੧੦. ਪਿਯਾਲਫਲਦਾਯਕਤ੍ਥੇਰਅਪਦਾਨਂ

੧੦੪. ‘‘ਮਿਗਲੁਦ੍ਦੋ ਪੁਰੇ ਆਸਿਂ, ਵਿਪਿਨੇ ਵਿਚਰਂ ਤਦਾ;

ਅਦ੍ਦਸਂ ਵਿਰਜਂ ਬੁਦ੍ਧਂ, ਸਬ੍ਬਧਮ੍ਮਾਨ ਪਾਰਗੁਂ.

੧੦੫. ‘‘ਪਿਯਾਲਫਲਮਾਦਾਯ, ਬੁਦ੍ਧਸੇਟ੍ਠਸ੍ਸਦਾਸਹਂ;

ਪੁਞ੍ਞਕ੍ਖੇਤ੍ਤਸ੍ਸ ਵੀਰਸ੍ਸ, ਪਸਨ੍ਨੋ ਸੇਹਿ ਪਾਣਿਭਿ.

੧੦੬. ‘‘ਏਕਤਿਂਸੇ ਇਤੋ ਕਪ੍ਪੇ, ਯਂ ਫਲਂ ਅਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਫਲਦਾਨਸ੍ਸਿਦਂ ਫਲਂ.

੧੦੭. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੧੦੮. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੧੦੯. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਪਿਯਾਲਫਲਦਾਯਕੋ ਥੇਰੋ ਇਮਾ

ਗਾਥਾਯੋ ਅਭਾਸਿਤ੍ਥਾਤਿ.

ਪਿਯਾਲਫਲਦਾਯਕਤ੍ਥੇਰਸ੍ਸਾਪਦਾਨਂ ਦਸਮਂ.

ਕਿਙ੍ਕਣਿਪੁਪ੍ਫਵਗ੍ਗੋ ਪਞ੍ਞਾਸਮੋ.

ਤਸ੍ਸੁਦ੍ਦਾਨਂ –

ਕਿਙ੍ਕਣੀ ਪਂਸੁਕੂਲਞ੍ਚ, ਕੋਰਣ੍ਡਮਥ ਕਿਂਸੁਕਂ;

ਉਪਡ੍ਢਦੁਸ੍ਸੀ ਘਤਦੋ, ਉਦਕਂ ਥੂਪਕਾਰਕੋ.

ਨਲ਼ਕਾਰੀ ਚ ਨਵਮੋ, ਪਿਯਾਲਫਲਦਾਯਕੋ;

ਸਤਮੇਕਞ੍ਚ ਗਾਥਾਨਂ, ਨਵਕਞ੍ਚ ਤਦੁਤ੍ਤਰਿ.

ਅਥ ਵਗ੍ਗੁਦ੍ਦਾਨਂ –

ਮੇਤ੍ਤੇਯ੍ਯਵਗ੍ਗੋ ਭਦ੍ਦਾਲਿ, ਸਕਿਂਸਮ੍ਮਜ੍ਜਕੋਪਿ ਚ;

ਏਕਵਿਹਾਰੀ ਵਿਭੀਤਕੀ, ਜਗਤੀ ਸਾਲਪੁਪ੍ਫਿਯੋ.

ਨਲ਼ਾਗਾਰਂ ਪਂਸੁਕੂਲਂ, ਕਿਙ੍ਕਣਿਪੁਪ੍ਫਿਯੋ ਤਥਾ;

ਅਸੀਤਿ ਦ੍ਵੇ ਚ ਗਾਥਾਯੋ, ਚਤੁਦ੍ਦਸਸਤਾਨਿ ਚ.

ਮੇਤ੍ਤੇਯ੍ਯਵਗ੍ਗਦਸਕਂ.