. ਕ.)];

ਸਾਵਤ੍ਥਿਸਬ੍ਬਗਨ੍ਧੇਹਿ, ਵਾਸਿਤਾ ਵਿਯ ਵਾਯਥ.

੨੯੯. ‘‘ਪੁਪ੍ਫਵਸ੍ਸਞ੍ਚ ਸੁਰਭਿ, ਦਿਬ੍ਬਗਨ੍ਧਂ ਮਨੋਰਮਂ;

ਧੂਪਾਨਿ ਚ ਮਹਗ੍ਘਾਨਿ, ਉਪਵਾਯਿਂਸੁ ਤਾਵਦੇ.

੩੦੦. ‘‘ਦੇਵਾ ਚ ਸਬ੍ਬਗਨ੍ਧੇਹਿ, ਧੂਪਪੁਪ੍ਫੇਹਿ ਤਂ ਘਰਂ;

ਵਾਸਯਿਂਸੁ ਸੁਗਨ੍ਧੇਨ, ਯਸ੍ਮਿਂ ਜਾਤੋ ਅਹਂ ਘਰੇ.

੩੦੧. ‘‘ਯਦਾ ਚ ਤਰੁਣੋ ਭਦ੍ਦੋ, ਪਠਮੇ ਯੋਬ੍ਬਨੇ ਠਿਤੋ;

ਤਦਾ ਸੇਲਂ [ਸੇਸਂ (ਸ੍ਯਾ.)] ਸਪਰਿਸਂ, ਵਿਨੇਤ੍ਵਾ ਨਰਸਾਰਥਿ.

੩੦੨. ‘‘ਤੇਹਿ ਸਬ੍ਬੇਹਿ ਪਰਿਵੁਤੋ [ਸਹਿਤੋ (ਸੀ. ਸ੍ਯਾ. ਪੀ.)], ਸਾਵਤ੍ਥਿਪੁਰਮਾਗਤੋ;

ਤਦਾ ਬੁਦ੍ਧਾਨੁਭਾਵਂ ਤਂ, ਦਿਸ੍ਵਾ ਪਬ੍ਬਜਿਤੋ ਅਹਂ.

੩੦੩. ‘‘ਸੀਲਂ ਸਮਾਧਿਪਞ੍ਞਞ੍ਚ, ਵਿਮੁਤ੍ਤਿਞ੍ਚ ਅਨੁਤ੍ਤਰਂ;

ਭਾਵੇਤ੍ਵਾ ਚਤੁਰੋ ਧਮ੍ਮੇ, ਪਾਪੁਣਿਂ ਆਸਵਕ੍ਖਯਂ.

੩੦੪. ‘‘ਯਦਾ ਪਬ੍ਬਜਿਤੋ ਚਾਹਂ, ਯਦਾ ਚ ਅਰਹਾ ਅਹੁਂ;

ਨਿਬ੍ਬਾਯਿਸ੍ਸਂ ਯਦਾ ਚਾਹਂ, ਗਨ੍ਧਵਸ੍ਸੋ ਤਦਾ ਅਹੁ.

੩੦੫. ‘‘ਸਰੀਰਗਨ੍ਧੋ ਚ ਸਦਾਤਿਸੇਤਿ [ਸਦਾ ਵਾਸੇਤਿ (ਕ.)] ਮੇ, ਮਹਾਰਹਂ ਚਨ੍ਦਨਚਮ੍ਪਕੁਪ੍ਪਲਂ;

ਤਥੇਵ ਗਨ੍ਧੇ ਇਤਰੇ ਚ ਸਬ੍ਬਸੋ, ਪਸਯ੍ਹ ਵਾਯਾਮਿ ਤਤੋ ਤਹਿਂ [ਯਹਿਂ (ਸ੍ਯਾ.)] ਤਹਿਂ.

੩੦੬. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੩੦੭. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੩੦੮. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਚੂਲ਼ਸੁਗਨ੍ਧੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ;

ਚੂਲ਼ਸੁਗਨ੍ਧਤ੍ਥੇਰਸ੍ਸਾਪਦਾਨਂ ਦਸਮਂ.

ਭਦ੍ਦਿਯਵਗ੍ਗੋ ਪਞ੍ਚਪਞ੍ਞਾਸਮੋ.