੬. ਕਾਲ਼ੁਦਾਯਿਤ੍ਥੇਰਅਪਦਾਨਂ

੧੬੫. ‘‘ਪਦੁਮੁਤ੍ਤਰੋ ਨਾਮ ਜਿਨੋ, ਸਬ੍ਬਧਮ੍ਮੇਸੁ ਚਕ੍ਖੁਮਾ;

ਇਤੋ ਸਤਸਹਸ੍ਸਮ੍ਹਿ, ਕਪ੍ਪੇ ਉਪ੍ਪਜ੍ਜਿ ਨਾਯਕੋ.

੧੬੬. ‘‘ਨਾਯਕਾਨਂ ਵਰੋ ਸਤ੍ਥਾ, ਗੁਣਾਗੁਣਵਿਦੂ ਜਿਨੋ;

ਕਤਞ੍ਞੂ ਕਤਵੇਦੀ ਚ, ਤਿਤ੍ਥੇ ਯੋਜੇਤਿ ਪਾਣਿਨੇ [ਪਾਣਿਨੋ (ਸੀ. ਸ੍ਯਾ ਪੀ.)].

੧੬੭. ‘‘ਸਬ੍ਬਞ੍ਞੁਤੇਨ ਞਾਣੇਨ, ਤੁਲਯਿਤ੍ਵਾ ਦਯਾਸਯੋ;

ਦੇਸੇਤਿ ਪਵਰਂ ਧਮ੍ਮਂ, ਅਨਨ੍ਤਗੁਣਸਞ੍ਚਯੋ.

੧੬੮. ‘‘ਸ ਕਦਾਚਿ ਮਹਾਵੀਰੋ, ਅਨਨ੍ਤਜਿਨਸਂਸਰਿ [ਅਨਨ੍ਤਜਨਸਂਸਦਿ (ਸੀ.), ਅਨਨ੍ਤਜਨਸਂਸੁਧਿ (ਸ੍ਯਾ.), ਅਨਨ੍ਤਜਨਸਂਸਰੀ (ਪੀ.)];

ਦੇਸੇਤਿ ਮਧੁਰਂ ਧਮ੍ਮਂ, ਚਤੁਸਚ੍ਚੂਪਸਞ੍ਹਿਤਂ.

੧੬੯. ‘‘ਸੁਤ੍ਵਾਨ ਤਂ ਧਮ੍ਮਵਰਂ, ਆਦਿਮਜ੍ਝਨ੍ਤਸੋਭਣਂ;

ਪਾਣਸਤਸਹਸ੍ਸਾਨਂ, ਧਮ੍ਮਾਭਿਸਮਯੋ ਅਹੁ.

੧੭੦. ‘‘ਨਿਨ੍ਨਾਦਿਤਾ ਤਦਾ ਭੂਮਿ, ਗਜ੍ਜਿਂਸੁ ਚ ਪਯੋਧਰਾ;

ਸਾਧੁਕਾਰਂ ਪਵਤ੍ਤਿਂਸੁ, ਦੇਵਬ੍ਰਹ੍ਮਨਰਾਸੁਰਾ.

੧੭੧. ‘‘‘ਅਹੋ ਕਾਰੁਣਿਕੋ ਸਤ੍ਥਾ, ਅਹੋ ਸਦ੍ਧਮ੍ਮਦੇਸਨਾ;

ਅਹੋ ਭਵਸਮੁਦ੍ਦਮ੍ਹਿ, ਨਿਮੁਗ੍ਗੇ ਉਦ੍ਧਰੀ ਜਿਨੋ’.

੧੭੨. ‘‘ਏਵਂ ਪਵੇਦਜਾਤੇਸੁ, ਸਨਰਾਮਰਬ੍ਰਹ੍ਮਸੁ;

ਕੁਲਪ੍ਪਸਾਦਕਾਨਗ੍ਗਂ, ਸਾਵਕਂ ਵਣ੍ਣਯੀ ਜਿਨੋ.

੧੭੩. ‘‘ਤਦਾਹਂ ਹਂਸਵਤਿਯਂ, ਜਾਤੋਮਚ੍ਚਕੁਲੇ ਅਹੁਂ;

ਪਾਸਾਦਿਕੋ ਦਸ੍ਸਨਿਯੋ, ਪਹੂਤਧਨਧਞ੍ਞਵਾ.

੧੭੪. ‘‘ਹਂਸਾਰਾਮਮੁਪੇਚ੍ਚਾਹਂ, ਵਨ੍ਦਿਤ੍ਵਾ ਤਂ ਤਥਾਗਤਂ;

ਸੁਣਿਤ੍ਵਾ ਮਧੁਰਂ ਧਮ੍ਮਂ, ਕਾਰਂ ਕਤ੍ਵਾ ਚ ਤਾਦਿਨੋ.

੧੭੫. ‘‘ਨਿਪਚ੍ਚ ਪਾਦਮੂਲੇਹਂ, ਇਮਂ ਵਚਨਮਬ੍ਰਵਿਂ;

‘ਕੁਲਪ੍ਪਸਾਦਕਾਨਗ੍ਗੋ, ਯੋ ਤਯਾ ਸਨ੍ਥੁਤੋ [ਯੋ ਤਵ ਸਾਸਨੇ (ਸ੍ਯਾ.)] ਮੁਨੇ.

੧੭੬. ‘‘‘ਤਾਦਿਸੋ ਹੋਮਹਂ ਵੀਰ [ਤਾਦਿਸੋਹਂ ਮਹਾਵੀਰ (ਸ੍ਯਾ. ਕ.)], ਬੁਦ੍ਧਸੇਟ੍ਠਸ੍ਸ ਸਾਸਨੇ’;

ਤਦਾ ਮਹਾਕਾਰੁਣਿਕੋ, ਸਿਞ੍ਚਨ੍ਤੋ ਵਾ ਮਤੇਨ ਮਂ.

੧੭੭. ‘‘ਆਹ ਮਂ ‘ਪੁਤ੍ਤ ਉਤ੍ਤਿਟ੍ਠ, ਲਚ੍ਛਸੇ ਤਂ ਮਨੋਰਥਂ;

ਕਥਂ ਨਾਮ ਜਿਨੇ ਕਾਰਂ, ਕਤ੍ਵਾਨ ਵਿਫਲੋ ਸਿਯਾ.

੧੭੮. ‘‘‘ਸਤਸਹਸ੍ਸਿਤੋ ਕਪ੍ਪੇ, ਓਕ੍ਕਾਕਕੁਲਸਮ੍ਭਵੋ;

ਗੋਤਮੋ ਨਾਮ ਗੋਤ੍ਤੇਨ, ਸਤ੍ਥਾ ਲੋਕੇ ਭਵਿਸ੍ਸਤਿ.

੧੭੯. ‘‘‘ਤਸ੍ਸ ਧਮ੍ਮੇਸੁ ਦਾਯਾਦੋ, ਓਰਸੋ ਧਮ੍ਮਨਿਮ੍ਮਿਤੋ;

ਉਦਾਯਿ ਨਾਮ ਨਾਮੇਨ, ਹੇਸ੍ਸਤਿ ਸਤ੍ਥੁ ਸਾਵਕੋ’.

੧੮੦. ‘‘ਤਂ ਸੁਤ੍ਵਾ ਮੁਦਿਤੋ ਹੁਤ੍ਵਾ, ਯਾਵਜੀਵਂ ਤਦਾ ਜਿਨਂ;

ਮੇਤ੍ਤਚਿਤ੍ਤੋ ਪਰਿਚਰਿਂ, ਪਚ੍ਚਯੇਹਿ ਵਿਨਾਯਕਂ.

੧੮੧. ‘‘ਤੇਨ ਕਮ੍ਮਵਿਪਾਕੇਨ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸਮਗਚ੍ਛਹਂ.

੧੮੨. ‘‘ਪਚ੍ਛਿਮੇ ਚ ਭਵੇ ਦਾਨਿ, ਰਮ੍ਮੇ ਕਪਿਲਵਤ੍ਥਵੇ;

ਜਾਤੋ ਮਹਾਮਚ੍ਚਕੁਲੇ, ਸੁਦ੍ਧੋਦਨਮਹੀਪਤੇ [ਸੁਦ੍ਧੋਦਨੋ ਮਹੀਪਤਿ (ਸ੍ਯਾ.)].

੧੮੩. ‘‘ਤਦਾ ਅਜਾਯਿ ਸਿਦ੍ਧਤ੍ਥੋ, ਰਮ੍ਮੇ ਲੁਮ੍ਬਿਨਿਕਾਨਨੇ;

ਹਿਤਾਯ ਸਬ੍ਬਲੋਕਸ੍ਸ, ਸੁਖਾਯ ਚ ਨਰਾਸਭੋ.

੧੮੪. ‘‘ਤਦਹੇਵ ਅਹਂ ਜਾਤੋ, ਸਹ ਤੇਨੇਵ ਵਡ੍ਢਿਤੋ;

ਪਿਯੋ ਸਹਾਯੋ ਦਯਿਤੋ, ਵਿਯਤ੍ਤੋ ਨੀਤਿਕੋਵਿਦੋ.

੧੮੫. ‘‘ਏਕੂਨਤਿਂਸੋ ਵਯਸਾ, ਨਿਕ੍ਖਮਿਤ੍ਵਾ ਅਗਾਰਤੋ [ਨਿਕ੍ਖਨ੍ਤੋ ਪਬ੍ਬਜਿਤ੍ਥਸੋ (ਸੀ. ਸ੍ਯਾ.)];

ਛਬ੍ਬਸ੍ਸਂ ਵੀਤਿਨਾਮੇਤ੍ਵਾ, ਆਸਿ ਬੁਦ੍ਧੋ ਵਿਨਾਯਕੋ.

੧੮੬. ‘‘ਜੇਤ੍ਵਾ ਸਸੇਨਕਂ ਮਾਰਂ, ਖੇਪਯਿਤ੍ਵਾਨ ਆਸਵੇ;

ਭਵਣ੍ਣਵਂ ਤਰਿਤ੍ਵਾਨ, ਬੁਦ੍ਧੋ ਆਸਿ ਸਦੇਵਕੇ.

੧੮੭. ‘‘ਇਸਿਵ੍ਹਯਂ ਗਮਿਤ੍ਵਾਨ [ਇਸਿਵ੍ਹਯਂ ਪਤਨਂ ਗਨ੍ਤ੍ਵਾ (ਸ੍ਯਾ.)], ਵਿਨੇਤ੍ਵਾ ਪਞ੍ਚਵਗ੍ਗਿਯੇ;

ਤਤੋ ਵਿਨੇਸਿ ਭਗਵਾ, ਗਨ੍ਤ੍ਵਾ ਗਨ੍ਤ੍ਵਾ ਤਹਿਂ ਤਹਿਂ.

੧੮੮. ‘‘ਵੇਨੇਯ੍ਯੇ ਵਿਨਯਨ੍ਤੋ ਸੋ, ਸਙ੍ਗਣ੍ਹਨ੍ਤੋ ਸਦੇਵਕਂ;

ਉਪੇਚ੍ਚ ਮਗਧੇ ਗਿਰਿਂ [ਮਾਗਦਗਿਰਿਂ (ਸੀ.), ਮਙ੍ਗਲਾਗਿਰਿਂ (ਪੀ.)], ਵਿਹਰਿਤ੍ਥ ਤਦਾ ਜਿਨੋ.

੧੮੯. ‘‘ਤਦਾ ਸੁਦ੍ਧੋਦਨੇਨਾਹਂ, ਭੂਮਿਪਾਲੇਨ ਪੇਸਿਤੋ;

ਗਨ੍ਤ੍ਵਾ ਦਿਸ੍ਵਾ ਦਸਬਲਂ, ਪਬ੍ਬਜਿਤ੍ਵਾਰਹਾ ਅਹੁਂ.

੧੯੦. ‘‘ਤਦਾ ਮਹੇਸਿਂ ਯਾਚਿਤ੍ਵਾ, ਪਾਪਯਿਂ ਕਪਿਲਵ੍ਹਯਂ;

ਤਤੋ ਪੁਰਾਹਂ ਗਨ੍ਤ੍ਵਾਨ, ਪਸਾਦੇਸਿਂ ਮਹਾਕੁਲਂ.

੧੯੧. ‘‘ਜਿਨੋ ਤਸ੍ਮਿਂ ਗੁਣੇ ਤੁਟ੍ਠੋ, ਮਂ ਮਹਾਪਰਿਸਾਯ ਸੋ [ਮਮਾਹ ਪੁਰਿਸਾਸਭੋ (ਸ੍ਯਾ. ਪੀ.)];

ਕੁਲਪ੍ਪਸਾਦਕਾਨਗ੍ਗਂ, ਪਞ੍ਞਾਪੇਸਿ ਵਿਨਾਯਕੋ.

੧੯੨. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੧੯੩. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੧੯੪. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਕਾਲ਼ੁਦਾਯਿਥੇਰੋ ਇਮਾ ਗਾਥਾਯੋ

ਅਭਾਸਿਤ੍ਥਾਤਿ.

ਕਾਲ਼ੁਦਾਯਿਤ੍ਥੇਰਸ੍ਸਾਪਦਾਨਂ ਛਟ੍ਠਂ.