੪. ਵਙ੍ਗੀਸਤ੍ਥੇਰਅਪਦਾਨਂ

੯੬. ‘‘ਪਦੁਮੁਤ੍ਤਰੋ ਨਾਮ ਜਿਨੋ, ਸਬ੍ਬਧਮ੍ਮੇਸੁ ਚਕ੍ਖੁਮਾ;

ਇਤੋ ਸਤਸਹਸ੍ਸਮ੍ਹਿ, ਕਪ੍ਪੇ ਉਪ੍ਪਜ੍ਜਿ ਨਾਯਕੋ.

੯੭. ‘‘ਯਥਾਪਿ ਸਾਗਰੇ ਊਮਿ, ਗਗਨੇ ਵਿਯ ਤਾਰਕਾ;

ਏਵਂ ਪਾਵਚਨਂ ਤਸ੍ਸ, ਅਰਹਨ੍ਤੇਹਿ ਚਿਤ੍ਤਿਤਂ.

੯੮. ‘‘ਸਦੇਵਾਸੁਰਨਾਗੇਹਿ, ਮਨੁਜੇਹਿ ਪੁਰਕ੍ਖਤੋ;

ਸਮਣਬ੍ਰਾਹ੍ਮਣਾਕਿਣ੍ਣੇ, ਜਨਮਜ੍ਝੇ ਜਿਨੁਤ੍ਤਮੋ.

੯੯. ‘‘ਪਭਾਹਿ ਅਨੁਰਞ੍ਜਨ੍ਤੋ, ਲੋਕੇ [ਲੋਕਂ (ਸੀ.)] ਲੋਕਨ੍ਤਗੂ ਜਿਨੋ;

ਵਚਨੇਨ ਵਿਬੋਧੇਨ੍ਤੋ, ਵੇਨੇਯ੍ਯਪਦੁਮਾਨਿ ਸੋ.

੧੦੦. ‘‘ਵੇਸਾਰਜ੍ਜੇਹਿ ਸਮ੍ਪਨ੍ਨੋ, ਚਤੂਹਿ ਪੁਰਿਸੁਤ੍ਤਮੋ;

ਪਹੀਨਭਯਸਾਰਜ੍ਜੋ, ਖੇਮਪ੍ਪਤ੍ਤੋ ਵਿਸਾਰਦੋ.

੧੦੧. ‘‘ਆਸਭਂ ਪਵਰਂ ਠਾਨਂ, ਬੁਦ੍ਧਭੂਮਿਞ੍ਚ ਕੇਵਲਂ;

ਪਟਿਜਾਨਾਤਿ ਲੋਕਗ੍ਗੋ, ਨਤ੍ਥਿ ਸਞ੍ਚੋਦਕੋ ਕ੍ਵਚਿ.

੧੦੨. ‘‘ਸੀਹਨਾਦਮਸਮ੍ਭੀਤਂ, ਨਦਤੋ ਤਸ੍ਸ ਤਾਦਿਨੋ;

ਦੇਵੋ ਨਰੋ ਵਾ ਬ੍ਰਹ੍ਮਾ ਵਾ, ਪਟਿਵਤ੍ਤਾ ਨ ਵਿਜ੍ਜਤਿ.

੧੦੩. ‘‘ਦੇਸੇਨ੍ਤੋ ਪਵਰਂ ਧਮ੍ਮਂ, ਸਨ੍ਤਾਰੇਨ੍ਤੋ ਸਦੇਵਕਂ;

ਧਮ੍ਮਚਕ੍ਕਂ ਪਵਤ੍ਤੇਤਿ, ਪਰਿਸਾਸੁ ਵਿਸਾਰਦੋ.

੧੦੪. ‘‘ਪਟਿਭਾਨਵਤਂ ਅਗ੍ਗਂ, ਸਾਵਕਂ ਸਾਧੁਸਮ੍ਮਤਂ;

ਗੁਣਂ ਬਹੁਂ ਪਕਿਤ੍ਤੇਤ੍ਵਾ, ਏਤਦਗ੍ਗੇ ਠਪੇਸਿ ਤਂ.

੧੦੫. ‘‘ਤਦਾਹਂ ਹਂਸਵਤਿਯਂ, ਬ੍ਰਾਹ੍ਮਣੋ ਸਾਧੁਸਮ੍ਮਤੋ;

ਸਬ੍ਬਵੇਦਵਿਦੂ ਜਾਤੋ, ਵਾਗੀਸੋ ਵਾਦਿਸੂਦਨੋ.

੧੦੬. ‘‘ਉਪੇਚ੍ਚ ਤਂ ਮਹਾਵੀਰਂ, ਸੁਤ੍ਵਾਹਂ ਧਮ੍ਮਦੇਸਨਂ;

ਪੀਤਿਵਰਂ ਪਟਿਲਭਿਂ, ਸਾਵਕਸ੍ਸ ਗੁਣੇ ਰਤੋ.

੧੦੭. ‘‘ਨਿਮਨ੍ਤੇਤ੍ਵਾਵ ਸੁਗਤਂ, ਸਸਙ੍ਘਂ ਲੋਕਨਨ੍ਦਨਂ;

ਸਤ੍ਤਾਹਂ ਭੋਜਯਿਤ੍ਵਾਹਂ, ਦੁਸ੍ਸੇਹਚ੍ਛਾਦਯਿਂ ਤਦਾ.

੧੦੮. ‘‘ਨਿਪਚ੍ਚ ਸਿਰਸਾ ਪਾਦੇ, ਕਤੋਕਾਸੋ ਕਤਞ੍ਜਲੀ;

ਏਕਮਨ੍ਤਂ ਠਿਤੋ ਹਟ੍ਠੋ, ਸਨ੍ਥਵਿਂ ਜਿਨਮੁਤ੍ਤਮਂ.

੧੦੯. ‘‘‘ਨਮੋ ਤੇ ਵਾਦਿਮਦ੍ਦਨ [ਵਾਦਿਸਦ੍ਦੁਲ (ਸੀ. ਪੀ.), ਵਾਦਿਸੂਦਨ (ਸ੍ਯਾ.)], ਨਮੋ ਤੇ ਇਸਿਸਤ੍ਤਮ [ਪੁਰਿਸੁਤ੍ਤਮ (ਸੀ. ਪੀ.)];

ਨਮੋ ਤੇ ਸਬ੍ਬਲੋਕਗ੍ਗ, ਨਮੋ ਤੇ ਅਭਯਙ੍ਕਰ.

੧੧੦. ‘‘‘ਨਮੋ ਤੇ ਮਾਰਮਥਨ [ਮਾਰਮਸਨ (ਅਟ੍ਠ.)], ਨਮੋ ਤੇ ਦਿਟ੍ਠਿਸੂਦਨ;

ਨਮੋ ਤੇ ਸਨ੍ਤਿਸੁਖਦ, ਨਮੋ ਤੇ ਸਰਣਙ੍ਕਰ.

੧੧੧. ‘‘‘ਅਨਾਥਾਨਂ ਭਵਂ ਨਾਥੋ, ਭੀਤਾਨਂ ਅਭਯਪ੍ਪਦੋ;

ਵਿਸ੍ਸਾਮਭੂਮਿ [ਵਿਸ੍ਸਾਸਂ ਭੂਮਿ (ਸ੍ਯਾ.), ਵਿਸ੍ਸਾਨਭੂਮਿ (ਪੀ.)] ਸਨ੍ਤਾਨਂ, ਸਰਣਂ ਸਰਣੇਸਿਨਂ’.

੧੧੨. ‘‘ਏਵਮਾਦੀਹਿ ਸਮ੍ਬੁਦ੍ਧਂ, ਸਨ੍ਥਵਿਤ੍ਵਾ ਮਹਾਗੁਣਂ;

ਅਵੋਚਂ ਵਾਦਿਸੂਦਸ੍ਸ [ਵਾਦਿਸੂਰਸ੍ਸ (ਸੀ. ਸ੍ਯਾ. ਪੀ.)], ਗਤਿਂ ਪਪ੍ਪੋਮਿ ਭਿਕ੍ਖੁਨੋ.

੧੧੩. ‘‘ਤਦਾ ਅਵੋਚ ਭਗਵਾ, ਅਨਨ੍ਤਪਟਿਭਾਨਵਾ;

‘ਯੋ ਸੋ ਬੁਦ੍ਧਂ ਅਭੋਜੇਸਿ, ਸਤ੍ਤਾਹਂ ਸਹਸਾਵਕਂ.

੧੧੪. ‘‘‘ਗੁਣਞ੍ਚ ਮੇ ਪਕਿਤ੍ਤੇਸਿ, ਪਸਨ੍ਨੋ ਸੇਹਿ ਪਾਣਿਭਿ;

ਏਸੋ ਪਤ੍ਥਯਤੇ ਠਾਨਂ, ਵਾਦਿਸੂਦਸ੍ਸ ਭਿਕ੍ਖੁਨੋ.

੧੧੫. ‘‘‘ਅਨਾਗਤਮ੍ਹਿ ਅਦ੍ਧਾਨੇ, ਲਚ੍ਛਸੇ ਤਂ ਮਨੋਰਥਂ;

ਦੇਵਮਾਨੁਸਸਮ੍ਪਤ੍ਤਿਂ, ਅਨੁਭੋਤ੍ਵਾ ਅਨਪ੍ਪਕਂ.

੧੧੬. ‘‘‘ਸਤਸਹਸ੍ਸਿਤੋ ਕਪ੍ਪੇ, ਓਕ੍ਕਾਕਕੁਲਸਮ੍ਭਵੋ;

ਗੋਤਮੋ ਨਾਮ ਗੋਤ੍ਤੇਨ, ਸਤ੍ਥਾ ਲੋਕੇ ਭਵਿਸ੍ਸਤਿ.

੧੧੭. ‘‘‘ਤਸ੍ਸ ਧਮ੍ਮੇਸੁ ਦਾਯਾਦੋ, ਓਰਸੋ ਧਮ੍ਮਨਿਮ੍ਮਿਤੋ;

ਵਙ੍ਗੀਸੋ ਨਾਮ ਨਾਮੇਨ, ਹੇਸ੍ਸਤਿ ਸਤ੍ਥੁ ਸਾਵਕੋ’.

੧੧੮. ‘‘ਤਂ ਸੁਤ੍ਵਾ ਮੁਦਿਤੋ ਹੁਤ੍ਵਾ, ਯਾਵਜੀਵਂ ਤਦਾ ਜਿਨਂ;

ਪਚ੍ਚਯੇਹਿ ਉਪਟ੍ਠਾਸਿਂ, ਮੇਤ੍ਤਚਿਤ੍ਤੋ ਤਥਾਗਤਂ.

੧੧੯. ‘‘ਤੇਨ ਕਮ੍ਮੇਨ ਸੁਕਤੇਨ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ, ਤੁਸਿਤਂ [ਤਾਵਤਿਂਸਂ (ਸ੍ਯਾ.)] ਅਗਮਾਸਹਂ.

੧੨੦. ‘‘ਪਚ੍ਛਿਮੇ ਚ ਭਵੇ ਦਾਨਿ, ਜਾਤੋ ਵਿਪ੍ਪਕੁਲੇ [ਪਰਿਬ੍ਬਾਜਕੁਲੇ (ਸੀ. ਸ੍ਯਾ. ਪੀ.)] ਅਹਂ;

ਪਚ੍ਚਾਜਾਤੋ [ਸਮ੍ਪਤ੍ਤੋ ਚ (ਕ.)] ਯਦਾ ਆਸਿਂ, ਜਾਤਿਯਾ ਸਤ੍ਤਵਸ੍ਸਿਕੋ.

੧੨੧. ‘‘ਸਬ੍ਬਵੇਦਵਿਦੂ ਜਾਤੋ, ਵਾਦਸਤ੍ਥਵਿਸਾਰਦੋ;

ਵਾਦਿਸ੍ਸਰੋ [ਵਗ੍ਗੁਸ੍ਸਰੋ (ਸ੍ਯਾ. ਪੀ.)] ਚਿਤ੍ਤਕਥੀ, ਪਰਵਾਦਪ੍ਪਮਦ੍ਦਨੋ.

੧੨੨. ‘‘ਵਙ੍ਗੇ ਜਾਤੋਤਿ ਵਙ੍ਗੀਸੋ, ਵਚਨੇ ਇਸ੍ਸਰੋਤਿ ਵਾ;

ਵਙ੍ਗੀਸੋ ਇਤਿ ਮੇ ਨਾਮਂ, ਅਭਵੀ ਲੋਕਸਮ੍ਮਤਂ.

੧੨੩. ‘‘ਯਦਾਹਂ ਵਿਞ੍ਞੁਤਂ ਪਤ੍ਤੋ, ਠਿਤੋ ਪਠਮਯੋਬ੍ਬਨੇ;

ਤਦਾ ਰਾਜਗਹੇ ਰਮ੍ਮੇ, ਸਾਰਿਪੁਤ੍ਤਮਹਦ੍ਦਸਂ [ਮਥਦ੍ਦਸਂ (ਸੀ. ਪੀ.), ਚ ਅਦ੍ਦਸਂ (ਸ੍ਯਾ.)].

ਪਞ੍ਚਵੀਸਤਿਮਂ ਭਾਣਵਾਰਂ.

੧੨੪. ‘‘ਪਿਣ੍ਡਾਯ ਵਿਚਰਨ੍ਤਂ ਤਂ, ਪਤ੍ਤਪਾਣਿਂ ਸੁਸਂਵੁਤਂ;

ਅਲੋਲਕ੍ਖਿਂ ਮਿਤਭਾਣਿਂ, ਯੁਗਮਤ੍ਤਂ ਨਿਦਕ੍ਖਿਤਂ [ਨਿਰਿਕ੍ਖਤਂ (ਸੀ. ਪੀ.), ਉਦਿਕ੍ਖਤਂ (ਸ੍ਯਾ.)].

੧੨੫. ‘‘ਤਂ ਦਿਸ੍ਵਾ ਵਿਮ੍ਹਿਤੋ ਹੁਤ੍ਵਾ, ਅਵੋਚਂ ਮਮਨੁਚ੍ਛਵਂ [ਮਨਨੁਚ੍ਛਵਂ (ਸੀ. ਸ੍ਯਾ.)];

ਕਣਿਕਾਰਂਵ ਨਿਚਿਤਂ [ਕਣਿਕਾਰਪਰਿਚਿਤਂ (ਪੀ.), ਖਣਿਕਂ ਠਾਨਰਚਿਤਂ (ਸੀ.)], ਚਿਤ੍ਤਂ ਗਾਥਾਪਦਂ ਅਹਂ.

੧੨੬. ‘‘ਆਚਿਕ੍ਖਿ ਸੋ ਮੇ ਸਤ੍ਥਾਰਂ, ਸਮ੍ਬੁਦ੍ਧਂ ਲੋਕਨਾਯਕਂ;

ਤਦਾ ਸੋ ਪਣ੍ਡਿਤੋ ਵੀਰੋ, ਉਤ੍ਤਰਿਂ [ਉਤ੍ਤਰਂ (ਸੀ. ਪੀ.)] ਸਮਵੋਚ ਮੇ.

੧੨੭. ‘‘ਵਿਰਾਗਸਂਹਿਤਂ ਵਾਕ੍ਯਂ, ਕਤ੍ਵਾ ਦੁਦ੍ਦਸਮੁਤ੍ਤਮਂ;

ਵਿਚਿਤ੍ਤਪਟਿਭਾਨੇਹਿ, ਤੋਸਿਤੋ ਤੇਨ ਤਾਦਿਨਾ.

੧੨੮. ‘‘ਨਿਪਚ੍ਚ ਸਿਰਸਾ ਪਾਦੇ, ‘ਪਬ੍ਬਾਜੇਹੀ’ਤਿ ਮਂ ਬ੍ਰਵਿ;

ਤਤੋ ਮਂ ਸ ਮਹਾਪਞ੍ਞੋ, ਬੁਦ੍ਧਸੇਟ੍ਠਮੁਪਾਨਯਿ.

੧੨੯. ‘‘ਨਿਪਚ੍ਚ ਸਿਰਸਾ ਪਾਦੇ, ਨਿਸੀਦਿਂ ਸਤ੍ਥੁ ਸਨ੍ਤਿਕੇ;

ਮਮਾਹ ਵਦਤਂ ਸੇਟ੍ਠੋ, ਕਚ੍ਚਿ ਵਙ੍ਗੀਸ ਜਾਨਾਸਿ [ਸਚ੍ਚਂ ਵਙ੍ਗੀਸ ਕਚ੍ਚਿ ਤੇ (ਸ੍ਯਾ.)].

੧੩੦. ‘‘ਕਿਞ੍ਚਿ ਸਿਪ੍ਪਨ੍ਤਿ ਤਸ੍ਸਾਹਂ, ‘ਜਾਨਾਮੀ’ਤਿ ਚ ਅਬ੍ਰਵਿਂ;

ਮਤਸੀਸਂ ਵਨਚ੍ਛੁਦ੍ਧਂ, ਅਪਿ ਬਾਰਸਵਸ੍ਸਿਕਂ;

ਤਵ ਵਿਜ੍ਜਾਵਿਸੇਸੇਨ, ਸਚੇ ਸਕ੍ਕੋਸਿ ਵਾਚਯ [ਭਾਸਯ (ਸੀ. ਪੀ.)].

੧੩੧. ‘‘ਆਮੋਤਿ ਮੇ ਪਟਿਞ੍ਞਾਤੇ, ਤੀਣਿ ਸੀਸਾਨਿ ਦਸ੍ਸਯਿ;

ਨਿਰਯਨਰਦੇਵੇਸੁ, ਉਪਪਨ੍ਨੇ ਅਵਾਚਯਿਂ.

੧੩੨. ‘‘ਤਦਾ ਖੀਣਾਸਵਸ੍ਸੇਵ [ਪਚ੍ਚੇਕਬੁਦ੍ਧਸ੍ਸ (ਸੀ. ਪੀ.)], ਸੀਸਂ ਦਸ੍ਸੇਸਿ ਨਾਯਕੋ;

ਤਤੋਹਂ ਵਿਹਤਾਰਬ੍ਭੋ, ਪਬ੍ਬਜ੍ਜਂ ਸਮਯਾਚਿਸਂ.

੧੩੩. ‘‘ਪਬ੍ਬਜਿਤ੍ਵਾਨ ਸੁਗਤਂ, ਸਨ੍ਥਵਾਮਿ ਤਹਿਂ ਤਹਿਂ;

ਤਤੋ ਮਂ ਕਬ੍ਬਵਿਤ੍ਤੋਸਿ [ਕਵਿਚਿਤ੍ਤੋਤਿ (ਸ੍ਯਾ. ਪੀ.)], ਉਜ੍ਝਾਯਨ੍ਤਿਹ ਭਿਕ੍ਖਵੋ.

੧੩੪. ‘‘ਤਤੋ ਵੀਮਂਸਨਤ੍ਥਂ ਮੇ, ਆਹ ਬੁਦ੍ਧੋ ਵਿਨਾਯਕੋ;

ਤਕ੍ਕਿਕਾ ਪਨਿਮਾ ਗਾਥਾ, ਠਾਨਸੋ ਪਟਿਭਨ੍ਤਿ ਤਂ.

੧੩੫. ‘‘ਨ ਕਬ੍ਬਵਿਤ੍ਤੋਹਂ ਵੀਰ, ਠਾਨਸੋ ਪਟਿਭਨ੍ਤਿ ਮਂ;

ਤੇਨ ਹਿ ਦਾਨਿ ਵਙ੍ਗੀਸ, ਠਾਨਸੋ ਸਨ੍ਥਵਾਹਿ ਮਂ.

੧੩੬. ‘‘ਤਦਾਹਂ ਸਨ੍ਥਵਿਂ ਵੀਰਂ, ਗਾਥਾਹਿ ਇਸਿਸਤ੍ਤਮਂ;

ਠਾਨਸੋ ਮੇ ਤਦਾ ਤੁਟ੍ਠੋ, ਜਿਨੋ ਅਗ੍ਗੇ ਠਪੇਸਿ ਮਂ.

੧੩੭. ‘‘ਪਟਿਭਾਨੇਨ ਚਿਤ੍ਤੇਨ, ਅਞ੍ਞੇਸਮਤਿਮਞ੍ਞਹਂ;

ਪੇਸਲੇ ਤੇਨ ਸਂਵਿਗ੍ਗੋ, ਅਰਹਤ੍ਤਮਪਾਪੁਣਿਂ.

੧੩੮. ‘‘‘ਪਟਿਭਾਨਵਤਂ ਅਗ੍ਗੋ, ਅਞ੍ਞੋ ਕੋਚਿ ਨ ਵਿਜ੍ਜਤਿ;

ਯਥਾਯਂ ਭਿਕ੍ਖੁ ਵਙ੍ਗੀਸੋ, ਏਵਂ ਧਾਰੇਥ ਭਿਕ੍ਖਵੋ’.

੧੩੯. ‘‘ਸਤਸਹਸ੍ਸੇ ਕਤਂ ਕਮ੍ਮਂ, ਫਲਂ ਦਸ੍ਸੇਸਿ ਮੇ ਇਧ;

ਸੁਮੁਤ੍ਤੋ ਸਰਵੇਗੋਵ ਕਿਲੇਸੇ ਝਾਪਯਿਂ ਮਮ.

੧੪੦. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੧੪੧. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੧੪੨. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਵਙ੍ਗੀਸੋ ਥੇਰੋ ਇਮਾ ਗਾਥਾਯੋ

ਅਭਾਸਿਤ੍ਥਾਤਿ.

ਵਙ੍ਗੀਸਤ੍ਥੇਰਸ੍ਸਾਪਦਾਨਂ ਚਤੁਤ੍ਥਂ.