੭. ਅਭਯਤ੍ਥੇਰਅਪਦਾਨਂ

੧੯੫. ‘‘ਪਦੁਮੁਤ੍ਤਰੋ ਨਾਮ ਜਿਨੋ, ਸਬ੍ਬਧਮ੍ਮੇਸੁ ਚਕ੍ਖੁਮਾ;

ਇਤੋ ਸਤਸਹਸ੍ਸਮ੍ਹਿ, ਕਪ੍ਪੇ ਉਪ੍ਪਜ੍ਜਿ ਨਾਯਕੋ.

੧੯੬. ‘‘ਸਰਣਗਮਨੇ ਕਿਞ੍ਚਿ, ਨਿਵੇਸੇਸਿ ਤਥਾਗਤੋ;

ਕਿਞ੍ਚਿ ਸੀਲੇ ਨਿਵੇਸੇਸਿ, ਦਸਕਮ੍ਮਪਥੁਤ੍ਤਮੇ.

੧੯੭. ‘‘ਦੇਤਿ ਕਸ੍ਸਚਿ ਸੋ ਵੀਰੋ, ਸਾਮਞ੍ਞਫਲਮੁਤ੍ਤਮਂ;

ਸਮਾਪਤ੍ਤੀ ਤਥਾ ਅਟ੍ਠ, ਤਿਸ੍ਸੋ ਵਿਜ੍ਜਾ ਪਵਚ੍ਛਤਿ.

੧੯੮. ‘‘ਛਲ਼ਭਿਞ੍ਞਾਸੁ ਯੋਜੇਸਿ, ਕਿਞ੍ਚਿ ਸਤ੍ਤਂ ਨਰੁਤ੍ਤਮੋ;

ਦੇਤਿ ਕਸ੍ਸਚਿ ਨਾਥੋ ਸੋ, ਚਤਸ੍ਸੋ ਪਟਿਸਮ੍ਭਿਦਾ.

੧੯੯. ‘‘ਬੋਧਨੇਯ੍ਯਂ ਪਜਂ ਦਿਸ੍ਵਾ, ਅਸਙ੍ਖੇਯ੍ਯਮ੍ਪਿ ਯੋਜਨਂ [ਅਸਙ੍ਖੇਯ੍ਯੇਪਿ ਯੋਜਨੇ ਸੀ. ਸ੍ਯਾ. ਪੀ.)];

ਖਣੇਨ ਉਪਗਨ੍ਤ੍ਵਾਨ, ਵਿਨੇਤਿ ਨਰਸਾਰਥਿ.

੨੦੦. ‘‘ਤਦਾਹਂ ਹਂਸਵਤਿਯਂ, ਅਹੋਸਿਂ ਬ੍ਰਾਹ੍ਮਣਤ੍ਰਜੋ;

ਪਾਰਗੂ ਸਬ੍ਬਵੇਦਾਨਂ, ਵੇਯ੍ਯਾਕਰਣਸਮ੍ਮਤੋ.

੨੦੧. ‘‘ਨਿਰੁਤ੍ਤਿਯਾ ਚ ਕੁਸਲੋ, ਨਿਘਣ੍ਡੁਮ੍ਹਿ ਵਿਸਾਰਦੋ;

ਪਦਕੋ ਕੇਟੁਭਵਿਦੂ, ਛਨ੍ਦੋਵਿਚਿਤਿਕੋਵਿਦੋ.

੨੦੨. ‘‘ਜਙ੍ਘਾਵਿਹਾਰਂ ਵਿਚਰਂ, ਹਂਸਾਰਾਮਮੁਪੇਚ੍ਚਹਂ;

ਅਦ੍ਦਸਂ ਵਰਦਂ [ਵਦਤਂ (ਸੀ. ਪੀ.), ਪਵਰਂ (ਸ੍ਯਾ.)] ਸੇਟ੍ਠਂ, ਮਹਾਜਨਪੁਰਕ੍ਖਤਂ.

੨੦੩. ‘‘ਦੇਸੇਨ੍ਤਂ ਵਿਰਜਂ ਧਮ੍ਮਂ, ਪਚ੍ਚਨੀਕਮਤੀ ਅਹਂ;

ਉਪੇਤ੍ਵਾ ਤਸ੍ਸ ਕਲ੍ਯਾਣਂ, ਸੁਤ੍ਵਾਨ ਵਿਮਲਂ ਅਹਂ [ਵਾਕ੍ਯਾਨਿ, ਸੁਤ੍ਵਾਨ ਵਿਮਲਾਨਹਂ (ਸੀ. ਸ੍ਯਾ. ਪੀ.)].

੨੦੪. ‘‘ਬ੍ਯਾਹਤਂ ਪੁਨਰੁਤ੍ਤਂ ਵਾ, ਅਪਤ੍ਥਂ ਵਾ ਨਿਰਤ੍ਥਕਂ;

ਨਾਦ੍ਦਸਂ ਤਸ੍ਸ ਮੁਨਿਨੋ, ਤਤੋ ਪਬ੍ਬਜਿਤੋ ਅਹਂ.

੨੦੫. ‘‘ਨਚਿਰੇਨੇਵ ਕਾਲੇਨ, ਸਬ੍ਬਸਤ੍ਤਵਿਸਾਰਦੋ;

ਨਿਪੁਣੋ ਬੁਦ੍ਧਵਚਨੇ, ਅਹੋਸਿਂ ਗੁਣਿਸਮ੍ਮਤੋ.

੨੦੬. ‘‘ਤਦਾ ਚਤਸ੍ਸੋ ਗਾਥਾਯੋ, ਗਨ੍ਥਯਿਤ੍ਵਾ ਸੁਬ੍ਯਞ੍ਜਨਾ;

ਸਨ੍ਥਵਿਤ੍ਵਾ ਤਿਲੋਕਗ੍ਗਂ, ਦੇਸਯਿਸ੍ਸਂ ਦਿਨੇ ਦਿਨੇ.

੨੦੭. ‘‘ਵਿਰਤ੍ਤੋਸਿ ਮਹਾਵੀਰੋ, ਸਂਸਾਰੇ ਸਭਯੇ ਵਸਂ;

ਕਰੁਣਾਯ ਨ ਨਿਬ੍ਬਾਯਿ, ਤਤੋ ਕਾਰੁਣਿਕੋ ਮੁਨਿ.

੨੦੮. ‘‘ਪੁਥੁਜ੍ਜਨੋ ਵਯੋ ਸਨ੍ਤੋ, ਨ ਕਿਲੇਸਵਸੋ ਅਹੁ;

ਸਮ੍ਪਜਾਨੋ ਸਤਿਯੁਤ੍ਤੋ, ਤਸ੍ਮਾ ਏਸੋ ਅਚਿਨ੍ਤਿਯੋ.

੨੦੯. ‘‘ਦੁਬ੍ਬਲਾਨਿ ਕਿਲੇਸਾਨਿ, ਯਸ੍ਸਾਸਯਗਤਾਨਿ ਮੇ;

ਞਾਣਗ੍ਗਿਪਰਿਦਡ੍ਢਾਨਿ, ਨ ਖੀਯਿਂਸੁ ਤਮਬ੍ਭੁਤਂ.

੨੧੦. ‘‘ਯੋ ਸਬ੍ਬਲੋਕਸ੍ਸ ਗਰੁ, ਲੋਕੋ [ਲੋਕੇ (ਸ੍ਯਾ. ਕ.)] ਯਸ੍ਸ ਤਥਾ ਗਰੁ;

ਤਥਾਪਿ ਲੋਕਾਚਰਿਯੋ, ਲੋਕੋ ਤਸ੍ਸਾਨੁਵਤ੍ਤਕੋ.

੨੧੧. ‘‘ਏਵਮਾਦੀਹਿ ਸਮ੍ਬੁਦ੍ਧਂ, ਕਿਤ੍ਤਯਂ ਧਮ੍ਮਦੇਸਨਂ;

ਯਾਵਜੀਵਂ ਕਰਿਤ੍ਵਾਨ, ਗਤੋ ਸਗ੍ਗਂ ਤਤੋ ਚੁਤੋ.

੨੧੨. ‘‘ਸਤਸਹਸ੍ਸਿਤੋ ਕਪ੍ਪੇ, ਯਂ ਬੁਦ੍ਧਮਭਿਕਿਤ੍ਤਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਕਿਤ੍ਤਨਾਯ ਇਦਂ ਫਲਂ.

੨੧੩. ‘‘ਦੇਵਲੋਕੇ ਮਹਾਰਜ੍ਜਂ, ਪਾਦੇਸਿਂ ਕਞ੍ਚਨਗ੍ਘਿਯਂ [ਦਿਬ੍ਬਾਨੁਭੋਜਹਂ ਤਦਾ (ਸ੍ਯਾ.), ਰਜ੍ਜਂ ਪਾਦੇਸਿ ਕਂਚਯਂ (ਸੀ.)];

ਚਕ੍ਕਵਤ੍ਤੀ ਮਹਾਰਜ੍ਜਂ, ਬਹੁਸੋਨੁਭਵਿਂ ਅਹਂ.

੨੧੪. ‘‘ਦੁਵੇ ਭਵੇ ਪਜਾਯਾਮਿ, ਦੇਵਤ੍ਤੇ ਅਥ ਮਾਨੁਸੇ;

ਅਞ੍ਞਂ ਗਤਿਂ ਨ ਜਾਨਾਮਿ, ਕਿਤ੍ਤਨਾਯ ਇਦਂ ਫਲਂ.

੨੧੫. ‘‘ਦੁਵੇ ਕੁਲੇ ਪਜਾਯਾਮਿ, ਖਤ੍ਤਿਯੇ ਅਥ ਬ੍ਰਾਹ੍ਮਣੇ;

ਨੀਚੇ ਕੁਲੇ ਨ ਜਾਯਾਮਿ, ਕਿਤ੍ਤਨਾਯ ਇਦਂ ਫਲਂ.

੨੧੬. ‘‘ਪਚ੍ਛਿਮੇ ਚ ਭਵੇ ਦਾਨਿ, ਗਿਰਿਬ੍ਬਜਪੁਰੁਤ੍ਤਮੇ;

ਰਞ੍ਞੋਹਂ ਬਿਮ੍ਬਿਸਾਰਸ੍ਸ, ਪੁਤ੍ਤੋ ਨਾਮੇਨ ਚਾਭਯੋ.

੨੧੭. ‘‘ਪਾਪਮਿਤ੍ਤਵਸਂ ਗਨ੍ਤ੍ਵਾ, ਨਿਗਣ੍ਠੇਨ ਵਿਮੋਹਿਤੋ;

ਪੇਸਿਤੋ ਨਾਟਪੁਤ੍ਤੇਨ, ਬੁਦ੍ਧਸੇਟ੍ਠਮੁਪੇਚ੍ਚਹਂ.

੨੧੮. ‘‘ਪੁਚ੍ਛਿਤ੍ਵਾ ਨਿਪੁਣਂ ਪਞ੍ਹਂ, ਸੁਤ੍ਵਾ ਬ੍ਯਾਕਰਣੁਤ੍ਤਮਂ;

ਪਬ੍ਬਜਿਤ੍ਵਾਨ ਨਚਿਰਂ, ਅਰਹਤ੍ਤਮਪਾਪੁਣਿਂ.

੨੧੯. ‘‘ਕਿਤ੍ਤਯਿਤ੍ਵਾ ਜਿਨਵਰਂ, ਕਿਤ੍ਤਿਤੋ ਹੋਮਿ ਸਬ੍ਬਦਾ;

ਸੁਗਨ੍ਧਦੇਹਵਦਨੋ, ਆਸਿਂ ਸੁਖਸਮਪ੍ਪਿਤੋ.

੨੨੦. ‘‘ਤਿਕ੍ਖਹਾਸਲਹੁਪਞ੍ਞੋ, ਮਹਾਪਞ੍ਞੋ ਤਥੇਵਹਂ;

ਵਿਚਿਤ੍ਤਪਟਿਭਾਨੋ ਚ, ਤਸ੍ਸ ਕਮ੍ਮਸ੍ਸ ਵਾਹਸਾ.

੨੨੧. ‘‘ਅਭਿਤ੍ਥਵਿਤ੍ਵਾ ਪਦੁਮੁਤ੍ਤਰਾਹਂ, ਪਸਨ੍ਨਚਿਤ੍ਤੋ ਅਸਮਂ ਸਯਮ੍ਭੁਂ;

ਨ ਗਚ੍ਛਿ ਕਪ੍ਪਾਨਿ ਅਪਾਯਭੂਮਿਂ, ਸਤਂ ਸਹਸ੍ਸਾਨਿ ਬਲੇਨ ਤਸ੍ਸ.

੨੨੨. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੨੨੩. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੨੨੪. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਅਭਯੋ ਥੇਰੋ ਇਮਾ ਗਾਥਾਯੋ

ਅਭਾਸਿਤ੍ਥਾਤਿ.

ਅਭਯਤ੍ਥੇਰਸ੍ਸਾਪਦਾਨਂ ਸਤ੍ਤਮਂ.