੭. ਪੁਲਿਨੁਪ੍ਪਾਦਕਤ੍ਥੇਰਅਪਦਾਨਂ

੧੧੧. ‘‘ਪਬ੍ਬਤੇ ਹਿਮਵਨ੍ਤਮ੍ਹਿ, ਦੇਵਲੋ ਨਾਮ ਤਾਪਸੋ;

ਤਤ੍ਥ ਮੇ ਚਙ੍ਕਮੋ ਆਸਿ, ਅਮਨੁਸ੍ਸੇਹਿ ਮਾਪਿਤੋ.

੧੧੨. ‘‘ਜਟਾਭਾਰੇਨ [ਜਟਾਭਾਰਸ੍ਸ (ਸ੍ਯਾ. ਕ.)] ਭਰਿਤੋ, ਕਮਣ੍ਡਲੁਧਰੋ ਸਦਾ;

ਉਤ੍ਤਮਤ੍ਥਂ ਗਵੇਸਨ੍ਤੋ, ਵਿਪਿਨਾ ਨਿਕ੍ਖਮਿਂ ਤਦਾ.

੧੧੩. ‘‘ਚੁਲ੍ਲਾਸੀਤਿਸਹਸ੍ਸਾਨਿ, ਸਿਸ੍ਸਾ ਮਯ੍ਹਂ ਉਪਟ੍ਠਹੁਂ;

ਸਕਕਮ੍ਮਾਭਿਪਸੁਤਾ, ਵਸਨ੍ਤਿ ਵਿਪਿਨੇ ਤਦਾ.

੧੧੪. ‘‘ਅਸ੍ਸਮਾ ਅਭਿਨਿਕ੍ਖਮ੍ਮ, ਅਕਂ ਪੁਲਿਨਚੇਤਿਯਂ;

ਨਾਨਾਪੁਪ੍ਫਂ ਸਮਾਨੇਤ੍ਵਾ, ਤਂ ਚੇਤਿਯਮਪੂਜਯਿਂ.

੧੧੫. ‘‘ਤਤ੍ਥ ਚਿਤ੍ਤਂ ਪਸਾਦੇਤ੍ਵਾ, ਅਸ੍ਸਮਂ ਪਵਿਸਾਮਹਂ;

ਸਬ੍ਬੇ ਸਿਸ੍ਸਾ ਸਮਾਗਨ੍ਤ੍ਵਾ, ਏਤਮਤ੍ਥਂ ਪੁਚ੍ਛਿਂਸੁ ਮਂ [ਏਤਮਤ੍ਥਮਪੁਚ੍ਛੁ ਮਂ (ਸੀ.), ਏਤਮਤ੍ਤਂ ਅਪੁਚ੍ਛਿਂਸੁ (ਸ੍ਯਾ. ਕ.)].

੧੧੬. ‘‘‘ਪੁਲਿਨੇਨ ਕਤੋ ਥੂਪੋ [ਕਤੋ ਥੂਪੇ (ਸੀ.)], ਯਂ ਤ੍ਵਂ ਦੇਵ [ਦੇਵਂ (ਸੀ. ਪੀ.)] ਮਸ੍ਸਤਿ;

ਮਯਮ੍ਪਿ ਞਾਤੁਮਿਚ੍ਛਾਮ, ਪੁਟ੍ਠੋ ਆਚਿਕ੍ਖ ਨੋ ਤੁਵਂ’.

੧੧੭. ‘‘‘ਨਿਦ੍ਦਿਟ੍ਠਾ ਨੁ [ਨਿਦ੍ਦਿਟ੍ਠਾ ਨੋ (ਸੀ. ਪੀ.), ਦਿਟ੍ਠਾਨੋ ਵੋ (ਸ੍ਯਾ.)] ਮਨ੍ਤਪਦੇ, ਚਕ੍ਖੁਮਨ੍ਤੋ ਮਹਾਯਸਾ;

ਤੇ ਖੋ ਅਹਂ ਨਮਸ੍ਸਾਮਿ, ਬੁਦ੍ਧਸੇਟ੍ਠੇ ਮਹਾਯਸੇ’.

੧੧੮. ‘‘‘ਕੀਦਿਸਾ ਤੇ ਮਹਾਵੀਰਾ, ਸਬ੍ਬਞ੍ਞੂ ਲੋਕਨਾਯਕਾ;

ਕਥਂਵਣ੍ਣਾ ਕਥਂਸੀਲਾ, ਕੀਦਿਸਾ ਤੇ ਮਹਾਯਸਾ’.

੧੧੯. ‘‘‘ਬਾਤ੍ਤਿਂਸਲਕ੍ਖਣਾ ਬੁਦ੍ਧਾ, ਚਤ੍ਤਾਲੀਸਦਿਜਾਪਿ ਚ;

ਨੇਤ੍ਤਾ ਗੋਪਖੁਮਾ ਤੇਸਂ, ਜਿਞ੍ਜੁਕਾ ਫਲਸਨ੍ਨਿਭਾ.

੧੨੦. ‘‘‘ਗਚ੍ਛਮਾਨਾ ਚ ਤੇ ਬੁਦ੍ਧਾ, ਯੁਗਮਤ੍ਤਞ੍ਚ ਪੇਕ੍ਖਰੇ;

ਨ ਤੇਸਂ ਜਾਣੁ ਨਦਤਿ, ਸਨ੍ਧਿਸਦ੍ਦੋ ਨ ਸੁਯ੍ਯਤਿ.

੧੨੧. ‘‘‘ਗਚ੍ਛਮਾਨਾ ਚ ਸੁਗਤਾ, ਉਦ੍ਧਰਨ੍ਤਾਵ ਗਚ੍ਛਰੇ;

ਪਠਮਂ ਦਕ੍ਖਿਣਂ ਪਾਦਂ, ਬੁਦ੍ਧਾਨਂ ਏਸ ਧਮ੍ਮਤਾ.

੧੨੨. ‘‘‘ਅਸਮ੍ਭੀਤਾ ਚ ਤੇ ਬੁਦ੍ਧਾ, ਮਿਗਰਾਜਾਵ ਕੇਸਰੀ;

ਨੇਵੁਕ੍ਕਂਸੇਨ੍ਤਿ ਅਤ੍ਤਾਨਂ, ਨੋ ਚ ਵਮ੍ਭੇਨ੍ਤਿ ਪਾਣਿਨਂ.

੧੨੩. ‘‘‘ਮਾਨਾਵਮਾਨਤੋ ਮੁਤ੍ਤਾ, ਸਮਾ ਸਬ੍ਬੇਸੁ ਪਾਣਿਸੁ;

ਅਨਤ੍ਤੁਕ੍ਕਂਸਕਾ ਬੁਦ੍ਧਾ, ਬੁਦ੍ਧਾਨਂ ਏਸ ਧਮ੍ਮਤਾ.

੧੨੪. ‘‘‘ਉਪ੍ਪਜ੍ਜਨ੍ਤਾ ਚ ਸਮ੍ਬੁਦ੍ਧਾ, ਆਲੋਕਂ ਦਸ੍ਸਯਨ੍ਤਿ ਤੇ;

ਛਪ੍ਪਕਾਰਂ ਪਕਮ੍ਪੇਨ੍ਤਿ, ਕੇਵਲਂ ਵਸੁਧਂ ਇਮਂ.

੧੨੫. ‘‘‘ਪਸ੍ਸਨ੍ਤਿ ਨਿਰਯਞ੍ਚੇਤੇ, ਨਿਬ੍ਬਾਤਿ ਨਿਰਯੋ ਤਦਾ;

ਪਵਸ੍ਸਤਿ ਮਹਾਮੇਘੋ, ਬੁਦ੍ਧਾਨਂ ਏਸ ਧਮ੍ਮਤਾ.

੧੨੬. ‘‘‘ਈਦਿਸਾ ਤੇ ਮਹਾਨਾਗਾ, ਅਤੁਲਾ ਚ [ਤੇ (ਸ੍ਯਾ. ਕ.)] ਮਹਾਯਸਾ;

ਵਣ੍ਣਤੋ ਅਨਤਿਕ੍ਕਨ੍ਤਾ, ਅਪ੍ਪਮੇਯ੍ਯਾ ਤਥਾਗਤਾ’.

੧੨੭. ‘‘‘ਅਨੁਮੋਦਿਂਸੁ ਮੇ ਵਾਕ੍ਯਂ, ਸਬ੍ਬੇ ਸਿਸ੍ਸਾ ਸਗਾਰਵਾ;

ਤਥਾ ਚ ਪਟਿਪਜ੍ਜਿਂਸੁ, ਯਥਾਸਤ੍ਤਿ ਯਥਾਬਲਂ’.

੧੨੮. ‘‘ਪਟਿਪੂਜੇਨ੍ਤਿ ਪੁਲਿਨਂ, ਸਕਕਮ੍ਮਾਭਿਲਾਸਿਨੋ;

ਸਦ੍ਦਹਨ੍ਤਾ ਮਮ ਵਾਕ੍ਯਂ, ਬੁਦ੍ਧਸਕ੍ਕਤਮਾਨਸਾ [ਬੁਦ੍ਧਤ੍ਤਗਤਮਾਨਸਾ (ਸੀ. ਸ੍ਯਾ. ਪੀ.)].

੧੨੯. ‘‘ਤਦਾ ਚਵਿਤ੍ਵਾ ਤੁਸਿਤਾ, ਦੇਵਪੁਤ੍ਤੋ ਮਹਾਯਸੋ;

ਉਪ੍ਪਜ੍ਜਿ ਮਾਤੁਕੁਚ੍ਛਿਮ੍ਹਿ, ਦਸਸਹਸ੍ਸਿ ਕਮ੍ਪਥ.

੧੩੦. ‘‘ਅਸ੍ਸਮਸ੍ਸਾਵਿਦੂਰਮ੍ਹਿ, ਚਙ੍ਕਮਮ੍ਹਿ ਠਿਤੋ ਅਹਂ;

ਸਬ੍ਬੇ ਸਿਸ੍ਸਾ ਸਮਾਗਨ੍ਤ੍ਵਾ, ਆਗਚ੍ਛੁਂ ਮਮ ਸਨ੍ਤਿਕੇ.

੧੩੧. ‘‘ਉਸਭੋਵ ਮਹੀ ਨਦਤਿ, ਮਿਗਰਾਜਾਵ ਕੂਜਤਿ;

ਸੁਸੁਮਾਰੋਵ [ਸੁਂਸੁਮਾਰੋਵ (ਸੀ. ਸ੍ਯਾ. ਪੀ.)] ਸਲ਼ਤਿ, ਕਿਂ ਵਿਪਾਕੋ ਭਵਿਸ੍ਸਤਿ.

੧੩੨. ‘‘ਯਂ ਪਕਿਤ੍ਤੇਮਿ ਸਮ੍ਬੁਦ੍ਧਂ, ਸਿਕਤਾਥੂਪਸਨ੍ਤਿਕੇ;

ਸੋ ਦਾਨਿ ਭਗਵਾ ਸਤ੍ਥਾ, ਮਾਤੁਕੁਚ੍ਛਿਮੁਪਾਗਮਿ.

੧੩੩. ‘‘ਤੇਸਂ ਧਮ੍ਮਕਥਂ ਵਤ੍ਵਾ, ਕਿਤ੍ਤਯਿਤ੍ਵਾ ਮਹਾਮੁਨਿਂ;

ਉਯ੍ਯੋਜੇਤ੍ਵਾ ਸਕੇ ਸਿਸ੍ਸੇ, ਪਲ੍ਲਙ੍ਕਮਾਭੁਜਿਂ ਅਹਂ.

੧੩੪. ‘‘ਬਲਞ੍ਚ ਵਤ ਮੇ ਖੀਣਂ, ਬ੍ਯਾਧਿਨਾ [ਬ੍ਯਾਧਿਤੋ (ਸੀ. ਸ੍ਯਾ. ਪੀ. ਕ.)] ਪਰਮੇਨ ਤਂ;

ਬੁਦ੍ਧਸੇਟ੍ਠਂ ਸਰਿਤ੍ਵਾਨ, ਤਤ੍ਥ ਕਾਲਙ੍ਕਤੋ [ਕਾਲਕਤੋ (ਸੀ. ਪੀ.)] ਅਹਂ.

੧੩੫. ‘‘ਸਬ੍ਬੇ ਸਿਸ੍ਸਾ ਸਮਾਗਨ੍ਤ੍ਵਾ, ਅਕਂਸੁ ਚਿਤਕਂ ਤਦਾ;

ਕਲ਼ੇਵਰਞ੍ਚ ਮੇ ਗਯ੍ਹ, ਚਿਤਕਂ ਅਭਿਰੋਪਯੁਂ.

੧੩੬. ‘‘ਚਿਤਕਂ ਪਰਿਵਾਰੇਤ੍ਵਾ, ਸੀਸੇ ਕਤ੍ਵਾਨ ਅਞ੍ਜਲਿਂ;

ਸੋਕਸਲ੍ਲਪਰੇਤਾ ਤੇ, ਵਿਕ੍ਕਨ੍ਦਿਂਸੁ ਸਮਾਗਤਾ.

੧੩੭. ‘‘ਤੇਸਂ ਲਾਲਪ੍ਪਮਾਨਾਨਂ, ਅਗਮਂ ਚਿਤਕਂ ਤਦਾ;

‘ਅਹਂ ਆਚਰਿਯੋ ਤੁਮ੍ਹਂ, ਮਾ ਸੋਚਿਤ੍ਥ ਸੁਮੇਧਸਾ.

੧੩੮. ‘‘‘ਸਦਤ੍ਥੇ ਵਾਯਮੇਯ੍ਯਾਥ, ਰਤ੍ਤਿਨ੍ਦਿਵਮਤਨ੍ਦਿਤਾ;

ਮਾ ਵੋ ਪਮਤ੍ਤਾ ਅਹੁਤ੍ਥ [ਅਹੁਵਤ੍ਥ (ਸੀ.)], ਖਣੋ ਵੋ ਪਟਿਪਾਦਿਤੋ’.

੧੩੯. ‘‘ਸਕੇ ਸਿਸ੍ਸੇਨੁਸਾਸਿਤ੍ਵਾ, ਦੇਵਲੋਕਂ ਪੁਨਾਗਮਿਂ;

ਅਟ੍ਠਾਰਸ ਚ ਕਪ੍ਪਾਨਿ, ਦੇਵਲੋਕੇ ਰਮਾਮਹਂ.

੧੪੦. ‘‘ਸਤਾਨਂ ਪਞ੍ਚਕ੍ਖਤ੍ਤੁਞ੍ਚ, ਚਕ੍ਕਵਤ੍ਤੀ ਅਹੋਸਹਂ;

ਅਨੇਕਸਤਕ੍ਖਤ੍ਤੁਞ੍ਚ, ਦੇਵਰਜ੍ਜਮਕਾਰਯਿਂ.

੧੪੧. ‘‘ਅਵਸੇਸੇਸੁ ਕਪ੍ਪੇਸੁ, ਵੋਕਿਣ੍ਣੋ [ਵੋਕਿਣ੍ਣਂ (ਸੀ. ਸ੍ਯਾ. ਕ.)] ਸਂਸਰਿਂ ਅਹਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਉਪ੍ਪਾਦਸ੍ਸ ਇਦਂ ਫਲਂ [ਪੁਲਿਨਪੂਜਾਯਿਦਂ ਫਲਂ (ਸੀ.)].

੧੪੨. ‘‘ਯਥਾ ਕੋਮੁਦਿਕੇ ਮਾਸੇ, ਬਹੂ ਪੁਪ੍ਫਨ੍ਤਿ ਪਾਦਪਾ;

ਤਥੇਵਾਹਮ੍ਪਿ ਸਮਯੇ, ਪੁਪ੍ਫਿਤੋਮ੍ਹਿ ਮਹੇਸਿਨਾ.

੧੪੩. ‘‘ਵੀਰਿਯਂ ਮੇ ਧੁਰਧੋਰਯ੍ਹਂ, ਯੋਗਕ੍ਖੇਮਾਧਿਵਾਹਨਂ;

ਨਾਗੋਵ ਬਨ੍ਧਨਂ ਛੇਤ੍ਵਾ, ਵਿਹਰਾਮਿ ਅਨਾਸਵੋ.

੧੪੪. ‘‘ਸਤਸਹਸ੍ਸਿਤੋ ਕਪ੍ਪੇ, ਯਂ ਬੁਦ੍ਧਮਭਿਕਿਤ੍ਤਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਕਿਤ੍ਤਨਾਯ ਇਦਂ ਫਲਂ.

੧੪੫. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੧੪੬. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੧੪੭. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਪੁਲਿਨੁਪ੍ਪਾਦਕੋ ਥੇਰੋ ਇਮਾ ਗਾਥਾਯੋ

ਅਭਾਸਿਤ੍ਥਾਤਿ.

ਪੁਲਿਨੁਪ੍ਪਾਦਕਤ੍ਥੇਰਸ੍ਸਾਪਦਾਨਂ ਸਤ੍ਤਮਂ.