੧੦. ਮਞ੍ਚਦਾਯਕਤ੍ਥੇਰਅਪਦਾਨਂ

੧੮੪. ‘‘ਪਰਿਨਿਬ੍ਬੁਤੇ ਕਾਰੁਣਿਕੇ, ਸਿਦ੍ਧਤ੍ਥੇ ਲੋਕਨਾਯਕੇ;

ਵਿਤ੍ਥਾਰਿਕੇ ਪਾਵਚਨੇ, ਦੇਵਮਾਨੁਸਸਕ੍ਕਤੇ.

੧੮੫. ‘‘ਚਣ੍ਡਾਲੋ ਆਸਹਂ ਤਤ੍ਥ, ਆਸਨ੍ਦਿਪੀਠਕਾਰਕੋ;

ਤੇਨ ਕਮ੍ਮੇਨ ਜੀਵਾਮਿ, ਤੇਨ ਪੋਸੇਮਿ ਦਾਰਕੇ.

੧੮੬. ‘‘ਆਸਨ੍ਦਿਂ ਸੁਕਤਂ ਕਤ੍ਵਾ, ਪਸਨ੍ਨੋ ਸੇਹਿ ਪਾਣਿਭਿ;

ਸਯਮੇਵੁਪਗਨ੍ਤ੍ਵਾਨ, ਭਿਕ੍ਖੁਸਙ੍ਘਸ੍ਸਦਾਸਹਂ.

੧੮੭. ‘‘ਤੇਨ ਕਮ੍ਮੇਨ ਸੁਕਤੇਨ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸਮਗਚ੍ਛਹਂ.

੧੮੮. ‘‘ਦੇਵਲੋਕਗਤੋ ਸਨ੍ਤੋ, ਮੋਦਾਮਿ ਤਿਦਸੇ ਗਣੇ;

ਸਯਨਾਨਿ ਮਹਗ੍ਘਾਨਿ, ਨਿਬ੍ਬਤ੍ਤਨ੍ਤਿ ਯਦਿਚ੍ਛਕਂ.

੧੮੯. ‘‘ਪਞ੍ਞਾਸਕ੍ਖਤ੍ਤੁਂ ਦੇਵਿਨ੍ਦੋ, ਦੇਵਰਜ੍ਜਮਕਾਰਯਿਂ;

ਅਸੀਤਿਕ੍ਖਤ੍ਤੁਂ ਰਾਜਾ ਚ, ਚਕ੍ਕਵਤ੍ਤੀ ਅਹੋਸਹਂ.

੧੯੦. ‘‘ਪਦੇਸਰਜ੍ਜਂ ਵਿਪੁਲਂ, ਗਣਨਾਤੋ ਅਸਙ੍ਖਿਯਂ;

ਸੁਖਿਤੋ ਯਸਵਾ ਹੋਮਿ, ਮਞ੍ਚਦਾਨਸ੍ਸਿਦਂ ਫਲਂ.

੧੯੧. ‘‘ਦੇਵਲੋਕਾ ਚਵਿਤ੍ਵਾਨ, ਏਮਿ ਚੇ ਮਾਨੁਸਂ ਭਵਂ;

ਮਹਾਰਹਾ ਸੁਸਯਨਾ, ਸਯਮੇਵ ਭਵਨ੍ਤਿ ਮੇ.

੧੯੨. ‘‘ਅਯਂ ਪਚ੍ਛਿਮਕੋ ਮਯ੍ਹਂ, ਚਰਿਮੋ ਵਤ੍ਤਤੇ ਭਵੋ;

ਅਜ੍ਜਾਪਿ ਸਯਨੇ ਕਾਲੇ [ਸਯਨਕਾਲੇ (ਸ੍ਯਾ.)], ਸਯਨਂ ਉਪਤਿਟ੍ਠਤਿ.

੧੯੩. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਦਾਨਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਮਞ੍ਚਦਾਨਸ੍ਸਿਦਂ ਫਲਂ.

੧੯੪. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੧੯੫. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੧੯੬. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਮਞ੍ਚਦਾਯਕੋ ਥੇਰੋ ਇਮਾ ਗਾਥਾਯੋ

ਅਭਾਸਿਤ੍ਥਾਤਿ.

ਮਞ੍ਚਦਾਯਕਤ੍ਥੇਰਸ੍ਸਾਪਦਾਨਂ ਦਸਮਂ.

ਭਦ੍ਦਾਲਿਵਗ੍ਗੋ ਬਾਚਤ੍ਤਾਲੀਸਮੋ.