੬. ਪਦੁਮਚ੍ਛਦਨਿਯਤ੍ਥੇਰਅਪਦਾਨਂ

੮੩. ‘‘ਨਿਬ੍ਬੁਤੇ ਲੋਕਨਾਥਮ੍ਹਿ, ਵਿਪਸ੍ਸਿਮ੍ਹਗ੍ਗਪੁਗ੍ਗਲੇ;

ਸੁਫੁਲ੍ਲਪਦੁਮਂ ਗਯ੍ਹ, ਚਿਤਮਾਰੋਪਯਿਂ ਅਹਂ.

੮੪. ‘‘ਆਰੋਪਿਤੇ ਚ ਚਿਤਕੇ, ਵੇਹਾਸਂ ਨਭਮੁਗ੍ਗਮਿ;

ਆਕਾਸੇ ਛਦਨਂ [ਆਕਾਸਚ੍ਛਦਨਂ (ਸੀ.)] ਕਤ੍ਵਾ, ਚਿਤਕਮ੍ਹਿ ਅਧਾਰਯਿ.

੮੫. ‘‘ਏਕਨਵੁਤਿਤੋ ਕਪ੍ਪੇ, ਯਂ ਪੁਪ੍ਫਮਭਿਰੋਪਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

੮੬. ‘‘ਸਤ੍ਤਤਾਲੀਸਿਤੋ ਕਪ੍ਪੇ, ਪਦੁਮਿਸ੍ਸਰਨਾਮਕੋ;

ਚਾਤੁਰਨ੍ਤੋ ਵਿਜਿਤਾਵੀ, ਚਕ੍ਕਵਤ੍ਤੀ ਮਹਬ੍ਬਲੋ.

੮੭. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਪਦੁਮਚ੍ਛਦਨਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ;

ਪਦੁਮਚ੍ਛਦਨਿਯਤ੍ਥੇਰਸ੍ਸਾਪਦਾਨਂ ਛਟ੍ਠਂ.