੫. ਪਦੁਮਕੂਟਾਗਾਰਿਯਤ੍ਥੇਰਅਪਦਾਨਂ

੩੫੩. ‘‘ਪਿਯਦਸ੍ਸੀ ਨਾਮ ਭਗਵਾ, ਸਯਮ੍ਭੂ ਲੋਕਨਾਯਕੋ;

ਵਿਵੇਕਕਾਮੋ ਸਮ੍ਬੁਦ੍ਧੋ, ਸਮਾਧਿਕੁਸਲੋ ਮੁਨਿ.

੩੫੪. ‘‘ਵਨਸਣ੍ਡਂ ਸਮੋਗਯ੍ਹ, ਪਿਯਦਸ੍ਸੀ ਮਹਾਮੁਨਿ;

ਪਂਸੁਕੂਲਂ ਪਤ੍ਥਰਿਤ੍ਵਾ, ਨਿਸੀਦਿ ਪੁਰਿਸੁਤ੍ਤਮੋ.

੩੫੫. ‘‘ਮਿਗਲੁਦ੍ਦੋ ਪੁਰੇ ਆਸਿਂ, ਅਰਞ੍ਞੇ [ਵਿਪਿਨੇ (ਸੀ.), ਇਰਿਨੇ (ਸ੍ਯਾ. ਕ.)] ਕਾਨਨੇ ਅਹਂ;

ਪਸਦਂ ਮਿਗਮੇਸਨ੍ਤੋ, ਆਹਿਣ੍ਡਾਮਿ ਅਹਂ ਤਦਾ.

੩੫੬. ‘‘ਤਤ੍ਥਦ੍ਦਸਾਸਿਂ ਸਮ੍ਬੁਦ੍ਧਂ, ਓਘਤਿਣ੍ਣਮਨਾਸਵਂ;

ਪੁਪ੍ਫਿਤਂ ਸਾਲਰਾਜਂਵ, ਸਤਰਂਸਿਂਵ ਉਗ੍ਗਤਂ.

੩੫੭. ‘‘ਦਿਸ੍ਵਾਨਹਂ ਦੇਵਦੇਵਂ, ਪਿਯਦਸ੍ਸਿਂ ਮਹਾਯਸਂ;

ਜਾਤਸ੍ਸਰਂ ਸਮੋਗਯ੍ਹ, ਪਦੁਮਂ ਆਹਰਿਂ ਤਦਾ.

੩੫੮. ‘‘ਆਹਰਿਤ੍ਵਾਨ ਪਦੁਮਂ, ਸਤਪਤ੍ਤਂ ਮਨੋਰਮਂ;

ਕੂਟਾਗਾਰਂ ਕਰਿਤ੍ਵਾਨ, ਛਾਦਯਿਂ ਪਦੁਮੇਨਹਂ.

੩੫੯. ‘‘ਅਨੁਕਮ੍ਪਕੋ ਕਾਰੁਣਿਕੋ, ਪਿਯਦਸ੍ਸੀ ਮਹਾਮੁਨਿ;

ਸਤ੍ਤਰਤ੍ਤਿਨ੍ਦਿਵਂ ਬੁਦ੍ਧੋ, ਕੂਟਾਗਾਰੇ ਵਸੀ ਜਿਨੋ.

੩੬੦. ‘‘ਪੁਰਾਣਂ ਛਡ੍ਡਯਿਤ੍ਵਾਨ, ਨਵੇਨ ਛਾਦਯਿਂ ਅਹਂ;

ਅਞ੍ਜਲਿਂ ਪਗ੍ਗਹੇਤ੍ਵਾਨ, ਅਟ੍ਠਾਸਿਂ ਤਾਵਦੇ ਅਹਂ.

੩੬੧. ‘‘ਵੁਟ੍ਠਹਿਤ੍ਵਾ ਸਮਾਧਿਮ੍ਹਾ, ਪਿਯਦਸ੍ਸੀ ਮਹਾਮੁਨਿ;

ਦਿਸਂ ਅਨੁਵਿਲੋਕੇਨ੍ਤੋ, ਨਿਸੀਦਿ ਲੋਕਨਾਯਕੋ.

੩੬੨. ‘‘ਤਦਾ ਸੁਦਸ੍ਸਨੋ ਨਾਮ, ਉਪਟ੍ਠਾਕੋ ਮਹਿਦ੍ਧਿਕੋ;

ਚਿਤ੍ਤਮਞ੍ਞਾਯ ਬੁਦ੍ਧਸ੍ਸ, ਪਿਯਦਸ੍ਸਿਸ੍ਸ ਸਤ੍ਥੁਨੋ.

੩੬੩. ‘‘ਅਸੀਤਿਯਾ ਸਹਸ੍ਸੇਹਿ, ਭਿਕ੍ਖੂਹਿ ਪਰਿਵਾਰਿਤੋ;

ਵਨਨ੍ਤੇ ਸੁਖਮਾਸੀਨਂ, ਉਪੇਸਿ ਲੋਕਨਾਯਕਂ.

੩੬੪. ‘‘ਯਾਵਤਾ ਵਨਸਣ੍ਡਮ੍ਹਿ, ਅਧਿਵਤ੍ਥਾ ਚ ਦੇਵਤਾ;

ਬੁਦ੍ਧਸ੍ਸ ਚਿਤ੍ਤਮਞ੍ਞਾਯ, ਸਬ੍ਬੇ ਸਨ੍ਨਿਪਤੁਂ ਤਦਾ.

੩੬੫. ‘‘ਸਮਾਗਤੇਸੁ ਯਕ੍ਖੇਸੁ, ਕੁਮ੍ਭਣ੍ਡੇ ਸਹਰਕ੍ਖਸੇ;

ਭਿਕ੍ਖੁਸਙ੍ਘੇ ਚ ਸਮ੍ਪਤ੍ਤੇ, ਗਾਥਾ ਪਬ੍ਯਾਹਰੀ [ਸਬ੍ਯਾਹਰੀ (ਸ੍ਯਾ.), ਮਾਬ੍ਯਾਹਰੀ (ਸੀ.)] ਜਿਨੋ.

੩੬੬. ‘‘‘ਯੋ ਮਂ ਸਤ੍ਤਾਹਂ ਪੂਜੇਸਿ, ਆਵਾਸਞ੍ਚ ਅਕਾਸਿ ਮੇ;

ਤਮਹਂ ਕਿਤ੍ਤਯਿਸ੍ਸਾਮਿ, ਸੁਣਾਥ ਮਮ ਭਾਸਤੋ.

੩੬੭. ‘‘‘ਸੁਦੁਦ੍ਦਸਂ ਸੁਨਿਪੁਣਂ, ਗਮ੍ਭੀਰਂ ਸੁਪ੍ਪਕਾਸਿਤਂ;

ਞਾਣੇਨ ਕਿਤ੍ਤਯਿਸ੍ਸਾਮਿ, ਸੁਣਾਥ ਮਮ ਭਾਸਤੋ.

੩੬੮. ‘‘‘ਚਤੁਦ੍ਦਸਾਨਿ ਕਪ੍ਪਾਨਿ, ਦੇਵਰਜ੍ਜਂ ਕਰਿਸ੍ਸਤਿ;

ਕੂਟਾਗਾਰਂ ਮਹਨ੍ਤਸ੍ਸ [ਬ੍ਰਹਂ ਤਸ੍ਸ (ਸੀ. ਸ੍ਯਾ.)], ਪਦ੍ਮਪੁਪ੍ਫੇਹਿ ਛਾਦਿਤਂ.

੩੬੯. ‘‘‘ਆਕਾਸੇ ਧਾਰਯਿਸ੍ਸਤਿ, ਪੁਪ੍ਫਕਮ੍ਮਸ੍ਸਿਦਂ [ਪੁਬ੍ਬਕਮ੍ਮਸ੍ਸਿਦਂ (ਸ੍ਯਾ.)] ਫਲਂ;

ਚਤੁਬ੍ਬੀਸੇ [ਚਤੁਦ੍ਦਸੇ (ਸ੍ਯਾ.)] ਕਪ੍ਪਸਤੇ, ਵੋਕਿਣ੍ਣਂ ਸਂਸਰਿਸ੍ਸਤਿ.

੩੭੦. ‘‘‘ਤਤ੍ਥ ਪੁਪ੍ਫਮਯਂ ਬ੍ਯਮ੍ਹਂ, ਆਕਾਸੇ ਧਾਰਯਿਸ੍ਸਤਿ;

ਯਥਾ ਪਦੁਮਪਤ੍ਤਮ੍ਹਿ, ਤੋਯਂ ਨ ਉਪਲਿਮ੍ਪਤਿ.

੩੭੧. ‘‘‘ਤਥੇਵੀਮਸ੍ਸ ਞਾਣਮ੍ਹਿ, ਕਿਲੇਸਾ ਨੋਪਲਿਮ੍ਪਰੇ;

ਮਨਸਾ ਵਿਨਿਵਟ੍ਟੇਤ੍ਵਾ, ਪਞ੍ਚ ਨੀਵਰਣੇ ਅਯਂ.

੩੭੨. ‘‘‘ਚਿਤ੍ਤਂ ਜਨੇਤ੍ਵਾ ਨੇਕ੍ਖਮ੍ਮੇ, ਅਗਾਰਾ ਪਬ੍ਬਜਿਸ੍ਸਤਿ;

ਤਤੋ ਪੁਪ੍ਫਮਯੇ ਬ੍ਯਮ੍ਹੇ, ਧਾਰੇਨ੍ਤੇ [ਪੁਪ੍ਫਮਯਂ ਬ੍ਯਮ੍ਹਂ, ਧਾਰੇਨ੍ਤਂ (ਸ੍ਯਾ. ਕ.)] ਨਿਕ੍ਖਮਿਸ੍ਸਤਿ.

੩੭੩. ‘‘‘ਰੁਕ੍ਖਮੂਲੇ ਵਸਨ੍ਤਸ੍ਸ, ਨਿਪਕਸ੍ਸ ਸਤੀਮਤੋ;

ਤਤ੍ਥ ਪੁਪ੍ਫਮਯਂ ਬ੍ਯਮ੍ਹਂ, ਮਤ੍ਥਕੇ ਧਾਰਯਿਸ੍ਸਤਿ.

੩੭੪. ‘‘‘ਚੀਵਰਂ ਪਿਣ੍ਡਪਾਤਞ੍ਚ, ਪਚ੍ਚਯਂ ਸਯਨਾਸਨਂ;

ਦਤ੍ਵਾਨ ਭਿਕ੍ਖੁਸਙ੍ਘਸ੍ਸ, ਨਿਬ੍ਬਾਯਿਸ੍ਸਤਿਨਾਸਵੋ’.

੩੭੫. ‘‘ਕੂਟਾਗਾਰੇਨ ਚਰਤਾ [ਚਰਣਾ (ਸੀ. ਪੀ. ਕ.), ਚਰਿਤੇ (ਸ੍ਯਾ.)], ਪਬ੍ਬਜ੍ਜਂ ਅਭਿਨਿਕ੍ਖਮਿਂ;

ਰੁਕ੍ਖਮੂਲੇ ਵਸਨ੍ਤਮ੍ਪਿ [ਵਸਨ੍ਤਮ੍ਹਿ (ਸੀ.), ਵਸਤੋਪਿ (?)], ਕੂਟਾਗਾਰਂ ਧਰੀਯਤਿ.

੩੭੬. ‘‘ਚੀਵਰੇ ਪਿਣ੍ਡਪਾਤੇ ਚ, ਚੇਤਨਾ ਮੇ ਨ ਵਿਜ੍ਜਤਿ;

ਪੁਞ੍ਞਕਮ੍ਮੇਨ ਸਂਯੁਤ੍ਤੋ, ਲਭਾਮਿ ਪਰਿਨਿਟ੍ਠਿਤਂ.

੩੭੭. ‘‘ਗਣਨਾਤੋ ਅਸਙ੍ਖੇਯ੍ਯਾ, ਕਪ੍ਪਕੋਟੀ ਬਹੂ ਮਮ;

ਰਿਤ੍ਤਕਾ ਤੇ ਅਤਿਕ੍ਕਨ੍ਤਾ, ਪਮੁਤ੍ਤਾ ਲੋਕਨਾਯਕਾ.

੩੭੮. ‘‘ਅਟ੍ਠਾਰਸੇ ਕਪ੍ਪਸਤੇ, ਪਿਯਦਸ੍ਸੀ ਵਿਨਾਯਕੋ;

ਤਮਹਂ ਪਯਿਰੁਪਾਸਿਤ੍ਵਾ, ਇਮਂ ਯੋਨਿਂ ਉਪਾਗਤੋ.

੩੭੯. ‘‘ਇਧ ਪਸ੍ਸਾਮਿ [ਇਧਦ੍ਦਸਾਸਿਂ (ਸੀ.)] ਸਮ੍ਬੁਦ੍ਧਂ, ਅਨੋਮਂ ਨਾਮ ਚਕ੍ਖੁਮਂ;

ਤਮਹਂ ਉਪਗਨ੍ਤ੍ਵਾਨ, ਪਬ੍ਬਜਿਂ ਅਨਗਾਰਿਯਂ.

੩੮੦. ‘‘ਦੁਕ੍ਖਸ੍ਸਨ੍ਤਕਰੋ ਬੁਦ੍ਧੋ, ਮਗ੍ਗਂ ਮੇ ਦੇਸਯੀ ਜਿਨੋ;

ਤਸ੍ਸ ਧਮ੍ਮਂ ਸੁਣਿਤ੍ਵਾਨ, ਪਤ੍ਤੋਮ੍ਹਿ ਅਚਲਂ ਪਦਂ.

੩੮੧. ‘‘ਤੋਸਯਿਤ੍ਵਾਨ ਸਮ੍ਬੁਦ੍ਧਂ, ਗੋਤਮਂ ਸਕ੍ਯਪੁਙ੍ਗਵਂ;

ਸਬ੍ਬਾਸਵੇ ਪਰਿਞ੍ਞਾਯ, ਵਿਹਰਾਮਿ ਅਨਾਸਵੋ.

੩੮੨. ‘‘ਅਟ੍ਠਾਰਸੇ ਕਪ੍ਪਸਤੇ, ਯਂ ਬੁਦ੍ਧਮਭਿਪੂਜਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

੩੮੩. ‘‘ਕਿਲੇਸਾ ਝਾਪਿਤਾ ਮਯ੍ਹਂ, ਭਵਾ ਸਬ੍ਬੇ ਸਮੂਹਤਾ;

ਸਬ੍ਬਾਸਵਾ ਪਰਿਕ੍ਖੀਣਾ, ਨਤ੍ਥਿ ਦਾਨਿ ਪੁਨਬ੍ਭਵੋ.

੩੮੪. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੩੮੫. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਪਦੁਮਕੂਟਾਗਾਰਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਪਦੁਮਕੂਟਾਗਾਰਿਯਤ੍ਥੇਰਸ੍ਸਾਪਦਾਨਂ ਪਞ੍ਚਮਂ.