੧. ਤਿਸ੍ਸਮੇਤ੍ਤੇਯ੍ਯਤ੍ਥੇਰਅਪਦਾਨਂ

੧. ‘‘ਪਬ੍ਭਾਰਕੂਟਂ ਨਿਸ੍ਸਾਯ, ਸੋਭਿਤੋ ਨਾਮ ਤਾਪਸੋ;

ਪਵਤ੍ਤਫਲਂ ਭੁਞ੍ਜਿਤ੍ਵਾ, ਵਸਤਿ ਪਬ੍ਬਤਨ੍ਤਰੇ.

੨. ‘‘ਅਗ੍ਗਿਂ ਦਾਰੁਂ ਆਹਰਿਤ੍ਵਾ, ਉਜ੍ਜਾਲੇਸਿਂ ਅਹਂ ਤਦਾ;

ਉਤ੍ਤਮਤ੍ਥਂ ਗਵੇਸਨ੍ਤੋ, ਬ੍ਰਹ੍ਮਲੋਕੂਪਪਤ੍ਤਿਯਾ.

੩. ‘‘ਪਦੁਮੁਤ੍ਤਰੋ ਲੋਕਵਿਦੂ, ਆਹੁਤੀਨਂ ਪਟਿਗ੍ਗਹੋ;

ਮਮੁਦ੍ਧਰਿਤੁਕਾਮੋ ਸੋ, ਆਗਚ੍ਛਿ ਮਮ ਸਨ੍ਤਿਕੇ.

੪. ‘‘ਕਿਂ ਕਰੋਸਿ ਮਹਾਪੁਞ੍ਞ, ਦੇਹਿ ਮੇ ਅਗ੍ਗਿਦਾਰੁਕਂ;

ਅਹਮਗ੍ਗਿਂ ਪਰਿਚਰੇ, ਤਤੋ ਮੇ ਸੁਦ੍ਧਿ ਹੋਹਿਤਿ [ਹੇਹਿਤਿ (ਸੀ.)].

੫. ‘‘ਸੁਭਦ੍ਦਕੋ ਤ੍ਵਂ ਮਨੁਜੇ, ਦੇਵਤੇ ਤ੍ਵਂ ਪਜਾਨਸਿ;

ਤੁਵਂ ਅਗ੍ਗਿਂ ਪਰਿਚਰ, ਹਨ੍ਦ ਤੇ ਅਗ੍ਗਿਦਾਰੁਕਂ.

੬. ‘‘ਤਤੋ ਕਟ੍ਠਂ ਗਹੇਤ੍ਵਾਨ, ਅਗ੍ਗਿਂ ਉਜ੍ਜਾਲਯੀ ਜਿਨੋ;

ਨ ਤਤ੍ਥ ਕਟ੍ਠਂ ਪਜ੍ਝਾਯਿ, ਪਾਟਿਹੇਰਂ ਮਹੇਸਿਨੋ.

੭. ‘‘ਨ ਤੇ ਅਗ੍ਗਿ ਪਜ੍ਜਲਤਿ, ਆਹੁਤੀ ਤੇ ਨ ਵਿਜ੍ਜਤਿ;

ਨਿਰਤ੍ਥਕਂ ਵਤਂ ਤੁਯ੍ਹਂ, ਅਗ੍ਗਿਂ ਪਰਿਚਰਸ੍ਸੁ ਮੇ.

੮. ‘‘ਕੀਦਿਸੋ ਸੋ [ਤੇ (ਸ੍ਯਾ. ਕ.)] ਮਹਾਵੀਰ, ਅਗ੍ਗਿ ਤਵ ਪਵੁਚ੍ਚਤਿ;

ਮਯ੍ਹਮ੍ਪਿ ਕਥਯਸ੍ਸੇਤਂ, ਉਭੋ ਪਰਿਚਰਾਮਸੇ.

੯. ‘‘ਹੇਤੁਧਮ੍ਮਨਿਰੋਧਾਯ, ਕਿਲੇਸਸਮਣਾਯ ਚ;

ਇਸ੍ਸਾਮਚ੍ਛਰਿਯਂ ਹਿਤ੍ਵਾ, ਤਯੋ ਏਤੇ ਮਮਾਹੁਤੀ.

੧੦. ‘‘ਕੀਦਿਸੋ ਤ੍ਵਂ ਮਹਾਵੀਰ, ਕਥਂ ਗੋਤ੍ਤੋਸਿ ਮਾਰਿਸ;

ਆਚਾਰਪਟਿਪਤ੍ਤਿ ਤੇ, ਬਾਲ਼੍ਹਂ ਖੋ ਮਮ ਰੁਚ੍ਚਤਿ.

੧੧. ‘‘ਖਤ੍ਤਿਯਮ੍ਹਿ ਕੁਲੇ ਜਾਤੋ, ਅਭਿਞ੍ਞਾਪਾਰਮਿਂ ਗਤੋ;

ਸਬ੍ਬਾਸਵਪਰਿਕ੍ਖੀਣੋ, ਨਤ੍ਥਿ ਦਾਨਿ ਪੁਨਬ੍ਭਵੋ.

੧੨. ‘‘ਯਦਿ ਬੁਦ੍ਧੋਸਿ ਸਬ੍ਬਞ੍ਞੂ, ਪਭਙ੍ਕਰ ਤਮੋਨੁਦ;

ਨਮਸ੍ਸਿਸ੍ਸਾਮਿ ਤਂ ਦੇਵ, ਦੁਕ੍ਖਸ੍ਸਨ੍ਤਕਰੋ ਤੁਵਂ.

੧੩. ‘‘ਪਤ੍ਥਰਿਤ੍ਵਾਜਿਨਚਮ੍ਮਂ, ਨਿਸੀਦਨਮਦਾਸਹਂ;

ਨਿਸੀਦ ਨਾਥ ਸਬ੍ਬਞ੍ਞੁ, ਉਪਟ੍ਠਿਸ੍ਸਾਮਹਂ ਤੁਵਂ.

੧੪. ‘‘ਨਿਸੀਦਿ ਭਗਵਾ ਤਤ੍ਥ, ਅਜਿਨਮ੍ਹਿ ਸੁਵਿਤ੍ਥਤੇ;

ਨਿਮਨ੍ਤਯਿਤ੍ਵਾ ਸਮ੍ਬੁਦ੍ਧਂ, ਪਬ੍ਬਤਂ ਅਗਮਾਸਹਂ.

੧੫. ‘‘ਖਾਰਿਭਾਰਞ੍ਚ ਪੂਰੇਤ੍ਵਾ, ਤਿਨ੍ਦੁਕਫਲਮਾਹਰਿਂ;

ਮਧੁਨਾ ਯੋਜਯਿਤ੍ਵਾਨ, ਫਲਂ ਬੁਦ੍ਧਸ੍ਸਦਾਸਹਂ.

੧੬. ‘‘ਮਮ ਨਿਜ੍ਝਾਯਮਾਨਸ੍ਸ, ਪਰਿਭੁਞ੍ਜਿ ਤਦਾ ਜਿਨੋ;

ਤਤ੍ਥ ਚਿਤ੍ਤਂ ਪਸਾਦੇਸਿਂ, ਪੇਕ੍ਖਨ੍ਤੋ ਲੋਕਨਾਯਕਂ.

੧੭. ‘‘ਪਦੁਮੁਤ੍ਤਰੋ ਲੋਕਵਿਦੂ, ਆਹੁਤੀਨਂ ਪਟਿਗ੍ਗਹੋ;

ਮਮਸ੍ਸਮੇ ਨਿਸੀਦਿਤ੍ਵਾ, ਇਮਾ ਗਾਥਾ ਅਭਾਸਥ.

੧੮. ‘‘‘ਯੋ ਮਂ ਫਲੇਨ ਤਪ੍ਪੇਸਿ, ਪਸਨ੍ਨੋ ਸੇਹਿ ਪਾਣਿਭਿ;

ਤਮਹਂ ਕਿਤ੍ਤਯਿਸ੍ਸਾਮਿ, ਸੁਣਾਥ ਮਮ ਭਾਸਤੋ.

੧੯. ‘‘‘ਪਞ੍ਚਵੀਸਤਿਕ੍ਖਤ੍ਤੁਂ ਸੋ, ਦੇਵਰਜ੍ਜਂ ਕਰਿਸ੍ਸਤਿ;

ਸਹਸ੍ਸਕ੍ਖਤ੍ਤੁਂ ਰਾਜਾ ਚ, ਚਕ੍ਕਵਤ੍ਤੀ ਭਵਿਸ੍ਸਤਿ.

੨੦. ‘‘‘ਤਸ੍ਸ ਸਙ੍ਕਪ੍ਪਮਞ੍ਞਾਯ, ਪੁਬ੍ਬਕਮ੍ਮਸਮਙ੍ਗਿਨੋ;

ਅਨ੍ਨਂ ਪਾਨਞ੍ਚ ਵਤ੍ਥਞ੍ਚ, ਸਯਨਞ੍ਚ ਮਹਾਰਹਂ.

੨੧. ‘‘‘ਪੁਞ੍ਞਕਮ੍ਮੇਨ ਸਂਯੁਤ੍ਤਾ, ਨਿਬ੍ਬਤ੍ਤਿਸ੍ਸਨ੍ਤਿ ਤਾਵਦੇ;

ਸਦਾ ਪਮੁਦਿਤੋ ਚਾਯਂ, ਭਵਿਸ੍ਸਤਿ ਅਨਾਮਯੋ.

੨੨. ‘‘‘ਉਪਪਜ੍ਜਤਿ ਯਂ ਯੋਨਿਂ, ਦੇਵਤ੍ਤਂ ਅਥ ਮਾਨੁਸਂ;

ਸਬ੍ਬਤ੍ਥ ਸੁਖਿਤੋ ਹੁਤ੍ਵਾ, ਮਨੁਸ੍ਸਤ੍ਤਂ ਗਮਿਸ੍ਸਤਿ.

੨੩. ‘‘‘ਅਜ੍ਝਾਯਕੋ ਮਨ੍ਤਧਰੋ, ਤਿਣ੍ਣਂ ਵੇਦਾਨ ਪਾਰਗੂ;

ਸਮ੍ਬੁਦ੍ਧਂ ਉਪਗਨ੍ਤ੍ਵਾਨ, ਅਰਹਾ ਸੋ ਭਵਿਸ੍ਸਤਿ’.

੨੪. ‘‘ਯਤੋ ਸਰਾਮਿ ਅਤ੍ਤਾਨਂ, ਯਤੋ ਪਤ੍ਤੋਸ੍ਮਿ ਵਿਞ੍ਞੁਤਂ;

ਭੋਗੇ ਮੇ ਊਨਤਾ ਨਤ੍ਥਿ, ਫਲਦਾਨਸ੍ਸਿਦਂ ਫਲਂ.

੨੫. ‘‘ਵਰਧਮ੍ਮਮਨੁਪ੍ਪਤ੍ਤੋ, ਰਾਗਦੋਸੇ ਸਮੂਹਨਿਂ;

ਸਬ੍ਬਾਸਵਪਰਿਕ੍ਖੀਣੋ, ਨਤ੍ਥਿ ਦਾਨਿ ਪੁਨਬ੍ਭਵੋ.

੨੬. ‘‘ਕਿਲੇਸਾ ਝਾਪਿਤਾ ਮਯ੍ਹਂ, ਭਵਾ ਸਬ੍ਬੇ ਸਮੂਹਤਾ;

ਨਾਗੋਵ ਬਨ੍ਧਨਂ ਛੇਤ੍ਵਾ, ਵਿਹਰਾਮਿ ਅਨਾਸਵੋ.

੨੭. ‘‘ਸ੍ਵਾਗਤਂ ਵਤ ਮੇ ਆਸਿ, ਮਮ ਬੁਦ੍ਧਸ੍ਸ ਸਨ੍ਤਿਕੇ;

ਤਿਸ੍ਸੋ ਵਿਜ੍ਜਾ ਅਨੁਪ੍ਪਤ੍ਤਾ, ਕਤਂ ਬੁਦ੍ਧਸ੍ਸ ਸਾਸਨਂ.

੨੮. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;

ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਤਿਸ੍ਸਮੇਤ੍ਤੇਯ੍ਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਤਿਸ੍ਸਮੇਤ੍ਤੇਯ੍ਯਤ੍ਥੇਰਸ੍ਸਾਪਦਾਨਂ ਪਠਮਂ.