੯. ਧਮ੍ਮਰੁਚਿਯਤ੍ਥੇਰਅਪਦਾਨਂ
੧੬੪. ‘‘ਯਦਾ ਦੀਪਙ੍ਕਰੋ ਬੁਦ੍ਧੋ, ਸੁਮੇਧਂ ਬ੍ਯਾਕਰੀ ਜਿਨੋ;
‘ਅਪਰਿਮੇਯ੍ਯੇ ਇਤੋ ਕਪ੍ਪੇ, ਅਯਂ ਬੁਦ੍ਧੋ ਭਵਿਸ੍ਸਤਿ.
੧੬੫. ‘‘‘ਇਮਸ੍ਸ ਜਨਿਕਾ ਮਾਤਾ, ਮਾਯਾ ਨਾਮ ਭਵਿਸ੍ਸਤਿ;
ਪਿਤਾ ਸੁਦ੍ਧੋਦਨੋ ਨਾਮ, ਅਯਂ ਹੇਸ੍ਸਤਿ ਗੋਤਮੋ.
੧੬੬. ‘‘‘ਪਧਾਨਂ ਪਦਹਿਤ੍ਵਾਨ, ਕਤ੍ਵਾ ਦੁਕ੍ਕਰਕਾਰਿਕਂ;
ਅਸ੍ਸਤ੍ਥਮੂਲੇ ਸਮ੍ਬੁਦ੍ਧੋ, ਬੁਜ੍ਝਿਸ੍ਸਤਿ ਮਹਾਯਸੋ.
੧੬੭. ‘‘‘ਉਪਤਿਸ੍ਸੋ ਕੋਲਿਤੋ ਚ, ਅਗ੍ਗਾ ਹੇਸ੍ਸਨ੍ਤਿ ਸਾਵਕਾ;
ਆਨਨ੍ਦੋ ਨਾਮ ਨਾਮੇਨ [ਆਨਨ੍ਦੋ ਨਾਮੁਪਟ੍ਠਾਕੋ (ਸ੍ਯਾ.)], ਉਪਟ੍ਠਿਸ੍ਸਤਿਮਂ ਜਿਨਂ.
੧੬੮. ‘‘‘ਖੇਮਾ ਉਪ੍ਪਲਵਣ੍ਣਾ ਚ, ਅਗ੍ਗਾ ਹੇਸ੍ਸਨ੍ਤਿ ਸਾਵਿਕਾ;
ਚਿਤ੍ਤੋ ਆਲ਼ਵਕੋ ਚੇਵ, ਅਗ੍ਗਾ ਹੇਸ੍ਸਨ੍ਤੁਪਾਸਕਾ.
੧੬੯. ‘‘‘ਖੁਜ੍ਜੁਤ੍ਤਰਾ ਨਨ੍ਦਮਾਤਾ, ਅਗ੍ਗਾ ਹੇਸ੍ਸਨ੍ਤੁਪਾਸਿਕਾ;
ਬੋਧਿ ਇਮਸ੍ਸ ਵੀਰਸ੍ਸ, ਅਸ੍ਸਤ੍ਥੋਤਿ ਪਵੁਚ੍ਚਤਿ’.
੧੭੦. ‘‘ਇਦਂ ਸੁਤ੍ਵਾਨ ਵਚਨਂ, ਅਸਮਸ੍ਸ ਮਹੇਸਿਨੋ;
ਆਮੋਦਿਤਾ ਨਰਮਰੂ, ਨਮਸ੍ਸਨ੍ਤਿ ਕਤਞ੍ਜਲੀ.
੧੭੧. ‘‘ਤਦਾਹਂ ਮਾਣਵੋ ਆਸਿਂ, ਮੇਘੋ ਨਾਮ ਸੁਸਿਕ੍ਖਿਤੋ;
ਸੁਤ੍ਵਾ ਬ੍ਯਾਕਰਣਂ ਸੇਟ੍ਠਂ, ਸੁਮੇਧਸ੍ਸ ਮਹਾਮੁਨੇ.
੧੭੨. ‘‘ਸਂਵਿਸਟ੍ਠੋ ਭਵਿਤ੍ਵਾਨ, ਸੁਮੇਧੇ ਕਰੁਣਾਸਯੇ [ਕਰੁਣਾਲਯੇ (ਸ੍ਯਾ.)];
ਪਬ੍ਬਜਨ੍ਤਞ੍ਚ ਤਂ ਵੀਰਂ, ਸਹਾਵ ਅਨੁਪਬ੍ਬਜਿਂ.
੧੭੩. ‘‘ਸਂਵੁਤੋ ਪਾਤਿਮੋਕ੍ਖਸ੍ਮਿਂ, ਇਨ੍ਦ੍ਰਿਯੇਸੁ ਚ ਪਞ੍ਚਸੁ;
ਸੁਦ੍ਧਾਜੀਵੋ ਸਤੋ ਵੀਰੋ, ਜਿਨਸਾਸਨਕਾਰਕੋ.
੧੭੪. ‘‘ਏਵਂ ਵਿਹਰਮਾਨੋਹਂ, ਪਾਪਮਿਤ੍ਤੇਨ ਕੇਨਚਿ;
ਨਿਯੋਜਿਤੋ ਅਨਾਚਾਰੇ, ਸੁਮਗ੍ਗਾ ਪਰਿਧਂਸਿਤੋ.
੧੭੫. ‘‘ਵਿਤਕ੍ਕਵਸਿਕੋ ਹੁਤ੍ਵਾ, ਸਾਸਨਤੋ ਅਪਕ੍ਕਮਿਂ;
ਪਚ੍ਛਾ ਤੇਨ ਕੁਮਿਤ੍ਤੇਨ, ਪਯੁਤ੍ਤੋ ਮਾਤੁਘਾਤਨਂ.
੧੭੬. ‘‘ਅਕਰਿਂ ਆਨਨ੍ਤਰਿਯਂ [ਅਕਰਿਂ ਨਨ੍ਤਰਿਯਞ੍ਚ (ਸ੍ਯਾ. ਕ.)], ਘਾਤਯਿਂ ਦੁਟ੍ਠਮਾਨਸੋ;
ਤਤੋ ਚੁਤੋ ਮਹਾਵੀਚਿਂ, ਉਪਪਨ੍ਨੋ ਸੁਦਾਰੁਣਂ.
੧੭੭. ‘‘ਵਿਨਿਪਾਤਗਤੋ ਸਨ੍ਤੋ, ਸਂਸਰਿਂ ਦੁਕ੍ਖਿਤੋ ਚਿਰਂ;
ਨ ਪੁਨੋ ਅਦ੍ਦਸਂ ਵੀਰਂ, ਸੁਮੇਧਂ ਨਰਪੁਙ੍ਗਵਂ.
੧੭੮. ‘‘ਅਸ੍ਮਿਂ ਕਪ੍ਪੇ ਸਮੁਦ੍ਦਮ੍ਹਿ, ਮਚ੍ਛੋ ਆਸਿਂ ਤਿਮਿਙ੍ਗਲੋ;
ਦਿਸ੍ਵਾਹਂ ਸਾਗਰੇ ਨਾਵਂ, ਗੋਚਰਤ੍ਥਮੁਪਾਗਮਿਂ.
੧੭੯. ‘‘ਦਿਸ੍ਵਾ ਮਂ ਵਾਣਿਜਾ ਭੀਤਾ, ਬੁਦ੍ਧਸੇਟ੍ਠਮਨੁਸ੍ਸਰੁਂ;
ਗੋਤਮੋਤਿ ਮਹਾਘੋਸਂ, ਸੁਤ੍ਵਾ ਤੇਹਿ ਉਦੀਰਿਤਂ.
੧੮੦. ‘‘ਪੁਬ੍ਬਸਞ੍ਞਂ ਸਰਿਤ੍ਵਾਨ, ਤਤੋ ਕਾਲਙ੍ਕਤੋ ਅਹਂ;
ਸਾਵਤ੍ਥਿਯਂ ਕੁਲੇ ਇਦ੍ਧੇ, ਜਾਤੋ ਬ੍ਰਾਹ੍ਮਣਜਾਤਿਯਂ.
੧੮੧. ‘‘ਆਸਿਂ ਧਮ੍ਮਰੁਚਿ ਨਾਮ, ਸਬ੍ਬਪਾਪਜਿਗੁਚ੍ਛਕੋ;
ਦਿਸ੍ਵਾਹਂ ਲੋਕਪਜ੍ਜੋਤਂ, ਜਾਤਿਯਾ ਸਤ੍ਤਵਸ੍ਸਿਕੋ.
੧੮੨. ‘‘ਮਹਾਜੇਤਵਨਂ ਗਨ੍ਤ੍ਵਾ, ਪਬ੍ਬਜਿਂ ਅਨਗਾਰਿਯਂ;
ਉਪੇਮਿ ਬੁਦ੍ਧਂ ਤਿਕ੍ਖਤ੍ਤੁਂ, ਰਤ੍ਤਿਯਾ ਦਿਵਸਸ੍ਸ ਚ.
੧੮੩. ‘‘ਤਦਾ ਦਿਸ੍ਵਾ ਮੁਨਿ ਆਹ, ਚਿਰਂ ਧਮ੍ਮਰੁਚੀਤਿ ਮਂ;
ਤਤੋਹਂ ਅਵਚਂ ਬੁਦ੍ਧਂ, ਪੁਬ੍ਬਕਮ੍ਮਪਭਾਵਿਤਂ.
੧੮੪. ‘‘ਸੁਚਿਰਂ ਸਤਪੁਞ੍ਞਲਕ੍ਖਣਂ, ਪਤਿਪੁਬ੍ਬੇਨ ਵਿਸੁਦ੍ਧਪਚ੍ਚਯਂ;
ਅਹਮਜ੍ਜਸੁਪੇਕ੍ਖਨਂ ਵਤ, ਤਵ ਪਸ੍ਸਾਮਿ ਨਿਰੁਪਮਂ ਵਿਗ੍ਗਹਂ [ਨਿਰੂਪਮਗ੍ਗਹਂ (ਸੀ.)].
੧੮੫. ‘‘ਸੁਚਿਰਂ ਵਿਹਤਤ੍ਤਮੋ ਮਯਾ, ਸੁਚਿਰਕ੍ਖੇਨ ਨਦੀ ਵਿਸੋਸਿਤਾ;
ਸੁਚਿਰਂ ਅਮਲਂ ਵਿਸੋਧਿਤਂ, ਨਯਨਂ ਞਾਣਮਯਂ ਮਹਾਮੁਨੇ.
੧੮੬. ‘‘ਚਿਰਕਾਲਸਮਙ੍ਗਿਤੋ [ਚਿਰਕਾਲਂ ਸਮਾਗਤੋ (ਪੀ.)] ਤਯਾ, ਅਵਿਨਟ੍ਠੋ ਪੁਨਰਨ੍ਤਰਂ ਚਿਰਂ;
ਪੁਨਰਜ੍ਜਸਮਾਗਤੋ ਤਯਾ, ਨ ਹਿ ਨਸ੍ਸਨ੍ਤਿ ਕਤਾਨਿ ਗੋਤਮ.
੧੮੭. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.
੧੮੮. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.
੧੮੯. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਧਮ੍ਮਰੁਚਿਯੋ ਥੇਰੋ ਇਮਾ ਗਾਥਾਯੋ
ਅਭਾਸਿਤ੍ਥਾਤਿ.
ਧਮ੍ਮਰੁਚਿਯਤ੍ਥੇਰਸ੍ਸਾਪਦਾਨਂ ਨਵਮਂ.