੮. ਲੋਮਸਕਙ੍ਗਿਯਤ੍ਥੇਰਅਪਦਾਨਂ

੨੨੫. ‘‘ਇਮਮ੍ਹਿ ਭਦ੍ਦਕੇ ਕਪ੍ਪੇ, ਬ੍ਰਹ੍ਮਬਨ੍ਧੁ ਮਹਾਯਸੋ;

ਕਸ੍ਸਪੋ ਨਾਮ ਗੋਤ੍ਤੇਨ, ਉਪ੍ਪਜ੍ਜਿ ਵਦਤਂ ਵਰੋ.

੨੨੬. ‘‘ਤਦਾਹਂ ਚਨ੍ਦਨੋ ਚੇਵ, ਪਬ੍ਬਜਿਤ੍ਵਾਨ ਸਾਸਨੇ;

ਆਪਾਣਕੋਟਿਕਂ ਧਮ੍ਮਂ, ਪੂਰਯਿਤ੍ਵਾਨ ਸਾਸਨੇ.

੨੨੭. ‘‘ਤਤੋ ਚੁਤਾ ਸਨ੍ਤੁਸਿਤਂ, ਉਪਪਨ੍ਨਾ ਉਭੋ ਮਯਂ;

ਤਤ੍ਥ ਦਿਬ੍ਬੇਹਿ ਨਚ੍ਚੇਹਿ, ਗੀਤੇਹਿ ਵਾਦਿਤੇਹਿ ਚ.

੨੨੮. ‘‘ਰੂਪਾਦਿਦਸਹਙ੍ਗੇਹਿ, ਅਭਿਭੋਤ੍ਵਾਨ ਸੇਸਕੇ;

ਯਾਵਤਾਯੁਂ ਵਸਿਤ੍ਵਾਨ, ਅਨੁਭੋਤ੍ਵਾ ਮਹਾਸੁਖਂ.

੨੨੯. ‘‘ਤਤੋ ਚਵਿਤ੍ਵਾ ਤਿਦਸਂ, ਚਨ੍ਦਨੋ ਉਪਪਜ੍ਜਥ;

ਅਹਂ ਕਪਿਲਵਤ੍ਥੁਸ੍ਮਿਂ, ਅਜਾਯਿਂ ਸਾਕਿਯਤ੍ਰਜੋ.

੨੩੦. ‘‘ਯਦਾ ਉਦਾਯਿਤ੍ਥੇਰੇਨ, ਅਜ੍ਝਿਟ੍ਠੋ ਲੋਕਨਾਯਕੋ;

ਅਨੁਕਮ੍ਪਿਯ ਸਕ੍ਯਾਨਂ, ਉਪੇਸਿ ਕਪਿਲਵ੍ਹਯਂ.

੨੩੧. ‘‘ਤਦਾਤਿਮਾਨਿਨੋ ਸਕ੍ਯਾ, ਨ ਬੁਦ੍ਧਸ੍ਸ ਗੁਣਞ੍ਞੁਨੋ;

ਪਣਮਨ੍ਤਿ ਨ ਸਮ੍ਬੁਦ੍ਧਂ, ਜਾਤਿਥਦ੍ਧਾ ਅਨਾਦਰਾ.

੨੩੨. ‘‘ਤੇਸਂ ਸਙ੍ਕਪ੍ਪਮਞ੍ਞਾਯ, ਆਕਾਸੇ ਚਙ੍ਕਮੀ ਜਿਨੋ;

ਪਜ੍ਜੁਨ੍ਨੋ ਵਿਯ ਵਸ੍ਸਿਤ੍ਥ, ਪਜ੍ਜਲਿਤ੍ਥ ਯਥਾ ਸਿਖੀ.

੨੩੩. ‘‘ਦਸ੍ਸੇਤ੍ਵਾ ਰੂਪਮਤੁਲਂ, ਪੁਨ ਅਨ੍ਤਰਧਾਯਥ;

ਏਕੋਪਿ ਹੁਤ੍ਵਾ ਬਹੁਧਾ, ਅਹੋਸਿ ਪੁਨਰੇਕਕੋ.

੨੩੪. ‘‘ਅਨ੍ਧਕਾਰਂ ਪਕਾਸਞ੍ਚ, ਦਸ੍ਸਯਿਤ੍ਵਾ ਅਨੇਕਧਾ;

ਪਾਟਿਹੇਰਂ ਕਰਿਤ੍ਵਾਨ, ਵਿਨਯੀ ਞਾਤਕੇ ਮੁਨਿ.

੨੩੫. ‘‘ਚਾਤੁਦ੍ਦੀਪੋ ਮਹਾਮੇਘੋ, ਤਾਵਦੇਵ ਪਵਸ੍ਸਥ;

ਤਦਾ ਹਿ ਜਾਤਕਂ ਬੁਦ੍ਧੋ, ਵੇਸ੍ਸਨ੍ਤਰਮਦੇਸਯਿ.

੨੩੬. ‘‘ਤਦਾ ਤੇ ਖਤ੍ਤਿਯਾ ਸਬ੍ਬੇ, ਨਿਹਨ੍ਤ੍ਵਾ ਜਾਤਿਜਂ ਮਦਂ;

ਉਪੇਸੁਂ ਸਰਣਂ ਬੁਦ੍ਧਂ, ਆਹ ਸੁਦ੍ਧੋਦਨੋ ਤਦਾ.

੨੩੭. ‘‘‘ਇਦਂ ਤਤਿਯਂ ਤਵ ਭੂਰਿਪਞ੍ਞ, ਪਾਦਾਨਿ ਵਨ੍ਦਾਮਿ ਸਮਨ੍ਤਚਕ੍ਖੁ;

ਯਦਾਭਿਜਾਤੋ ਪਥਵੀ ਪਕਮ੍ਪਯੀ, ਯਦਾ ਚ ਤਂ ਨਜ੍ਜਹਿ ਜਮ੍ਬੁਛਾਯਾ’.

੨੩੮. ‘‘ਤਦਾ ਬੁਦ੍ਧਾਨੁਭਾਵਂ ਤਂ, ਦਿਸ੍ਵਾ ਵਿਮ੍ਹਿਤਮਾਨਸੋ;

ਪਬ੍ਬਜਿਤ੍ਵਾਨ ਤਤ੍ਥੇਵ, ਨਿਵਸਿਂ ਮਾਤੁਪੂਜਕੋ.

੨੩੯. ‘‘ਚਨ੍ਦਨੋ ਦੇਵਪੁਤ੍ਤੋ ਮਂ, ਉਪਗਨ੍ਤ੍ਵਾਨੁਪੁਚ੍ਛਥ;

ਭਦ੍ਦੇਕਰਤ੍ਤਸ੍ਸ ਤਦਾ, ਸਙ੍ਖੇਪਵਿਤ੍ਥਾਰਂ ਨਯਂ.

੨੪੦. ‘‘ਚੋਦਿਤੋਹਂ ਤਦਾ ਤੇਨ, ਉਪੇਚ੍ਚ ਨਰਨਾਯਕਂ;

ਭਦ੍ਦੇਕਰਤ੍ਤਂ ਸੁਤ੍ਵਾਨ, ਸਂਵਿਗ੍ਗੋ ਵਨਮਾਮਕੋ.

੨੪੧. ‘‘ਤਦਾ ਮਾਤਰਮਪੁਚ੍ਛਿਂ, ਵਨੇ ਵਚ੍ਛਾਮਿ ਏਕਕੋ;

ਸੁਖੁਮਾਲੋਤਿ ਮੇ ਮਾਤਾ, ਵਾਰਯੀ ਤਂ [ਤੇ (ਸ੍ਯਾ. ਪੀ. ਕ.)] ਤਦਾ ਵਚਂ.

੨੪੨. ‘‘ਕਾਸਂ [ਦਬ੍ਬਂ (ਸੀ. ਸ੍ਯਾ. ਪੀ.)] ਕੁਸਂ ਪੋਟਕਿਲਂ, ਉਸੀਰਂ ਮੁਞ੍ਜਪਬ੍ਬਜਂ [ਮੁਞ੍ਜਬਬ੍ਬਜਂ (ਸੀ. ਪੀ.)];

ਉਰਸਾ ਪਨੁਦਿਸ੍ਸਾਮਿ, ਵਿਵੇਕਮਨੁਬ੍ਰੂਹਯਂ.

੨੪੩. ‘‘ਤਦਾ ਵਨਂ ਪਵਿਟ੍ਠੋਹਂ, ਸਰਿਤ੍ਵਾ ਜਿਨਸਾਸਨਂ;

ਭਦ੍ਦੇਕਰਤ੍ਤਓਵਾਦਂ, ਅਰਹਤ੍ਤਮਪਾਪੁਣਿਂ.

੨੪੪. ‘‘‘ਅਤੀਤਂ ਨਾਨ੍ਵਾਗਮੇਯ੍ਯ, ਨਪ੍ਪਟਿਕਙ੍ਖੇ ਅਨਾਗਤਂ;

ਯਦਤੀਤਂ ਪਹੀਨਂ ਤਂ, ਅਪ੍ਪਤ੍ਤਞ੍ਚ ਅਨਾਗਤਂ.

੨੪੫. ‘‘‘ਪਚ੍ਚੁਪ੍ਪਨ੍ਨਞ੍ਚ ਯੋ ਧਮ੍ਮਂ, ਤਤ੍ਥ ਤਤ੍ਥ ਵਿਪਸ੍ਸਤਿ;

ਅਸਂਹੀਰਂ ਅਸਂਕੁਪ੍ਪਂ, ਤਂ ਵਿਦ੍ਵਾ ਮਨੁਬ੍ਰੂਹਯੇ.

੨੪੬. ‘‘‘ਅਜ੍ਜੇਵ ਕਿਚ੍ਚਮਾਤਪ੍ਪਂ, ਕੋ ਜਞ੍ਞਾ ਮਰਣਂ ਸੁਵੇ;

ਨ ਹਿ ਨੋ ਸਙ੍ਗਰਂ [ਸਙ੍ਕਰਂ (ਕ.)] ਤੇਨ, ਮਹਾਸੇਨੇਨ ਮਚ੍ਚੁਨਾ.

੨੪੭. ‘‘‘ਏਵਂਵਿਹਾਰਿਂ ਆਤਾਪਿਂ, ਅਹੋਰਤ੍ਤਮਤਨ੍ਦਿਤਂ;

ਤਂ ਵੇ ਭਦ੍ਦੇਕਰਤ੍ਤੋਤਿ, ਸਨ੍ਤੋ ਆਚਿਕ੍ਖਤੇ ਮੁਨਿ’.

੨੪੮. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੨੪੯. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੨੫੦. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਲੋਮਸਕਙ੍ਗਿਯੋ [ਲੋਮਸਙ੍ਖਿਯੋ (ਸ੍ਯਾ. ਕ.)] ਥੇਰੋ ਇਮਾ ਗਾਥਾਯੋ

ਅਭਾਸਿਤ੍ਥਾਤਿ.

ਲੋਮਸਕਙ੍ਗਿਯਤ੍ਥੇਰਸ੍ਸਾਪਦਾਨਂ ਅਟ੍ਠਮਂ.