੧. ਭਾਗਿਨੇਯ੍ਯੁਪਾਲਿਤ੍ਥੇਰਅਪਦਾਨਂ

੧. ‘‘ਖੀਣਾਸਵਸਹਸ੍ਸੇਹਿ, ਪਰਿਵੁਤੋ [ਪਰੇਤੋ (ਕ. ਅਟ੍ਠ)] ਲੋਕਨਾਯਕੋ;

ਵਿਵੇਕਮਨੁਯੁਤ੍ਤੋ ਸੋ, ਗਚ੍ਛਤੇ ਪਟਿਸਲ੍ਲਿਤੁਂ.

੨. ‘‘ਅਜਿਨੇਨ ਨਿਵਤ੍ਥੋਹਂ, ਤਿਦਣ੍ਡਪਰਿਧਾਰਕੋ;

ਭਿਕ੍ਖੁਸਙ੍ਘਪਰਿਬ੍ਯੂਲ਼੍ਹਂ, ਅਦ੍ਦਸਂ ਲੋਕਨਾਯਕਂ.

੩. ‘‘ਏਕਂਸਂ ਅਜਿਨਂ ਕਤ੍ਵਾ, ਸਿਰੇ ਕਤ੍ਵਾਨ ਅਞ੍ਜਲਿਂ;

ਸਮ੍ਬੁਦ੍ਧਂ ਅਭਿਵਾਦੇਤ੍ਵਾ, ਸਨ੍ਥਵਿਂ ਲੋਕਨਾਯਕਂ.

੪. ‘‘ਯਥਾਣ੍ਡਜਾ ਚ ਸਂਸੇਦਾ, ਓਪਪਾਤੀ ਜਲਾਬੁਜਾ;

ਕਾਕਾਦਿਪਕ੍ਖਿਨੋ ਸਬ੍ਬੇ, ਅਨ੍ਤਲਿਕ੍ਖਚਰਾ ਸਦਾ.

੫. ‘‘ਯੇ ਕੇਚਿ ਪਾਣਭੂਤਤ੍ਥਿ, ਸਞ੍ਞਿਨੋ ਵਾ ਅਸਞ੍ਞਿਨੋ;

ਸਬ੍ਬੇ ਤੇ ਤਵ ਞਾਣਮ੍ਹਿ, ਅਨ੍ਤੋ ਹੋਨ੍ਤਿ ਸਮੋਗਧਾ.

੬. ‘‘ਗਨ੍ਧਾ ਚ ਪਬ੍ਬਤੇਯ੍ਯਾ ਯੇ, ਹਿਮਵਨ੍ਤਨਗੁਤ੍ਤਮੇ;

ਸਬ੍ਬੇ ਤੇ ਤਵ ਸੀਲਮ੍ਹਿ, ਕਲਾਯਪਿ ਨ ਯੁਜ੍ਜਰੇ.

੭. ‘‘ਮੋਹਨ੍ਧਕਾਰਪਕ੍ਖਨ੍ਦੋ, ਅਯਂ ਲੋਕੋ ਸਦੇਵਕੋ;

ਤਵ ਞਾਣਮ੍ਹਿ ਜੋਤਨ੍ਤੇ, ਅਨ੍ਧਕਾਰਾ ਵਿਧਂਸਿਤਾ.

੮. ‘‘ਯਥਾ ਅਤ੍ਥਙ੍ਗਤੇ ਸੂਰਿਯੇ, ਹੋਨ੍ਤਿ ਸਤ੍ਤਾ ਤਮੋਗਤਾ;

ਏਵਂ ਬੁਦ੍ਧੇ ਅਨੁਪ੍ਪਨ੍ਨੇ, ਹੋਤਿ ਲੋਕੋ ਤਮੋਗਤੋ.

੯. ‘‘ਯਥੋਦਯਨ੍ਤੋ ਆਦਿਚ੍ਚੋ, ਵਿਨੋਦੇਤਿ ਤਮਂ ਸਦਾ;

ਤਥੇਵ ਤ੍ਵਂ ਬੁਦ੍ਧਸੇਟ੍ਠ, ਵਿਦ੍ਧਂਸੇਸਿ ਤਮਂ ਸਦਾ.

੧੦. ‘‘ਪਧਾਨਪਹਿਤਤ੍ਤੋਸਿ, ਬੁਦ੍ਧੋ ਲੋਕੇ ਸਦੇਵਕੇ;

ਤਵ ਕਮ੍ਮਾਭਿਰਦ੍ਧੇਨ, ਤੋਸੇਸਿ ਜਨਤਂ ਬਹੁਂ.

੧੧. ‘‘ਤਂ ਸਬ੍ਬਂ ਅਨੁਮੋਦਿਤ੍ਵਾ, ਪਦੁਮੁਤ੍ਤਰੋ ਮਹਾਮੁਨਿ;

ਨਭਂ ਅਬ੍ਭੁਗ੍ਗਮੀ ਧੀਰੋ, ਹਂਸਰਾਜਾਵ ਅਮ੍ਬਰੇ.

੧੨. ‘‘ਅਬ੍ਭੁਗ੍ਗਨ੍ਤ੍ਵਾਨ ਸਮ੍ਬੁਦ੍ਧੋ, ਮਹੇਸਿ ਪਦੁਮੁਤ੍ਤਰੋ;

ਅਨ੍ਤਲਿਕ੍ਖੇ ਠਿਤੋ ਸਤ੍ਥਾ, ਇਮਾ ਗਾਥਾ ਅਭਾਸਥ.

੧੩. ‘‘ਯੇਨਿਦਂ ਥਵਿਤਂ ਞਾਣਂ, ਓਪਮ੍ਮੇਹਿ ਸਮਾਯੁਤਂ;

ਤਮਹਂ ਕਿਤ੍ਤਯਿਸ੍ਸਾਮਿ, ਸੁਣਾਥ ਮਮ ਭਾਸਤੋ.

੧੪. ‘‘‘ਅਟ੍ਠਾਰਸਞ੍ਚ ਖਤ੍ਤੁਂ ਸੋ, ਦੇਵਰਾਜਾ ਭਵਿਸ੍ਸਤਿ;

ਪਥਬ੍ਯਾ ਰਜ੍ਜਂ ਤਿਸਤਂ, ਵਸੁਧਂ ਆਵਸਿਸ੍ਸਤਿ.

੧੫. ‘‘‘ਪਞ੍ਚਵੀਸਤਿਕ੍ਖਤ੍ਤੁਞ੍ਚ, ਚਕ੍ਕਵਤ੍ਤੀ ਭਵਿਸ੍ਸਤਿ;

ਪਦੇਸਰਜ੍ਜਂ ਵਿਪੁਲਂ, ਗਣਨਾਤੋ ਅਸਙ੍ਖਿਯਂ.

੧੬. ‘‘‘ਕਪ੍ਪਸਤਸਹਸ੍ਸਮ੍ਹਿ, ਓਕ੍ਕਾਕਕੁਲਸਮ੍ਭਵੋ;

ਗੋਤਮੋ ਨਾਮ ਗੋਤ੍ਤੇਨ, ਸਤ੍ਥਾ ਲੋਕੇ ਭਵਿਸ੍ਸਤਿ.

੧੭. ‘‘‘ਤੁਸਿਤਾ ਹਿ ਚਵਿਤ੍ਵਾਨ, ਸੁਕ੍ਕਮੂਲੇਨ ਚੋਦਿਤੋ;

ਹੀਨੋਵ ਜਾਤਿਯਾ ਸਨ੍ਤੋ, ਉਪਾਲਿ ਨਾਮ ਹੇਸ੍ਸਤਿ.

੧੮. ‘‘‘ਸੋ ਪਚ੍ਛਾ ਪਬ੍ਬਜਿਤ੍ਵਾਨ, ਵਿਰਾਜੇਤ੍ਵਾਨ ਪਾਪਕਂ;

ਸਬ੍ਬਾਸਵੇ ਪਰਿਞ੍ਞਾਯ, ਨਿਬ੍ਬਾਯਿਸ੍ਸਤਿਨਾਸਵੋ.

੧੯. ‘‘‘ਤੁਟ੍ਠੋ ਚ ਗੋਤਮੋ ਬੁਦ੍ਧੋ, ਸਕ੍ਯਪੁਤ੍ਤੋ ਮਹਾਯਸੋ;

ਵਿਨਯਾਧਿਗਤਂ ਤਸ੍ਸ, ਏਤਦਗ੍ਗੇ ਠਪੇਸ੍ਸਤਿ’.

੨੦. ‘‘ਸਦ੍ਧਾਯਾਹਂ ਪਬ੍ਬਜਿਤੋ, ਕਤਕਿਚ੍ਚੋ ਅਨਾਸਵੋ;

ਸਬ੍ਬਾਸਵੇ ਪਰਿਞ੍ਞਾਯ, ਵਿਹਰਾਮਿ ਅਨਾਸਵੋ.

੨੧. ‘‘ਭਗਵਾ ਚਾਨੁਕਮ੍ਪੀ ਮਂ, ਵਿਨਯੇਹਂ ਵਿਸਾਰਦੋ;

ਸਕਕਮ੍ਮਾਭਿਰਦ੍ਧੋ ਚ, ਵਿਹਰਾਮਿ ਅਨਾਸਵੋ.

੨੨. ‘‘ਸਂਵੁਤੋ ਪਾਤਿਮੋਕ੍ਖਮ੍ਹਿ, ਇਨ੍ਦ੍ਰਿਯੇਸੁ ਚ ਪਞ੍ਚਸੁ;

ਧਾਰੇਮਿ ਵਿਨਯਂ ਸਬ੍ਬਂ, ਕੇਵਲਂ ਰਤਨਾਕਰਂ [ਰਤਨਗ੍ਘਰਂ (ਕ.)].

੨੩. ‘‘ਮਮਞ੍ਚ ਗੁਣਮਞ੍ਞਾਯ, ਸਤ੍ਥਾ ਲੋਕੇ ਅਨੁਤ੍ਤਰੋ;

ਭਿਕ੍ਖੁਸਙ੍ਘੇ ਨਿਸੀਦਿਤ੍ਵਾ, ਏਤਦਗ੍ਗੇ ਠਪੇਸਿ ਮਂ.

੨੪. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;

ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਉਪਾਲਿਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਭਾਗਿਨੇਯ੍ਯੁਪਾਲਿਤ੍ਥੇਰਸ੍ਸਾਪਦਾਨਂ ਪਠਮਂ.