੮. ਪੁਲਿਨਥੂਪਿਯਤ੍ਥੇਰਅਪਦਾਨਂ

੫੭. ‘‘ਹਿਮਵਨ੍ਤਸ੍ਸਾਵਿਦੂਰੇ, ਯਮਕੋ ਨਾਮ ਪਬ੍ਬਤੋ;

ਅਸ੍ਸਮੋ ਸੁਕਤੋ ਮਯ੍ਹਂ, ਪਣ੍ਣਸਾਲਾ ਸੁਮਾਪਿਤਾ.

੫੮. ‘‘ਨਾਰਦੋ ਨਾਮ ਨਾਮੇਨ, ਜਟਿਲੋ ਉਗ੍ਗਤਾਪਨੋ;

ਚਤੁਦ੍ਦਸਸਹਸ੍ਸਾਨਿ, ਸਿਸ੍ਸਾ ਪਰਿਚਰਨ੍ਤਿ ਮਂ.

੫੯. ‘‘ਪਟਿਸਲ੍ਲੀਨਕੋ ਸਨ੍ਤੋ, ਏਵਂ ਚਿਨ੍ਤੇਸਹਂ ਤਦਾ;

‘ਸਬ੍ਬੋ ਜਨੋ ਮਂ ਪੂਜੇਤਿ, ਨਾਹਂ ਪੂਜੇਮਿ ਕਿਞ੍ਚਨਂ.

੬੦. ‘‘‘ਨ ਮੇ ਓਵਾਦਕੋ ਅਤ੍ਥਿ, ਵਤ੍ਤਾ ਕੋਚਿ ਨ ਵਿਜ੍ਜਤਿ;

ਅਨਾਚਰਿਯੁਪਜ੍ਝਾਯੋ, ਵਨੇ ਵਾਸਂ ਉਪੇਮਹਂ.

੬੧. ‘‘‘ਉਪਾਸਮਾਨੋ ਯਮਹਂ, ਗਰੁਚਿਤ੍ਤਂ ਉਪਟ੍ਠਹੇ;

ਸੋ ਮੇ ਆਚਰਿਯੋ ਨਤ੍ਥਿ, ਵਨਵਾਸੋ ਨਿਰਤ੍ਥਕੋ.

੬੨. ‘‘‘ਆਯਾਗਂ ਮੇ ਗਵੇਸਿਸ੍ਸਂ, ਗਰੁਂ ਭਾਵਨਿਯਂ ਤਥਾ;

ਸਾਵਸ੍ਸਯੋ ਵਸਿਸ੍ਸਾਮਿ, ਨ ਕੋਚਿ ਗਰਹਿਸ੍ਸਤਿ’.

੬੩. ‘‘ਉਤ੍ਤਾਨਕੂਲਾ ਨਦਿਕਾ, ਸੁਪਤਿਤ੍ਥਾ ਮਨੋਰਮਾ;

ਸਂਸੁਦ੍ਧਪੁਲਿਨਾਕਿਣ੍ਣਾ, ਅਵਿਦੂਰੇ ਮਮਸ੍ਸਮਂ.

੬੪. ‘‘ਨਦਿਂ ਅਮਰਿਕਂ ਨਾਮ, ਉਪਗਨ੍ਤ੍ਵਾਨਹਂ ਤਦਾ;

ਸਂਵਡ੍ਢਯਿਤ੍ਵਾ ਪੁਲਿਨਂ, ਅਕਂ ਪੁਲਿਨਚੇਤਿਯਂ.

੬੫. ‘‘ਯੇ ਤੇ ਅਹੇਸੁਂ ਸਮ੍ਬੁਦ੍ਧਾ, ਭਵਨ੍ਤਕਰਣਾ ਮੁਨੀ;

ਤੇਸਂ ਏਤਾਦਿਸੋ ਥੂਪੋ, ਤਂ ਨਿਮਿਤ੍ਤਂ ਕਰੋਮਹਂ.

੬੬. ‘‘ਕਰਿਤ੍ਵਾ ਪੁਲਿਨਂ [ਪੁਲ਼ਿਨੇ (ਸੀ. ਸ੍ਯਾ. ਪੀ.)] ਥੂਪਂ, ਸੋਵਣ੍ਣਂ ਮਾਪਯਿਂ ਅਹਂ;

ਸੋਣ੍ਣਕਿਙ੍ਕਣਿਪੁਪ੍ਫਾਨਿ, ਸਹਸ੍ਸੇ ਤੀਣਿ ਪੂਜਯਿਂ.

੬੭. ‘‘ਸਾਯਪਾਤਂ ਨਮਸ੍ਸਾਮਿ, ਵੇਦਜਾਤੋ ਕਤਞ੍ਜਲੀ;

ਸਮ੍ਮੁਖਾ ਵਿਯ ਸਮ੍ਬੁਦ੍ਧਂ, ਵਨ੍ਦਿਂ ਪੁਲਿਨਚੇਤਿਯਂ.

੬੮. ‘‘ਯਦਾ ਕਿਲੇਸਾ ਜਾਯਨ੍ਤਿ, ਵਿਤਕ੍ਕਾ ਗੇਹਨਿਸ੍ਸਿਤਾ;

ਸਰਾਮਿ ਸੁਕਤਂ ਥੂਪਂ, ਪਚ੍ਚਵੇਕ੍ਖਾਮਿ ਤਾਵਦੇ.

੬੯. ‘‘ਉਪਨਿਸ੍ਸਾਯ ਵਿਹਰਂ, ਸਤ੍ਥਵਾਹਂ ਵਿਨਾਯਕਂ;

ਕਿਲੇਸੇ ਸਂਵਸੇਯ੍ਯਾਸਿ, ਨ ਯੁਤ੍ਤਂ ਤਵ ਮਾਰਿਸ.

੭੦. ‘‘ਸਹ ਆਵਜ੍ਜਿਤੇ ਥੂਪੇ, ਗਾਰਵਂ ਹੋਤਿ ਮੇ ਤਦਾ;

ਕੁਵਿਤਕ੍ਕੇ ਵਿਨੋਦੇਸਿਂ, ਨਾਗੋ ਤੁਤ੍ਤਟ੍ਟਿਤੋ ਯਥਾ.

੭੧. ‘‘ਏਵਂ ਵਿਹਰਮਾਨਂ ਮਂ, ਮਚ੍ਚੁਰਾਜਾਭਿਮਦ੍ਦਥ;

ਤਤ੍ਥ ਕਾਲਙ੍ਕਤੋ ਸਨ੍ਤੋ, ਬ੍ਰਹ੍ਮਲੋਕਮਗਚ੍ਛਹਂ.

੭੨. ‘‘ਯਾਵਤਾਯੁਂ ਵਸਿਤ੍ਵਾਨ, ਤਿਦਿਵੇ [ਤਿਦਸੇ (ਸੀ. ਪੀ.)] ਉਪਪਜ੍ਜਹਂ;

ਅਸੀਤਿਕ੍ਖਤ੍ਤੁਂ ਦੇਵਿਨ੍ਦੋ, ਦੇਵਰਜ੍ਜਮਕਾਰਯਿਂ.

੭੩. ‘‘ਸਤਾਨਂ ਤੀਣਿਕ੍ਖਤ੍ਤੁਞ੍ਚ, ਚਕ੍ਕਵਤ੍ਤੀ ਅਹੋਸਹਂ;

ਪਦੇਸਰਜ੍ਜਂ ਵਿਪੁਲਂ, ਗਣਨਾਤੋ ਅਸਙ੍ਖਿਯਂ.

੭੪. ‘‘ਸੋਣ੍ਣਕਿਙ੍ਕਣਿਪੁਪ੍ਫਾਨਂ [ਤੇਸਂ ਕਿਙ੍ਕਣਿਪੁਪ੍ਫਾਨਂ (ਸੀ.)], ਵਿਪਾਕਂ ਅਨੁਭੋਮਹਂ;

ਧਾਤੀਸਤਸਹਸ੍ਸਾਨਿ, ਪਰਿਵਾਰੇਨ੍ਤਿ ਮਂ [ਮੇ (ਕ.)] ਭਵੇ.

੭੫. ‘‘ਥੂਪਸ੍ਸ ਪਰਿਚਿਣ੍ਣਤ੍ਤਾ, ਰਜੋਜਲ੍ਲਂ ਨ ਲਿਮ੍ਪਤਿ;

ਗਤ੍ਤੇ ਸੇਦਾ ਨ ਮੁਚ੍ਚਨ੍ਤਿ, ਸੁਪ੍ਪਭਾਸੋ ਭਵਾਮਹਂ.

੭੬. ‘‘ਅਹੋ ਮੇ ਸੁਕਤੋ ਥੂਪੋ, ਸੁਦਿਟ੍ਠਾਮਰਿਕਾ ਨਦੀ;

ਥੂਪਂ ਕਤ੍ਵਾਨ ਪੁਲਿਨਂ, ਪਤ੍ਤੋਮ੍ਹਿ ਅਚਲਂ ਪਦਂ.

੭੭. ‘‘ਕੁਸਲਂ ਕਤ੍ਤੁਕਾਮੇਨ, ਜਨ੍ਤੁਨਾ ਸਾਰਗਾਹਿਨਾ;

ਨਤ੍ਥਿ ਖੇਤ੍ਤਂ ਅਖੇਤ੍ਤਂ ਵਾ, ਪਟਿਪਤ੍ਤੀਵ ਸਾਧਕਾ [ਸਾਰਿਕਾ (ਪੀ.), ਸਾਰਕਾ (ਸ੍ਯਾ.), ਸਾਰਤਾ (ਕ.)].

੭੮. ‘‘ਯਥਾਪਿ ਬਲਵਾ ਪੋਸੋ, ਅਣ੍ਣਵਂ ਤਰਿਤੁਸ੍ਸਹੇ;

ਪਰਿਤ੍ਤਂ ਕਟ੍ਠਮਾਦਾਯ, ਪਕ੍ਖਨ੍ਦੇਯ੍ਯ ਮਹਾਸਰਂ.

੭੯. ‘‘ਇਮਾਹਂ ਕਟ੍ਠਂ ਨਿਸ੍ਸਾਯ, ਤਰਿਸ੍ਸਾਮਿ ਮਹੋਦਧਿਂ;

ਉਸ੍ਸਾਹੇਨ ਵੀਰਿਯੇਨ, ਤਰੇਯ੍ਯ ਉਦਧਿਂ ਨਰੋ.

੮੦. ‘‘ਤਥੇਵ ਮੇ ਕਤਂ ਕਮ੍ਮਂ, ਪਰਿਤ੍ਤਂ ਥੋਕਕਞ੍ਚ ਯਂ;

ਤਂ ਕਮ੍ਮਂ ਉਪਨਿਸ੍ਸਾਯ, ਸਂਸਾਰਂ ਸਮਤਿਕ੍ਕਮਿਂ.

੮੧. ‘‘ਪਚ੍ਛਿਮੇ ਭਵੇ ਸਮ੍ਪਤ੍ਤੇ, ਸੁਕ੍ਕਮੂਲੇਨ ਚੋਦਿਤੋ;

ਸਾਵਤ੍ਥਿਯਂ ਪੁਰੇ ਜਾਤੋ, ਮਹਾਸਾਲੇ ਸੁਅਡ੍ਢਕੇ.

੮੨. ‘‘ਸਦ੍ਧਾ ਮਾਤਾ ਪਿਤਾ ਮਯ੍ਹਂ, ਬੁਦ੍ਧਸ੍ਸ ਸਰਣਂ ਗਤਾ;

ਉਭੋ ਦਿਟ੍ਠਪਦਾ ਏਤੇ, ਅਨੁਵਤ੍ਤਨ੍ਤਿ ਸਾਸਨਂ.

੮੩. ‘‘ਬੋਧਿਪਪਟਿਕਂ ਗਯ੍ਹ, ਸੋਣ੍ਣਥੂਪਮਕਾਰਯੁਂ;

ਸਾਯਪਾਤਂ [ਸਾਯਂ ਪਾਤਂ (ਸ੍ਯਾ. ਕ.)] ਨਮਸ੍ਸਨ੍ਤਿ, ਸਕ੍ਯਪੁਤ੍ਤਸ੍ਸ ਸਮ੍ਮੁਖਾ.

੮੪. ‘‘ਉਪੋਸਥਮ੍ਹਿ ਦਿਵਸੇ, ਸੋਣ੍ਣਥੂਪਂ ਵਿਨੀਹਰੁਂ;

ਬੁਦ੍ਧਸ੍ਸ ਵਣ੍ਣਂ ਕਿਤ੍ਤੇਨ੍ਤਾ, ਤਿਯਾਮਂ ਵੀਤਿਨਾਮਯੁਂ.

੮੫. ‘‘ਸਹ ਦਿਸ੍ਵਾਨਹਂ [ਪਸਾਦੇਤ੍ਵਾਨਹਂ (ਕ.)] ਥੂਪਂ, ਸਰਿਂ ਪੁਲਿਨਚੇਤਿਯਂ;

ਏਕਾਸਨੇ ਨਿਸੀਦਿਤ੍ਵਾ, ਅਰਹਤ੍ਤਮਪਾਪੁਣਿਂ.

ਦ੍ਵਾਵੀਸਤਿਮਂ ਭਾਣਵਾਰਂ.

੮੬. ‘‘ਗਵੇਸਮਾਨੋ ਤਂ ਵੀਰਂ, ਧਮ੍ਮਸੇਨਾਪਤਿਦ੍ਦਸਂ;

ਅਗਾਰਾ ਨਿਕ੍ਖਮਿਤ੍ਵਾਨ, ਪਬ੍ਬਜਿਂ ਤਸ੍ਸ ਸਨ੍ਤਿਕੇ.

੮੭. ‘‘ਜਾਤਿਯਾ ਸਤ੍ਤਵਸ੍ਸੇਨ, ਅਰਹਤ੍ਤਮਪਾਪੁਣਿਂ;

ਉਪਸਮ੍ਪਾਦਯੀ ਬੁਦ੍ਧੋ, ਗੁਣਮਞ੍ਞਾਯ ਚਕ੍ਖੁਮਾ.

੮੮. ‘‘ਦਾਰਕੇਨੇਵ ਸਨ੍ਤੇਨ, ਕਿਰਿਯਂ ਨਿਟ੍ਠਿਤਂ ਮਯਾ;

ਕਤਂ ਮੇ ਕਰਣੀਯਜ੍ਜ, ਸਕ੍ਯਪੁਤ੍ਤਸ੍ਸ ਸਾਸਨੇ.

੮੯. ‘‘ਸਬ੍ਬਵੇਰਭਯਾਤੀਤੋ, ਸਬ੍ਬਸਙ੍ਗਾਤਿਗੋ [ਸਬ੍ਬਸਙ੍ਕਾਤਿਤੋ (ਕ.)] ਇਸਿ;

ਸਾਵਕੋ ਤੇ ਮਹਾਵੀਰ, ਸੋਣ੍ਣਥੂਪਸ੍ਸਿਦਂ ਫਲਂ.

੯੦. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੯੧. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੯੨. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਪੁਲਿਨਥੂਪਿਯੋ ਥੇਰੋ ਇਮਾ ਗਾਥਾਯੋ

ਅਭਾਸਿਤ੍ਥਾਤਿ.

ਪੁਲਿਨਥੂਪਿਯਤ੍ਥੇਰਸ੍ਸਾਪਦਾਨਂ ਅਟ੍ਠਮਂ.