੮. ਬੋਧਿਸਮ੍ਮਜ੍ਜਕਤ੍ਥੇਰਅਪਦਾਨਂ

੪੮. ‘‘ਅਹਂ ਪੁਰੇ ਬੋਧਿਪਤ੍ਤਂ, ਉਜ੍ਝਿਤਂ ਚੇਤਿਯਙ੍ਗਣੇ;

ਤਂ ਗਹੇਤ੍ਵਾਨ ਛਡ੍ਡੇਸਿਂ, ਅਲਭਿਂ ਵੀਸਤੀਗੁਣੇ.

੪੯. ‘‘ਤਸ੍ਸ ਕਮ੍ਮਸ੍ਸ ਤੇਜੇਨ, ਸਂਸਰਨ੍ਤੋ ਭਵਾਭਵੇ;

ਦੁਵੇ ਭਵੇ ਸਂਸਰਾਮਿ, ਦੇਵਤ੍ਤੇ ਚਾਪਿ ਮਾਨੁਸੇ.

੫੦. ‘‘ਦੇਵਲੋਕਾ ਚਵਿਤ੍ਵਾਨ, ਆਗਨ੍ਤ੍ਵਾ ਮਾਨੁਸਂ ਭਵਂ;

ਦੁਵੇ ਕੁਲੇ ਪਜਾਯਾਮਿ, ਖਤ੍ਤਿਯੇ ਚਾਪਿ ਬ੍ਰਾਹ੍ਮਣੇ.

੫੧. ‘‘ਅਙ੍ਗਪਚ੍ਚਙ੍ਗਸਮ੍ਪਨ੍ਨੋ, ਆਰੋਹਪਰਿਣਾਹਵਾ;

ਅਭਿਰੂਪੋ ਸੁਚਿ ਹੋਮਿ, ਸਮ੍ਪੁਣ੍ਣਙ੍ਗੋ ਅਨੂਨਕੋ.

੫੨. ‘‘ਦੇਵਲੋਕੇ ਮਨੁਸ੍ਸੇ ਵਾ, ਜਾਤੋ ਵਾ ਯਤ੍ਥ ਕਤ੍ਥਚਿ;

ਭਵੇ ਸੁਵਣ੍ਣਵਣ੍ਣੋ ਚ, ਉਤ੍ਤਤ੍ਤਕਨਕੂਪਮੋ.

੫੩. ‘‘ਮੁਦੁਕਾ ਮਦ੍ਦਵਾ ਸ੍ਨਿਦ੍ਧਾ [ਮੁਦੁ ਮਦ੍ਦਵਾ ਸਿਨਿਦ੍ਧਾ (ਸ੍ਯਾ.)], ਸੁਖੁਮਾ ਸੁਕੁਮਾਰਿਕਾ;

ਛਵਿ ਮੇ ਸਬ੍ਬਦਾ ਹੋਤਿ, ਬੋਧਿਪਤ੍ਤੇ ਸੁਛਡ੍ਡਿਤੇ [ਸੁਛਡ੍ਡਿਨੇ (ਸੀ.)].

੫੪. ‘‘ਯਤੋ ਕੁਤੋਚਿ ਗਤੀਸੁ, ਸਰੀਰੇ ਸਮੁਦਾਗਤੇ;

ਨ ਲਿਮ੍ਪਤਿ ਰਜੋਜਲ੍ਲਂ, ਵਿਪਾਕੋ ਪਤ੍ਤਛਡ੍ਡਿਤੇ.

੫੫. ‘‘ਉਣ੍ਹੇ ਵਾਤਾਤਪੇ ਤਸ੍ਸ, ਅਗ੍ਗਿਤਾਪੇਨ ਵਾ ਪਨ;

ਗਤ੍ਤੇ ਸੇਦਾ ਨ ਮੁਚ੍ਚਨ੍ਤਿ, ਵਿਪਾਕੋ ਪਤ੍ਤਛਡ੍ਡਿਤੇ.

੫੬. ‘‘ਕੁਟ੍ਠਂ ਗਣ੍ਡੋ ਕਿਲਾਸੋ ਚ, ਤਿਲਕਾ ਪਿਲ਼ਕਾ ਤਥਾ;

ਨ ਹੋਨ੍ਤਿ ਕਾਯੇ ਦਦ੍ਦੁ ਚ, ਵਿਪਾਕੋ ਪਤ੍ਤਛਡ੍ਡਿਤੇ.

੫੭. ‘‘ਅਪਰਮ੍ਪਿ ਗੁਣਂ ਤਸ੍ਸ, ਨਿਬ੍ਬਤ੍ਤਤਿ ਭਵਾਭਵੇ;

ਰੋਗਾ ਨ ਹੋਨ੍ਤਿ ਕਾਯਸ੍ਮਿਂ, ਵਿਪਾਕੋ ਪਤ੍ਤਛਡ੍ਡਿਤੇ.

੫੮. ‘‘ਅਪਰਮ੍ਪਿ ਗੁਣਂ ਤਸ੍ਸ, ਨਿਬ੍ਬਤ੍ਤਤਿ ਭਵਾਭਵੇ;

ਨ ਹੋਤਿ ਚਿਤ੍ਤਜਾ ਪੀਲ਼ਾ, ਵਿਪਾਕੋ ਪਤ੍ਤਛਡ੍ਡਿਤੇ.

੫੯. ‘‘ਅਪਰਮ੍ਪਿ ਗੁਣਂ ਤਸ੍ਸ, ਨਿਬ੍ਬਤ੍ਤਤਿ ਭਵਾਭਵੇ;

ਅਮਿਤ੍ਤਾ ਨ ਭਵਨ੍ਤਸ੍ਸ, ਵਿਪਾਕੋ ਪਤ੍ਤਛਡ੍ਡਿਤੇ.

੬੦. ‘‘ਅਪਰਮ੍ਪਿ ਗੁਣਂ ਤਸ੍ਸ, ਨਿਬ੍ਬਤ੍ਤਤਿ ਭਵਾਭਵੇ;

ਅਨੂਨਭੋਗੋ ਭਵਤਿ, ਵਿਪਾਕੋ ਪਤ੍ਤਛਡ੍ਡਿਤੇ.

੬੧. ‘‘ਅਪਰਮ੍ਪਿ ਗੁਣਂ ਤਸ੍ਸ, ਨਿਬ੍ਬਤ੍ਤਤਿ ਭਵਾਭਵੇ;

ਅਗ੍ਗਿਰਾਜੂਹਿ ਚੋਰੇਹਿ, ਨ ਹੋਤਿ ਉਦਕੇ ਭਯਂ.

੬੨. ‘‘ਅਪਰਮ੍ਪਿ ਗੁਣਂ ਤਸ੍ਸ, ਨਿਬ੍ਬਤ੍ਤਤਿ ਭਵਾਭਵੇ;

ਦਾਸਿਦਾਸਾ ਅਨੁਚਰਾ, ਹੋਨ੍ਤਿ ਚਿਤ੍ਤਾਨੁਵਤ੍ਤਕਾ.

੬੩. ‘‘ਯਮ੍ਹਿ ਆਯੁਪ੍ਪਮਾਣਮ੍ਹਿ, ਜਾਯਤੇ ਮਾਨੁਸੇ ਭਵੇ;

ਤਤੋ ਨ ਹਾਯਤੇ ਆਯੁ, ਤਿਟ੍ਠਤੇ ਯਾਵਤਾਯੁਕਂ.

੬੪. ‘‘ਅਬ੍ਭਨ੍ਤਰਾ ਚ ਬਾਹਿਰਾ [ਬਹਿਚਰਾ (ਸੀ. ਪੀ. ਕ.)], ਨੇਗਮਾ ਚ ਸਰਟ੍ਠਕਾ;

ਨੁਯੁਤ੍ਤਾ ਹੋਨ੍ਤਿ ਸਬ੍ਬੇਪਿ, ਵੁਦ੍ਧਿਕਾਮਾ ਸੁਖਿਚ੍ਛਕਾ.

੬੫. ‘‘ਭੋਗਵਾ ਯਸਵਾ ਹੋਮਿ, ਸਿਰਿਮਾ ਞਾਤਿਪਕ੍ਖਵਾ;

ਅਪੇਤਭਯਸਨ੍ਤਾਸੋ, ਭਵੇਹਂ ਸਬ੍ਬਤੋ ਭਵੇ.

੬੬. ‘‘ਦੇਵਾ ਮਨੁਸ੍ਸਾ ਅਸੁਰਾ, ਗਨ੍ਧਬ੍ਬਾ ਯਕ੍ਖਰਕ੍ਖਸਾ;

ਸਬ੍ਬੇ ਤੇ ਪਰਿਰਕ੍ਖਨ੍ਤਿ, ਭਵੇ ਸਂਸਰਤੋ ਸਦਾ.

੬੭. ‘‘ਦੇਵਲੋਕੇ ਮਨੁਸ੍ਸੇ ਚ, ਅਨੁਭੋਤ੍ਵਾ ਉਭੋ ਯਸੇ;

ਅਵਸਾਨੇ ਚ ਨਿਬ੍ਬਾਨਂ, ਸਿਵਂ ਪਤ੍ਤੋ ਅਨੁਤ੍ਤਰਂ.

੬੮. ‘‘ਸਮ੍ਬੁਦ੍ਧਮੁਦ੍ਦਿਸਿਤ੍ਵਾਨ, ਬੋਧਿਂ ਵਾ ਤਸ੍ਸ ਸਤ੍ਥੁਨੋ;

ਯੋ ਪੁਞ੍ਞਂ ਪਸਵੇ ਪੋਸੋ, ਤਸ੍ਸ ਕਿਂ ਨਾਮ ਦੁਲ੍ਲਭਂ.

੬੯. ‘‘ਮਗ੍ਗੇ ਫਲੇ ਆਗਮੇ ਚ, ਝਾਨਾਭਿਞ੍ਞਾਗੁਣੇਸੁ ਚ;

ਅਞ੍ਞੇਸਂ ਅਧਿਕੋ ਹੁਤ੍ਵਾ, ਨਿਬ੍ਬਾਯਾਮਿ ਅਨਾਸਵੋ.

੭੦. ‘‘ਪੁਰੇਹਂ ਬੋਧਿਯਾ ਪਤ੍ਤਂ, ਛਡ੍ਡੇਤ੍ਵਾ ਹਟ੍ਠਮਾਨਸੋ;

ਇਮੇਹਿ ਵੀਸਤਙ੍ਗੇਹਿ, ਸਮਙ੍ਗੀ ਹੋਮਿ ਸਬ੍ਬਦਾ.

੭੧. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੭੨. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੭੩. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਬੋਧਿਸਮ੍ਮਜ੍ਜਕੋ ਥੇਰੋ ਇਮਾ ਗਾਥਾਯੋ

ਅਭਾਸਿਤ੍ਥਾਤਿ.

ਬੋਧਿਸਮ੍ਮਜ੍ਜਕਤ੍ਥੇਰਸ੍ਸਾਪਦਾਨਂ ਅਟ੍ਠਮਂ.