੩. ਸਬ੍ਬਕਿਤ੍ਤਿਕਤ੍ਥੇਰਅਪਦਾਨਂ

੩੦੪. ‘‘ਕਣਿਕਾਰਂਵ ਜਲਿਤਂ [ਜੋਤਨ੍ਤਂ (ਸੀ.)], ਦੀਪਰੁਕ੍ਖਂਵ ਉਜ੍ਜਲਂ [ਜੋਤਿਤਂ (ਸ੍ਯਾ.)];

ਓਸਧਿਂਵ ਵਿਰੋਚਨ੍ਤਂ, ਵਿਜ੍ਜੁਤਂ ਗਗਨੇ ਯਥਾ.

੩੦੫. ‘‘ਅਸਮ੍ਭੀਤਂ ਅਨੁਤ੍ਤਾਸਿਂ, ਮਿਗਰਾਜਂਵ ਕੇਸਰਿਂ;

ਞਾਣਾਲੋਕਂ ਪਕਾਸੇਨ੍ਤਂ, ਮਦ੍ਦਨ੍ਤਂ ਤਿਤ੍ਥਿਯੇ ਗਣੇ.

੩੦੬. ‘‘ਉਦ੍ਧਰਨ੍ਤਂ ਇਮਂ ਲੋਕਂ, ਛਿਦ੍ਦਨ੍ਤਂ ਸਬ੍ਬਸਂਸਯਂ;

ਗਜ੍ਜਨ੍ਤਂ [ਅਸਮ੍ਭੀਤਂ (ਸ੍ਯਾ.), ਗਚ੍ਛਨ੍ਤਂ (ਕ.)] ਮਿਗਰਾਜਂਵ, ਅਦ੍ਦਸਂ ਲੋਕਨਾਯਕਂ.

੩੦੭. ‘‘ਜਟਾਜਿਨਧਰੋ ਆਸਿਂ, ਬ੍ਰਹਾ ਉਜੁ ਪਤਾਪਵਾ;

ਵਾਕਚੀਰਂ ਗਹੇਤ੍ਵਾਨ, ਪਾਦਮੂਲੇ ਅਪਤ੍ਥਰਿਂ.

੩੦੮. ‘‘ਕਾਲ਼ਾਨੁਸਾਰਿਯਂ ਗਯ੍ਹ, ਅਨੁਲਿਮ੍ਪਿਂ ਤਥਾਗਤਂ;

ਸਮ੍ਬੁਦ੍ਧਮਨੁਲਿਮ੍ਪੇਤ੍ਵਾ, ਸਨ੍ਥਵਿਂ ਲੋਕਨਾਯਕਂ.

੩੦੯. ‘‘ਸਮੁਦ੍ਧਰਸਿਮਂ ਲੋਕਂ, ਓਘਤਿਣ੍ਣ [ਓਘਤਿਣ੍ਣੋ (ਸ੍ਯਾ. ਕ.)] ਮਹਾਮੁਨਿ;

ਞਾਣਾਲੋਕੇਨ ਜੋਤੇਸਿ, ਨਾਵਟਂ [ਪਵਰਂ (ਸ੍ਯਾ.), ਵਜਿਰ (ਪੀ.)] ਞਾਣਮੁਤ੍ਤਮਂ.

੩੧੦. ‘‘ਧਮ੍ਮਚਕ੍ਕਂ [ਤੁਵਂ ਚਕ੍ਕਂ (ਕ.)] ਪਵਤ੍ਤੇਸਿ, ਮਦ੍ਦਸੇ ਪਰਤਿਤ੍ਥਿਯੇ;

ਉਸਭੋ ਜਿਤਸਙ੍ਗਾਮੋ, ਸਮ੍ਪਕਮ੍ਪੇਸਿ ਮੇਦਨਿਂ.

੩੧੧. ‘‘ਮਹਾਸਮੁਦ੍ਦੇ ਊਮਿਯੋ, ਵੇਲਨ੍ਤਮ੍ਹਿ ਪਭਿਜ੍ਜਰੇ;

ਤਥੇਵ ਤਵ ਞਾਣਮ੍ਹਿ, ਸਬ੍ਬਦਿਟ੍ਠੀ ਪਭਿਜ੍ਜਰੇ.

੩੧੨. ‘‘ਸੁਖੁਮਚ੍ਛਿਕਜਾਲੇਨ, ਸਰਮ੍ਹਿ ਸਮ੍ਪਤਾਨਿਤੇ;

ਅਨ੍ਤੋਜਾਲਿਕਤਾ [ਜਾਲਗਤਾ (ਸੀ.)] ਪਾਣਾ, ਪੀਲ਼ਿਤਾ ਹੋਨ੍ਤਿ ਤਾਵਦੇ.

੩੧੩. ‘‘ਤਥੇਵ ਤਿਤ੍ਥਿਯਾ ਲੋਕੇ, ਪੁਥੁਪਾਸਣ੍ਡਨਿਸ੍ਸਿਤਾ [ਮੂਲ਼੍ਹਾ ਸਚ੍ਚਵਿਨਿਸ੍ਸਟਾ (ਸ੍ਯਾ.), ਮੁਟ੍ਠਸਚ੍ਚਵਿਨਿਸ੍ਸਟਾ (ਕ.)];

ਅਨ੍ਤੋਞਾਣਵਰੇ ਤੁਯ੍ਹਂ, ਪਰਿਵਤ੍ਤਨ੍ਤਿ ਮਾਰਿਸ.

੩੧੪. ‘‘ਪਤਿਟ੍ਠਾ ਵੁਯ੍ਹਤਂ ਓਘੇ, ਤ੍ਵਞ੍ਹਿ ਨਾਥੋ ਅਬਨ੍ਧੁਨਂ;

ਭਯਟ੍ਟਿਤਾਨਂ ਸਰਣਂ, ਮੁਤ੍ਤਿਤ੍ਥੀਨਂ ਪਰਾਯਣਂ.

੩੧੫. ‘‘ਏਕਵੀਰੋ ਅਸਦਿਸੋ, ਮੇਤ੍ਤਾਕਰੁਣਸਞ੍ਚਯੋ [ਸਞ੍ਞੁਤੋ (ਸ੍ਯਾ.)];

ਅਸਮੋ ਸੁਸਮੋ ਸਨ੍ਤੋ [ਸੁਸੀਲੋ ਅਸਮੋ ਸਨ੍ਤੋ (ਸੀ.), ਪਞ੍ਞਵਾ ਯੁਤ੍ਤਚਾਗੋ ਚ (ਸ੍ਯਾ.)], ਵਸੀ ਤਾਦੀ ਜਿਤਞ੍ਜਯੋ.

੩੧੬. ‘‘ਧੀਰੋ ਵਿਗਤਸਮ੍ਮੋਹੋ, ਅਨੇਜੋ ਅਕਥਂਕਥੀ;

ਤੁਸਿਤੋ [ਵੁਸਿਤੋ (ਸੀ.)] ਵਨ੍ਤਦੋਸੋਸਿ, ਨਿਮ੍ਮਲੋ ਸਂਯਤੋ ਸੁਚਿ.

੩੧੭. ‘‘ਸਙ੍ਗਾਤਿਗੋ ਹਤਮਦੋ [ਗਤਮਦੋ (ਸ੍ਯਾ.), ਤਮਨੁਦੋ (ਕ.)], ਤੇਵਿਜ੍ਜੋ ਤਿਭਵਨ੍ਤਗੋ;

ਸੀਮਾਤਿਗੋ ਧਮ੍ਮਗਰੁ, ਗਤਤ੍ਥੋ ਹਿਤਵਬ੍ਭੁਤੋ [ਹਿਤਵਪ੍ਪਥੋ (ਸੀ. ਸ੍ਯਾ.)].

੩੧੮. ‘‘ਤਾਰਕੋ ਤ੍ਵਂ ਯਥਾ ਨਾਵਾ, ਨਿਧੀਵਸ੍ਸਾਸਕਾਰਕੋ;

ਅਸਮ੍ਭੀਤੋ ਯਥਾ ਸੀਹੋ, ਗਜਰਾਜਾਵ ਦਪ੍ਪਿਤੋ.

੩੧੯. ‘‘ਥੋਮੇਤ੍ਵਾ ਦਸਗਾਥਾਹਿ, ਪਦੁਮੁਤ੍ਤਰਂ ਮਹਾਯਸਂ;

ਵਨ੍ਦਿਤ੍ਵਾ ਸਤ੍ਥੁਨੋ ਪਾਦੇ, ਤੁਣ੍ਹੀ ਅਟ੍ਠਾਸਹਂ ਤਦਾ.

੩੨੦. ‘‘ਪਦੁਮੁਤ੍ਤਰੋ ਲੋਕਵਿਦੂ, ਆਹੁਤੀਨਂ ਪਟਿਗ੍ਗਹੋ;

ਭਿਕ੍ਖੁਸਙ੍ਘੇ ਠਿਤੋ ਸਤ੍ਥਾ, ਇਮਾ ਗਾਥਾ ਅਭਾਸਥ.

੩੨੧. ‘‘‘ਯੋ ਮੇ ਸੀਲਞ੍ਚ ਞਾਣਞ੍ਚ, ਸਦ੍ਧਮ੍ਮਞ੍ਚਾਪਿ ਵਣ੍ਣਯਿ [ਧਮ੍ਮਞ੍ਚਾਪਿ ਪਕਿਤ੍ਤਯਿ (ਸੀ. ਸ੍ਯਾ.)];

ਤਮਹਂ ਕਿਤ੍ਤਯਿਸ੍ਸਾਮਿ, ਸੁਣਾਥ ਮਮ ਭਾਸਤੋ.

੩੨੨. ‘‘‘ਸਟ੍ਠਿ ਕਪ੍ਪਸਹਸ੍ਸਾਨਿ, ਦੇਵਲੋਕੇ ਰਮਿਸ੍ਸਤਿ;

ਅਞ੍ਞੇ ਦੇਵੇਭਿਭਵਿਤ੍ਵਾ, ਇਸ੍ਸਰਂ ਕਾਰਯਿਸ੍ਸਤਿ.

੩੨੩. ‘‘‘ਸੋ ਪਚ੍ਛਾ ਪਬ੍ਬਜਿਤ੍ਵਾਨ, ਸੁਕ੍ਕਮੂਲੇਨ ਚੋਦਿਤੋ;

ਗੋਤਮਸ੍ਸ ਭਗਵਤੋ, ਸਾਸਨੇ ਪਬ੍ਬਜਿਸ੍ਸਤਿ.

੩੨੪. ‘‘‘ਪਬ੍ਬਜਿਤ੍ਵਾਨ ਕਾਯੇਨ, ਪਾਪਕਮ੍ਮਂ ਵਿਵਜ੍ਜਿਯ;

ਸਬ੍ਬਾਸਵੇ ਪਰਿਞ੍ਞਾਯ, ਨਿਬ੍ਬਾਯਿਸ੍ਸਤਿਨਾਸਵੋ’.

੩੨੫. ‘‘ਯਥਾਪਿ ਮੇਘੋ ਥਨਯਂ, ਤਪ੍ਪੇਤਿ ਮੇਦਿਨਿਂ ਇਮਂ;

ਤਥੇਵ ਤ੍ਵਂ ਮਹਾਵੀਰ, ਧਮ੍ਮੇਨ ਤਪ੍ਪਯੀ ਮਮਂ.

੩੨੬. ‘‘ਸੀਲਂ ਪਞ੍ਞਞ੍ਚ ਧਮ੍ਮਞ੍ਚ, ਥਵਿਤ੍ਵਾ ਲੋਕਨਾਯਕਂ;

ਪਤ੍ਤੋਮ੍ਹਿ ਪਰਮਂ ਸਨ੍ਤਿਂ, ਨਿਬ੍ਬਾਨਂ ਪਦਮਚ੍ਚੁਤਂ.

੩੨੭. ‘‘ਅਹੋ ਨੂਨ ਸ ਭਗਵਾ, ਚਿਰਂ ਤਿਟ੍ਠੇਯ੍ਯ ਚਕ੍ਖੁਮਾ;

ਅਞ੍ਞਾਤਞ੍ਚ ਵਿਜਾਨੇਯ੍ਯੁਂ, ਫੁਸੇਯ੍ਯੁਂ [ਅਞ੍ਞਾਤਞ੍ਚਾਪਿ ਜਾਨੇਯ੍ਯ, ਪਸ੍ਸੇਯ੍ਯ (ਕ.)] ਅਮਤਂ ਪਦਂ.

੩੨੮. ‘‘ਅਯਂ ਮੇ ਪਚ੍ਛਿਮਾ ਜਾਤਿ, ਭਵਾ ਸਬ੍ਬੇ ਸਮੂਹਤਾ;

ਸਬ੍ਬਾਸਵੇ ਪਰਿਞ੍ਞਾਯ, ਵਿਹਰਾਮਿ ਅਨਾਸਵੋ.

੩੨੯. ‘‘ਸਤਸਹਸ੍ਸਿਤੋ ਕਪ੍ਪੇ, ਯਂ ਬੁਦ੍ਧਮਭਿਥੋਮਯਿਂ

ਦੁਗ੍ਗਤਿਂ ਨਾਭਿਜਾਨਾਮਿ, ਕਿਤ੍ਤਨਾਯ ਇਦਂ ਫਲਂ.

੩੩੦. ‘‘ਕਿਲੇਸਾ ਝਾਪਿਤਾ ਮਯ੍ਹਂ, ਭਵਾ ਸਬ੍ਬੇ ਸਮੂਹਤਾ;

ਸਬ੍ਬਾਸਵਾ ਪਰਿਕ੍ਖੀਣਾ, ਨਤ੍ਥਿ ਦਾਨਿ ਪੁਨਬ੍ਭਵੋ.

੩੩੧. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੩੩੨. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਸਬ੍ਬਕਿਤ੍ਤਿਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਸਬ੍ਬਕਿਤ੍ਤਿਕਤ੍ਥੇਰਸ੍ਸਾਪਦਾਨਂ ਤਤਿਯਂ.