੯. ਅਮ੍ਬਪਿਣ੍ਡਿਯਤ੍ਥੇਰਅਪਦਾਨਂ

੭੨. ‘‘ਹਤ੍ਥਿਰਾਜਾ ਤਦਾ ਆਸਿਂ, ਈਸਾਦਨ੍ਤੋ ਉਰੁਲ਼੍ਹਵਾ;

ਵਿਚਰਨ੍ਤੋ ਬ੍ਰਹਾਰਞ੍ਞੇ, ਅਦ੍ਦਸਂ ਲੋਕਨਾਯਕਂ.

੭੩. ‘‘ਅਮ੍ਬਪਿਣ੍ਡਂ ਗਹੇਤ੍ਵਾਨ, ਅਦਾਸਿਂ ਸਤ੍ਥੁਨੋ ਅਹਂ;

ਪਟਿਗ੍ਗਣ੍ਹਿ ਮਹਾਵੀਰੋ, ਸਿਦ੍ਧਤ੍ਥੋ ਲੋਕਨਾਯਕੋ.

੭੪. ‘‘ਮਮ ਨਿਜ੍ਝਾਯਮਾਨਸ੍ਸ, ਪਰਿਭੁਞ੍ਜਿ ਤਦਾ ਜਿਨੋ;

ਤਤ੍ਥ ਚਿਤ੍ਤਂ ਪਸਾਦੇਤ੍ਵਾ, ਤੁਸਿਤਂ ਉਪਪਜ੍ਜਹਂ.

੭੫. ‘‘ਤਤੋ ਅਹਂ ਚਵਿਤ੍ਵਾਨ, ਚਕ੍ਕਵਤ੍ਤੀ ਅਹੋਸਹਂ;

ਏਤੇਨੇਵ ਉਪਾਯੇਨ, ਅਨੁਭੁਤ੍ਵਾਨ ਸਮ੍ਪਦਾ.

੭੬. ‘‘ਪਧਾਨਪਹਿਤਤ੍ਤੋਹਂ, ਉਪਸਨ੍ਤੋ ਨਿਰੂਪਧਿ;

ਸਬ੍ਬਾਸਵੇ ਪਰਿਞ੍ਞਾਯ, ਵਿਹਰਾਮਿ ਅਨਾਸਵੋ.

੭੭. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਫਲਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਫਲਦਾਨਸ੍ਸਿਦਂ ਫਲਂ.

੭੮. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੭੯. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੮੦. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਅਮ੍ਬਪਿਣ੍ਡਿਯੋ ਥੇਰੋ ਇਮਾ ਗਾਥਾਯੋ

ਅਭਾਸਿਤ੍ਥਾਤਿ.

ਅਮ੍ਬਪਿਣ੍ਡਿਯਤ੍ਥੇਰਸ੍ਸਾਪਦਾਨਂ ਨਵਮਂ.