੮. ਸਲ਼ਲਮਣ੍ਡਪਿਯਤ੍ਥੇਰਅਪਦਾਨਂ

੪੪੯. ‘‘ਨਿਬ੍ਬੁਤੇ ਕਕੁਸਨ੍ਧਮ੍ਹਿ, ਬ੍ਰਾਹ੍ਮਣਮ੍ਹਿ ਵੁਸੀਮਤਿ;

ਗਹੇਤ੍ਵਾ ਸਲ਼ਲਂ ਮਾਲਂ, ਮਣ੍ਡਪਂ ਕਾਰਯਿਂ ਅਹਂ.

੪੫੦. ‘‘ਤਾਵਤਿਂਸਗਤੋ ਸਨ੍ਤੋ, ਲਭਾਮਿ ਬ੍ਯਮ੍ਹਮੁਤ੍ਤਮਂ;

ਅਞ੍ਞੇ ਦੇਵੇਤਿਰੋਚਾਮਿ, ਪੁਞ੍ਞਕਮ੍ਮਸ੍ਸਿਦਂ ਫਲਂ.

੪੫੧. ‘‘ਦਿਵਾ ਵਾ ਯਦਿ ਵਾ ਰਤ੍ਤਿਂ, ਚਙ੍ਕਮਨ੍ਤੋ ਠਿਤੋ ਚਹਂ;

ਛਨ੍ਨੋ ਸਲ਼ਲਪੁਪ੍ਫੇਹਿ, ਪੁਞ੍ਞਕਮ੍ਮਸ੍ਸਿਦਂ ਫਲਂ.

੪੫੨. ‘‘ਇਮਸ੍ਮਿਂਯੇਵ ਕਪ੍ਪਮ੍ਹਿ, ਯਂ ਬੁਦ੍ਧਮਭਿਪੂਜਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

੪੫੩. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੪੫੪. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੪੫੫. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਸਲ਼ਲਮਣ੍ਡਪਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਸਲ਼ਲਮਣ੍ਡਪਿਯਤ੍ਥੇਰਸ੍ਸਾਪਦਾਨਂ ਅਟ੍ਠਮਂ.