੧. ਭਦ੍ਦਾਲਿਤ੍ਥੇਰਅਪਦਾਨਂ

੧. ‘‘ਸੁਮੇਧੋ ਨਾਮ ਸਮ੍ਬੁਦ੍ਧੋ, ਅਗ੍ਗੋ ਕਾਰੁਣਿਕੋ ਮੁਨਿ;

ਵਿਵੇਕਕਾਮੋ ਲੋਕਗ੍ਗੋ, ਹਿਮਵਨ੍ਤਮੁਪਾਗਮਿ.

੨. ‘‘ਅਜ੍ਝੋਗਾਹੇਤ੍ਵਾ ਹਿਮਵਂ, ਸੁਮੇਧੋ ਲੋਕਨਾਯਕੋ;

ਪਲ੍ਲਙ੍ਕਂ ਆਭੁਜਿਤ੍ਵਾਨ, ਨਿਸੀਦਿ ਪੁਰਿਸੁਤ੍ਤਮੋ.

੩. ‘‘ਸਮਾਧਿਂ ਸੋ ਸਮਾਪਨ੍ਨੋ, ਸੁਮੇਧੋ ਲੋਕਨਾਯਕੋ;

ਸਤ੍ਤਰਤ੍ਤਿਨ੍ਦਿਵਂ ਬੁਦ੍ਧੋ, ਨਿਸੀਦਿ ਪੁਰਿਸੁਤ੍ਤਮੋ.

੪. ‘‘ਖਾਰਿਭਾਰਂ [ਖਾਰਿਕਾਜਂ (ਸੀ.)] ਗਹੇਤ੍ਵਾਨ, ਵਨਮਜ੍ਝੋਗਹਿਂ ਅਹਂ;

ਤਤ੍ਥਦ੍ਦਸਾਸਿਂ ਸਮ੍ਬੁਦ੍ਧਂ, ਓਘਤਿਣ੍ਣਮਨਾਸਵਂ.

੫. ‘‘ਸਮ੍ਮਜ੍ਜਨਿਂ ਗਹੇਤ੍ਵਾਨ, ਸਮ੍ਮਜ੍ਜਿਤ੍ਵਾਨ ਅਸ੍ਸਮਂ;

ਚਤੁਦਣ੍ਡੇ ਠਪੇਤ੍ਵਾਨ, ਅਕਾਸਿਂ ਮਣ੍ਡਪਂ ਤਦਾ.

੬. ‘‘ਸਾਲਪੁਪ੍ਫਂ ਆਹਰਿਤ੍ਵਾ, ਮਣ੍ਡਪਂ ਛਾਦਯਿਂ ਅਹਂ;

ਪਸਨ੍ਨਚਿਤ੍ਤੋ ਸੁਮਨੋ, ਅਭਿਵਨ੍ਦਿਂ ਤਥਾਗਤਂ.

੭. ‘‘ਯਂ ਵਦਨ੍ਤਿ ਸੁਮੇਧੋਤਿ, ਭੂਰਿਪਞ੍ਞਂ ਸੁਮੇਧਸਂ;

ਭਿਕ੍ਖੁਸਙ੍ਘੇ ਨਿਸੀਦਿਤ੍ਵਾ, ਇਮਾ ਗਾਥਾ ਅਭਾਸਥ.

੮. ‘‘‘ਬੁਦ੍ਧਸ੍ਸ ਗਿਰਮਞ੍ਞਾਯ, ਸਬ੍ਬੇ ਦੇਵਾ ਸਮਾਗਮੁਂ;

ਅਸਂਸਯਂ ਬੁਦ੍ਧਸੇਟ੍ਠੋ, ਧਮ੍ਮਂ ਦੇਸੇਤਿ ਚਕ੍ਖੁਮਾ.

੯. ‘‘‘ਸੁਮੇਧੋ ਨਾਮ ਸਮ੍ਬੁਦ੍ਧੋ, ਆਹੁਤੀਨਂ ਪਟਿਗ੍ਗਹੋ;

ਦੇਵਸਙ੍ਘੇ ਨਿਸੀਦਿਤ੍ਵਾ, ਇਮਾ ਗਾਥਾ ਅਭਾਸਥ.

੧੦. ‘‘‘ਯੋ ਮੇ ਸਤ੍ਤਾਹਂ ਮਣ੍ਡਪਂ, ਧਾਰਯੀ ਸਾਲਛਾਦਿਤਂ;

ਤਮਹਂ ਕਿਤ੍ਤਯਿਸ੍ਸਾਮਿ, ਸੁਣਾਥ ਮਮ ਭਾਸਤੋ.

੧੧. ‘‘‘ਦੇਵਭੂਤੋ ਮਨੁਸ੍ਸੋ ਵਾ, ਹੇਮਵਣ੍ਣੋ ਭਵਿਸ੍ਸਤਿ;

ਪਹੂਤਭੋਗੋ ਹੁਤ੍ਵਾਨ, ਕਾਮਭੋਗੀ ਭਵਿਸ੍ਸਤਿ.

੧੨. ‘‘‘ਸਟ੍ਠਿ ਨਾਗਸਹਸ੍ਸਾਨਿ, ਸਬ੍ਬਾਲਙ੍ਕਾਰਭੂਸਿਤਾ;

ਸੁਵਣ੍ਣਕਚ੍ਛਾ ਮਾਤਙ੍ਗਾ, ਹੇਮਕਪ੍ਪਨਵਾਸਸਾ.

੧੩. ‘‘‘ਆਰੂਲ਼੍ਹਾ ਗਾਮਣੀਯੇਹਿ, ਤੋਮਰਙ੍ਕੁਸਪਾਣਿਭਿ;

ਸਾਯਂ ਪਾਤੋ [ਸਾਯਪਾਤੋ (ਪੀ.)] ਉਪਟ੍ਠਾਨਂ, ਆਗਮਿਸ੍ਸਨ੍ਤਿਮਂ ਨਰਂ;

ਤੇਹਿ ਨਾਗੇਹਿ ਪਰਿਵੁਤੋ, ਰਮਿਸ੍ਸਤਿ ਅਯਂ ਨਰੋ.

੧੪. ‘‘‘ਸਟ੍ਠਿ ਅਸ੍ਸਸਹਸ੍ਸਾਨਿ, ਸਬ੍ਬਾਲਙ੍ਕਾਰਭੂਸਿਤਾ;

ਆਜਾਨੀਯਾਵ ਜਾਤਿਯਾ, ਸਿਨ੍ਧਵਾ ਸੀਘਵਾਹਿਨੋ.

੧੫. ‘‘‘ਆਰੂਲ਼੍ਹਾ ਗਾਮਣੀਯੇਹਿ, ਇਲ੍ਲਿਯਾਚਾਪਧਾਰਿਭਿ;

ਪਰਿਵਾਰੇਸ੍ਸਨ੍ਤਿਮਂ ਨਿਚ੍ਚਂ, ਬੁਦ੍ਧਪੂਜਾਯਿਦਂ ਫਲਂ.

੧੬. ‘‘‘ਸਟ੍ਠਿ ਰਥਸਹਸ੍ਸਾਨਿ, ਸਬ੍ਬਾਲਙ੍ਕਾਰਭੂਸਿਤਾ;

ਦੀਪਾ ਅਥੋਪਿ ਵੇਯਗ੍ਘਾ, ਸਨ੍ਨਦ੍ਧਾ ਉਸ੍ਸਿਤਦ੍ਧਜਾ.

੧੭. ‘‘‘ਆਰੂਲ਼੍ਹਾ ਗਾਮਣੀਯੇਹਿ, ਚਾਪਹਤ੍ਥੇਹਿ ਵਮ੍ਮਿਭਿ;

ਪਰਿਵਾਰੇਸ੍ਸਨ੍ਤਿਮਂ ਨਿਚ੍ਚਂ, ਬੁਦ੍ਧਪੂਜਾਯਿਦਂ ਫਲਂ.

੧੮. ‘‘‘ਸਟ੍ਠਿ ਗਾਮਸਹਸ੍ਸਾਨਿ, ਪਰਿਪੁਣ੍ਣਾਨਿ ਸਬ੍ਬਸੋ;

ਪਹੂਤਧਨਧਞ੍ਞਾਨਿ, ਸੁਸਮਿਦ੍ਧਾਨਿ ਸਬ੍ਬਸੋ;

ਸਦਾ ਪਾਤੁਭਵਿਸ੍ਸਨ੍ਤਿ, ਬੁਦ੍ਧਪੂਜਾਯਿਦਂ ਫਲਂ.

੧੯. ‘‘‘ਹਤ੍ਥੀ ਅਸ੍ਸਾ ਰਥਾ ਪਤ੍ਤੀ, ਸੇਨਾ ਚ ਚਤੁਰਙ੍ਗਿਨੀ;

ਪਰਿਵਾਰੇਸ੍ਸਨ੍ਤਿਮਂ ਨਿਚ੍ਚਂ, ਬੁਦ੍ਧਪੂਜਾਯਿਦਂ ਫਲਂ.

੨੦. ‘‘‘ਅਟ੍ਠਾਰਸੇ ਕਪ੍ਪਸਤੇ, ਦੇਵਲੋਕੇ ਰਮਿਸ੍ਸਤਿ;

ਸਹਸ੍ਸਕ੍ਖਤ੍ਤੁਂ ਰਾਜਾ ਚ, ਚਕ੍ਕਵਤ੍ਤੀ ਭਵਿਸ੍ਸਤਿ.

੨੧. ‘‘‘ਸਤਾਨਂ ਤੀਣਿਕ੍ਖਤ੍ਤੁਞ੍ਚ, ਦੇਵਰਜ੍ਜਂ ਕਰਿਸ੍ਸਤਿ;

ਪਦੇਸਰਜ੍ਜਂ ਵਿਪੁਲਂ, ਗਣਨਾਤੋ ਅਸਙ੍ਖਿਯਂ.

੨੨. ‘‘‘ਤਿਂਸਕਪ੍ਪਸਹਸ੍ਸਮ੍ਹਿ, ਓਕ੍ਕਾਕਕੁਲਸਮ੍ਭਵੋ;

ਗੋਤਮੋ ਨਾਮ ਗੋਤ੍ਤੇਨ, ਸਤ੍ਥਾ ਲੋਕੇ ਭਵਿਸ੍ਸਤਿ.

੨੩. ‘‘‘ਤਸ੍ਸ ਧਮ੍ਮੇਸੁ ਦਾਯਾਦੋ, ਓਰਸੋ ਧਮ੍ਮਨਿਮ੍ਮਿਤੋ;

ਸਬ੍ਬਾਸਵੇ ਪਰਿਞ੍ਞਾਯ, ਵਿਹਰਿਸ੍ਸਤਿਨਾਸਵੋ’.

੨੪. ‘‘ਤਿਂਸਕਪ੍ਪਸਹਸ੍ਸਮ੍ਹਿ, ਅਦ੍ਦਸਂ ਲੋਕਨਾਯਕਂ;

ਏਤ੍ਥਨ੍ਤਰਮੁਪਾਦਾਯ, ਗਵੇਸਿਂ ਅਮਤਂ ਪਦਂ.

੨੫. ‘‘ਲਾਭਾ ਮਯ੍ਹਂ ਸੁਲਦ੍ਧਂ ਮੇ, ਯਮਹਞ੍ਞਾਸਿ ਸਾਸਨਂ;

ਤਿਸ੍ਸੋ ਵਿਜ੍ਜਾ ਅਨੁਪ੍ਪਤ੍ਤਾ, ਕਤਂ ਬੁਦ੍ਧਸ੍ਸ ਸਾਸਨਂ.

੨੬. ‘‘ਨਮੋ ਤੇ ਪੁਰਿਸਾਜਞ੍ਞ, ਨਮੋ ਤੇ ਪੁਰਿਸੁਤ੍ਤਮ;

ਤਵ ਞਾਣਂ ਪਕਿਤ੍ਤੇਤ੍ਵਾ, ਪਤ੍ਤੋਮ੍ਹਿ ਅਚਲਂ ਪਦਂ.

੨੭. ‘‘ਯਂ ਯਂ ਯੋਨੁਪਪਜ੍ਜਾਮਿ, ਦੇਵਤ੍ਤਂ ਅਥ ਮਾਨੁਸਂ;

ਸਬ੍ਬਤ੍ਥ ਸੁਖਿਤੋ ਹੋਮਿ, ਫਲਂ ਮੇ ਞਾਣਕਿਤ੍ਤਨੇ.

੨੮. ‘‘ਇਦਂ ਪਚ੍ਛਿਮਕਂ ਮਯ੍ਹਂ, ਚਰਿਮੋ ਵਤ੍ਤਤੇ ਭਵੋ;

ਨਾਗੋਵ ਬਨ੍ਧਨਂ ਛੇਤ੍ਵਾ, ਵਿਹਰਾਮਿ ਅਨਾਸਵੋ.

੨੯. ‘‘ਕਿਲੇਸਾ ਝਾਪਿਤਾ ਮਯ੍ਹਂ, ਭਵਾ ਸਬ੍ਬੇ ਸਮੂਹਤਾ;

ਨਾਗੋਵ ਬਨ੍ਧਨਂ ਛੇਤ੍ਵਾ, ਵਿਹਰਾਮਿ ਅਨਾਸਵੋ.

੩੦. ‘‘ਸ੍ਵਾਗਤਂ ਵਤ ਮੇ ਆਸਿ, ਮਮ ਬੁਦ੍ਧਸ੍ਸ ਸਨ੍ਤਿਕੇ;

ਤਿਸ੍ਸੋ ਵਿਜ੍ਜਾ ਅਨੁਪ੍ਪਤ੍ਤਾ, ਕਤਂ ਬੁਦ੍ਧਸ੍ਸ ਸਾਸਨਂ.

੩੧. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;

ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਭਦ੍ਦਾਲਿਤ੍ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਭਦ੍ਦਾਲਿਤ੍ਥੇਰਸ੍ਸਾਪਦਾਨਂ ਪਠਮਂ.