੧੦. ਬੋਧਿਘਰਦਾਯਕਤ੍ਥੇਰਅਪਦਾਨਂ

੬੯. ‘‘ਸਿਦ੍ਧਤ੍ਥਸ੍ਸ ਭਗਵਤੋ, ਦ੍ਵਿਪਦਿਨ੍ਦਸ੍ਸ ਤਾਦਿਨੋ;

ਪਸਨ੍ਨਚਿਤ੍ਤੋ ਸੁਮਨੋ, ਬੋਧਿਘਰਮਕਾਰਯਿਂ.

੭੦. ‘‘ਤੁਸਿਤਂ ਉਪਪਨ੍ਨੋਮ੍ਹਿ, ਵਸਾਮਿ ਰਤਨੇ ਘਰੇ;

ਨ ਮੇ ਸੀਤਂ ਵਾ ਉਣ੍ਹਂ ਵਾ, ਵਾਤੋ ਗਤ੍ਤੇ ਨ ਸਮ੍ਫੁਸੇ.

੭੧. ‘‘ਪਞ੍ਚਸਟ੍ਠਿਮ੍ਹਿਤੋ ਕਪ੍ਪੇ, ਚਕ੍ਕਵਤ੍ਤੀ ਅਹੋਸਹਂ;

ਕਾਸਿਕਂ ਨਾਮ ਨਗਰਂ, ਵਿਸ੍ਸਕਮ੍ਮੇਨ [ਵਿਸੁਕਮ੍ਮੇਨ (ਸ੍ਯਾ. ਕ.)] ਮਾਪਿਤਂ.

੭੨. ‘‘ਦਸਯੋਜਨਆਯਾਮਂ, ਅਟ੍ਠਯੋਜਨਵਿਤ੍ਥਤਂ;

ਨ ਤਮ੍ਹਿ ਨਗਰੇ ਅਤ੍ਥਿ, ਕਟ੍ਠਂ ਵਲ੍ਲੀ ਚ ਮਤ੍ਤਿਕਾ.

੭੩. ‘‘ਤਿਰਿਯਂ ਯੋਜਨਂ ਆਸਿ, ਅਦ੍ਧਯੋਜਨਵਿਤ੍ਥਤਂ;

ਮਙ੍ਗਲੋ ਨਾਮ ਪਾਸਾਦੋ, ਵਿਸ੍ਸਕਮ੍ਮੇਨ ਮਾਪਿਤੋ.

੭੪. ‘‘ਚੁਲ੍ਲਾਸੀਤਿਸਹਸ੍ਸਾਨਿ, ਥਮ੍ਭਾ ਸੋਣ੍ਣਮਯਾ ਅਹੁਂ;

ਮਣਿਮਯਾ ਚ ਨਿਯ੍ਯੂਹਾ, ਛਦਨਂ ਰੂਪਿਯਂ ਅਹੁ.

੭੫. ‘‘ਸਬ੍ਬਸੋਣ੍ਣਮਯਂ ਘਰਂ, ਵਿਸ੍ਸਕਮ੍ਮੇਨ ਮਾਪਿਤਂ;

ਅਜ੍ਝਾਵੁਤ੍ਥਂ ਮਯਾ ਏਤਂ, ਘਰਦਾਨਸ੍ਸਿਦਂ ਫਲਂ.

੭੬. ‘‘ਤੇ ਸਬ੍ਬੇ ਅਨੁਭੋਤ੍ਵਾਨ, ਦੇਵਮਾਨੁਸਕੇ ਭਵੇ;

ਅਜ੍ਝਪਤ੍ਤੋਮ੍ਹਿ ਨਿਬ੍ਬਾਨਂ, ਸਨ੍ਤਿਪਦਮਨੁਤ੍ਤਰਂ.

੭੭. ‘‘ਤਿਂਸਕਪ੍ਪਸਹਸ੍ਸਮ੍ਹਿ, ਬੋਧਿਘਰਮਕਾਰਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਘਰਦਾਨਸ੍ਸਿਦਂ ਫਲਂ.

੭੮. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੭੯. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੮੦. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਬੋਧਿਘਰਦਾਯਕੋ ਥੇਰੋ ਇਮਾ ਗਾਥਾਯੋ

ਅਭਾਸਿਤ੍ਥਾਤਿ.

ਬੋਧਿਘਰਦਾਯਕਤ੍ਥੇਰਸ੍ਸਾਪਦਾਨਂ ਦਸਮਂ.

ਵਿਭੀਤਕਵਗ੍ਗੋ ਪਞ੍ਚਚਤ੍ਤਾਲੀਸਮੋ.