੭. ਗਿਰਿਮਾਨਨ੍ਦਤ੍ਥੇਰਅਪਦਾਨਂ

੪੧੯. ‘‘ਭਰਿਯਾ ਮੇ ਕਾਲਙ੍ਕਤਾ, ਪੁਤ੍ਤੋ ਸੀਵਥਿਕਂ ਗਤੋ;

ਮਾਤਾ ਪਿਤਾ ਮਤਾ ਭਾਤਾ, ਏਕਚਿਤਮ੍ਹਿ [ਮਾਤਾ ਪਿਤਾ ਚ ਭਾਤਾ ਚ, ਏਕਚਿਤਕਮ੍ਹਿ (ਸੀ. ਸ੍ਯਾ.)] ਡਯ੍ਹਰੇ.

੪੨੦. ‘‘ਤੇਨ ਸੋਕੇਨ ਸਨ੍ਤਤ੍ਤੋ, ਕਿਸੋ ਪਣ੍ਡੁ ਅਹੋਸਹਂ;

ਚਿਤ੍ਤਕ੍ਖੇਪੋ ਚ ਮੇ ਆਸਿ, ਤੇਨ ਸੋਕੇਨ ਅਟ੍ਟਿਤੋ.

੪੨੧. ‘‘ਸੋਕਸਲ੍ਲਪਰੇਤੋਹਂ, ਵਨਨ੍ਤਮੁਪਸਙ੍ਕਮਿਂ;

ਪਵਤ੍ਤਫਲਂ ਭੁਞ੍ਜਿਤ੍ਵਾ, ਰੁਕ੍ਖਮੂਲੇ ਵਸਾਮਹਂ.

੪੨੨. ‘‘ਸੁਮੇਧੋ ਨਾਮ ਸਮ੍ਬੁਦ੍ਧੋ, ਦੁਕ੍ਖਸ੍ਸਨ੍ਤਕਰੋ ਜਿਨੋ;

ਮਮੁਦ੍ਧਰਿਤੁਕਾਮੋ ਸੋ, ਆਗਞ੍ਛਿ ਮਮ ਸਨ੍ਤਿਕਂ.

੪੨੩. ‘‘ਪਦਸਦ੍ਦਂ ਸੁਣਿਤ੍ਵਾਨ, ਸੁਮੇਧਸ੍ਸ ਮਹੇਸਿਨੋ;

ਪਗ੍ਗਹੇਤ੍ਵਾਨਹਂ ਸੀਸਂ, ਉਲ੍ਲੋਕੇਸਿਂ ਮਹਾਮੁਨਿਂ.

੪੨੪. ‘‘ਉਪਾਗਤੇ ਮਹਾਵੀਰੇ, ਪੀਤਿ ਮੇ ਉਦਪਜ੍ਜਥ;

ਤਦਾਸਿਮੇਕਗ੍ਗਮਨੋ, ਦਿਸ੍ਵਾ ਤਂ ਲੋਕਨਾਯਕਂ.

੪੨੫. ‘‘ਸਤਿਂ ਪਟਿਲਭਿਤ੍ਵਾਨ, ਪਣ੍ਣਮੁਟ੍ਠਿਮਦਾਸਹਂ;

ਨਿਸੀਦਿ ਭਗਵਾ ਤਤ੍ਥ, ਅਨੁਕਮ੍ਪਾਯ ਚਕ੍ਖੁਮਾ.

੪੨੬. ‘‘ਨਿਸਜ੍ਜ ਤਤ੍ਥ ਭਗਵਾ, ਸੁਮੇਧੋ ਲੋਕਨਾਯਕੋ;

ਧਮ੍ਮਂ ਮੇ ਕਥਯੀ ਬੁਦ੍ਧੋ, ਸੋਕਸਲ੍ਲਵਿਨੋਦਨਂ.

੪੨੭. ‘‘‘ਅਨਵ੍ਹਿਤਾ ਤਤੋ ਆਗੁਂ, ਅਨਨੁਞ੍ਞਾਤਾ ਇਤੋ ਗਤਾ;

ਯਥਾਗਤਾ ਤਥਾ ਗਤਾ, ਤਤ੍ਥ ਕਾ ਪਰਿਦੇਵਨਾ.

੪੨੮. ‘‘‘ਯਥਾਪਿ ਪਥਿਕਾ ਸਤ੍ਤਾ, ਵਸ੍ਸਮਾਨਾਯ ਵੁਟ੍ਠਿਯਾ;

ਸਭਣ੍ਡਾ ਉਪਗਚ੍ਛਨ੍ਤਿ, ਵਸ੍ਸਸ੍ਸਾਪਤਨਾਯ ਤੇ.

੪੨੯. ‘‘‘ਵਸ੍ਸੇ ਚ ਤੇ ਓਰਮਿਤੇ, ਸਮ੍ਪਯਨ੍ਤਿ ਯਦਿਚ੍ਛਕਂ;

ਏਵਂ ਮਾਤਾ ਪਿਤਾ ਤੁਯ੍ਹਂ, ਤਤ੍ਥ ਕਾ ਪਰਿਦੇਵਨਾ.

੪੩੦. ‘‘‘ਆਗਨ੍ਤੁਕਾ ਪਾਹੁਨਕਾ, ਚਲਿਤੇਰਿਤਕਮ੍ਪਿਤਾ;

ਏਵਂ ਮਾਤਾ ਪਿਤਾ ਤੁਯ੍ਹਂ, ਤਤ੍ਥ ਕਾ ਪਰਿਦੇਵਨਾ.

੪੩੧. ‘‘‘ਯਥਾਪਿ ਉਰਗੋ ਜਿਣ੍ਣਂ, ਹਿਤ੍ਵਾ ਗਚ੍ਛਤਿ ਸਂ ਤਚਂ [ਸਂਤਨੁਂ (ਸ੍ਯਾ. ਕ.)];

ਏਵਂ ਮਾਤਾ ਪਿਤਾ ਤੁਯ੍ਹਂ, ਸਂ ਤਨੁਂ ਇਧ ਹੀਯਰੇ’.

੪੩੨. ‘‘ਬੁਦ੍ਧਸ੍ਸ ਗਿਰਮਞ੍ਞਾਯ, ਸੋਕਸਲ੍ਲਂ ਵਿਵਜ੍ਜਯਿਂ;

ਪਾਮੋਜ੍ਜਂ ਜਨਯਿਤ੍ਵਾਨ, ਬੁਦ੍ਧਸੇਟ੍ਠਂ ਅਵਨ੍ਦਹਂ.

੪੩੩. ‘‘ਵਨ੍ਦਿਤ੍ਵਾਨ ਮਹਾਨਾਗਂ, ਪੂਜਯਿਂ ਗਿਰਿਮਞ੍ਜਰਿਂ [ਗਿਰਿਮਞ੍ਜਰਿਮਪੂਜਯਿਂ (ਸੀ. ਸ੍ਯਾ.)];

ਦਿਬ੍ਬਗਨ੍ਧਂ ਸਮ੍ਪਵਨ੍ਤਂ [ਦਿਬ੍ਬਗਨ੍ਧੇਨ ਸਮ੍ਪਨ੍ਨਂ (ਸੀ. ਸ੍ਯਾ.)], ਸੁਮੇਧਂ ਲੋਕਨਾਯਕਂ.

੪੩੪. ‘‘ਪੂਜਯਿਤ੍ਵਾਨ ਸਮ੍ਬੁਦ੍ਧਂ, ਸਿਰੇ ਕਤ੍ਵਾਨ ਅਞ੍ਜਲਿਂ;

ਅਨੁਸ੍ਸਰਂ ਗੁਣਗ੍ਗਾਨਿ, ਸਨ੍ਥਵਿਂ ਲੋਕਨਾਯਕਂ.

੪੩੫. ‘‘ਨਿਤ੍ਤਿਣ੍ਣੋਸਿ [ਨਿਤ੍ਤਣ੍ਹੋਸਿ (ਸੀ.), ਵਿਤਿਣ੍ਣੋਸਿ (ਸ੍ਯਾ.)] ਮਹਾਵੀਰ, ਸਬ੍ਬਞ੍ਞੁ ਲੋਕਨਾਯਕ;

ਸਬ੍ਬੇ ਸਤ੍ਤੇ ਉਦ੍ਧਰਸਿ, ਞਾਣੇਨ ਤ੍ਵਂ ਮਹਾਮੁਨੇ.

੪੩੬. ‘‘ਵਿਮਤਿਂ ਦ੍ਵੇਲ਼੍ਹਕਂ ਵਾਪਿ, ਸਞ੍ਛਿਨ੍ਦਸਿ ਮਹਾਮੁਨੇ;

ਪਟਿਪਾਦੇਸਿ ਮੇ ਮਗ੍ਗਂ, ਤਵ ਞਾਣੇਨ ਚਕ੍ਖੁਮ.

੪੩੭. ‘‘ਅਰਹਾ ਵਸਿਪਤ੍ਤਾ [ਸਿਦ੍ਧਿਪਤ੍ਤਾ (ਸੀ. ਸ੍ਯਾ.)] ਚ, ਛਲ਼ਭਿਞ੍ਞਾ ਮਹਿਦ੍ਧਿਕਾ;

ਅਨ੍ਤਲਿਕ੍ਖਚਰਾ ਧੀਰਾ, ਪਰਿਵਾਰੇਨ੍ਤਿ ਤਾਵਦੇ.

੪੩੮. ‘‘ਪਟਿਪਨ੍ਨਾ ਚ ਸੇਖਾ ਚ, ਫਲਟ੍ਠਾ ਸਨ੍ਤਿ ਸਾਵਕਾ;

ਸੂਰੋਦਯੇਵ ਪਦੁਮਾ, ਪੁਪ੍ਫਨ੍ਤਿ ਤਵ ਸਾਵਕਾ.

੪੩੯. ‘‘ਮਹਾਸਮੁਦ੍ਦੋਵਕ੍ਖੋਭੋ, ਅਤੁਲੋਪਿ [ਯਥਾ ਸਮੁਦ੍ਦੋ ਅਕ੍ਖੋਭੋ, ਅਤੁਲੋ ਚ (ਸੀ.)] ਦੁਰੁਤ੍ਤਰੋ;

ਏਵਂ ਞਾਣੇਨ ਸਮ੍ਪਨ੍ਨੋ, ਅਪ੍ਪਮੇਯ੍ਯੋਸਿ ਚਕ੍ਖੁਮ.

੪੪੦. ‘‘ਵਨ੍ਦਿਤ੍ਵਾਹਂ ਲੋਕਜਿਨਂ, ਚਕ੍ਖੁਮਨ੍ਤਂ ਮਹਾਯਸਂ;

ਪੁਥੁ ਦਿਸਾ ਨਮਸ੍ਸਨ੍ਤੋ, ਪਟਿਕੁਟਿਕੋ ਅਗਞ੍ਛਹਂ.

੪੪੧. ‘‘ਦੇਵਲੋਕਾ ਚਵਿਤ੍ਵਾਨ, ਸਮ੍ਪਜਾਨੋ ਪਤਿਸ੍ਸਤੋ;

ਓਕ੍ਕਮਿਂ ਮਾਤੁਯਾ ਕੁਚ੍ਛਿਂ, ਸਨ੍ਧਾਵਨ੍ਤੋ ਭਵਾਭਵੇ.

੪੪੨. ‘‘ਅਗਾਰਾ ਅਭਿਨਿਕ੍ਖਮ੍ਮ, ਪਬ੍ਬਜਿਂ ਅਨਗਾਰਿਯਂ;

ਆਤਾਪੀ ਨਿਪਕੋ ਝਾਯੀ, ਪਟਿਸਲ੍ਲਾਨਗੋਚਰੋ.

੪੪੩. ‘‘ਪਧਾਨਂ ਪਦਹਿਤ੍ਵਾਨ, ਤੋਸਯਿਤ੍ਵਾ ਮਹਾਮੁਨਿਂ;

ਚਨ੍ਦੋਵਬ੍ਭਘਨਾ ਮੁਤ੍ਤੋ, ਵਿਚਰਾਮਿ ਅਹਂ ਸਦਾ.

੪੪੪. ‘‘ਵਿਵੇਕਮਨੁਯੁਤ੍ਤੋਮ੍ਹਿ, ਉਪਸਨ੍ਤੋ ਨਿਰੂਪਧਿ;

ਸਬ੍ਬਾਸਵੇ ਪਰਿਞ੍ਞਾਯ, ਵਿਹਰਾਮਿ ਅਨਾਸਵੋ.

੪੪੫. ‘‘ਤਿਂਸਕਪ੍ਪਸਹਸ੍ਸਮ੍ਹਿ, ਯਂ ਬੁਦ੍ਧਮਭਿਪੂਜਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

੪੪੬. ‘‘ਕਿਲੇਸਾ ਝਾਪਿਤਾ ਮਯ੍ਹਂ, ਭਵਾ ਸਬ੍ਬੇ ਸਮੂਹਤਾ;

ਸਬ੍ਬਾਸਵਾ ਪਰਿਕ੍ਖੀਣਾ, ਨਤ੍ਥਿ ਦਾਨਿ ਪੁਨਬ੍ਭਵੋ.

੪੪੭. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੪੪੮. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਗਿਰਿਮਾਨਨ੍ਦੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਗਿਰਿਮਾਨਨ੍ਦਤ੍ਥੇਰਸ੍ਸਾਪਦਾਨਂ ਸਤ੍ਤਮਂ.