੩. ਸੀਵਲਿਤ੍ਥੇਰਅਪਦਾਨਂ

੫੪. ‘‘ਪਦੁਮੁਤ੍ਤਰੋ ਨਾਮ ਜਿਨੋ, ਸਬ੍ਬਧਮ੍ਮੇਸੁ ਚਕ੍ਖੁਮਾ;

ਇਤੋ ਸਤਸਹਸ੍ਸਮ੍ਹਿ, ਕਪ੍ਪੇ ਉਪ੍ਪਜ੍ਜਿ ਨਾਯਕੋ.

੫੫. ‘‘ਸੀਲਂ ਤਸ੍ਸ ਅਸਙ੍ਖੇਯ੍ਯਂ, ਸਮਾਧਿ ਵਜਿਰੂਪਮੋ;

ਅਸਙ੍ਖੇਯ੍ਯਂ ਞਾਣਵਰਂ, ਵਿਮੁਤ੍ਤਿ ਚ ਅਨੋਪਮਾ.

੫੬. ‘‘ਮਨੁਜਾਮਰਨਾਗਾਨਂ, ਬ੍ਰਹ੍ਮਾਨਞ੍ਚ ਸਮਾਗਮੇ;

ਸਮਣਬ੍ਰਾਹ੍ਮਣਾਕਿਣ੍ਣੇ, ਧਮ੍ਮਂ ਦੇਸੇਸਿ ਨਾਯਕੋ.

੫੭. ‘‘ਸਸਾਵਕਂ ਮਹਾਲਾਭਿਂ, ਪੁਞ੍ਞਵਨ੍ਤਂ ਜੁਤਿਨ੍ਧਰਂ;

ਠਪੇਸਿ ਏਤਦਗ੍ਗਮ੍ਹਿ, ਪਰਿਸਾਸੁ ਵਿਸਾਰਦੋ.

੫੮. ‘‘ਤਦਾਹਂ ਖਤ੍ਤਿਯੋ ਆਸਿਂ, ਨਗਰੇ ਹਂਸਸਵ੍ਹਯੇ;

ਸੁਤ੍ਵਾ ਜਿਨਸ੍ਸ ਤਂ ਵਾਕ੍ਯਂ, ਸਾਵਕਸ੍ਸ ਗੁਣਂ ਬਹੁਂ.

੫੯. ‘‘ਨਿਮਨ੍ਤਯਿਤ੍ਵਾ ਸਤ੍ਤਾਹਂ, ਭੋਜਯਿਤ੍ਵਾ ਸਸਾਵਕਂ;

ਮਹਾਦਾਨਂ ਦਦਿਤ੍ਵਾਨ, ਤਂ ਠਾਨਮਭਿਪਤ੍ਥਯਿਂ.

੬੦. ‘‘ਤਦਾ ਮਂ ਵਿਨਤਂ ਪਾਦੇ, ਦਿਸ੍ਵਾਨ ਪੁਰਿਸਾਸਭੋ;

ਸਰੇਨ ਮਹਤਾ ਵੀਰੋ [ਸੁਸ੍ਸਰੇਨ ਮਹਾਵੀਰੋ (ਸੀ. ਪੀ.)], ਇਦਂ ਵਚਨਮਬ੍ਰਵਿ.

੬੧. ‘‘‘ਤਤੋ ਜਿਨਸ੍ਸ ਵਚਨਂ, ਸੋਤੁਕਾਮਾ ਮਹਾਜਨਾ;

ਦੇਵਦਾਨਵਗਨ੍ਧਬ੍ਬਾ, ਬ੍ਰਹ੍ਮਾਨੋ ਚ ਮਹਿਦ੍ਧਿਕਾ’.

੬੨. ‘‘ਸਮਣਬ੍ਰਾਹ੍ਮਣਾ ਚੇਵ, ਨਮਸ੍ਸਿਂਸੁ ਕਤਞ੍ਜਲੀ;

‘ਨਮੋ ਤੇ ਪੁਰਿਸਾਜਞ੍ਞ, ਨਮੋ ਤੇ ਪੁਰਿਸੁਤ੍ਤਮ.

੬੩. ‘‘‘ਖਤ੍ਤਿਯੇਨ ਮਹਾਦਾਨਂ, ਦਿਨ੍ਨਂ ਸਤ੍ਤਾਹਿਕਮ੍ਪਿ ਵੋ [ਸਤ੍ਤਹਿਕਂ ਮਿ ਵੋ (ਸੀ.), ਸਤ੍ਤਹਿਕਾਧਿਕਂ (ਸ੍ਯਾ.), ਸਤ੍ਤਹਿਕਂ ਵਿਭੋ (ਪੀ.)];

ਸੋਤੁਕਾਮਾ ਫਲਂ ਤਸ੍ਸ, ਬ੍ਯਾਕਰੋਹਿ ਮਹਾਮੁਨੇ’.

੬੪. ‘‘ਤਤੋ ਅਵੋਚ ਭਗਵਾ, ‘ਸੁਣਾਥ ਮਮ ਭਾਸਿਤਂ;

ਅਪ੍ਪਮੇਯ੍ਯਮ੍ਹਿ ਬੁਦ੍ਧਮ੍ਹਿ, ਸਸਙ੍ਘਮ੍ਹਿ ਪਤਿਟ੍ਠਿਤਾ [ਸਂਘਮ੍ਹਿ ਸੁਪ੍ਪਤਿਟ੍ਠਿਤਾ (ਸੀ. ਪੀ.)].

੬੫. ‘‘‘ਦਕ੍ਖਿਣਾ ਤਾਯ [ਦਕ੍ਖਿਣਾਦਾਯ (ਸ੍ਯਾ. ਪੀ.)] ਕੋ ਵਤ੍ਤਾ, ਅਪ੍ਪਮੇਯ੍ਯਫਲਾ ਹਿ ਸਾ;

ਅਪਿ ਚੇ ਸ ਮਹਾਭੋਗੋ, ਠਾਨਂ ਪਤ੍ਥੇਤਿ ਉਤ੍ਤਮਂ.

੬੬. ‘‘‘ਲਾਭੀ ਵਿਪੁਲਲਾਭਾਨਂ, ਯਥਾ ਭਿਕ੍ਖੁ ਸੁਦਸ੍ਸਨੋ;

ਤਥਾਹਮ੍ਪਿ ਭਵੇਯ੍ਯਨ੍ਤਿ, ਲਚ੍ਛਸੇ ਤਂ ਅਨਾਗਤੇ.

੬੭. ‘‘‘ਸਤਸਹਸ੍ਸਿਤੋ ਕਪ੍ਪੇ, ਓਕ੍ਕਾਕਕੁਲਸਮ੍ਭਵੋ;

ਗੋਤਮੋ ਨਾਮ ਗੋਤ੍ਤੇਨ, ਸਤ੍ਥਾ ਲੋਕੇ ਭਵਿਸ੍ਸਤਿ.

੬੮. ‘‘‘ਤਸ੍ਸ ਧਮ੍ਮੇਸੁ ਦਾਯਾਦੋ, ਓਰਸੋ ਧਮ੍ਮਨਿਮ੍ਮਿਤੋ;

ਸੀਵਲਿ ਨਾਮ ਨਾਮੇਨ, ਹੇਸ੍ਸਤਿ ਸਤ੍ਥੁ ਸਾਵਕੋ’.

੬੯. ‘‘ਤੇਨ ਕਮ੍ਮੇਨ ਸੁਕਤੇਨ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸੂਪਗੋ ਅਹਂ.

੭੦. ‘‘ਏਕਨਵੁਤਿਤੋ ਕਪ੍ਪੇ, ਵਿਪਸ੍ਸੀ ਲੋਕਨਾਯਕੋ;

ਉਪ੍ਪਜ੍ਜਿ ਚਾਰੁਦਸ੍ਸਨੋ, ਸਬ੍ਬਧਮ੍ਮਵਿਪਸ੍ਸਕੋ.

੭੧. ‘‘ਤਦਾਹਂ ਬਨ੍ਧੁਮਤਿਯਂ, ਕੁਲਸ੍ਸਞ੍ਞਤਰਸ੍ਸ ਚ;

ਦਯਿਤੋ ਪਸ੍ਸਿਤੋ ਚੇਵ, ਆਸਿਂ ਕਮ੍ਮਨ੍ਤਵਾਵਟੋ [ਕਮ੍ਮਨ੍ਤਬ੍ਯਾਵਟੋ (ਸੀ. ਸ੍ਯਾ. ਕ.)].

੭੨. ‘‘ਤਦਾ ਅਞ੍ਞਤਰੋ ਪੂਗੋ, ਵਿਪਸ੍ਸਿਸ੍ਸ ਮਹੇਸਿਨੋ;

ਪਰਿਵੇਸਂ ਅਕਾਰਯਿ, ਮਹਨ੍ਤਮਤਿਵਿਸ੍ਸੁਤਂ.

੭੩. ‘‘ਨਿਟ੍ਠਿਤੇ ਚ ਮਹਾਦਾਨੇ, ਦਦੁਂ ਖਜ੍ਜਕਸਞ੍ਹਿਤਂ;

ਨਵਂ ਦਧਿਂ ਮਧੁਞ੍ਚੇਵ, ਵਿਚਿਨਂ ਨੇਵ ਅਦ੍ਦਸੁਂ.

੭੪. ‘‘ਤਦਾਹਂ ਤਂ ਗਹੇਤ੍ਵਾਨ, ਨਵਂ ਦਧਿਂ ਮਧੁਮ੍ਪਿ ਚ;

ਕਮ੍ਮਸ੍ਸਾਮਿਘਰਂ ਗਚ੍ਛਿਂ, ਤਮੇਸਨ੍ਤਾ ਮਮਦ੍ਦਸੁਂ.

੭੫. ‘‘ਸਹਸ੍ਸਮਪਿ ਦਤ੍ਵਾਨ, ਨਾਲਭਿਂਸੁ ਚ ਤਂ ਦ੍ਵਯਂ;

ਤਤੋਹਂ ਏਵਂ ਚਿਨ੍ਤੇਸਿਂ, ‘ਨੇਤਂ ਹੇਸ੍ਸਤਿ ਓਰਕਂ.

੭੬. ‘‘‘ਯਥਾ ਇਮੇ ਜਨਾ ਸਬ੍ਬੇ, ਸਕ੍ਕਰੋਨ੍ਤਿ ਤਥਾਗਤਂ;

ਅਹਮ੍ਪਿ ਕਾਰਂ ਕਸ੍ਸਾਮਿ, ਸਸਙ੍ਘੇ ਲੋਕਨਾਯਕੇ’.

੭੭. ‘‘ਤਦਾਹਮੇਵਂ ਚਿਨ੍ਤੇਤ੍ਵਾ, ਦਧਿਂ ਮਧੁਞ੍ਚ ਏਕਤੋ;

ਮਦ੍ਦਿਤ੍ਵਾ ਲੋਕਨਾਥਸ੍ਸ, ਸਸਙ੍ਘਸ੍ਸ ਅਦਾਸਹਂ.

੭੮. ‘‘ਤੇਨ ਕਮ੍ਮੇਨ ਸੁਕਤੇਨ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸਮਗਚ੍ਛਹਂ.

੭੯. ‘‘ਪੁਨਾਹਂ ਬਾਰਾਣਸਿਯਂ, ਰਾਜਾ ਹੁਤ੍ਵਾ ਮਹਾਯਸੋ;

ਸਤ੍ਤੁਕਸ੍ਸ ਤਦਾ ਦੁਟ੍ਠੋ, ਦ੍ਵਾਰਰੋਧਮਕਾਰਯਿਂ.

੮੦. ‘‘ਤਦਾ ਤਪਸ੍ਸਿਨੋ ਰੁਦ੍ਧਾ, ਏਕਾਹਂ ਰਕ੍ਖਿਤਾ ਅਹੁਂ;

ਤਤੋ ਤਸ੍ਸ ਵਿਪਾਕੇਨ, ਪਾਪਤਿਂ [ਪਾਪਿਟ੍ਠਂ (ਸ੍ਯਾ.) ਪਾਪਤ੍ਤਂ (ਕ.)] ਨਿਰਯਂ ਭੁਸਂ.

੮੧. ‘‘ਪਚ੍ਛਿਮੇ ਚ ਭਵੇ ਦਾਨਿ, ਜਾਤੋਹਂ ਕੋਲਿਯੇ ਪੁਰੇ;

ਸੁਪ੍ਪਵਾਸਾ ਚ ਮੇ ਮਾਤਾ, ਮਹਾਲਿ ਲਿਚ੍ਛਵੀ ਪਿਤਾ.

੮੨. ‘‘ਖਤ੍ਤਿਯੇ ਪੁਞ੍ਞਕਮ੍ਮੇਨ, ਦ੍ਵਾਰਰੋਧਸ੍ਸ ਵਾਹਸਾ;

ਸਤ੍ਤ ਵਸ੍ਸਾਨਿ ਨਿਵਸਿਂ, ਮਾਤੁਕੁਚ੍ਛਿਮ੍ਹਿ ਦੁਕ੍ਖਿਤੋ.

੮੩. ‘‘ਸਤ੍ਤਾਹਂ ਦ੍ਵਾਰਮੂਲ਼੍ਹੋਹਂ, ਮਹਾਦੁਕ੍ਖਸਮਪ੍ਪਿਤੋ;

ਮਾਤਾ ਮੇ ਛਨ੍ਦਦਾਨੇਨ, ਏਵਂ ਆਸਿ ਸੁਦੁਕ੍ਖਿਤਾ.

੮੪. ‘‘ਸੁਵਤ੍ਥਿਤੋਹਂ ਨਿਕ੍ਖਨ੍ਤੋ, ਬੁਦ੍ਧੇਨ ਅਨੁਕਮ੍ਪਿਤੋ;

ਨਿਕ੍ਖਨ੍ਤਦਿਵਸੇਯੇਵ, ਪਬ੍ਬਜਿਂ ਅਨਗਾਰਿਯਂ.

੮੫. ‘‘ਉਪਜ੍ਝਾ ਸਾਰਿਪੁਤ੍ਤੋ ਮੇ, ਮੋਗ੍ਗਲ੍ਲਾਨੋ ਮਹਿਦ੍ਧਿਕੋ;

ਕੇਸੇ ਓਰੋਪਯਨ੍ਤੋ ਮੇ, ਅਨੁਸਾਸਿ ਮਹਾਮਤਿ.

੮੬. ‘‘ਕੇਸੇਸੁ ਛਿਜ੍ਜਮਾਨੇਸੁ, ਅਰਹਤ੍ਤਮਪਾਪੁਣਿਂ;

ਦੇਵਾ ਨਾਗਾ ਮਨੁਸ੍ਸਾ ਚ, ਪਚ੍ਚਯੇ ਉਪਨੇਨ੍ਤਿ ਮੇ.

੮੭. ‘‘ਪਦੁਮੁਤ੍ਤਰਨਾਥਞ੍ਚ, ਵਿਪਸ੍ਸਿਞ੍ਚ ਵਿਨਾਯਕਂ;

ਯਂ ਪੂਜਯਿਂ ਪਮੁਦਿਤੋ, ਪਚ੍ਚਯੇਹਿ ਵਿਸੇਸਤੋ.

੮੮. ‘‘ਤਤੋ ਤੇਸਂ ਵਿਸੇਸੇਨ, ਕਮ੍ਮਾਨਂ ਵਿਪੁਲੁਤ੍ਤਮਂ;

ਲਾਭਂ ਲਭਾਮਿ ਸਬ੍ਬਤ੍ਥ, ਵਨੇ ਗਾਮੇ ਜਲੇ ਥਲੇ.

੮੯. ‘‘ਰੇਵਤਂ ਦਸ੍ਸਨਤ੍ਥਾਯ, ਯਦਾ ਯਾਤਿ ਵਿਨਾਯਕੋ;

ਤਿਂਸਭਿਕ੍ਖੁਸਹਸ੍ਸੇਹਿ, ਸਹ ਲੋਕਗ੍ਗਨਾਯਕੋ.

੯੦. ‘‘ਤਦਾ ਦੇਵੋਪਣੀਤੇਹਿ, ਮਮਤ੍ਥਾਯ ਮਹਾਮਤਿ;

ਪਚ੍ਚਯੇਹਿ ਮਹਾਵੀਰੋ, ਸਸਙ੍ਘੋ ਲੋਕਨਾਯਕੋ.

੯੧. ‘‘ਉਪਟ੍ਠਿਤੋ ਮਯਾ ਬੁਦ੍ਧੋ, ਗਨ੍ਤ੍ਵਾ ਰੇਵਤਮਦ੍ਦਸ;

ਤਤੋ ਜੇਤਵਨਂ ਗਨ੍ਤ੍ਵਾ, ਏਤਦਗ੍ਗੇ ਠਪੇਸਿ ਮਂ.

੯੨. ‘‘‘ਲਾਭੀਨਂ ਸੀਵਲਿ ਅਗ੍ਗੋ, ਮਮ ਸਿਸ੍ਸੇਸੁ ਭਿਕ੍ਖਵੋ’;

ਸਬ੍ਬਲੋਕਹਿਤੋ ਸਤ੍ਥਾ, ਕਿਤ੍ਤਯੀ ਪਰਿਸਾਸੁ ਮਂ.

੯੩. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੯੪. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੯੫. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਸੀਵਲਿਥੇਰੋ ਇਮਾ ਗਾਥਾਯੋ

ਅਭਾਸਿਤ੍ਥਾਤਿ.

ਸੀਵਲਿਤ੍ਥੇਰਸ੍ਸਾਪਦਾਨਂ ਤਤਿਯਂ.