੪. ਮਧੁਮਂਸਦਾਯਕਤ੍ਥੇਰਅਪਦਾਨਂ

੧੦੬. ‘‘ਨਗਰੇ ਬਨ੍ਧੁਮਤਿਯਾ, ਸੂਕਰਿਕੋ ਅਹੋਸਹਂ;

ਉਕ੍ਕੋਟਂ ਰਨ੍ਧਯਿਤ੍ਵਾਨ [ਉਕ੍ਕੋਟਕਂ ਰਨ੍ਧਯਿਤ੍ਵਾ (ਸੀ. ਸ੍ਯਾ.)], ਮਧੁਮਂਸਮ੍ਹਿ [ਮਧੁਸਪ੍ਪਿਮ੍ਹਿ (ਪੀ.), ਮਧੁਂ ਮਂਸਮ੍ਹਿ (ਕ.)] ਓਕਿਰਿਂ.

੧੦੭. ‘‘ਸਨ੍ਨਿਪਾਤਂ ਅਹਂ ਗਨ੍ਤ੍ਵਾ, ਏਕਂ ਪਤ੍ਤਂ ਗਹੇਸਹਂ;

ਪੂਰਯਿਤ੍ਵਾਨ ਤਂ ਪਤ੍ਤਂ, ਭਿਕ੍ਖੁਸਙ੍ਘਸ੍ਸਦਾਸਹਂ.

੧੦੮. ‘‘ਯੋਤ੍ਥ ਥੇਰਤਰੋ ਭਿਕ੍ਖੁ, ਨਿਯ੍ਯਾਦੇਸਿ ਮਮਂ ਤਦਾ;

ਇਮਿਨਾ ਪਤ੍ਤਪੂਰੇਨ, ਲਭਸ੍ਸੁ ਵਿਪੁਲਂ ਸੁਖਂ.

੧੦੯. ‘‘ਦੁਵੇ ਸਮ੍ਪਤ੍ਤਿਯੋ ਭੁਤ੍ਵਾ, ਸੁਕ੍ਕਮੂਲੇਨ ਚੋਦਿਤੋ;

ਪਚ੍ਛਿਮੇ ਵਤ੍ਤਮਾਨਮ੍ਹਿ, ਕਿਲੇਸੇ ਝਾਪਯਿਸ੍ਸਤਿ.

੧੧੦. ‘‘ਤਤ੍ਥ ਚਿਤ੍ਤਂ ਪਸਾਦੇਤ੍ਵਾ, ਤਾਵਤਿਂਸਮਗਚ੍ਛਹਂ;

ਤਤ੍ਥ ਭੁਤ੍ਵਾ ਪਿਵਿਤ੍ਵਾ ਚ, ਲਭਾਮਿ ਵਿਪੁਲਂ ਸੁਖਂ.

੧੧੧. ‘‘ਮਣ੍ਡਪੇ ਰੁਕ੍ਖਮੂਲੇ ਵਾ, ਪੁਬ੍ਬਕਮ੍ਮਂ ਅਨੁਸ੍ਸਰਿਂ;

ਅਨ੍ਨਪਾਨਾਭਿਵਸ੍ਸੋ ਮੇ, ਅਭਿਵਸ੍ਸਤਿ ਤਾਵਦੇ.

੧੧੨. ‘‘ਇਦਂ ਪਚ੍ਛਿਮਕਂ ਮਯ੍ਹਂ, ਚਰਿਮੋ ਵਤ੍ਤਤੇ ਭਵੋ;

ਇਧਾਪਿ ਅਨ੍ਨਪਾਨਂ ਮੇ, ਵਸ੍ਸਤੇ ਸਬ੍ਬਕਾਲਿਕਂ.

੧੧੩. ‘‘ਤੇਨੇਵ ਮਧੁਦਾਨੇਨ [ਮਂਸਦਾਨੇਨ (ਸੀ. ਪੀ.)], ਸਨ੍ਧਾਵਿਤ੍ਵਾ ਭਵੇ ਅਹਂ;

ਸਬ੍ਬਾਸਵੇ ਪਰਿਞ੍ਞਾਯ, ਵਿਹਰਾਮਿ ਅਨਾਸਵੋ.

੧੧੪. ‘‘ਏਕਨਵੁਤਿਤੋ ਕਪ੍ਪੇ, ਯਂ ਦਾਨਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਮਧੁਦਾਨਸ੍ਸਿਦਂ ਫਲਂ.

੧੧੫. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੧੧੬. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੧੧੭. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਮਧੁਮਂਸਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਮਧੁਮਂਸਦਾਯਕਤ੍ਥੇਰਸ੍ਸਾਪਦਾਨਂ ਚਤੁਤ੍ਥਂ.