੬. ਬਾਕੁਲਤ੍ਥੇਰਅਪਦਾਨਂ

੩੮੬. ‘‘ਹਿਮਵਨ੍ਤਸ੍ਸਾਵਿਦੂਰੇ, ਸੋਭਿਤੋ ਨਾਮ ਪਬ੍ਬਤੋ;

ਅਸ੍ਸਮੋ ਸੁਕਤੋ ਮਯ੍ਹਂ, ਸਕਸਿਸ੍ਸੇਹਿ ਮਾਪਿਤੋ.

੩੮੭. ‘‘ਮਣ੍ਡਪਾ ਚ ਬਹੂ ਤਤ੍ਥ, ਪੁਪ੍ਫਿਤਾ ਸਿਨ੍ਦੁਵਾਰਕਾ;

ਕਪਿਤ੍ਥਾ ਚ ਬਹੂ ਤਤ੍ਥ, ਪੁਪ੍ਫਿਤਾ ਜੀਵਜੀਵਕਾ [ਚਮ੍ਪਕਾ ਨਾਗਕੇਤਕਾ (ਸ੍ਯਾ.)].

੩੮੮. ‘‘ਨਿਗ੍ਗੁਣ੍ਡਿਯੋ ਬਹੂ ਤਤ੍ਥ, ਬਦਰਾਮਲਕਾਨਿ ਚ;

ਫਾਰੁਸਕਾ ਅਲਾਬੂ ਚ, ਪੁਣ੍ਡਰੀਕਾ ਚ ਪੁਪ੍ਫਿਤਾ.

੩੮੯. ‘‘ਆਲ਼ਕਾ [ਅਲ਼ਕ੍ਕਾ (ਸ੍ਯਾ.)] ਬੇਲੁਵਾ ਤਤ੍ਥ, ਕਦਲੀ ਮਾਤੁਲੁਙ੍ਗਕਾ;

ਮਹਾਨਾਮਾ ਬਹੂ ਤਤ੍ਥ, ਅਜ੍ਜੁਨਾ ਚ ਪਿਯਙ੍ਗੁਕਾ.

੩੯੦. ‘‘ਕੋਸਮ੍ਬਾ ਸਲ਼ਲਾ ਨਿਮ੍ਬਾ [ਨੀਪਾ (ਸੀ.)], ਨਿਗ੍ਰੋਧਾ ਚ ਕਪਿਤ੍ਥਨਾ;

ਏਦਿਸੋ ਅਸ੍ਸਮੋ ਮਯ੍ਹਂ, ਸਸਿਸ੍ਸੋਹਂ ਤਹਿਂ ਵਸਿਂ.

੩੯੧. ‘‘ਅਨੋਮਦਸ੍ਸੀ ਭਗਵਾ, ਸਯਮ੍ਭੂ ਲੋਕਨਾਯਕੋ;

ਗਵੇਸਂ ਪਟਿਸਲ੍ਲਾਨਂ, ਮਮਸ੍ਸਮਮੁਪਾਗਮਿ.

੩੯੨. ‘‘ਉਪੇਤਮ੍ਹਿ ਮਹਾਵੀਰੇ, ਅਨੋਮਦਸ੍ਸਿਮਹਾਯਸੇ;

ਖਣੇਨ ਲੋਕਨਾਥਸ੍ਸ, ਵਾਤਾਬਾਧੋ ਸਮੁਟ੍ਠਹਿ.

੩੯੩. ‘‘ਵਿਚਰਨ੍ਤੋ ਅਰਞ੍ਞਮ੍ਹਿ, ਅਦ੍ਦਸਂ ਲੋਕਨਾਯਕਂ;

ਉਪਗਨ੍ਤ੍ਵਾਨ ਸਮ੍ਬੁਦ੍ਧਂ, ਚਕ੍ਖੁਮਨ੍ਤਂ ਮਹਾਯਸਂ.

੩੯੪. ‘‘ਇਰਿਯਞ੍ਚਾਪਿ ਦਿਸ੍ਵਾਨ, ਉਪਲਕ੍ਖੇਸਹਂ ਤਦਾ;

ਅਸਂਸਯਞ੍ਹਿ ਬੁਦ੍ਧਸ੍ਸ, ਬ੍ਯਾਧਿ ਨੋ ਉਦਪਜ੍ਜਥ.

੩੯੫. ‘‘ਖਿਪ੍ਪਂ ਅਸ੍ਸਮਮਾਗਞ੍ਛਿਂ, ਮਮ ਸਿਸ੍ਸਾਨ ਸਨ੍ਤਿਕੇ;

ਭੇਸਜ੍ਜਂ ਕਤ੍ਤੁਕਾਮੋਹਂ, ਸਿਸ੍ਸੇ ਆਮਨ੍ਤਯਿਂ ਤਦਾ.

੩੯੬. ‘‘ਪਟਿਸ੍ਸੁਣਿਤ੍ਵਾਨ ਮੇ ਵਾਕ੍ਯਂ, ਸਿਸ੍ਸਾ ਸਬ੍ਬੇ ਸਗਾਰਵਾ;

ਏਕਜ੍ਝਂ ਸਨ੍ਨਿਪਤਿਂਸੁ, ਸਤ੍ਥੁਗਾਰਵਤਾ ਮਮ.

੩੯੭. ‘‘ਖਿਪ੍ਪਂ ਪਬ੍ਬਤਮਾਰੁਯ੍ਹ, ਸਬ੍ਬੋਸਧਮਹਾਸਹਂ [ਮਕਾਸਹਂ (ਸ੍ਯਾ. ਕ.)];

ਪਾਨੀਯਯੋਗਂ [ਪਾਨੀਯਯੋਗ੍ਗਂ (ਸੀ.)] ਕਤ੍ਵਾਨ, ਬੁਦ੍ਧਸੇਟ੍ਠਸ੍ਸਦਾਸਹਂ.

੩੯੮. ‘‘ਪਰਿਭੁਤ੍ਤੇ ਮਹਾਵੀਰੇ, ਸਬ੍ਬਞ੍ਞੁਲੋਕਨਾਯਕੇ;

ਖਿਪ੍ਪਂ ਵਾਤੋ ਵੂਪਸਮਿ, ਸੁਗਤਸ੍ਸ ਮਹੇਸਿਨੋ.

੩੯੯. ‘‘ਪਸ੍ਸਦ੍ਧਂ ਦਰਥਂ ਦਿਸ੍ਵਾ, ਅਨੋਮਦਸ੍ਸੀ ਮਹਾਯਸੋ;

ਸਕਾਸਨੇ ਨਿਸੀਦਿਤ੍ਵਾ, ਇਮਾ ਗਾਥਾ ਅਭਾਸਥ.

੪੦੦. ‘‘‘ਯੋ ਮੇ ਪਾਦਾਸਿ ਭੇਸਜ੍ਜਂ, ਬ੍ਯਾਧਿਞ੍ਚ ਸਮਯੀ ਮਮ;

ਤਮਹਂ ਕਿਤ੍ਤਯਿਸ੍ਸਾਮਿ, ਸੁਣਾਥ ਮਮ ਭਾਸਤੋ.

੪੦੧. ‘‘‘ਕਪ੍ਪਸਤਸਹਸ੍ਸਾਨਿ, ਦੇਵਲੋਕੇ ਰਮਿਸ੍ਸਤਿ;

ਵਾਦਿਤੇ ਤੂਰਿਯੇ ਤਤ੍ਥ, ਮੋਦਿਸ੍ਸਤਿ ਸਦਾ ਅਯਂ.

੪੦੨. ‘‘‘ਮਨੁਸ੍ਸਲੋਕਮਾਗਨ੍ਤ੍ਵਾ, ਸੁਕ੍ਕਮੂਲੇਨ ਚੋਦਿਤੋ;

ਸਹਸ੍ਸਕ੍ਖਤ੍ਤੁਂ ਰਾਜਾ ਚ, ਚਕ੍ਕਵਤ੍ਤੀ ਭਵਿਸ੍ਸਤਿ.

੪੦੩. ‘‘‘ਪਞ੍ਚਪਞ੍ਞਾਸਕਪ੍ਪਮ੍ਹਿ, ਅਨੋਮੋ ਨਾਮ ਖਤ੍ਤਿਯੋ;

ਚਾਤੁਰਨ੍ਤੋ ਵਿਜਿਤਾਵੀ, ਜਮ੍ਬੁਮਣ੍ਡਸ੍ਸ [ਜਮ੍ਬੁਦੀਪਸ੍ਸ (ਸ੍ਯਾ.)] ਇਸ੍ਸਰੋ.

੪੦੪. ‘‘‘ਸਤ੍ਤਰਤਨਸਮ੍ਪਨ੍ਨੋ, ਚਕ੍ਕਵਤ੍ਤੀ ਮਹਬ੍ਬਲੋ;

ਤਾਵਤਿਂਸੇਪਿ ਖੋਭੇਤ੍ਵਾ, ਇਸ੍ਸਰਂ ਕਾਰਯਿਸ੍ਸਤਿ.

੪੦੫. ‘‘‘ਦੇਵਭੂਤੋ ਮਨੁਸ੍ਸੋ ਵਾ, ਅਪ੍ਪਾਬਾਧੋ ਭਵਿਸ੍ਸਤਿ;

ਪਰਿਗ੍ਗਹਂ ਵਿਵਜ੍ਜੇਤ੍ਵਾ, ਬ੍ਯਾਧਿਂ ਲੋਕੇ ਤਰਿਸ੍ਸਤਿ.

੪੦੬. ‘‘‘ਅਪ੍ਪਰਿਮੇਯ੍ਯੇ ਇਤੋ ਕਪ੍ਪੇ, ਓਕ੍ਕਾਕਕੁਲਸਮ੍ਭਵੋ;

ਗੋਤਮੋ ਨਾਮ ਗੋਤ੍ਤੇਨ, ਸਤ੍ਥਾ ਲੋਕੇ ਭਵਿਸ੍ਸਤਿ.

੪੦੭. ‘‘‘ਤਸ੍ਸ ਧਮ੍ਮੇਸੁ ਦਾਯਾਦੋ, ਓਰਸੋ ਧਮ੍ਮਨਿਮ੍ਮਿਤੋ;

ਸਬ੍ਬਾਸਵੇ ਪਰਿਞ੍ਞਾਯ, ਨਿਬ੍ਬਾਯਿਸ੍ਸਤਿਨਾਸਵੋ.

੪੦੮. ‘‘‘ਕਿਲੇਸੇ ਝਾਪਯਿਤ੍ਵਾਨ, ਤਣ੍ਹਾਸੋਤਂ ਤਰਿਸ੍ਸਤਿ;

ਬਾਕੁਲੋ [ਬਕ੍ਕੁਲੋ (ਸੀ. ਸ੍ਯਾ.)] ਨਾਮ ਨਾਮੇਨ, ਹੇਸ੍ਸਤਿ ਸਤ੍ਥੁ ਸਾਵਕੋ.

੪੦੯. ‘‘‘ਇਦਂ ਸਬ੍ਬਂ ਅਭਿਞ੍ਞਾਯ, ਗੋਤਮੋ ਸਕ੍ਯਪੁਙ੍ਗਵੋ;

ਭਿਕ੍ਖੁਸਙ੍ਘੇ ਨਿਸੀਦਿਤ੍ਵਾ, ਏਤਦਗ੍ਗੇ ਠਪੇਸ੍ਸਤਿ’.

੪੧੦. ‘‘ਅਨੋਮਦਸ੍ਸੀ ਭਗਵਾ, ਸਯਮ੍ਭੂ ਲੋਕਨਾਯਕੋ;

ਵਿਵੇਕਾਨੁਵਿਲੋਕੇਨ੍ਤੋ, ਮਮਸ੍ਸਮਮੁਪਾਗਮਿ.

੪੧੧. ‘‘ਉਪਾਗਤਂ ਮਹਾਵੀਰਂ, ਸਬ੍ਬਞ੍ਞੁਂ ਲੋਕਨਾਯਕਂ;

ਸਬ੍ਬੋਸਧੇਨ ਤਪ੍ਪੇਸਿਂ, ਪਸਨ੍ਨੋ ਸੇਹਿ ਪਾਣਿਭਿ.

੪੧੨. ‘‘ਤਸ੍ਸ ਮੇ ਸੁਕਤਂ ਕਮ੍ਮਂ, ਸੁਖੇਤ੍ਤੇ ਬੀਜਸਮ੍ਪਦਾ;

ਖੇਪੇਤੁਂ ਨੇਵ ਸਕ੍ਕੋਮਿ, ਤਦਾ ਹਿ ਸੁਕਤਂ ਮਮ.

੪੧੩. ‘‘ਲਾਭਾ ਮਮ ਸੁਲਦ੍ਧਂ ਮੇ, ਯੋਹਂ ਅਦ੍ਦਕ੍ਖਿ ਨਾਯਕਂ;

ਤੇਨ ਕਮ੍ਮਾਵਸੇਸੇਨ, ਪਤ੍ਤੋਮ੍ਹਿ ਅਚਲਂ ਪਦਂ.

੪੧੪. ‘‘ਸਬ੍ਬਮੇਤਂ ਅਭਿਞ੍ਞਾਯ, ਗੋਤਮੋ ਸਕ੍ਯਪੁਙ੍ਗਵੋ;

ਭਿਕ੍ਖੁਸਙ੍ਘੇ ਨਿਸੀਦਿਤ੍ਵਾ, ਏਤਦਗ੍ਗੇ ਠਪੇਸਿ ਮਂ.

੪੧੫. ‘‘ਅਪਰਿਮੇਯ੍ਯੇ ਇਤੋ ਕਪ੍ਪੇ, ਯਂ ਕਮ੍ਮਮਕਰਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਭੇਸਜ੍ਜਸ੍ਸ ਇਦਂ ਫਲਂ.

੪੧੬. ‘‘ਕਿਲੇਸਾ ਝਾਪਿਤਾ ਮਯ੍ਹਂ, ਭਵਾ ਸਬ੍ਬੇ ਸਮੂਹਤਾ;

ਸਬ੍ਬਾਸਵਾ ਪਰਿਕ੍ਖੀਣਾ, ਨਤ੍ਥਿ ਦਾਨਿ ਪੁਨਬ੍ਭਵੋ.

੪੧੭. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੪੧੮. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਬਾਕੁਲੋ [ਬਕ੍ਕੁਲੋ (ਸੀ. ਸ੍ਯਾ.)] ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ;

ਬਾਕੁਲਤ੍ਥੇਰਸ੍ਸਾਪਦਾਨਂ ਛਟ੍ਠਂ.