੩. ਤਿਣਸੂਲਕਛਾਦਨਿਯਤ੍ਥੇਰਅਪਦਾਨਂ

੭੯. ‘‘ਜਾਤਿਂ ਜਰਞ੍ਚ ਮਰਣਂ, ਪਚ੍ਚਵੇਕ੍ਖਿਂ ਅਹਂ ਤਦਾ;

ਏਕਕੋ ਅਭਿਨਿਕ੍ਖਮ੍ਮ, ਪਬ੍ਬਜਿਂ ਅਨਗਾਰਿਯਂ.

੮੦. ‘‘ਚਰਮਾਨੋਨੁਪੁਬ੍ਬੇਨ, ਗਙ੍ਗਾਤੀਰਂ ਉਪਾਗਮਿਂ;

ਤਤ੍ਥਦ੍ਦਸਾਸਿਂ ਪਥਵਿਂ, ਗਙ੍ਗਾਤੀਰੇ ਸਮੁਨ੍ਨਤਂ.

੮੧. ‘‘ਅਸ੍ਸਮਂ ਤਤ੍ਥ ਮਾਪੇਤ੍ਵਾ, ਵਸਾਮਿ ਅਸ੍ਸਮੇ ਅਹਂ;

ਸੁਕਤੋ ਚਙ੍ਕਮੋ ਮਯ੍ਹਂ, ਨਾਨਾਦਿਜਗਣਾਯੁਤੋ.

੮੨. ‘‘ਮਮੁਪੇਨ੍ਤਿ ਚ ਵਿਸ੍ਸਤ੍ਥਾ, ਕੂਜਨ੍ਤਿ ਚ ਮਨੋਹਰਂ;

ਰਮਮਾਨੋ ਸਹ ਤੇਹਿ, ਵਸਾਮਿ ਅਸ੍ਸਮੇ ਅਹਂ.

੮੩. ‘‘ਮਮ ਅਸ੍ਸਮਸਾਮਨ੍ਤਾ, ਮਿਗਰਾਜਾ ਚਤੁਕ੍ਕਮੋ;

ਆਸਯਾ ਅਭਿਨਿਕ੍ਖਮ੍ਮ, ਗਜ੍ਜਿ ਸੋ ਅਸਨੀ ਵਿਯ.

੮੪. ‘‘ਨਦਿਤੇ ਮਿਗਰਾਜੇ ਚ, ਹਾਸੋ ਮੇ ਉਦਪਜ੍ਜਥ;

ਮਿਗਰਾਜਂ ਗਵੇਸਨ੍ਤੋ, ਅਦ੍ਦਸਂ ਲੋਕਨਾਯਕਂ.

੮੫. ‘‘ਦਿਸ੍ਵਾਨਾਹਂ ਦੇਵਦੇਵਂ, ਤਿਸ੍ਸਂ ਲੋਕਗ੍ਗਨਾਯਕਂ;

ਹਟ੍ਠੋ ਹਟ੍ਠੇਨ ਚਿਤ੍ਤੇਨ, ਪੂਜਯਿਂ ਨਾਗਕੇਸਰਂ.

੮੬. ‘‘ਉਗ੍ਗਚ੍ਛਨ੍ਤਂਵ ਸੂਰਿਯਂ, ਸਾਲਰਾਜਂਵ ਪੁਪ੍ਫਿਤਂ;

ਓਸਧਿਂਵ ਵਿਰੋਚਨ੍ਤਂ, ਸਨ੍ਥਵਿਂ ਲੋਕਨਾਯਕਂ.

੮੭. ‘‘‘ਤਵ ਞਾਣੇਨ ਸਬ੍ਬਞ੍ਞੁ, ਮੋਚੇਸਿਮਂ ਸਦੇਵਕਂ;

ਤਵਂ ਆਰਾਧਯਿਤ੍ਵਾਨ, ਜਾਤਿਯਾ ਪਰਿਮੁਚ੍ਚਰੇ.

੮੮. ‘‘‘ਅਦਸ੍ਸਨੇਨ ਸਬ੍ਬਞ੍ਞੁ, ਬੁਦ੍ਧਾਨਂ ਸਬ੍ਬਦਸ੍ਸਿਨਂ;

ਪਤਨ੍ਤਿਵੀਚਿਨਿਰਯਂ, ਰਾਗਦੋਸੇਹਿ ਓਫੁਟਾ [ਓਤ੍ਥਟਾ (ਸ੍ਯਾ.)].

੮੯. ‘‘‘ਤਵ ਦਸ੍ਸਨਮਾਗਮ੍ਮ, ਸਬ੍ਬਞ੍ਞੁ ਲੋਕਨਾਯਕ;

ਪਮੁਚ੍ਚਨ੍ਤਿ ਭਵਾ ਸਬ੍ਬਾ, ਫੁਸਨ੍ਤਿ ਅਮਤਂ ਪਦਂ.

੯੦. ‘‘‘ਯਦਾ ਬੁਦ੍ਧਾ ਚਕ੍ਖੁਮਨ੍ਤੋ, ਉਪ੍ਪਜ੍ਜਨ੍ਤਿ ਪਭਙ੍ਕਰਾ;

ਕਿਲੇਸੇ ਝਾਪਯਿਤ੍ਵਾਨ, ਆਲੋਕਂ ਦਸ੍ਸਯਨ੍ਤਿ ਤੇ’.

੯੧. ‘‘ਕਿਤ੍ਤਯਿਤ੍ਵਾਨ ਸਮ੍ਬੁਦ੍ਧਂ, ਤਿਸ੍ਸਂ ਲੋਕਗ੍ਗਨਾਯਕਂ;

ਹਟ੍ਠੋ ਹਟ੍ਠੇਨ ਚਿਤ੍ਤੇਨ, ਤਿਣਸੂਲਂ ਅਪੂਜਯਿਂ.

੯੨. ‘‘ਮਮ ਸਙ੍ਕਪ੍ਪਮਞ੍ਞਾਯ, ਤਿਸ੍ਸੋ ਲੋਕਗ੍ਗਨਾਯਕੋ;

ਸਕਾਸਨੇ ਨਿਸੀਦਿਤ੍ਵਾ, ਇਮਾ ਗਾਥਾ ਅਭਾਸਥ.

੯੩. ‘‘‘ਯੋ ਮਂ ਪੁਪ੍ਫੇਹਿ ਛਾਦੇਸਿ, ਪਸਨ੍ਨੋ ਸੇਹਿ ਪਾਣਿਭਿ;

ਤਮਹਂ ਕਿਤ੍ਤਯਿਸ੍ਸਾਮਿ, ਸੁਣਾਥ ਮਮ ਭਾਸਤੋ.

੯੪. ‘‘‘ਪਞ੍ਚਵੀਸਤਿਕ੍ਖਤ੍ਤੁਂ ਸੋ, ਦੇਵਰਜ੍ਜਂ ਕਰਿਸ੍ਸਤਿ;

ਪਞ੍ਚਸਤ੍ਤਤਿਕ੍ਖਤ੍ਤੁਞ੍ਚ, ਚਕ੍ਕਵਤ੍ਤੀ ਭਵਿਸ੍ਸਤਿ.

੯੫. ‘‘‘ਪਦੇਸਰਜ੍ਜਂ ਵਿਪੁਲਂ, ਗਣਨਾਤੋ ਅਸਙ੍ਖਿਯਂ;

ਤਸ੍ਸ ਕਮ੍ਮਨਿਸ੍ਸਨ੍ਦੇਨ [ਕਮ੍ਮਸ੍ਸ ਨਿਸ੍ਸਨ੍ਦੋ (ਸੀ. ਸ੍ਯਾ. ਪੀ.)], ਪੁਪ੍ਫਾਨਂ ਪੂਜਨਾਯ ਚ [ਸੋ (ਸ੍ਯਾ. ਪੀ.)].

੯੬. ‘‘‘ਸੀਸਂਨ੍ਹਾਤੋ ਚਯਂ ਪੋਸੋ, ਪੁਪ੍ਫਮਾਕਙ੍ਖਤੇ ਯਦਿ [ਸਾਯਂ ਪਾਤੋ ਚਯਂ ਪੋਸੋ, ਪੁਪ੍ਫੇਹਿ ਮਂ ਅਛਾਦਯਿ (ਸ੍ਯਾ.)];

ਪੁਞ੍ਞਕਮ੍ਮੇਨ ਸਂਯੁਤ੍ਤਂ [ਸਂਯੁਤ੍ਤੋ (ਸੀ. ਸ੍ਯਾ. ਪੀ.)], ਪੁਰਤੋ ਪਾਤੁਭਵਿਸ੍ਸਤਿ.

੯੭. ‘‘‘ਯਂ ਯਂ ਇਚ੍ਛਤਿ ਕਾਮੇਹਿ, ਤਂ ਤਂ ਪਾਤੁਭਵਿਸ੍ਸਤਿ;

ਸਙ੍ਕਪ੍ਪਂ ਪਰਿਪੂਰੇਤ੍ਵਾ, ਨਿਬ੍ਬਾਯਿਸ੍ਸਤਿਨਾਸਵੋ’.

ਅਟ੍ਠਾਰਸਮਂ ਭਾਣਵਾਰਂ.

੯੮. ‘‘ਕਿਲੇਸੇ ਝਾਪਯਿਤ੍ਵਾਨ, ਸਮ੍ਪਜਾਨੋ ਪਤਿਸ੍ਸਤੋ;

ਏਕਾਸਨੇ ਨਿਸੀਦਿਤ੍ਵਾ, ਅਰਹਤ੍ਤਮਪਾਪੁਣਿਂ.

੯੯. ‘‘ਚਙ੍ਕਮਨ੍ਤੋ ਨਿਪਜ੍ਜਨ੍ਤੋ, ਨਿਸਿਨ੍ਨੋ ਉਦ ਵਾ ਠਿਤੋ;

ਬੁਦ੍ਧਸੇਟ੍ਠਂ ਸਰਿਤ੍ਵਾਨ, ਵਿਹਰਾਮਿ ਅਹਂ ਸਦਾ.

੧੦੦. ‘‘ਚੀਵਰੇ ਪਿਣ੍ਡਪਾਤੇ ਚ, ਪਚ੍ਚਯੇ ਸਯਨਾਸਨੇ;

ਤਤ੍ਥ ਮੇ ਊਨਤਾ ਨਤ੍ਥਿ, ਬੁਦ੍ਧਪੂਜਾਯਿਦਂ ਫਲਂ.

੧੦੧. ‘‘ਸੋ ਦਾਨਿ ਪਤ੍ਤੋ ਅਮਤਂ, ਸਨ੍ਤਂ ਪਦਮਨੁਤ੍ਤਰਂ;

ਸਬ੍ਬਾਸਵੇ ਪਰਿਞ੍ਞਾਯ, ਵਿਹਰਾਮਿ ਅਨਾਸਵੋ.

੧੦੨. ‘‘ਦ੍ਵੇਨਵੁਤੇ ਇਤੋ ਕਪ੍ਪੇ, ਯਂ ਪੁਪ੍ਫਮਭਿਪੂਜਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

੧੦੩. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੧੦੪. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੧੦੫. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਤਿਣਸੂਲਕਛਾਦਨਿਯੋ [ਤਿਣਸੂਲਿਕਛਾਦਨਿਯੋ (ਕ.)] ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਤਿਣਸੂਲਕਛਾਦਨਿਯਤ੍ਥੇਰਸ੍ਸਾਪਦਾਨਂ ਤਤਿਯਂ.