੫. ਨਨ੍ਦਕਤ੍ਥੇਰਅਪਦਾਨਂ

੧੪੩. ‘‘ਪਦੁਮੁਤ੍ਤਰੋ ਨਾਮ ਜਿਨੋ, ਸਬ੍ਬਧਮ੍ਮੇਸੁ ਚਕ੍ਖੁਮਾ;

ਇਤੋ ਸਤਸਹਸ੍ਸਮ੍ਹਿ, ਕਪ੍ਪੇ ਉਪ੍ਪਜ੍ਜਿ ਨਾਯਕੋ.

੧੪੪. ‘‘ਹਿਤਾਯ ਸਬ੍ਬਸਤ੍ਤਾਨਂ, ਸੁਖਾਯ ਵਦਤਂ ਵਰੋ;

ਅਤ੍ਥਾਯ ਪੁਰਿਸਾਜਞ੍ਞੋ, ਪਟਿਪਨ੍ਨੋ ਸਦੇਵਕੇ.

੧੪੫. ‘‘ਯਸਗ੍ਗਪਤ੍ਤੋ ਸਿਰਿਮਾ, ਕਿਤ੍ਤਿਵਣ੍ਣਭਤੋ [ਕਿਤ੍ਤਿਵਣ੍ਣ ਭਟੋ (ਸ੍ਯਾ. ਕ.)] ਜਿਨੋ;

ਪੂਜਿਤੋ ਸਬ੍ਬਲੋਕਸ੍ਸ, ਦਿਸਾ ਸਬ੍ਬਾਸੁ ਵਿਸ੍ਸੁਤੋ.

੧੪੬. ‘‘ਉਤ੍ਤਿਣ੍ਣਵਿਚਿਕਿਚ੍ਛੋ ਸੋ, ਵੀਤਿਵਤ੍ਤਕਥਂਕਥੋ;

ਪਰਿਪੁਣ੍ਣਮਨਸਙ੍ਕਪ੍ਪੋ, ਪਤ੍ਤੋ ਸਮ੍ਬੋਧਿਮੁਤ੍ਤਮਂ.

੧੪੭. ‘‘ਅਨੁਪ੍ਪਨ੍ਨਸ੍ਸ ਮਗ੍ਗਸ੍ਸ, ਉਪ੍ਪਾਦੇਤਾ ਨਰੁਤ੍ਤਮੋ;

ਅਨਕ੍ਖਾਤਞ੍ਚ ਅਕ੍ਖਾਸਿ, ਅਸਞ੍ਜਾਤਞ੍ਚ ਸਞ੍ਜਨੀ.

੧੪੮. ‘‘ਮਗ੍ਗਞ੍ਞੂ ਮਗ੍ਗਵਿਦੂ [ਸੋ ਮਗ੍ਗਵਿਦੂ (ਸੀ. ਪੀ.)] ਚ, ਮਗ੍ਗਕ੍ਖਾਯੀ ਨਰਾਸਭੋ;

ਮਗ੍ਗਸ੍ਸ ਕੁਸਲੋ ਸਤ੍ਥਾ, ਸਾਰਥੀਨਂ ਵਰੁਤ੍ਤਮੋ [ਨਰੁਤ੍ਤਮੋ (ਸ੍ਯਾ.)].

੧੪੯. ‘‘ਤਦਾ ਮਹਾਕਾਰੁਣਿਕੋ, ਧਮ੍ਮਂ ਦੇਸੇਸਿ ਨਾਯਕੋ;

ਨਿਮੁਗ੍ਗੇ ਕਾਮਪਙ੍ਕਮ੍ਹਿ [ਮੋਹਪਙ੍ਕਮ੍ਹਿ (ਸੀ. ਸ੍ਯਾ.), ਮੋਹਮਗ੍ਗਮ੍ਹਿ (ਪੀ.)], ਸਮੁਦ੍ਧਰਤਿ ਪਾਣਿਨੇ.

੧੫੦. ‘‘ਭਿਕ੍ਖੁਨੀਨਂ ਓਵਦਨੇ, ਸਾਵਕਂ ਸੇਟ੍ਠਸਮ੍ਮਤਂ;

ਵਣ੍ਣਯਂ ਏਤਦਗ੍ਗਮ੍ਹਿ, ਪਞ੍ਞਪੇਸਿ ਮਹਾਮੁਨਿ.

੧੫੧. ‘‘ਤਂ ਸੁਤ੍ਵਾਹਂ ਪਮੁਦਿਤੋ, ਨਿਮਨ੍ਤੇਤ੍ਵਾ ਤਥਾਗਤਂ;

ਭੋਜਯਿਤ੍ਵਾ ਸਸਙ੍ਘਂ ਤਂ, ਪਤ੍ਥਯਿਂ ਠਾਨਮੁਤ੍ਤਮਂ.

੧੫੨. ‘‘ਤਦਾ ਪਮੁਦਿਤੋ ਨਾਥੋ, ਮਂ ਅਵੋਚ ਮਹਾਇਸਿ;

‘ਸੁਖੀ ਭਵਸ੍ਸੁ ਦੀਘਾਵੁ [ਦੀਘਾਯੁ (ਸੀ. ਸ੍ਯਾ.)], ਲਚ੍ਛਸੇ ਤਂ ਮਨੋਰਥਂ.

੧੫੩. ‘‘‘ਸਤਸਹਸ੍ਸਿਤੋ ਕਪ੍ਪੇ, ਓਕ੍ਕਾਕਕੁਲਸਮ੍ਭਵੋ;

ਗੋਤਮੋ ਨਾਮ ਗੋਤ੍ਤੇਨ, ਸਤ੍ਥਾ ਲੋਕੇ ਭਵਿਸ੍ਸਤਿ.

੧੫੪. ‘‘‘ਤਸ੍ਸ ਧਮ੍ਮੇਸੁ ਦਾਯਾਦੋ, ਓਰਸੋ ਧਮ੍ਮਨਿਮ੍ਮਿਤੋ;

ਨਨ੍ਦਕੋ ਨਾਮ ਨਾਮੇਨ, ਹੇਸ੍ਸਤਿ ਸਤ੍ਥੁ ਸਾਵਕੋ’.

੧੫੫. ‘‘ਤੇਨ ਕਮ੍ਮੇਨ ਸੁਕਤੇਨ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸੂਪਗੋ ਅਹਂ.

੧੫੬. ‘‘ਪਚ੍ਛਿਮੇ ਚ ਭਵੇ ਦਾਨਿ, ਜਾਤੋ ਸੇਟ੍ਠਿਕੁਲੇ ਅਹਂ;

ਸਾਵਤ੍ਥਿਯਂ ਪੁਰੇ ਵਰੇ, ਇਦ੍ਧੇ ਫੀਤੇ ਮਹਦ੍ਧਨੇ.

੧੫੭. ‘‘ਪੁਰਪ੍ਪਵੇਸੇ ਸੁਗਤਂ, ਦਿਸ੍ਵਾ ਵਿਮ੍ਹਿਤਮਾਨਸੋ;

ਜੇਤਾਰਾਮਪਟਿਗ੍ਗਾਹੇ, ਪਬ੍ਬਜਿਂ ਅਨਗਾਰਿਯਂ.

੧੫੮. ‘‘ਨਚਿਰੇਨੇਵ ਕਾਲੇਨ, ਅਰਹਤ੍ਤਮਪਾਪੁਣਿਂ;

ਤਤੋਹਂ ਤਿਣ੍ਣਸਂਸਾਰੋ, ਸਾਸਿਤੋ ਸਬ੍ਬਦਸ੍ਸਿਨਾ.

੧੫੯. ‘‘ਭਿਕ੍ਖੁਨੀਨਂ ਧਮ੍ਮਕਥਂ, ਪਟਿਪੁਚ੍ਛਾਕਰਿਂ ਅਹਂ;

ਸਾਸਿਤਾ ਤਾ ਮਯਾ ਸਬ੍ਬਾ, ਅਭਵਿਂਸੁ ਅਨਾਸਵਾ.

੧੬੦. ‘‘ਸਤਾਨਿ ਪਞ੍ਚਨੂਨਾਨਿ, ਤਦਾ ਤੁਟ੍ਠੋ ਮਹਾਹਿਤੋ;

ਭਿਕ੍ਖੁਨੀਨਂ ਓਵਦਤਂ, ਅਗ੍ਗਟ੍ਠਾਨੇ ਠਪੇਸਿ ਮਂ.

੧੬੧. ‘‘ਸਤਸਹਸ੍ਸੇ ਕਤਂ ਕਮ੍ਮਂ, ਫਲਂ ਦਸ੍ਸੇਸਿ ਮੇ ਇਧ;

ਸੁਮੁਤ੍ਤੋ ਸਰਵੇਗੋਵ, ਕਿਲੇਸੇ ਝਾਪਯਿਂ ਮਮ.

੧੬੨. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੧੬੩. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੧੬੪. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਨਨ੍ਦਕੋ ਥੇਰੋ ਇਮਾ ਗਾਥਾਯੋ

ਅਭਾਸਿਤ੍ਥਾਤਿ.

ਨਨ੍ਦਕਤ੍ਥੇਰਸ੍ਸਾਪਦਾਨਂ ਪਞ੍ਚਮਂ.