੪੭. ਸਾਲਕੁਸੁਮਿਯਵਗ੍ਗੋ

੧. ਸਾਲਕੁਸੁਮਿਯਤ੍ਥੇਰਅਪਦਾਨਂ

੧. ‘‘ਪਰਿਨਿਬ੍ਬੁਤੇ ਭਗਵਤਿ, ਜਲਜੁਤ੍ਤਮਨਾਮਕੇ;

ਆਰੋਪਿਤਮ੍ਹਿ ਚਿਤਕੇ, ਸਾਲਪੁਪ੍ਫਮਪੂਜਯਿਂ.

੨. ‘‘ਸਤਸਹਸ੍ਸਿਤੋ ਕਪ੍ਪੇ, ਯਂ ਪੁਪ੍ਫਮਭਿਰੋਪਯਿਂ [ਪੁਪ੍ਫਮਭਿਪੁਜਯਿਂ (ਸ੍ਯਾ.)];

ਦੁਗ੍ਗਤਿਂ ਨਾਭਿਜਾਨਾਮਿ, ਚਿਤਪੂਜਾਯਿਦਂ [ਬੁਦ੍ਧਪੂਜਾਯਿਦਂ (ਸ੍ਯਾ.)] ਫਲਂ.

੩. ‘‘ਕਿਲੇਸਾ ਝਾਪਿਤਾ ਮਯ੍ਹਂ, ਭਵਾ ਸਬ੍ਬੇ ਸਮੂਹਤਾ;

ਨਾਗੋਵ ਬਨ੍ਧਨਂ ਛੇਤ੍ਵਾ, ਵਿਹਰਾਮਿ ਅਨਾਸਵੋ.

੪. ‘‘ਸ੍ਵਾਗਤਂ ਵਤ ਮੇ ਆਸਿ, ਮਮ ਬੁਦ੍ਧਸ੍ਸ ਸਨ੍ਤਿਕੇ;

ਤਿਸ੍ਸੋ ਵਿਜ੍ਜਾ ਅਨੁਪ੍ਪਤ੍ਤਾ, ਕਤਂ ਬੁਦ੍ਧਸ੍ਸ ਸਾਸਨਂ.

੫. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;

ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਸਾਲਕੁਸੁਮਿਯੋ ਥੇਰੋ ਇਮਾ ਗਾਥਾਯੋ

ਅਭਾਸਿਤ੍ਥਾਤਿ.

ਸਾਲਕੁਸੁਮਿਯਤ੍ਥੇਰਸ੍ਸਾਪਦਾਨਂ ਪਠਮਂ.

੨. ਚਿਤਕਪੂਜਕਤ੍ਥੇਰਅਪਦਾਨਂ

੬. ‘‘ਝਾਯਮਾਨਸ੍ਸ ਭਗਵਤੋ, ਸਿਖਿਨੋ ਲੋਕਬਨ੍ਧੁਨੋ;

ਅਟ੍ਠ ਚਮ੍ਪਕਪੁਪ੍ਫਾਨਿ, ਚਿਤਕਂ ਅਭਿਰੋਪਯਿਂ.

੭. ‘‘ਏਕਤਿਂਸੇ ਇਤੋ ਕਪ੍ਪੇ, ਯਂ ਪੁਪ੍ਫਮਭਿਰੋਪਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਚਿਤਪੂਜਾਯਿਦਂ ਫਲਂ.

੮. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੯. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੧੦. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਚਿਤਕਪੂਜਕੋ ਥੇਰੋ ਇਮਾ ਗਾਥਾਯੋ

ਅਭਾਸਿਤ੍ਥਾਤਿ.

ਚਿਤਕਪੂਜਕਤ੍ਥੇਰਸ੍ਸਾਪਦਾਨਂ ਦੁਤਿਯਂ.

੩. ਚਿਤਕਨਿਬ੍ਬਾਪਕਤ੍ਥੇਰਅਪਦਾਨਂ

੧੧. ‘‘ਦਯ੍ਹਮਾਨੇ ਸਰੀਰਮ੍ਹਿ, ਵੇਸ੍ਸਭੁਸ੍ਸ ਮਹੇਸਿਨੋ;

ਗਨ੍ਧੋਦਕਂ ਗਹੇਤ੍ਵਾਨ, ਚਿਤਂ ਨਿਬ੍ਬਾਪਯਿਂ ਅਹਂ.

੧੨. ‘‘ਏਕਤਿਂਸੇ ਇਤੋ ਕਪ੍ਪੇ, ਚਿਤਂ ਨਿਬ੍ਬਾਪਯਿਂ ਅਹਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਗਨ੍ਧੋਦਕਸ੍ਸਿਦਂ ਫਲਂ.

੧੩. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੧੪. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੧੫. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਚਿਤਕਨਿਬ੍ਬਾਪਕੋ ਥੇਰੋ ਇਮਾ

ਗਾਥਾਯੋ ਅਭਾਸਿਤ੍ਥਾਤਿ.

ਚਿਤਕਨਿਬ੍ਬਾਪਕਤ੍ਥੇਰਸ੍ਸਾਪਦਾਨਂ ਤਤਿਯਂ.

੪. ਸੇਤੁਦਾਯਕਤ੍ਥੇਰਅਪਦਾਨਂ

੧੬. ‘‘ਵਿਪਸ੍ਸਿਨੋ ਭਗਵਤੋ, ਚਙ੍ਕਮਨ੍ਤਸ੍ਸ ਸਮ੍ਮੁਖਾ;

ਪਸਨ੍ਨਚਿਤ੍ਤੋ ਸੁਮਨੋ, ਸੇਤੁਂ ਕਾਰਾਪਯਿਂ ਅਹਂ.

੧੭. ‘‘ਏਕਨਵੁਤਿਤੋ ਕਪ੍ਪੇ, ਯਂ ਸੇਤੁਂ ਕਾਰਯਿਂ ਅਹਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਸੇਤੁਦਾਨਸ੍ਸਿਦਂ ਫਲਂ.

੧੮. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੧੯. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੨੦. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਸੇਤੁਦਾਯਕੋ ਥੇਰੋ ਇਮਾ ਗਾਥਾਯੋ

ਅਭਾਸਿਤ੍ਥਾਤਿ.

ਸੇਤੁਦਾਯਕਤ੍ਥੇਰਸ੍ਸਾਪਦਾਨਂ ਚਤੁਤ੍ਥਂ.

੫. ਸੁਮਨਤਾਲਵਣ੍ਟਿਯਤ੍ਥੇਰਅਪਦਾਨਂ

੨੧. ‘‘ਸਿਦ੍ਧਤ੍ਥਸ੍ਸ ਭਗਵਤੋ, ਤਾਲਵਣ੍ਟਮਦਾਸਹਂ;

ਸੁਮਨੇਹਿ ਪਟਿਚ੍ਛਨ੍ਨਂ, ਧਾਰਯਾਮਿ ਮਹਾਯਸਂ.

੨੨. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਤਾਲਵਣ੍ਟਮਦਾਸਹਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਤਾਲਵਣ੍ਟਸ੍ਸਿਦਂ ਫਲਂ.

੨੩. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੨੪. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੨੫. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਸੁਮਨਤਾਲਵਣ੍ਟਿਯੋ ਥੇਰੋ ਇਮਾ

ਗਾਥਾਯੋ ਅਭਾਸਿਤ੍ਥਾਤਿ.

ਸੁਮਨਤਾਲਵਣ੍ਟਿਯਤ੍ਥੇਰਸ੍ਸਾਪਦਾਨਂ ਪਞ੍ਚਮਂ.

੬. ਅਵਟਫਲਿਯਤ੍ਥੇਰਅਪਦਾਨਂ

੨੬. ‘‘ਸਤਰਂਸੀ ਨਾਮ ਭਗਵਾ, ਸਯਮ੍ਭੂ ਅਪਰਾਜਿਤੋ;

ਵਿਵੇਕਕਾਮੋ ਸਮ੍ਬੁਦ੍ਧੋ, ਗੋਚਰਾਯਾਭਿਨਿਕ੍ਖਮਿ.

੨੭. ‘‘ਫਲਹਤ੍ਥੋ ਅਹਂ ਦਿਸ੍ਵਾ, ਉਪਗਚ੍ਛਿਂ ਨਰਾਸਭਂ;

ਪਸਨ੍ਨਚਿਤ੍ਤੋ ਸੁਮਨੋ, ਅਦਾਸਿਂ ਅਵਟਂ ਫਲਂ.

੨੮. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਫਲਂ ਅਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਫਲਦਾਨਸ੍ਸਿਦਂ ਫਲਂ.

੨੯. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੩੦. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੩੧. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਅਵਟਫਲਿਯੋ ਥੇਰੋ ਇਮਾ ਗਾਥਾਯੋ

ਅਭਾਸਿਤ੍ਥਾਤਿ.

ਅਵਟਫਲਿਯਤ੍ਥੇਰਸ੍ਸਾਪਦਾਨਂ ਛਟ੍ਠਂ.

੭. ਲਬੁਜਫਲਦਾਯਕਤ੍ਥੇਰਅਪਦਾਨਂ

੩੨. ‘‘ਨਗਰੇ ਬਨ੍ਧੁਮਤਿਯਾ, ਆਰਾਮਿਕੋ ਅਹਂ ਤਦਾ;

ਅਦ੍ਦਸਂ ਵਿਰਜਂ ਬੁਦ੍ਧਂ, ਗਚ੍ਛਨ੍ਤਂ ਅਨਿਲਞ੍ਜਸੇ.

੩੩. ‘‘ਲਬੁਜਂ ਫਲਮਾਦਾਯ, ਬੁਦ੍ਧਸੇਟ੍ਠਸ੍ਸਦਾਸਹਂ;

ਆਕਾਸੇਵ ਠਿਤੋ ਸਨ੍ਤੋ, ਪਟਿਗ੍ਗਣ੍ਹਿ ਮਹਾਯਸੋ.

੩੪. ‘‘ਵਿਤ੍ਤਿਸਞ੍ਜਨਨੋ ਮਯ੍ਹਂ, ਦਿਟ੍ਠਧਮ੍ਮਸੁਖਾਵਹੋ;

ਫਲਂ ਬੁਦ੍ਧਸ੍ਸ ਦਤ੍ਵਾਨ, ਵਿਪ੍ਪਸਨ੍ਨੇਨ ਚੇਤਸਾ.

੩੫. ‘‘ਅਧਿਗਞ੍ਛਿਂ ਤਦਾ ਪੀਤਿਂ, ਵਿਪੁਲਂ ਸੁਖਮੁਤ੍ਤਮਂ;

ਉਪ੍ਪਜ੍ਜਤੇਵ [ਉਪ੍ਪਜ੍ਜਤੇ ਮੇ (ਸ੍ਯਾ.)] ਰਤਨਂ, ਨਿਬ੍ਬਤ੍ਤਸ੍ਸ ਤਹਿਂ ਤਹਿਂ.

੩੬. ‘‘ਏਕਨਵੁਤਿਤੋ ਕਪ੍ਪੇ, ਯਂ ਫਲਂ ਅਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਫਲਦਾਨਸ੍ਸਿਦਂ ਫਲਂ.

੩੭. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੩੮. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੩੯. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਲਬੁਜਫਲਦਾਯਕੋ ਥੇਰੋ ਇਮਾ

ਗਾਥਾਯੋ ਅਭਾਸਿਤ੍ਥਾਤਿ.

ਲਬੁਜਫਲਦਾਯਕਤ੍ਥੇਰਸ੍ਸਾਪਦਾਨਂ ਸਤ੍ਤਮਂ.

੮. ਪਿਲਕ੍ਖਫਲਦਾਯਕਤ੍ਥੇਰਅਪਦਾਨਂ

੪੦. ‘‘ਵਨਨ੍ਤਰੇ ਬੁਦ੍ਧਂ ਦਿਸ੍ਵਾ [ਵਨਨ੍ਤੇ ਬੁਦ੍ਧਂ ਦਿਸ੍ਵਾਨ (ਸੀ. ਪੀ.)], ਅਤ੍ਥਦਸ੍ਸਿਂ ਮਹਾਯਸਂ;

ਪਸਨ੍ਨਚਿਤ੍ਤੋ ਸੁਮਨੋ, ਪਿਲਕ੍ਖਸ੍ਸ [ਪਿਲਕ੍ਖੁਸ੍ਸ (ਪੀ.)] ਫਲਂ ਅਦਾ.

੪੧. ‘‘ਅਟ੍ਠਾਰਸੇ ਕਪ੍ਪਸਤੇ, ਯਂ ਫਲਂ ਅਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਫਲਦਾਨਸ੍ਸਿਦਂ ਫਲਂ.

੪੨. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੪੩. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੪੪. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਪਿਲਕ੍ਖਫਲਦਾਯਕੋ ਥੇਰੋ ਇਮਾ

ਗਾਥਾਯੋ ਅਭਾਸਿਤ੍ਥਾਤਿ.

ਪਿਲਕ੍ਖਫਲਦਾਯਕਤ੍ਥੇਰਸ੍ਸਾਪਦਾਨਂ ਅਟ੍ਠਮਂ.

੯. ਸਯਂਪਟਿਭਾਨਿਯਤ੍ਥੇਰਅਪਦਾਨਂ

੪੫. ‘‘ਕਕੁਧਂ ਵਿਲਸਨ੍ਤਂਵ, ਦੇਵਦੇਵਂ ਨਰਾਸਭਂ;

ਰਥਿਯਂ ਪਟਿਪਜ੍ਜਨ੍ਤਂ, ਕੋ ਦਿਸ੍ਵਾ ਨ ਪਸੀਦਤਿ.

੪੬. ‘‘ਤਮਨ੍ਧਕਾਰਂ ਨਾਸੇਤ੍ਵਾ, ਸਨ੍ਤਾਰੇਤ੍ਵਾ ਬਹੁਂ ਜਨਂ;

ਞਾਣਾਲੋਕੇਨ ਜੋਤਨ੍ਤਂ, ਕੋ ਦਿਸ੍ਵਾ ਨ ਪਸੀਦਤਿ.

੪੭. ‘‘ਵਸੀਸਤਸਹਸ੍ਸੇਹਿ, ਨੀਯਨ੍ਤਂ ਲੋਕਨਾਯਕਂ;

ਉਦ੍ਧਰਨ੍ਤਂ ਬਹੂ ਸਤ੍ਤੇ, ਕੋ ਦਿਸ੍ਵਾ ਨ ਪਸੀਦਤਿ.

੪੮. ‘‘ਆਹਨਨ੍ਤਂ [ਆਹਨਿਤ੍ਵਾ (ਸ੍ਯਾ. ਕ.)] ਧਮ੍ਮਭੇਰਿਂ, ਮਦ੍ਦਨ੍ਤਂ ਤਿਤ੍ਥਿਯੇ ਗਣੇ;

ਸੀਹਨਾਦਂ ਵਿਨਦਨ੍ਤਂ, ਕੋ ਦਿਸ੍ਵਾ ਨ ਪਸੀਦਤਿ.

੪੯. ‘‘ਯਾਵਤਾ ਬ੍ਰਹ੍ਮਲੋਕਤੋ, ਆਗਨ੍ਤ੍ਵਾਨ ਸਬ੍ਰਹ੍ਮਕਾ;

ਪੁਚ੍ਛਨ੍ਤਿ ਨਿਪੁਣੇ ਪਞ੍ਹੇ, ਕੋ ਦਿਸ੍ਵਾ ਨ ਪਸੀਦਤਿ.

੫੦. ‘‘ਯਸ੍ਸਞ੍ਜਲਿਂ ਕਰਿਤ੍ਵਾਨ, ਆਯਾਚਨ੍ਤਿ ਸਦੇਵਕਾ;

ਤੇਨ ਪੁਞ੍ਞਂ ਅਨੁਭੋਨ੍ਤਿ, ਕੋ ਦਿਸ੍ਵਾ ਨ ਪਸੀਦਤਿ.

੫੧. ‘‘ਸਬ੍ਬੇ ਜਨਾ ਸਮਾਗਨ੍ਤ੍ਵਾ, ਸਮ੍ਪਵਾਰੇਨ੍ਤਿ ਚਕ੍ਖੁਮਂ;

ਨ ਵਿਕਮ੍ਪਤਿ ਅਜ੍ਝਿਟ੍ਠੋ, ਕੋ ਦਿਸ੍ਵਾ ਨ ਪਸੀਦਤਿ.

੫੨. ‘‘ਨਗਰਂ ਪਵਿਸਤੋ ਯਸ੍ਸ, ਰਵਨ੍ਤਿ ਭੇਰਿਯੋ ਬਹੂ;

ਵਿਨਦਨ੍ਤਿ ਗਜਾ ਮਤ੍ਤਾ, ਕੋ ਦਿਸ੍ਵਾ ਨ ਪਸੀਦਤਿ.

੫੩. ‘‘ਵੀਥਿਯਾ [ਰਥਿਯਾ (ਸੀ.)] ਗਚ੍ਛਤੋ ਯਸ੍ਸ, ਸਬ੍ਬਾਭਾ ਜੋਤਤੇ ਸਦਾ;

ਅਬ੍ਭੁਨ੍ਨਤਾ ਸਮਾ ਹੋਨ੍ਤਿ, ਕੋ ਦਿਸ੍ਵਾ ਨ ਪਸੀਦਤਿ.

੫੪. ‘‘ਬ੍ਯਾਹਰਨ੍ਤਸ੍ਸ ਬੁਦ੍ਧਸ੍ਸ, ਚਕ੍ਕਵਾਲ਼ਮ੍ਪਿ ਸੁਯ੍ਯਤਿ;

ਸਬ੍ਬੇ ਸਤ੍ਤੇ ਵਿਞ੍ਞਾਪੇਤਿ, ਕੋ ਦਿਸ੍ਵਾ ਨ ਪਸੀਦਤਿ.

੫੫. ‘‘ਸਤਸਹਸ੍ਸਿਤੋ ਕਪ੍ਪੇ, ਯਂ ਬੁਦ੍ਧਮਭਿਕਿਤ੍ਤਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਕਿਤ੍ਤਨਾਯ ਇਦਂ ਫਲਂ.

੫੬. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੫੭. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੫੮. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਸਯਂਪਟਿਭਾਨਿਯੋ ਥੇਰੋ ਇਮਾ ਗਾਥਾਯੋ

ਅਭਾਸਿਤ੍ਥਾਤਿ.

ਸਯਂਪਟਿਭਾਨਿਯਤ੍ਥੇਰਸ੍ਸਾਪਦਾਨਂ ਨਵਮਂ.

੧੦. ਨਿਮਿਤ੍ਤਬ੍ਯਾਕਰਣਿਯਤ੍ਥੇਰਅਪਦਾਨਂ

੫੯. ‘‘ਅਜ੍ਝੋਗਾਹੇਤ੍ਵਾ ਹਿਮਵਂ, ਮਨ੍ਤੇ ਵਾਚੇ ਮਹਂ ਤਦਾ;

ਚਤੁਪਞ੍ਞਾਸਸਹਸ੍ਸਾਨਿ, ਸਿਸ੍ਸਾ ਮਯ੍ਹਂ ਉਪਟ੍ਠਹੁਂ.

੬੦. ‘‘ਅਧਿਤਾ ਵੇਦਗੂ ਸਬ੍ਬੇ, ਛਲ਼ਙ੍ਗੇ ਪਾਰਮਿਂ ਗਤਾ;

ਸਕਵਿਜ੍ਜਾਹੁਪਤ੍ਥਦ੍ਧਾ, ਹਿਮਵਨ੍ਤੇ ਵਸਨ੍ਤਿ ਤੇ.

੬੧. ‘‘ਚਵਿਤ੍ਵਾ ਤੁਸਿਤਾ ਕਾਯਾ, ਦੇਵਪੁਤ੍ਤੋ ਮਹਾਯਸੋ;

ਉਪ੍ਪਜ੍ਜਿ ਮਾਤੁਕੁਚ੍ਛਿਸ੍ਮਿਂ, ਸਮ੍ਪਜਾਨੋ ਪਤਿਸ੍ਸਤੋ.

੬੨. ‘‘ਸਮ੍ਬੁਦ੍ਧੇ ਉਪਪਜ੍ਜਨ੍ਤੇ, ਦਸਸਹਸ੍ਸਿ ਕਮ੍ਪਥ;

ਅਨ੍ਧਾ ਚਕ੍ਖੁਂ ਅਲਭਿਂਸੁ, ਉਪ੍ਪਜ੍ਜਨ੍ਤਮ੍ਹਿ ਨਾਯਕੇ.

੬੩. ‘‘ਸਬ੍ਬਾਕਾਰਂ ਪਕਮ੍ਪਿਤ੍ਥ, ਕੇਵਲਾ ਵਸੁਧਾ ਅਯਂ;

ਨਿਗ੍ਘੋਸਸਦ੍ਦਂ ਸੁਤ੍ਵਾਨ, ਉਬ੍ਬਿਜ੍ਜਿਂਸੁ [ਵਿਮ੍ਹਯਿਂਸੁ (ਸ੍ਯਾ. ਕ.)] ਮਹਾਜਨਾ.

੬੪. ‘‘ਸਬ੍ਬੇ ਜਨਾ ਸਮਾਗਮ੍ਮ, ਆਗਚ੍ਛੁਂ ਮਮ ਸਨ੍ਤਿਕਂ;

ਵਸੁਧਾਯਂ ਪਕਮ੍ਪਿਤ੍ਥ, ਕਿਂ ਵਿਪਾਕੋ ਭਵਿਸ੍ਸਤਿ.

੬੫. ‘‘ਅਵਚਾਸਿਂ [ਵਿਦਸ੍ਸਾਮਿ (ਸ੍ਯਾ.)] ਤਦਾ ਤੇਸਂ, ਮਾ ਭੇਥ [ਮਾ ਰੋਦ (ਕ.), ਮਾਭਾਯਿਤ੍ਥ (ਸ੍ਯਾ.)] ਨਤ੍ਥਿ ਵੋ ਭਯਂ;

ਵਿਸਟ੍ਠਾ ਹੋਥ ਸਬ੍ਬੇਪਿ, ਉਪ੍ਪਾਦੋਯਂ ਸੁਵਤ੍ਥਿਕੋ [ਸੁਖਤ੍ਥਿਕੋ (ਸ੍ਯਾ.)].

੬੬. ‘‘ਅਟ੍ਠਹੇਤੂਹਿ ਸਮ੍ਫੁਸ੍ਸ [ਅਟ੍ਠਹੇਤੂਹਿ ਸਮ੍ਫਸ੍ਸ (ਸ੍ਯਾ. ਪੀ.), ਅਤ੍ਥਹੇਤੁ ਨਿਸਂਸਯਂ (ਕ.)], ਵਸੁਧਾਯਂ ਪਕਮ੍ਪਤਿ;

ਤਥਾ ਨਿਮਿਤ੍ਤਾ ਦਿਸ੍ਸਨ੍ਤਿ, ਓਭਾਸੋ ਵਿਪੁਲੋ ਮਹਾ.

੬੭. ‘‘ਅਸਂਸਯਂ ਬੁਦ੍ਧਸੇਟ੍ਠੋ, ਉਪ੍ਪਜ੍ਜਿਸ੍ਸਤਿ ਚਕ੍ਖੁਮਾ;

ਸਞ੍ਞਾਪੇਤ੍ਵਾਨ ਜਨਤਂ, ਪਞ੍ਚਸੀਲੇ ਕਥੇਸਹਂ.

੬੮. ‘‘ਸੁਤ੍ਵਾਨ ਪਞ੍ਚ ਸੀਲਾਨਿ, ਬੁਦ੍ਧੁਪ੍ਪਾਦਞ੍ਚ ਦੁਲ੍ਲਭਂ;

ਉਬ੍ਬੇਗਜਾਤਾ ਸੁਮਨਾ, ਤੁਟ੍ਠਹਟ੍ਠਾ ਅਹਂਸੁ ਤੇ.