੬. ਏਕਦੀਪਿਯਤ੍ਥੇਰਅਪਦਾਨਂ

੧੨੪. ‘‘ਪਰਿਨਿਬ੍ਬੁਤੇ ਸੁਗਤੇ, ਸਿਦ੍ਧਤ੍ਥੇ ਲੋਕਨਾਯਕੇ;

ਸਦੇਵਮਾਨੁਸਾ ਸਬ੍ਬੇ, ਪੂਜੇਨ੍ਤਿ ਦ੍ਵਿਪਦੁਤ੍ਤਮਂ.

੧੨੫. ‘‘ਆਰੋਪਿਤੇ ਚ ਚਿਤਕੇ, ਸਿਦ੍ਧਤ੍ਥੇ ਲੋਕਨਾਯਕੇ;

ਯਥਾਸਕੇਨ ਥਾਮੇਨ, ਚਿਤਂ ਪੂਜੇਨ੍ਤਿ ਸਤ੍ਥੁਨੋ.

੧੨੬. ‘‘ਅਵਿਦੂਰੇ ਚਿਤਕਸ੍ਸ, ਦੀਪਂ ਉਜ੍ਜਾਲਯਿਂ ਅਹਂ;

ਯਾਵ ਉਦੇਤਿ ਸੂਰਿਯੋ, ਦੀਪਂ ਮੇ ਤਾਵ ਉਜ੍ਜਲਿ.

੧੨੭. ‘‘ਤੇਨ ਕਮ੍ਮੇਨ ਸੁਕਤੇਨ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸਮਗਚ੍ਛਹਂ.

੧੨੮. ‘‘ਤਤ੍ਥ ਮੇ ਸੁਕਤਂ ਬ੍ਯਮ੍ਹਂ, ਏਕਦੀਪੀਤਿ ਞਾਯਤਿ;

ਦੀਪਸਤਸਹਸ੍ਸਾਨਿ, ਬ੍ਯਮ੍ਹੇ ਪਜ੍ਜਲਰੇ ਮਮ.

੧੨੯. ‘‘ਉਦਯਨ੍ਤੋਵ ਸੂਰਿਯੋ, ਦੇਹੋ ਮੇ ਜੋਤਤੇ ਸਦਾ;

ਸਪ੍ਪਭਾਹਿ ਸਰੀਰਸ੍ਸ, ਆਲੋਕੋ ਹੋਤਿ ਮੇ ਸਦਾ.

੧੩੦. ‘‘ਤਿਰੋਕੁਟ੍ਟਂ [ਤਿਰੋਕੁਡ੍ਡਂ (ਸੀ. ਸ੍ਯਾ. ਕ.)] ਤਿਰੋਸੇਲਂ, ਸਮਤਿਗ੍ਗਯ੍ਹ [ਸਬ੍ਬਤ੍ਥਪਿ ਏਵਮੇਵ ਦਿਸ੍ਸਤਿ] ਪਬ੍ਬਤਂ;

ਸਮਨ੍ਤਾ ਯੋਜਨਸਤਂ, ਪਸ੍ਸਾਮਿ ਚਕ੍ਖੁਨਾ ਅਹਂ.

੧੩੧. ‘‘ਸਤ੍ਤਸਤ੍ਤਤਿਕ੍ਖਤ੍ਤੁਞ੍ਚ, ਦੇਵਲੋਕੇ ਰਮਿਂ ਅਹਂ;

ਏਕਤਿਂਸਤਿਕ੍ਖਤ੍ਤੁਞ੍ਚ, ਦੇਵਰਜ੍ਜਮਕਾਰਯਿਂ.

੧੩੨. ‘‘ਅਟ੍ਠਵੀਸਤਿਕ੍ਖਤ੍ਤੁਞ੍ਚ, ਚਕ੍ਕਵਤ੍ਤੀ ਅਹੋਸਹਂ;

ਪਦੇਸਰਜ੍ਜਂ ਵਿਪੁਲਂ, ਗਣਨਾਤੋ ਅਸਙ੍ਖਿਯਂ.

੧੩੩. ‘‘ਦੇਵਲੋਕਾ ਚਵਿਤ੍ਵਾਨ, ਨਿਬ੍ਬਤ੍ਤਿਂ ਮਾਤੁਕੁਚ੍ਛਿਯਂ;

ਮਾਤੁਕੁਚ੍ਛਿਗਤਸ੍ਸਾਪਿ, ਅਕ੍ਖਿ ਮੇ ਨ ਨਿਮੀਲਤਿ.

੧੩੪. ‘‘ਜਾਤਿਯਾ ਚਤੁਵਸ੍ਸੋਹਂ, ਪਬ੍ਬਜਿਂ ਅਨਗਾਰਿਯਂ;

ਅਡ੍ਢਮਾਸੇ ਅਸਮ੍ਪਤ੍ਤੇ, ਅਰਹਤ੍ਤਮਪਾਪੁਣਿਂ.

੧੩੫. ‘‘ਦਿਬ੍ਬਚਕ੍ਖੁਂ ਵਿਸੋਧੇਸਿਂ, ਭਵਾ ਸਬ੍ਬੇ ਸਮੂਹਤਾ;

ਸਬ੍ਬੇ ਕਿਲੇਸਾ ਸਞ੍ਛਿਨ੍ਨਾ, ਏਕਦੀਪਸ੍ਸਿਦਂ ਫਲਂ.

੧੩੬. ‘‘ਤਿਰੋਕੁਟ੍ਟਂ ਤਿਰੋਸੇਲਂ, ਪਬ੍ਬਤਞ੍ਚਾਪਿ ਕੇਵਲਂ;

ਸਮਤਿਕ੍ਕਮ੍ਮ [ਸਬ੍ਬਤ੍ਥਪੀ ਏਵਮੇਵ ਦਿਸ੍ਸਤਿ] ਪਸ੍ਸਾਮਿ, ਏਕਦੀਪਸ੍ਸਿਦਂ ਫਲਂ.

੧੩੭. ‘‘ਵਿਸਮਾ ਮੇ ਸਮਾ ਹੋਨ੍ਤਿ, ਅਨ੍ਧਕਾਰੋ ਨ ਵਿਜ੍ਜਤਿ;

ਨਾਹਂ ਪਸ੍ਸਾਮਿ ਤਿਮਿਰਂ, ਏਕਦੀਪਸ੍ਸਿਦਂ ਫਲਂ.

੧੩੮. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਦੀਪਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਏਕਦੀਪਸ੍ਸਿਦਂ ਫਲਂ.

੧੩੯. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੧੪੦. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੧੪੧. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਏਕਦੀਪਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਏਕਦੀਪਿਯਤ੍ਥੇਰਸ੍ਸਾਪਦਾਨਂ ਛਟ੍ਠਂ.