੨. ਏਕਛਤ੍ਤਿਯਤ੍ਥੇਰਅਪਦਾਨਂ

੩੨. ‘‘ਚਨ੍ਦਭਾਗਾਨਦੀਤੀਰੇ, ਅਸ੍ਸਮੋ ਸੁਕਤੋ ਮਮ;

ਸੁਸੁਦ੍ਧਪੁਲਿਨਾਕਿਣ੍ਣੋ, ਪਨ੍ਨਸਾਲਾ ਸੁਮਾਪਿਤਾ.

੩੩. ‘‘ਉਤ੍ਤਾਨਕੂਲਾ ਨਦਿਕਾ, ਸੁਪਤਿਤ੍ਥਾ ਮਨੋਰਮਾ;

ਮਚ੍ਛਕਚ੍ਛਪਸਮ੍ਪਨ੍ਨਾ [… ਸਞ੍ਛਨ੍ਨਾ (ਕ.)], ਸੁਸੁਮਾਰਨਿਸੇਵਿਤਾ.

੩੪. ‘‘ਅਚ੍ਛਾ ਦੀਪੀ ਚ ਮਯੂਰਾ, ਕਰਵੀਕਾ ਚ ਸਾਲ਼ਿਕਾ;

ਕੂਜਨ੍ਤਿ ਸਬ੍ਬਦਾ ਏਤੇ, ਸੋਭਯਨ੍ਤਾ ਮਮਸ੍ਸਮਂ.

੩੫. ‘‘ਕੋਕਿਲਾ ਮਞ੍ਜੁਭਾਣੀ ਚ, ਹਂਸਾ ਚ ਮਧੁਰਸ੍ਸਰਾ;

ਅਭਿਕੂਜਨ੍ਤਿ ਤੇ ਤਤ੍ਥ, ਸੋਭਯਨ੍ਤਾ ਮਮਸ੍ਸਮਂ.

੩੬. ‘‘ਸੀਹਾ ਬ੍ਯਗ੍ਘਾ ਵਰਾਹਾ ਚ, ਅਚ੍ਛ [ਵਕ (ਸੀ. ਪੀ.), ਬਕਾ (ਸ੍ਯਾ.), ਵਕਾ (ਕ.)] ਕੋਕਤਰਚ੍ਛਕਾ;

ਗਿਰਿਦੁਗ੍ਗਮ੍ਹਿ ਨਾਦੇਨ੍ਤਿ, ਸੋਭਯਨ੍ਤਾ ਮਮਸ੍ਸਮਂ.

੩੭. ‘‘ਏਣੀਮਿਗਾ ਚ ਸਰਭਾ, ਭੇਰਣ੍ਡਾ ਸੂਕਰਾ ਬਹੂ;

ਗਿਰਿਦੁਗ੍ਗਮ੍ਹਿ ਨਾਦੇਨ੍ਤਿ, ਸੋਭਯਨ੍ਤਾ ਮਮਸ੍ਸਮਂ.

੩੮. ‘‘ਉਦ੍ਦਾਲਕਾ ਚਮ੍ਪਕਾ ਚ, ਪਾਟਲੀ ਸਿਨ੍ਦੁਵਾਰਕਾ;

ਅਤਿਮੁਤ੍ਤਾ ਅਸੋਕਾ ਚ, ਸੋਭਯਨ੍ਤਿ ਮਮਸ੍ਸਮਂ [ਪੁਪ੍ਫਨ੍ਤਿ ਮਮ ਅਸ੍ਸਮੇ (ਸੀ. ਪੀ.)].

੩੯. ‘‘ਅਙ੍ਕੋਲਾ ਯੂਥਿਕਾ ਚੇਵ, ਸਤ੍ਤਲੀ ਬਿਮ੍ਬਿਜਾਲਿਕਾ;

ਕਣਿਕਾਰਾ ਚ ਪੁਪ੍ਫਨ੍ਤਿ, ਸੋਭਯਨ੍ਤਾ ਮਮਸ੍ਸਮਂ [ਕਣਿਕਾਕਣਿਕਾਰਾ ਚ, ਪੁਪ੍ਫਨ੍ਤਿ ਮਮ ਅਸ੍ਸਮੇ (ਸੀ. ਸ੍ਯਾ. ਪੀ.)].

੪੦. ‘‘ਨਾਗਾ ਸਾਲਾ ਚ ਸਲ਼ਲਾ, ਪੁਣ੍ਡਰੀਕੇਤ੍ਥ ਪੁਪ੍ਫਿਤਾ;

ਦਿਬ੍ਬਗਨ੍ਧਂ ਸਮ੍ਪਵਨ੍ਤਾ, ਸੋਭਯਨ੍ਤਿ ਮਮਸ੍ਸਮਂ.

੪੧. ‘‘ਅਜ੍ਜੁਨਾ ਅਸਨਾ ਚੇਤ੍ਥ, ਮਹਾਨਾਮਾ ਚ ਪੁਪ੍ਫਿਤਾ;

ਸਾਲਾ ਚ ਕਙ੍ਗੁਪੁਪ੍ਫਾ ਚ, ਸੋਭਯਨ੍ਤਿ ਮਮਸ੍ਸਮਂ.

੪੨. ‘‘ਅਮ੍ਬਾ ਜਮ੍ਬੂ ਚ ਤਿਲਕਾ, ਨਿਮ੍ਬਾ ਚ ਸਾਲਕਲ੍ਯਾਣੀ;

ਦਿਬ੍ਬਗਨ੍ਧਂ ਸਮ੍ਪਵਨ੍ਤਾ, ਸੋਭਯਨ੍ਤਿ ਮਮਸ੍ਸਮਂ.

੪੩. ‘‘ਅਸੋਕਾ ਚ ਕਪਿਟ੍ਠਾ ਚ, ਗਿਰਿਮਾਲੇਤ੍ਥ [ਭਗਿਨਿਮਾਲੇਤ੍ਥ (ਸੀ. ਪੀ.), ਭਗਿਨਿਮਾਲਾ ਚ (ਸ੍ਯਾ.)] ਪੁਪ੍ਫਿਤਾ;

ਦਿਬ੍ਬਗਨ੍ਧਂ ਸਮ੍ਪਵਨ੍ਤਾ, ਸੋਭਯਨ੍ਤਿ ਮਮਸ੍ਸਮਂ.

੪੪. ‘‘ਕਦਮ੍ਬਾ ਕਦਲੀ ਚੇਵ, ਇਸਿਮੁਗ੍ਗਾ ਚ ਰੋਪਿਤਾ;

ਧੁਵਂ ਫਲਾਨਿ ਧਾਰੇਨ੍ਤਿ, ਸੋਭਯਨ੍ਤਾ ਮਮਸ੍ਸਮਂ.

੪੫. ‘‘ਹਰੀਤਕਾ ਆਮਲਕਾ, ਅਮ੍ਬਜਮ੍ਬੁਵਿਭੀਤਕਾ;

ਕੋਲਾ ਭਲ੍ਲਾਤਕਾ ਬਿਲ੍ਲਾ, ਫਲਿਨੋ ਮਮ ਅਸ੍ਸਮੇ.

੪੬. ‘‘ਅਵਿਦੂਰੇ ਪੋਕ੍ਖਰਣੀ, ਸੁਪਤਿਤ੍ਥਾ ਮਨੋਰਮਾ;

ਮਨ੍ਦਾਲਕੇਹਿ ਸਞ੍ਛਨ੍ਨਾ, ਪਦੁਮੁਪ੍ਪਲਕੇਹਿ ਚ.

੪੭. ‘‘ਗਬ੍ਭਂ ਗਣ੍ਹਨ੍ਤਿ ਪਦੁਮਾ, ਅਞ੍ਞੇ ਪੁਪ੍ਫਨ੍ਤਿ ਕੇਸਰੀ;

ਓਪਤ੍ਤਕਣ੍ਣਿਕਾ ਚੇਵ, ਪੁਪ੍ਫਨ੍ਤਿ ਮਮ ਅਸ੍ਸਮੇ.

੪੮. ‘‘ਪਾਠੀਨਾ ਪਾਵੁਸਾ ਮਚ੍ਛਾ, ਬਲਜਾ ਮੁਞ੍ਜਰੋਹਿਤਾ;

ਅਚ੍ਛੋਦਕਮ੍ਹਿ ਵਿਚਰਂ, ਸੋਭਯਨ੍ਤਿ ਮਮਸ੍ਸਮਂ.

੪੯. ‘‘ਨਯਿਤਾ ਅਮ੍ਬਗਨ੍ਧੀ ਚ, ਅਨੁਕੂਲੇ ਚ ਕੇਤਕਾ;

ਦਿਬ੍ਬਗਨ੍ਧਂ ਸਮ੍ਪਵਨ੍ਤਾ, ਸੋਭਯਨ੍ਤਿ ਮਮਸ੍ਸਮਂ.

੫੦. ‘‘ਮਧੁ ਭਿਸਮ੍ਹਾ ਸਵਤਿ, ਖੀਰਸਪ੍ਪਿ ਮੁਲ਼ਾਲਿਭਿ;

ਦਿਬ੍ਬਗਨ੍ਧਂ ਸਮ੍ਪਵਨ੍ਤਾ, ਸੋਭਯਨ੍ਤਿ ਮਮਸ੍ਸਮਂ.

੫੧. ‘‘ਪੁਲਿਨਾ ਸੋਭਨਾ ਤਤ੍ਥ, ਆਕਿਣ੍ਣਾ ਜਲਸੇਵਿਤਾ;

ਓਪੁਪ੍ਫਾ ਪੁਪ੍ਫਿਤਾ ਸੇਨ੍ਤਿ, ਸੋਭਯਨ੍ਤਾ ਮਮਸ੍ਸਮਂ.

੫੨. ‘‘ਜਟਾਭਾਰੇਨ ਭਰਿਤਾ, ਅਜਿਨੁਤ੍ਤਰਵਾਸਨਾ;

ਵਾਕਚੀਰਧਰਾ ਸਬ੍ਬੇ, ਸੋਭਯਨ੍ਤਿ ਮਮਸ੍ਸਮਂ.

੫੩. ‘‘ਯੁਗਮਤ੍ਤਮਪੇਕ੍ਖਨ੍ਤਾ, ਨਿਪਕਾ ਸਨ੍ਤਵੁਤ੍ਤਿਨੋ;

ਕਾਮਭੋਗੇ ਅਨਪੇਕ੍ਖਾ, ਵਸਨ੍ਤਿ ਮਮ ਅਸ੍ਸਮੇ.

੫੪. ‘‘ਪਰੂਲ਼੍ਹਕਚ੍ਛਨਖਲੋਮਾ, ਪਙ੍ਕਦਨ੍ਤਾ ਰਜਸ੍ਸਿਰਾ;

ਰਜੋਜਲ੍ਲਧਰਾ ਸਬ੍ਬੇ, ਵਸਨ੍ਤਿ ਮਮ ਅਸ੍ਸਮੇ.

੫੫. ‘‘ਅਭਿਞ੍ਞਾਪਾਰਮਿਪ੍ਪਤ੍ਤਾ, ਅਨ੍ਤਲਿਕ੍ਖਚਰਾ ਚ ਤੇ;

ਉਗ੍ਗਚ੍ਛਨ੍ਤਾ ਨਭਂ ਏਤੇ, ਸੋਭਯਨ੍ਤਿ ਮਮਸ੍ਸਮਂ.

੫੬. ‘‘ਤੇਹਿ ਸਿਸ੍ਸੇਹਿ ਪਰਿਵੁਤੋ, ਵਸਾਮਿ ਵਿਪਿਨੇ ਤਦਾ;

ਰਤ੍ਤਿਨ੍ਦਿਵਂ ਨ ਜਾਨਾਮਿ, ਸਦਾ ਝਾਨਸਮਪ੍ਪਿਤੋ.

੫੭. ‘‘ਭਗਵਾ ਤਮ੍ਹਿ ਸਮਯੇ, ਅਤ੍ਥਦਸ੍ਸੀ ਮਹਾਮੁਨਿ;

ਤਮਨ੍ਧਕਾਰਂ ਨਾਸੇਨ੍ਤੋ, ਉਪ੍ਪਜ੍ਜਿ ਲੋਕਨਾਯਕੋ.

੫੮. ‘‘ਅਥ ਅਞ੍ਞਤਰੋ ਸਿਸ੍ਸੋ, ਆਗਚ੍ਛਿ ਮਮ ਸਨ੍ਤਿਕਂ;

ਮਨ੍ਤੇ ਅਜ੍ਝੇਤੁਕਾਮੋ ਸੋ, ਛਲ਼ਙ੍ਗਂ ਨਾਮ ਲਕ੍ਖਣਂ.

੫੯. ‘‘ਬੁਦ੍ਧੋ ਲੋਕੇ ਸਮੁਪ੍ਪਨ੍ਨੋ, ਅਤ੍ਥਦਸ੍ਸੀ ਮਹਾਮੁਨਿ;

ਚਤੁਸਚ੍ਚਂ ਪਕਾਸੇਨ੍ਤੋ, ਦੇਸੇਤਿ ਅਮਤਂ ਪਦਂ.

੬੦. ‘‘ਤੁਟ੍ਠਹਟ੍ਠੋ ਪਮੁਦਿਤੋ, ਧਮ੍ਮਨ੍ਤਰਗਤਾਸਯੋ;

ਅਸ੍ਸਮਾ ਅਭਿਨਿਕ੍ਖਮ੍ਮ, ਇਦਂ ਵਚਨਮਬ੍ਰਵਿਂ.

੬੧. ‘‘‘ਬੁਦ੍ਧੋ ਲੋਕੇ ਸਮੁਪ੍ਪਨ੍ਨੋ, ਦ੍ਵਤ੍ਤਿਂਸਵਰਲਕ੍ਖਣੋ;

ਏਥ ਸਬ੍ਬੇ ਗਮਿਸ੍ਸਾਮ, ਸਮ੍ਮਾਸਮ੍ਬੁਦ੍ਧਸਨ੍ਤਿਕਂ’.

੬੨. ‘‘ਓਵਾਦਪਟਿਕਰਾ ਤੇ, ਸਧਮ੍ਮੇ ਪਾਰਮਿਂ ਗਤਾ;

ਸਾਧੂਤਿ ਸਮ੍ਪਟਿਚ੍ਛਿਂਸੁ, ਉਤ੍ਤਮਤ੍ਥਗਵੇਸਕਾ.

੬੩. ‘‘ਜਟਾਭਾਰਭਰਿਤਾ ਤੇ [ਜਟਾਭਾਰੇਨ ਭਰਿਤਾ (ਕ.)], ਅਜਿਨੁਤ੍ਤਰਵਾਸਨਾ;

ਉਤ੍ਤਮਤ੍ਥਂ ਗਵੇਸਨ੍ਤਾ, ਨਿਕ੍ਖਮਿਂਸੁ ਵਨਾ ਤਦਾ.

੬੪. ‘‘ਭਗਵਾ ਤਮ੍ਹਿ ਸਮਯੇ, ਅਤ੍ਥਦਸ੍ਸੀ ਮਹਾਯਸੋ;

ਚਤੁਸਚ੍ਚਂ ਪਕਾਸੇਨ੍ਤੋ, ਦੇਸੇਤਿ ਅਮਤਂ ਪਦਂ.

੬੫. ‘‘ਸੇਤਚ੍ਛਤ੍ਤਂ ਗਹੇਤ੍ਵਾਨ, ਬੁਦ੍ਧਸੇਟ੍ਠਸ੍ਸ ਧਾਰਯਿਂ;

ਏਕਾਹਂ ਧਾਰਯਿਤ੍ਵਾਨ, ਬੁਦ੍ਧਸੇਟ੍ਠਂ ਅਵਨ੍ਦਹਂ.

੬੬. ‘‘ਅਤ੍ਥਦਸ੍ਸੀ ਤੁ ਭਗਵਾ, ਲੋਕਜੇਟ੍ਠੋ ਨਰਾਸਭੋ;

ਭਿਕ੍ਖੁਸਙ੍ਘੇ ਨਿਸੀਦਿਤ੍ਵਾ, ਇਮਾ ਗਾਥਾ ਅਭਾਸਥ.

੬੭. ‘‘‘ਯੋ ਮੇ ਛਤ੍ਤਂ ਅਧਾਰੇਸਿ, ਪਸਨ੍ਨੋ ਸੇਹਿ ਪਾਣਿਭਿ;

ਤਮਹਂ ਕਿਤ੍ਤਯਿਸ੍ਸਾਮਿ, ਸੁਣਾਥ ਮਮ ਭਾਸਤੋ.

੬੮. ‘‘‘ਇਮਸ੍ਸ ਜਾਯਮਾਨਸ੍ਸ, ਦੇਵਤ੍ਤੇ ਅਥ ਮਾਨੁਸੇ;

ਧਾਰੇਸ੍ਸਤਿ ਸਦਾ ਛਤ੍ਤਂ, ਛਤ੍ਤਦਾਨਸ੍ਸਿਦਂ ਫਲਂ.

੬੯. ‘‘‘ਸਤ੍ਤਸਤ੍ਤਤਿਕਪ੍ਪਾਨਿ, ਦੇਵਲੋਕੇ ਰਮਿਸ੍ਸਤਿ;

ਸਹਸ੍ਸਕ੍ਖਤ੍ਤੁਂ ਰਾਜਾ ਚ, ਚਕ੍ਕਵਤ੍ਤੀ ਭਵਿਸ੍ਸਤਿ.

੭੦. ‘‘‘ਸਤ੍ਤਸਤ੍ਤਤਿਕ੍ਖਤ੍ਤੁਞ੍ਚ, ਦੇਵਰਜ੍ਜਂ ਕਰਿਸ੍ਸਤਿ;

ਪਦੇਸਰਜ੍ਜਂ ਵਿਪੁਲਂ, ਗਣਨਾਤੋ ਅਸਙ੍ਖਿਯਂ.

੭੧. ‘‘‘ਅਟ੍ਠਾਰਸੇ ਕਪ੍ਪਸਤੇ, ਗੋਤਮੋ ਸਕ੍ਯਪੁਙ੍ਗਵੋ;

ਤਮਨ੍ਧਕਾਰਂ ਨਾਸੇਨ੍ਤੋ, ਉਪ੍ਪਜ੍ਜਿਸ੍ਸਤਿ ਚਕ੍ਖੁਮਾ.

੭੨. ‘‘‘ਤਸ੍ਸ ਧਮ੍ਮੇਸੁ ਦਾਯਾਦੋ, ਓਰਸੋ ਧਮ੍ਮਨਿਮ੍ਮਿਤੋ;

ਸਬ੍ਬਾਸਵੇ ਪਰਿਞ੍ਞਾਯ, ਵਿਹਰਿਸ੍ਸਤਿਨਾਸਵੋ’.

੭੩. ‘‘ਯਤੋ ਅਹਂ ਕਮ੍ਮਮਕਂ, ਛਤ੍ਤਂ ਬੁਦ੍ਧਸ੍ਸ ਧਾਰਯਂ;

ਏਤ੍ਥਨ੍ਤਰੇ ਨ ਜਾਨਾਮਿ, ਸੇਤਚ੍ਛਤ੍ਤਂ ਅਧਾਰਿਤਂ.

੭੪. ‘‘ਇਦਂ ਪਚ੍ਛਿਮਕਂ ਮਯ੍ਹਂ, ਚਰਿਮੋ ਵਤ੍ਤਤੇ ਭਵੋ;

ਛਤ੍ਤਧਾਰਣਮਜ੍ਜਾਪਿ, ਵਤ੍ਤਤੇ ਨਿਚ੍ਚਕਾਲਿਕਂ.

੭੫. ‘‘ਅਹੋ ਮੇ ਸੁਕਤਂ ਕਮ੍ਮਂ, ਅਤ੍ਥਦਸ੍ਸਿਸ੍ਸ ਤਾਦਿਨੋ;

ਸਬ੍ਬਾਸਵਾ ਪਰਿਕ੍ਖੀਣਾ, ਨਤ੍ਥਿ ਦਾਨਿ ਪੁਨਬ੍ਭਵੋ.

੭੬. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੭੭. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੭੮. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਏਕਛਤ੍ਤਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ;

ਏਕਛਤ੍ਤਿਯਤ੍ਥੇਰਸ੍ਸਾਪਦਾਨਂ ਦੁਤਿਯਂ.