੪. ਸਨ੍ਨਿਟ੍ਠਾਪਕਤ੍ਥੇਰਅਪਦਾਨਂ

੭੦. ‘‘ਅਰਞ੍ਞੇ ਕੁਟਿਕਂ ਕਤ੍ਵਾ, ਵਸਾਮਿ ਪਬ੍ਬਤਨ੍ਤਰੇ;

ਲਾਭਾਲਾਭੇਨ ਸਨ੍ਤੁਟ੍ਠੋ, ਯਸੇਨ ਅਯਸੇਨ ਚ.

੭੧. ‘‘ਪਦੁਮੁਤ੍ਤਰੋ ਲੋਕਵਿਦੂ, ਆਹੁਤੀਨਂ ਪਟਿਗ੍ਗਹੋ;

ਵਸੀਸਤਸਹਸ੍ਸੇਹਿ [ਭਿਕ੍ਖੁਸਤਸਹਸ੍ਸੇਹਿ (ਸ੍ਯਾ.)], ਆਗਚ੍ਛਿ ਮਮ ਸਨ੍ਤਿਕਂ.

੭੨. ‘‘ਉਪਾਗਤਂ ਮਹਾਨਾਗਂ [ਮਹਾਵੀਰਂ (ਸੀ.)], ਜਲਜੁਤ੍ਤਮਨਾਮਕਂ;

ਤਿਣਸਨ੍ਥਰਂ [ਤਿਣਤ੍ਥਰਂ (ਕ.)] ਪਞ੍ਞਾਪੇਤ੍ਵਾ, ਅਦਾਸਿਂ ਸਤ੍ਥੁਨੋ ਅਹਂ.

੭੩. ‘‘ਪਸਨ੍ਨਚਿਤ੍ਤੋ ਸੁਮਨੋ, ਆਮਣ੍ਡਂ ਪਾਨੀਯਞ੍ਚਹਂ;

ਅਦਾਸਿਂ ਉਜੁਭੂਤਸ੍ਸ, ਵਿਪ੍ਪਸਨ੍ਨੇਨ ਚੇਤਸਾ.

੭੪. ‘‘ਸਤਸਹਸ੍ਸਿਤੋ ਕਪ੍ਪੇ [ਸਤਸਹਸ੍ਸੇ ਇਤੋ ਕਪ੍ਪੇ (ਸੀ.)], ਯਂ ਦਾਨਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਆਮਣ੍ਡਸ੍ਸ ਇਦਂ ਫਲਂ.

੭੫. ‘‘ਏਕਤਾਲੀਸਕਪ੍ਪਮ੍ਹਿ, ਏਕੋ ਆਸਿਂ ਅਰਿਨ੍ਦਮੋ;

ਸਤ੍ਤਰਤਨਸਮ੍ਪਨ੍ਨੋ, ਚਕ੍ਕਵਤ੍ਤੀ ਮਹਬ੍ਬਲੋ.

੭੬. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਸਨ੍ਨਿਟ੍ਠਾਪਕੋ [ਸਨ੍ਨਿਧਾਪਕੋ (ਸੀ.)] ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਸਨ੍ਨਿਟ੍ਠਾਪਕਤ੍ਥੇਰਸ੍ਸਾਪਦਾਨਂ ਚਤੁਤ੍ਥਂ.