੮. ਯਾਗੁਦਾਯਕਤ੍ਥੇਰਅਪਦਾਨਂ

੧੪੯. ‘‘ਅਤਿਥਿਂ [ਅਤੀਤਂ (ਕ.)] ਮੇ ਗਹੇਤ੍ਵਾਨ, ਅਗਚ੍ਛਿਂ ਗਾਮਕਂ ਤਦਾ;

ਸਮ੍ਪੁਣ੍ਣਨਦਿਕਂ ਦਿਸ੍ਵਾ, ਸਙ੍ਘਾਰਾਮਂ ਉਪਾਗਮਿਂ.

੧੫੦. ‘‘ਆਰਞ੍ਞਕਾ ਧੁਤਧਰਾ, ਝਾਯਿਨੋ ਲੂਖਚੀਵਰਾ;

ਵਿਵੇਕਾਭਿਰਤਾ ਧੀਰਾ, ਸਙ੍ਘਾਰਾਮੇ ਵਸਨ੍ਤਿ ਤੇ.

੧੫੧. ‘‘ਗਤਿ ਤੇਸਂ ਉਪਚ੍ਛਿਨ੍ਨਾ, ਸੁਵਿਮੁਤ੍ਤਾਨ ਤਾਦਿਨਂ;

ਪਿਣ੍ਡਾਯ ਤੇ ਨ ਗਚ੍ਛਨ੍ਤਿ, ਓਰੁਦ੍ਧਨਦਿਤਾਯ ਹਿ [ਓਰੁਦ੍ਧਨਦਿਕਾਯਤਿਂ (ਸ੍ਯਾ.)].

੧੫੨. ‘‘ਪਸਨ੍ਨਚਿਤ੍ਤੋ ਸੁਮਨੋ, ਵੇਦਜਾਤੋ ਕਤਞ੍ਜਲੀ;

ਤਣ੍ਡੁਲਂ ਮੇ ਗਹੇਤ੍ਵਾਨ, ਯਾਗੁਦਾਨਂ ਅਦਾਸਹਂ.

੧੫੩. ‘‘ਪਞ੍ਚਨ੍ਨਂ ਯਾਗੁਂ ਦਤ੍ਵਾਨ, ਪਸਨ੍ਨੋ ਸੇਹਿ ਪਾਣਿਭਿ;

ਸਕਕਮ੍ਮਾਭਿਰਦ੍ਧੋਹਂ, ਤਾਵਤਿਂਸਮਗਚ੍ਛਹਂ.

੧੫੪. ‘‘ਮਣਿਮਯਞ੍ਚ ਮੇ ਬ੍ਯਮ੍ਹਂ, ਨਿਬ੍ਬਤ੍ਤਿ ਤਿਦਸੇ ਗਣੇ;

ਨਾਰੀਗਣੇਹਿ ਸਹਿਤੋ, ਮੋਦਾਮਿ ਬ੍ਯਮ੍ਹਮੁਤ੍ਤਮੇ.

੧੫੫. ‘‘ਤੇਤ੍ਤਿਂਸਕ੍ਖਤ੍ਤੁਂ ਦੇਵਿਨ੍ਦੋ, ਦੇਵਰਜ੍ਜਮਕਾਰਯਿਂ;

ਤਿਂਸਕ੍ਖਤ੍ਤੁਂ ਚਕ੍ਕਵਤ੍ਤੀ, ਮਹਾਰਜ੍ਜਮਕਾਰਯਿਂ.

੧੫੬. ‘‘ਪਦੇਸਰਜ੍ਜਂ ਵਿਪੁਲਂ, ਗਣਨਾਤੋ ਅਸਙ੍ਖਿਯਂ;

ਦੇਵਲੋਕੇ ਮਨੁਸ੍ਸੇ ਵਾ, ਅਨੁਭੋਤ੍ਵਾ ਸਯਂ [ਯਸਂ (ਸ੍ਯਾ.)] ਅਹਂ.

੧੫੭. ‘‘ਪਚ੍ਛਿਮੇ ਭਵੇ ਸਮ੍ਪਤ੍ਤੇ, ਪਬ੍ਬਜਿਂ ਅਨਗਾਰਿਯਂ;

ਸਹ ਓਰੋਪਿਤੇ ਕੇਸੇ, ਸਬ੍ਬਂ ਸਮ੍ਪਟਿਵਿਜ੍ਝਹਂ.

੧੫੮. ‘‘ਖਯਤੋ ਵਯਤੋ ਚਾਪਿ, ਸਮ੍ਮਸਨ੍ਤੋ ਕਲ਼ੇਵਰਂ;

ਪੁਰੇ ਸਿਕ੍ਖਾਪਦਾਦਾਨਾ, ਅਰਹਤ੍ਤਮਪਾਪੁਣਿਂ.

੧੫੯. ‘‘ਸੁਦਿਨ੍ਨਂ ਮੇ ਦਾਨਵਰਂ, ਵਾਣਿਜ੍ਜਂ ਸਮ੍ਪਯੋਜਿਤਂ;

ਤੇਨੇਵ ਯਾਗੁਦਾਨੇਨ, ਪਤ੍ਤੋਮ੍ਹਿ ਅਚਲਂ ਪਦਂ.

੧੬੦. ‘‘ਸੋਕਂ ਪਰਿਦ੍ਦਵਂ ਬ੍ਯਾਧਿਂ, ਦਰਥਂ ਚਿਤ੍ਤਤਾਪਨਂ;

ਨਾਭਿਜਾਨਾਮਿ ਉਪ੍ਪਨ੍ਨਂ, ਯਾਗੁਦਾਨਸ੍ਸਿਦਂ ਫਲਂ.

੧੬੧. ‘‘ਯਾਗੁਂ ਸਙ੍ਘਸ੍ਸ ਦਤ੍ਵਾਨ, ਪੁਞ੍ਞਕ੍ਖੇਤ੍ਤੇ ਅਨੁਤ੍ਤਰੇ;

ਪਞ੍ਚਾਨਿਸਂਸੇ ਅਨੁਭੋਮਿ, ਅਹੋ ਯਾਗੁਸੁਯਿਟ੍ਠਤਾ.

੧੬੨. ‘‘ਅਬ੍ਯਾਧਿਤਾ ਰੂਪਵਤਾ, ਖਿਪ੍ਪਂ ਧਮ੍ਮਨਿਸਨ੍ਤਿਤਾ [ਨਿਬੁਜ੍ਝਿਤਾ (ਸ੍ਯਾ.)];

ਲਾਭਿਤਾ ਅਨ੍ਨਪਾਨਸ੍ਸ, ਆਯੁ ਪਞ੍ਚਮਕਂ ਮਮ.

੧੬੩. ‘‘ਯੋ ਕੋਚਿ ਵੇਦਂ ਜਨਯਂ, ਸਙ੍ਘੇ ਯਾਗੁਂ ਦਦੇਯ੍ਯ ਸੋ;

ਇਮਾਨਿ ਪਞ੍ਚ ਠਾਨਾਨਿ, ਪਟਿਗਣ੍ਹੇਯ੍ਯ ਪਣ੍ਡਿਤੋ.

੧੬੪. ‘‘ਕਰਣੀਯਂ ਕਤਂ ਸਬ੍ਬਂ, ਭਵਾ ਉਗ੍ਘਾਟਿਤਾ ਮਯਾ;

ਸਬ੍ਬਾਸਵਾ ਪਰਿਕ੍ਖੀਣਾ, ਨਤ੍ਥਿ ਦਾਨਿ ਪੁਨਬ੍ਭਵੋ.

੧੬੫. ‘‘ਸੋ ਅਹਂ ਵਿਚਰਿਸ੍ਸਾਮਿ, ਗਾਮਾ ਗਾਮਂ ਪੁਰਾ ਪੁਰਂ;

ਨਮਸ੍ਸਮਾਨੋ ਸਮ੍ਬੁਦ੍ਧਂ, ਧਮ੍ਮਸ੍ਸ ਚ ਸੁਧਮ੍ਮਤਂ.

੧੬੬. ‘‘ਤਿਂਸਕਪ੍ਪਸਹਸ੍ਸਮ੍ਹਿ, ਯਂ ਦਾਨਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਯਾਗੁਦਾਨਸ੍ਸਿਦਂ ਫਲਂ.

੧੬੭. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੧੬੮. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੧੬੯. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਯਾਗੁਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਯਾਗੁਦਾਯਕਤ੍ਥੇਰਸ੍ਸਾਪਦਾਨਂ ਅਟ੍ਠਮਂ.