੪. ਮਧੁਦਾਯਕਤ੍ਥੇਰਅਪਦਾਨਂ

੩੩੩. ‘‘ਸਿਨ੍ਧੁਯਾ ਨਦਿਯਾ ਤੀਰੇ, ਸੁਕਤੋ ਅਸ੍ਸਮੋ ਮਮ;

ਤਤ੍ਥ ਵਾਚੇਮਹਂ ਸਿਸ੍ਸੇ, ਇਤਿਹਾਸਂ ਸਲਕ੍ਖਣਂ.

੩੩੪. ‘‘ਧਮ੍ਮਕਾਮਾ ਵਿਨੀਤਾ ਤੇ, ਸੋਤੁਕਾਮਾ ਸੁਸਾਸਨਂ;

ਛਲ਼ਙ੍ਗੇ ਪਾਰਮਿਪ੍ਪਤ੍ਤਾ, ਸਿਨ੍ਧੁਕੂਲੇ ਵਸਨ੍ਤਿ ਤੇ.

੩੩੫. ‘‘ਉਪ੍ਪਾਤਗਮਨੇ ਚੇਵ, ਲਕ੍ਖਣੇਸੁ ਚ ਕੋਵਿਦਾ;

ਉਤ੍ਤਮਤ੍ਥਂ ਗਵੇਸਨ੍ਤਾ, ਵਸਨ੍ਤਿ ਵਿਪਿਨੇ ਤਦਾ.

੩੩੬. ‘‘ਸੁਮੇਧੋ ਨਾਮ ਸਮ੍ਬੁਦ੍ਧੋ, ਲੋਕੇ ਉਪ੍ਪਜ੍ਜਿ ਤਾਵਦੇ;

ਅਮ੍ਹਾਕਂ ਅਨੁਕਮ੍ਪਨ੍ਤੋ, ਉਪਾਗਚ੍ਛਿ ਵਿਨਾਯਕੋ.

੩੩੭. ‘‘ਉਪਾਗਤਂ ਮਹਾਵੀਰਂ, ਸੁਮੇਧਂ ਲੋਕਨਾਯਕਂ;

ਤਿਣਸਨ੍ਥਾਰਕਂ ਕਤ੍ਵਾ, ਲੋਕਜੇਟ੍ਠਸ੍ਸਦਾਸਹਂ.

੩੩੮. ‘‘ਵਿਪਿਨਾਤੋ ਮਧੁਂ ਗਯ੍ਹ, ਬੁਦ੍ਧਸੇਟ੍ਠਸ੍ਸਦਾਸਹਂ;

ਸਮ੍ਬੁਦ੍ਧੋ ਪਰਿਭੁਞ੍ਜਿਤ੍ਵਾ, ਇਦਂ ਵਚਨਮਬ੍ਰਵਿ.

੩੩੯. ‘‘‘ਯੋ ਤਂ ਅਦਾਸਿ ਮਧੁਂ ਮੇ, ਪਸਨ੍ਨੋ ਸੇਹਿ ਪਾਣਿਭਿ;

ਤਮਹਂ ਕਿਤ੍ਤਯਿਸ੍ਸਾਮਿ, ਸੁਣਾਥ ਮਮ ਭਾਸਤੋ.

੩੪੦. ‘‘‘ਇਮਿਨਾ ਮਧੁਦਾਨੇਨ, ਤਿਣਸਨ੍ਥਾਰਕੇਨ ਚ;

ਤਿਂਸ ਕਪ੍ਪਸਹਸ੍ਸਾਨਿ, ਦੇਵਲੋਕੇ ਰਮਿਸ੍ਸਤਿ.

੩੪੧. ‘‘‘ਤਿਂਸ ਕਪ੍ਪਸਹਸ੍ਸਮ੍ਹਿ, ਓਕ੍ਕਾਕਕੁਲਸਮ੍ਭਵੋ;

ਗੋਤਮੋ ਨਾਮ ਗੋਤ੍ਤੇਨ, ਸਤ੍ਥਾ ਲੋਕੇ ਭਵਿਸ੍ਸਤਿ.

੩੪੨. ‘‘‘ਤਸ੍ਸ ਧਮ੍ਮੇਸੁ ਦਾਯਾਦੋ, ਓਰਸੋ ਧਮ੍ਮਨਿਮ੍ਮਿਤੋ;

ਸਬ੍ਬਾਸਵੇ ਪਰਿਞ੍ਞਾਯ, ਨਿਬ੍ਬਾਯਿਸ੍ਸਤਿਨਾਸਵੋ.

੩੪੩. ‘‘‘ਦੇਵਲੋਕਾ ਇਧਾਗਨ੍ਤ੍ਵਾ, ਮਾਤੁਕੁਚ੍ਛਿਂ ਉਪਾਗਤੇ;

ਮਧੁਵਸ੍ਸਂ ਪਵਸ੍ਸਿਤ੍ਥ, ਛਾਦਯਂ ਮਧੁਨਾ ਮਹਿਂ’.

੩੪੪. ‘‘ਮਯਿ ਨਿਕ੍ਖਨ੍ਤਮਤ੍ਤਮ੍ਹਿ, ਕੁਚ੍ਛਿਯਾ ਚ ਸੁਦੁਤ੍ਤਰਾ;

ਤਤ੍ਰਾਪਿ ਮਧੁਵਸ੍ਸਂ ਮੇ, ਵਸ੍ਸਤੇ ਨਿਚ੍ਚਕਾਲਿਕਂ.

੩੪੫. ‘‘ਅਗਾਰਾ ਅਭਿਨਿਕ੍ਖਮ੍ਮ, ਪਬ੍ਬਜਿਂ ਅਨਗਾਰਿਯਂ;

ਲਾਭੀ ਅਨ੍ਨਸ੍ਸ ਪਾਨਸ੍ਸ, ਮਧੁਦਾਨਸ੍ਸਿਦਂ ਫਲਂ.

੩੪੬. ‘‘ਸਬ੍ਬਕਾਮਸਮਿਦ੍ਧੋਹਂ, ਭਵਿਤ੍ਵਾ ਦੇਵਮਾਨੁਸੇ;

ਤੇਨੇਵ ਮਧੁਦਾਨੇਨ, ਪਤ੍ਤੋਮ੍ਹਿ ਆਸਵਕ੍ਖਯਂ.

੩੪੭. ‘‘ਵੁਟ੍ਠਮ੍ਹਿ ਦੇਵੇ ਚਤੁਰਙ੍ਗੁਲੇ ਤਿਣੇ, ਸਮ੍ਪੁਪ੍ਫਿਤੇ [ਸੁਪੁਪ੍ਫਿਤੇ (ਸ੍ਯਾ.)] ਧਰਣੀਰੁਹੇ ਸਞ੍ਛਨ੍ਨੇ [ਵਪ੍ਪਦੇਸੇ (ਸ੍ਯਾ.)];

ਸੁਞ੍ਞੇ ਘਰੇ ਮਣ੍ਡਪਰੁਕ੍ਖਮੂਲਕੇ, ਵਸਾਮਿ ਨਿਚ੍ਚਂ ਸੁਖਿਤੋ ਅਨਾਸਵੋ.

੩੪੮. ‘‘ਮਜ੍ਝੇ ਮਹਨ੍ਤੇ ਹੀਨੇ ਚ [ਮਜ੍ਝੇ ਮਯ੍ਹਂ ਭਵਾ ਅਸ੍ਸੁ (ਸ੍ਯਾ. ਪੀ. ਕ.)], ਭਵੇ ਸਬ੍ਬੇ ਅਤਿਕ੍ਕਮਿਂ [ਯੇ ਭਵੇ ਸਮਤਿਕ੍ਕਮਿਂ (ਸ੍ਯਾ. ਕ.), ਯੋ ਭਵੇਸੁ ਪਕਿਤ੍ਤਯਿ (ਕ.)];

ਅਜ੍ਜ ਮੇ ਆਸਵਾ ਖੀਣਾ, ਨਤ੍ਥਿ ਦਾਨਿ ਪੁਨਬ੍ਭਵੋ.

੩੪੯. ‘‘ਤਿਂਸਕਪ੍ਪਸਹਸ੍ਸਮ੍ਹਿ, ਯਂ ਦਾਨਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਮਧੁਦਾਨਸ੍ਸਿਦਂ ਫਲਂ.

੩੫੦. ‘‘ਕਿਲੇਸਾ ਝਾਪਿਤਾ ਮਯ੍ਹਂ, ਭਵਾ ਸਬ੍ਬੇ ਸਮੂਹਤਾ;

ਸਬ੍ਬਾਸਵਾ ਪਰਿਕ੍ਖੀਣਾ, ਨਤ੍ਥਿ ਦਾਨਿ ਪੁਨਬ੍ਭਵੋ.

੩੫੧. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੩੫੨. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਮਧੁਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਮਧੁਦਾਯਕਤ੍ਥੇਰਸ੍ਸਾਪਦਾਨਂ ਚਤੁਤ੍ਥਂ.