੯. ਪਤ੍ਥੋਦਨਦਾਯਕਤ੍ਥੇਰਅਪਦਾਨਂ

੧੭੦. ‘‘ਵਨਚਾਰੀ ਪੁਰੇ ਆਸਿਂ, ਸਤਤਂ ਵਨਕਮ੍ਮਿਕੋ;

ਪਤ੍ਥੋਦਨਂ ਗਹੇਤ੍ਵਾਨ, ਕਮ੍ਮਨ੍ਤਂ ਅਗਮਾਸਹਂ.

੧੭੧. ‘‘ਤਤ੍ਥਦ੍ਦਸਾਸਿਂ ਸਮ੍ਬੁਦ੍ਧਂ, ਸਯਮ੍ਭੁਂ ਅਪਰਾਜਿਤਂ;

ਵਨਾ ਪਿਣ੍ਡਾਯ ਨਿਕ੍ਖਨ੍ਤਂ, ਦਿਸ੍ਵਾ ਚਿਤ੍ਤਂ ਪਸਾਦਯਿਂ.

੧੭੨. ‘‘ਪਰਕਮ੍ਮਾਯਨੇ [ਵਯਕਮ੍ਮਾਯਨੇ (ਕ.)] ਯੁਤ੍ਤੋ, ਪੁਞ੍ਞਞ੍ਚ ਮੇ ਨ ਵਿਜ੍ਜਤਿ;

ਅਯਂ ਪਤ੍ਥੋਦਨੋ ਅਤ੍ਥਿ, ਭੋਜਯਿਸ੍ਸਾਮਹਂ [ਭੋਜਯਿਸ੍ਸਾਮਿ ਮਂ (ਸ੍ਯਾ.)] ਮੁਨਿਂ.

੧੭੩. ‘‘ਪਤ੍ਥੋਦਨਂ ਗਹੇਤ੍ਵਾਨ, ਸਯਮ੍ਭੁਸ੍ਸ ਅਦਾਸਹਂ;

ਮਮ ਨਿਜ੍ਝਾਯਮਾਨਸ੍ਸ, ਪਰਿਭੁਞ੍ਜਿ ਤਦਾ ਮੁਨਿ.

੧੭੪. ‘‘ਤੇਨ ਕਮ੍ਮੇਨ ਸੁਕਤੇਨ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸਮਗਚ੍ਛਹਂ.

੧੭੫. ‘‘ਛਤ੍ਤਿਂਸਕ੍ਖਤ੍ਤੁਂ ਦੇਵਿਨ੍ਦੋ, ਦੇਵਰਜ੍ਜਮਕਾਰਯਿਂ;

ਤੇਤ੍ਤਿਂਸਕ੍ਖਤ੍ਤੁਂ ਰਾਜਾ ਚ, ਚਕ੍ਕਵਤ੍ਤੀ ਅਹੋਸਹਂ.

੧੭੬. ‘‘ਪਦੇਸਰਜ੍ਜਂ ਵਿਪੁਲਂ, ਗਣਨਾਤੋ ਅਸਙ੍ਖਿਯਂ;

ਸੁਖਿਤੋ ਯਸਵਾ ਹੋਮਿ, ਪਤ੍ਥੋਦਨਸ੍ਸਿਦਂ ਫਲਂ.

੧੭੭. ‘‘ਭਵਾਭਵੇ ਸਂਸਰਨ੍ਤੋ, ਲਭਾਮਿ ਅਮਿਤਂ ਧਨਂ;

ਭੋਗੇ ਮੇ ਊਨਤਾ ਨਤ੍ਥਿ, ਪਤ੍ਥੋਦਨਸ੍ਸਿਦਂ ਫਲਂ.

੧੭੮. ‘‘ਨਦੀਸੋਤਪਟਿਭਾਗਾ, ਭੋਗਾ ਨਿਬ੍ਬਤ੍ਤਰੇ ਮਮ;

ਪਰਿਮੇਤੁਂ ਨ ਸਕ੍ਕੋਮਿ, ਪਤ੍ਥੋਦਨਸ੍ਸਿਦਂ ਫਲਂ.

੧੭੯. ‘‘ਇਮਂ ਖਾਦ ਇਮਂ ਭੁਞ੍ਜ, ਇਮਮ੍ਹਿ ਸਯਨੇ ਸਯ;

ਤੇਨਾਹਂ ਸੁਖਿਤੋ ਹੋਮਿ, ਪਤ੍ਥੋਦਨਸ੍ਸਿਦਂ ਫਲਂ.

੧੮੦. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਦਾਨਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਪਤ੍ਥੋਦਨਸ੍ਸਿਦਂ ਫਲਂ.

੧੮੧. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੧੮੨. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੧੮੩. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਪਤ੍ਥੋਦਨਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਪਤ੍ਥੋਦਨਦਾਯਕਤ੍ਥੇਰਸ੍ਸਾਪਦਾਨਂ ਨਵਮਂ.