੧. ਸਕਿਂਸਮ੍ਮਜ੍ਜਕਤ੍ਥੇਰਅਪਦਾਨਂ

੧. ‘‘ਵਿਪਸ੍ਸਿਨੋ ਭਗਵਤੋ, ਪਾਟਲਿਂ ਬੋਧਿਮੁਤ੍ਤਮਂ;

ਦਿਸ੍ਵਾਵ ਤਂ ਪਾਦਪਗ੍ਗਂ, ਤਤ੍ਥ ਚਿਤ੍ਤਂ ਪਸਾਦਯਿਂ.

੨. ‘‘ਸਮ੍ਮਜ੍ਜਨਿਂ ਗਹੇਤ੍ਵਾਨ, ਬੋਧਿਂ ਸਮ੍ਮਜ੍ਜਿ ਤਾਵਦੇ;

ਸਮ੍ਮਜ੍ਜਿਤ੍ਵਾਨ ਤਂ ਬੋਧਿਂ, ਅਵਨ੍ਦਿਂ ਪਾਟਲਿਂ ਅਹਂ.

੩. ‘‘ਤਤ੍ਥ ਚਿਤ੍ਤਂ ਪਸਾਦੇਤ੍ਵਾ, ਸਿਰੇ ਕਤ੍ਵਾਨ ਅਞ੍ਜਲਿਂ;

ਨਮਸ੍ਸਮਾਨੋ ਤਂ ਬੋਧਿਂ, ਗਞ੍ਛਿਂ ਪਟਿਕੁਟਿਂ ਅਹਂ.

੪. ‘‘ਤਾਦਿਮਗ੍ਗੇਨ ਗਚ੍ਛਾਮਿ, ਸਰਨ੍ਤੋ ਬੋਧਿਮੁਤ੍ਤਮਂ;

ਅਜਗਰੋ ਮਂ ਪੀਲ਼ੇਸਿ, ਘੋਰਰੂਪੋ ਮਹਬ੍ਬਲੋ.

੫. ‘‘ਆਸਨ੍ਨੇ ਮੇ ਕਤਂ ਕਮ੍ਮਂ, ਫਲੇਨ ਤੋਸਯੀ ਮਮਂ;

ਕਲ਼ੇਵਰਂ ਮੇ ਗਿਲਤਿ, ਦੇਵਲੋਕੇ ਰਮਾਮਹਂ.

੬. ‘‘ਅਨਾਵਿਲਂ ਮਮ ਚਿਤ੍ਤਂ, ਵਿਸੁਦ੍ਧਂ ਪਣ੍ਡਰਂ ਸਦਾ;

ਸੋਕਸਲ੍ਲਂ ਨ ਜਾਨਾਮਿ, ਚਿਤ੍ਤਸਨ੍ਤਾਪਨਂ ਮਮ.

੭. ‘‘ਕੁਟ੍ਠਂ ਗਣ੍ਡੋ ਕਿਲਾਸੋ ਚ, ਅਪਮਾਰੋ ਵਿਤਚ੍ਛਿਕਾ;

ਦਦ੍ਦੁ ਕਣ੍ਡੁ ਚ ਮੇ ਨਤ੍ਥਿ, ਫਲਂ ਸਮ੍ਮਜ੍ਜਨਾਯਿਦਂ [ਸਮ੍ਮਜ੍ਜਨੇ ਇਦਂ (ਸੀ.)].

੮. ‘‘ਸੋਕੋ ਚ ਪਰਿਦੇਵੋ ਚ, ਹਦਯੇ ਮੇ ਨ ਵਿਜ੍ਜਤਿ;

ਅਭਨ੍ਤਂ ਉਜੁਕਂ ਚਿਤ੍ਤਂ, ਫਲਂ ਸਮ੍ਮਜ੍ਜਨਾਯਿਦਂ.

੯. ‘‘ਸਮਾਧੀਸੁ ਨ ਮਜ੍ਜਾਮਿ [ਸਮਾਧੀਸੁ ਨ ਸਜ੍ਜਾਮਿ (ਸੀ.), ਸਮਾਧਿਂ ਪੁਨ ਪਜ੍ਜਾਮਿ (ਸ੍ਯਾ)], ਵਿਸਦਂ ਹੋਤਿ ਮਾਨਸਂ;

ਯਂ ਯਂ ਸਮਾਧਿਮਿਚ੍ਛਾਮਿ, ਸੋ ਸੋ ਸਮ੍ਪਜ੍ਜਤੇ ਮਮਂ.

੧੦. ‘‘ਰਜਨੀਯੇ ਨ ਰਜ੍ਜਾਮਿ, ਅਥੋ ਦੁਸ੍ਸਨਿਯੇਸੁ [ਦੋਸਨਿਯੇਸੁ (ਸੀ. ਸ੍ਯਾ. ਕ.)] ਚ;

ਮੋਹਨੀਯੇ ਨ ਮੁਯ੍ਹਾਮਿ, ਫਲਂ ਸਮ੍ਮਜ੍ਜਨਾਯਿਦਂ.

੧੧. ‘‘ਏਕਨਵੁਤਿਤੋ [ਏਕਨਵੁਤੇ ਇਤੋ (ਸੀ. ਸ੍ਯਾ.)] ਕਪ੍ਪੇ, ਯਂ ਕਮ੍ਮਮਕਰਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਫਲਂ ਸਮ੍ਮਜ੍ਜਨਾਯਿਦਂ.

੧੨. ‘‘ਕਿਲੇਸਾ ਝਾਪਿਤਾ ਮਯ੍ਹਂ, ਭਵਾ ਸਬ੍ਬੇ ਸਮੂਹਤਾ;

ਨਾਗੋਵ ਬਨ੍ਧਨਂ ਛੇਤ੍ਵਾ, ਵਿਹਰਾਮਿ ਅਨਾਸਵੋ.

੧੩. ‘‘ਸ੍ਵਾਗਤਂ ਵਤ ਮੇ ਆਸਿ, ਮਮ ਬੁਦ੍ਧਸ੍ਸ ਸਨ੍ਤਿਕੇ;

ਤਿਸ੍ਸੋ ਵਿਜ੍ਜਾ ਅਨੁਪ੍ਪਤ੍ਤਾ, ਕਤਂ ਬੁਦ੍ਧਸ੍ਸ ਸਾਸਨਂ.

੧੪. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;

ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਸਕਿਂਸਮ੍ਮਜ੍ਜਕੋ ਥੇਰੋ ਇਮਾ ਗਾਥਾਯੋ

ਅਭਾਸਿਤ੍ਥਾਤਿ.

ਸਕਿਂਸਮ੍ਮਜ੍ਜਕਤ੍ਥੇਰਸ੍ਸਾਪਦਾਨਂ ਪਠਮਂ.