੨. ਸੇਲਤ੍ਥੇਰਅਪਦਾਨਂ

੨੦੮. ‘‘ਨਗਰੇ ਹਂਸਵਤਿਯਾ, ਵੀਥਿਸਾਮੀ ਅਹੋਸਹਂ;

ਮਮ ਞਾਤੀ ਸਮਾਨੇਤ੍ਵਾ, ਇਦਂ ਵਚਨਮਬ੍ਰਵਿਂ.

੨੦੯. ‘‘‘ਬੁਦ੍ਧੋ ਲੋਕੇ ਸਮੁਪ੍ਪਨ੍ਨੋ, ਪੁਞ੍ਞਕ੍ਖੇਤ੍ਤੋ ਅਨੁਤ੍ਤਰੋ [ਪੁਞ੍ਞਕ੍ਖੇਤ੍ਤਂ ਅਨੁਤ੍ਤਰਂ (ਸੀ.)];

ਆਸਿ ਸੋ [ਆਸੀਸੋ (ਸੀ.), ਆਧਾਰੋ (ਪੀ.)] ਸਬ੍ਬਲੋਕਸ੍ਸ, ਆਹੁਤੀਨਂ ਪਟਿਗ੍ਗਹੋ.

੨੧੦. ‘‘‘ਖਤ੍ਤਿਯਾ ਨੇਗਮਾ ਚੇਵ, ਮਹਾਸਾਲਾ ਚ ਬ੍ਰਾਹ੍ਮਣਾ;

ਪਸਨ੍ਨਚਿਤ੍ਤਾ ਸੁਮਨਾ, ਪੂਗਧਮ੍ਮਂ ਅਕਂਸੁ ਤੇ.

੨੧੧. ‘‘‘ਹਤ੍ਥਾਰੋਹਾ ਅਨੀਕਟ੍ਠਾ, ਰਥਿਕਾ ਪਤ੍ਤਿਕਾਰਕਾ;

ਪਸਨ੍ਨਚਿਤ੍ਤਾ ਸੁਮਨਾ, ਪੂਗਧਮ੍ਮਂ ਅਕਂਸੁ ਤੇ.

੨੧੨. ‘‘‘ਉਗ੍ਗਾ ਚ ਰਾਜਪੁਤ੍ਤਾ ਚ, ਵੇਸਿਯਾਨਾ ਚ ਬ੍ਰਾਹ੍ਮਣਾ;

ਪਸਨ੍ਨਚਿਤ੍ਤਾ ਸੁਮਨਾ, ਪੂਗਧਮ੍ਮਂ ਅਕਂਸੁ ਤੇ.

੨੧੩. ‘‘‘ਆਲ਼ਾਰਿਕਾ ਕਪ੍ਪਕਾ [ਆਲ਼ਾਰਿਕਾ ਚ ਸੂਦਾ (ਸ੍ਯਾ.)] ਚ, ਨ੍ਹਾਪਕਾ ਮਾਲਕਾਰਕਾ;

ਪਸਨ੍ਨਚਿਤ੍ਤਾ ਸੁਮਨਾ, ਪੂਗਧਮ੍ਮਂ ਅਕਂਸੁ ਤੇ.

੨੧੪. ‘‘‘ਰਜਕਾ ਪੇਸਕਾਰਾ ਚ, ਚਮ੍ਮਕਾਰਾ ਚ ਨ੍ਹਾਪਿਤਾ;

ਪਸਨ੍ਨਚਿਤ੍ਤਾ ਸੁਮਨਾ, ਪੂਗਧਮ੍ਮਂ ਅਕਂਸੁ ਤੇ.

੨੧੫. ‘‘‘ਉਸੁਕਾਰਾ ਭਮਕਾਰਾ, ਚਮ੍ਮਕਾਰਾ ਚ ਤਚ੍ਛਕਾ;

ਪਸਨ੍ਨਚਿਤ੍ਤਾ ਸੁਮਨਾ, ਪੂਗਧਮ੍ਮਂ ਅਕਂਸੁ ਤੇ.

੨੧੬. ‘‘‘ਕਮ੍ਮਾਰਾ ਸੋਣ੍ਣਕਾਰਾ ਚ, ਤਿਪੁਲੋਹਕਰਾ ਤਥਾ;

ਪਸਨ੍ਨਚਿਤ੍ਤਾ ਸੁਮਨਾ, ਪੂਗਧਮ੍ਮਂ ਅਕਂਸੁ ਤੇ.

੨੧੭. ‘‘‘ਭਤਕਾ ਚੇਟਕਾ ਚੇਵ, ਦਾਸਕਮ੍ਮਕਰਾ ਬਹੂ;

ਯਥਾਸਕੇਨ ਥਾਮੇਨ, ਪੂਗਧਮ੍ਮਂ ਅਕਂਸੁ ਤੇ.

੨੧੮. ‘‘‘ਉਦਹਾਰਾ ਕਟ੍ਠਹਾਰਾ, ਕਸ੍ਸਕਾ ਤਿਣਹਾਰਕਾ;

ਯਥਾਸਕੇਨ ਥਾਮੇਨ, ਪੂਗਧਮ੍ਮਂ ਅਕਂਸੁ ਤੇ.

੨੧੯. ‘‘‘ਪੁਪ੍ਫਿਕਾ ਮਾਲਿਕਾ ਚੇਵ, ਪਣ੍ਣਿਕਾ ਫਲਹਾਰਕਾ;

ਯਥਾਸਕੇਨ ਥਾਮੇਨ, ਪੂਗਧਮ੍ਮਂ ਅਕਂਸੁ ਤੇ.

੨੨੦. ‘‘‘ਗਣਿਕਾ ਕੁਮ੍ਭਦਾਸੀ ਚ, ਪੂਵਿਕਾ [ਸੂਪਿਕਾ (ਕ.)] ਮਚ੍ਛਿਕਾਪਿ ਚ;

ਯਥਾਸਕੇਨ ਥਾਮੇਨ, ਪੂਗਧਮ੍ਮਂ ਅਕਂਸੁ ਤੇ.

੨੨੧. ‘‘‘ਏਥ ਸਬ੍ਬੇ ਸਮਾਗਨ੍ਤ੍ਵਾ, ਗਣਂ ਬਨ੍ਧਾਮ ਏਕਤੋ;

ਅਧਿਕਾਰਂ ਕਰਿਸ੍ਸਾਮ, ਪੁਞ੍ਞਕ੍ਖੇਤ੍ਤੇ ਅਨੁਤ੍ਤਰੇ’.

੨੨੨. ‘‘ਤੇ ਮੇ ਸੁਤ੍ਵਾਨ ਵਚਨਂ, ਗਣਂ ਬਨ੍ਧਿਂਸੁ ਤਾਵਦੇ;

ਉਪਟ੍ਠਾਨਸਾਲਂ ਸੁਕਤਂ, ਭਿਕ੍ਖੁਸਙ੍ਘਸ੍ਸ ਕਾਰਯੁਂ.

੨੨੩. ‘‘ਨਿਟ੍ਠਾਪੇਤ੍ਵਾਨ ਤਂ ਸਾਲਂ, ਉਦਗ੍ਗੋ ਤੁਟ੍ਠਮਾਨਸੋ;

ਪਰੇਤੋ ਤੇਹਿ ਸਬ੍ਬੇਹਿ, ਸਮ੍ਬੁਦ੍ਧਮੁਪਸਙ੍ਕਮਿਂ.

੨੨੪. ‘‘ਉਪਸਙ੍ਕਮ੍ਮ ਸਮ੍ਬੁਦ੍ਧਂ, ਲੋਕਨਾਥਂ ਨਰਾਸਭਂ;

ਵਨ੍ਦਿਤ੍ਵਾ ਸਤ੍ਥੁਨੋ ਪਾਦੇ, ਇਦਂ ਵਚਨਮਬ੍ਰਵਿਂ.

੨੨੫. ‘‘‘ਇਮੇ ਤੀਣਿ ਸਤਾ ਵੀਰ, ਪੁਰਿਸਾ ਏਕਤੋ ਗਣਾ;

ਉਪਟ੍ਠਾਨਸਾਲਂ ਸੁਕਤਂ, ਨਿਯ੍ਯਾਦੇਨ੍ਤਿ [ਨਿਯ੍ਯਾਤੇਨ੍ਤਿ (ਸੀ.)] ਤੁਵਂ [ਤਵਂ (ਸੀ.), ਤਵ (ਸ੍ਯਾ.)] ਮੁਨਿ’.

੨੨੬. ‘‘ਭਿਕ੍ਖੁਸਙ੍ਘਸ੍ਸ ਪੁਰਤੋ, ਸਮ੍ਪਟਿਚ੍ਛਤ੍ਵ ਚਕ੍ਖੁਮਾ;

ਤਿਣ੍ਣਂ ਸਤਾਨਂ ਪੁਰਤੋ, ਇਮਾ ਗਾਥਾ ਅਭਾਸਥ.

੨੨੭. ‘‘‘ਤਿਸਤਾਪਿ ਚ ਜੇਟ੍ਠੋ ਚ, ਅਨੁਵਤ੍ਤਿਂਸੁ ਏਕਤੋ;

ਸਮ੍ਪਤ੍ਤਿਞ੍ਹਿ [ਸਮ੍ਪਤ੍ਤੀਹਿ (ਸ੍ਯਾ. ਕ.)] ਕਰਿਤ੍ਵਾਨ, ਸਬ੍ਬੇ ਅਨੁਭਵਿਸ੍ਸਥ.

੨੨੮. ‘‘‘ਪਚ੍ਛਿਮੇ ਭਵੇ ਸਮ੍ਪਤ੍ਤੇ, ਸੀਤਿਭਾਵਮਨੁਤ੍ਤਰਂ;

ਅਜਰਂ ਅਮਤਂ ਸਨ੍ਤਂ, ਨਿਬ੍ਬਾਨਂ ਫਸ੍ਸਯਿਸ੍ਸਥ’.

੨੨੯. ‘‘ਏਵਂ ਬੁਦ੍ਧੋ ਵਿਯਾਕਾਸਿ, ਸਬ੍ਬਞ੍ਞੂ ਸਮਣੁਤ੍ਤਰੋ;

ਬੁਦ੍ਧਸ੍ਸ ਵਚਨਂ ਸੁਤ੍ਵਾ, ਸੋਮਨਸ੍ਸਂ ਪਵੇਦਯਿਂ.

੨੩੦. ‘‘ਤਿਂਸ ਕਪ੍ਪਸਹਸ੍ਸਾਨਿ, ਦੇਵਲੋਕੇ ਰਮਿਂ ਅਹਂ;

ਦੇਵਾਧਿਪੋ ਪਞ੍ਚਸਤਂ, ਦੇਵਰਜ੍ਜਮਕਾਰਯਿਂ.

੨੩੧. ‘‘ਸਹਸ੍ਸਕ੍ਖਤ੍ਤੁਂ ਰਾਜਾ ਚ, ਚਕ੍ਕਵਤ੍ਤੀ ਅਹੋਸਹਂ;

ਦੇਵਰਜ੍ਜਂ ਕਰੋਨ੍ਤਸ੍ਸ, ਮਹਾਦੇਵਾ ਅਵਨ੍ਦਿਸੁਂ.

੨੩੨. ‘‘ਇਧ ਮਾਨੁਸਕੇ ਰਜ੍ਜਂ [ਰਜ੍ਜੇ (ਸੀ.)], ਪਰਿਸਾ ਹੋਨ੍ਤਿ ਬਨ੍ਧਵਾ;

ਪਚ੍ਛਿਮੇ ਭਵੇ ਸਮ੍ਪਤ੍ਤੇ, ਵਾਸੇਟ੍ਠੋ ਨਾਮ ਬ੍ਰਾਹ੍ਮਣੋ.

੨੩੩. ‘‘ਅਸੀਤਿਕੋਟਿ ਨਿਚਯੋ, ਤਸ੍ਸ ਪੁਤ੍ਤੋ ਅਹੋਸਹਂ;

ਸੇਲੋ ਇਤਿ ਮਮ ਨਾਮਂ, ਛਲ਼ਙ੍ਗੇ ਪਾਰਮਿਂ ਗਤੋ.

੨੩੪. ‘‘ਜਙ੍ਘਾਵਿਹਾਰਂ ਵਿਚਰਂ, ਸਸਿਸ੍ਸੇਹਿ ਪੁਰਕ੍ਖਤੋ;

ਜਟਾਭਾਰਿਕਭਰਿਤਂ, ਕੇਣਿਯਂ ਨਾਮ ਤਾਪਸਂ.

੨੩੫. ‘‘ਪਟਿਯਤ੍ਤਾਹੁਤਿਂ ਦਿਸ੍ਵਾ, ਇਦਂ ਵਚਨਮਬ੍ਰਵਿਂ;

‘ਆਵਾਹੋ ਵਾ ਵਿਵਾਹੋ ਵਾ, ਰਾਜਾ ਵਾ ਤੇ ਨਿਮਨ੍ਤਿਤੋ’.

੨੩੬. ‘‘ਆਹੁਤਿਂ [ਨਾਹੁਤਿਂ (?)] ਯਿਟ੍ਠੁਕਾਮੋਹਂ, ਬ੍ਰਾਹ੍ਮਣੇ ਦੇਵਸਮ੍ਮਤੇ;

ਨ ਨਿਮਨ੍ਤੇਮਿ ਰਾਜਾਨਂ, ਆਹੁਤੀ ਮੇ ਨ ਵਿਜ੍ਜਤਿ.

੨੩੭. ‘‘ਨ ਚਤ੍ਥਿ ਮਯ੍ਹਮਾਵਾਹੋ, ਵਿਵਾਹੋ ਮੇ ਨ ਵਿਜ੍ਜਤਿ;

ਸਕ੍ਯਾਨਂ ਨਨ੍ਦਿਜਨਨੋ, ਸੇਟ੍ਠੋ ਲੋਕੇ ਸਦੇਵਕੇ.

੨੩੮. ‘‘ਸਬ੍ਬਲੋਕਹਿਤਤ੍ਥਾਯ, ਸਬ੍ਬਸਤ੍ਤਸੁਖਾਵਹੋ;

ਸੋ ਮੇ ਨਿਮਨ੍ਤਿਤੋ ਅਜ੍ਜ, ਤਸ੍ਸੇਤਂ ਪਟਿਯਾਦਨਂ.

੨੩੯. ‘‘ਤਿਮ੍ਬਰੂਸਕਵਣ੍ਣਾਭੋ, ਅਪ੍ਪਮੇਯ੍ਯੋ ਅਨੂਪਮੋ;

ਰੂਪੇਨਾਸਦਿਸੋ ਬੁਦ੍ਧੋ, ਸ੍ਵਾਤਨਾਯ ਨਿਮਨ੍ਤਿਤੋ.

੨੪੦. ‘‘ਉਕ੍ਕਾਮੁਖਪਹਟ੍ਠੋਵ, ਖਦਿਰਙ੍ਗਾਰਸਨ੍ਨਿਭੋ;

ਵਿਜ੍ਜੂਪਮੋ ਮਹਾਵੀਰੋ, ਸੋ ਮੇ ਬੁਦ੍ਧੋ ਨਿਮਨ੍ਤਿਤੋ.

੨੪੧. ‘‘ਪਬ੍ਬਤਗ੍ਗੇ ਯਥਾ ਅਚ੍ਚਿ, ਪੁਣ੍ਣਮਾਯੇਵ ਚਨ੍ਦਿਮਾ;

ਨਲ਼ਗ੍ਗਿਵਣ੍ਣਸਙ੍ਕਾਸੋ, ਸੋ ਮੇ ਬੁਦ੍ਧੋ ਨਿਮਨ੍ਤਿਤੋ.

੨੪੨. ‘‘ਅਸਮ੍ਭੀਤੋ ਭਯਾਤੀਤੋ, ਭਵਨ੍ਤਕਰਣੋ ਮੁਨਿ;

ਸੀਹੂਪਮੋ ਮਹਾਵੀਰੋ, ਸੋ ਮੇ ਬੁਦ੍ਧੋ ਨਿਮਨ੍ਤਿਤੋ.

੨੪੩. ‘‘ਕੁਸਲੋ ਬੁਦ੍ਧਧਮ੍ਮੇਹਿ, ਅਪਸਯ੍ਹੋ ਪਰੇਹਿ ਸੋ;

ਨਾਗੂਪਮੋ ਮਹਾਵੀਰੋ, ਸੋ ਮੇ ਬੁਦ੍ਧੋ ਨਿਮਨ੍ਤਿਤੋ.

੨੪੪. ‘‘ਸਦ੍ਧਮ੍ਮਾਚਾਰਕੁਸਲੋ, ਬੁਦ੍ਧਨਾਗੋ ਅਸਾਦਿਸੋ;

ਉਸਭੂਪਮੋ ਮਹਾਵੀਰੋ, ਸੋ ਮੇ ਬੁਦ੍ਧੋ ਨਿਮਨ੍ਤਿਤੋ.

੨੪੫. ‘‘ਅਨਨ੍ਤਵਣ੍ਣੋ ਅਮਿਤਯਸੋ, ਵਿਚਿਤ੍ਤਸਬ੍ਬਲਕ੍ਖਣੋ;

ਸਕ੍ਕੂਪਮੋ ਮਹਾਵੀਰੋ, ਸੋ ਮੇ ਬੁਦ੍ਧੋ ਨਿਮਨ੍ਤਿਤੋ.

੨੪੬. ‘‘ਵਸੀ ਗਣੀ ਪਤਾਪੀ ਚ, ਤੇਜਸ੍ਸੀ ਚ ਦੁਰਾਸਦੋ;

ਬ੍ਰਹ੍ਮੂਪਮੋ ਮਹਾਵੀਰੋ, ਸੋ ਮੇ ਬੁਦ੍ਧੋ ਨਿਮਨ੍ਤਿਤੋ.

੨੪੭. ‘‘ਪਤ੍ਤਧਮ੍ਮੋ ਦਸਬਲੋ, ਬਲਾਤਿਬਲਪਾਰਗੋ;

ਧਰਣੂਪਮੋ ਮਹਾਵੀਰੋ, ਸੋ ਮੇ ਬੁਦ੍ਧੋ ਨਿਮਨ੍ਤਿਤੋ.

੨੪੮. ‘‘ਸੀਲਵੀਚਿਸਮਾਕਿਣ੍ਣੋ, ਧਮ੍ਮਵਿਞ੍ਞਾਣਖੋਭਿਤੋ;

ਉਦਧੂਪਮੋ ਮਹਾਵੀਰੋ, ਸੋ ਮੇ ਬੁਦ੍ਧੋ ਨਿਮਨ੍ਤਿਤੋ.

੨੪੯. ‘‘ਦੁਰਾਸਦੋ ਦੁਪ੍ਪਸਹੋ, ਅਚਲੋ ਉਗ੍ਗਤੋ ਬ੍ਰਹਾ;

ਨੇਰੂਪਮੋ ਮਹਾਵੀਰੋ, ਸੋ ਮੇ ਬੁਦ੍ਧੋ ਨਿਮਨ੍ਤਿਤੋ.

੨੫੦. ‘‘ਅਨਨ੍ਤਞਾਣੋ ਅਸਮਸਮੋ, ਅਤੁਲੋ ਅਗ੍ਗਤਂ ਗਤੋ;

ਗਗਨੂਪਮੋ ਮਹਾਵੀਰੋ, ਸੋ ਮੇ ਬੁਦ੍ਧੋ ਨਿਮਨ੍ਤਿਤੋ.

ਪਨ੍ਨਰਸਮਂ ਭਾਣਵਾਰਂ.

੨੫੧. ‘‘ਪਤਿਟ੍ਠਾ ਭਯਭੀਤਾਨਂ, ਤਾਣੋ ਸਰਣਗਾਮਿਨਂ;

ਅਸ੍ਸਾਸਕੋ ਮਹਾਵੀਰੋ, ਸੋ ਮੇ ਬੁਦ੍ਧੋ ਨਿਮਨ੍ਤਿਤੋ.

੨੫੨. ‘‘ਆਸਯੋ ਬੁਦ੍ਧਿਮਨ੍ਤਾਨਂ, ਪੁਞ੍ਞਕ੍ਖੇਤ੍ਤਂ ਸੁਖੇਸਿਨਂ;

ਰਤਨਾਕਰੋ ਮਹਾਵੀਰੋ, ਸੋ ਮੇ ਬੁਦ੍ਧੋ ਨਿਮਨ੍ਤਿਤੋ.

੨੫੩. ‘‘ਅਸ੍ਸਾਸਕੋ ਵੇਦਕਰੋ, ਸਾਮਞ੍ਞਫਲਦਾਯਕੋ;

ਮੇਘੂਪਮੋ ਮਹਾਵੀਰੋ, ਸੋ ਮੇ ਬੁਦ੍ਧੋ ਨਿਮਨ੍ਤਿਤੋ.

੨੫੪. ‘‘ਲੋਕਚਕ੍ਖੁ ਮਹਾਤੇਜੋ, ਸਬ੍ਬਤਮਵਿਨੋਦਨੋ;

ਸੂਰਿਯੂਪਮੋ ਮਹਾਵੀਰੋ, ਸੋ ਮੇ ਬੁਦ੍ਧੋ ਨਿਮਨ੍ਤਿਤੋ.

੨੫੫. ‘‘ਆਰਮ੍ਮਣਵਿਮੁਤ੍ਤੀਸੁ, ਸਭਾਵਦਸ੍ਸਨੋ ਮੁਨਿ;

ਚਨ੍ਦੂਪਮੋ ਮਹਾਵੀਰੋ, ਸੋ ਮੇ ਬੁਦ੍ਧੋ ਨਿਮਨ੍ਤਿਤੋ.

੨੫੬. ‘‘ਬੁਦ੍ਧੋ ਸਮੁਸ੍ਸਿਤੋ ਲੋਕੇ, ਲਕ੍ਖਣੇਹਿ ਅਲਙ੍ਕਤੋ;

ਅਪ੍ਪਮੇਯ੍ਯੋ ਮਹਾਵੀਰੋ, ਸੋ ਮੇ ਬੁਦ੍ਧੋ ਨਿਮਨ੍ਤਿਤੋ.

੨੫੭. ‘‘ਯਸ੍ਸ ਞਾਣਂ ਅਪ੍ਪਮੇਯ੍ਯਂ, ਸੀਲਂ ਯਸ੍ਸ ਅਨੂਪਮਂ;

ਵਿਮੁਤ੍ਤਿ ਅਸਦਿਸਾ ਯਸ੍ਸ, ਸੋ ਮੇ ਬੁਦ੍ਧੋ ਨਿਮਨ੍ਤਿਤੋ.

੨੫੮. ‘‘ਯਸ੍ਸ ਧੀਤਿ ਅਸਦਿਸਾ, ਥਾਮੋ ਯਸ੍ਸ ਅਚਿਨ੍ਤਿਯੋ;

ਯਸ੍ਸ ਪਰਕ੍ਕਮੋ ਜੇਟ੍ਠੋ, ਸੋ ਮੇ ਬੁਦ੍ਧੋ ਨਿਮਨ੍ਤਿਤੋ.

੨੫੯. ‘‘ਰਾਗੋ ਦੋਸੋ ਚ ਮੋਹੋ ਚ, ਵਿਸਾ ਸਬ੍ਬੇ ਸਮੂਹਤਾ;

ਅਗਦੂਪਮੋ ਮਹਾਵੀਰੋ, ਸੋ ਮੇ ਬੁਦ੍ਧੋ ਨਿਮਨ੍ਤਿਤੋ.

੨੬੦. ‘‘ਕ੍ਲੇਸਬ੍ਯਾਧਿਬਹੁਦੁਕ੍ਖ ਸਬ੍ਬਤਮਵਿਨੋਦਨੋ [ਵਿਨੋਦਕੋ (ਸੀ. ਸ੍ਯਾ.)];

ਵੇਜ੍ਜੂਪਮੋ ਮਹਾਵੀਰੋ, ਸੋ ਮੇ ਬੁਦ੍ਧੋ ਨਿਮਨ੍ਤਿਤੋ.

੨੬੧. ‘‘ਬੁਦ੍ਧੋਤਿ ਭੋ ਯਂ ਵਦੇਸਿ, ਘੋਸੋਪੇਸੋ ਸੁਦੁਲ੍ਲਭੋ;

ਬੁਦ੍ਧੋ ਬੁਦ੍ਧੋਤਿ ਸੁਤ੍ਵਾਨ, ਪੀਤਿ ਮੇ ਉਦਪਜ੍ਜਥ.

੨੬੨. ‘‘ਅਬ੍ਭਨ੍ਤਰਂ ਅਗਣ੍ਹਨ੍ਤਂ, ਪੀਤਿ ਮੇ ਬਹਿ ਨਿਚ੍ਛਰੇ;

ਸੋਹਂ ਪੀਤਿਮਨੋ ਸਨ੍ਤੋ, ਇਦਂ ਵਚਨਮਬ੍ਰਵਿਂ.

੨੬੩. ‘‘‘ਕਹਂ ਨੁ ਖੋ ਸੋ ਭਗਵਾ, ਲੋਕਜੇਟ੍ਠੋ ਨਰਾਸਭੋ;

ਤਤ੍ਥ ਗਨ੍ਤ੍ਵਾ ਨਮਸ੍ਸਿਸ੍ਸਂ, ਸਾਮਞ੍ਞਫਲਦਾਯਕਂ’.

੨੬੪. ‘‘‘ਪਗ੍ਗਯ੍ਹ ਦਕ੍ਖਿਣਂ ਬਾਹੁਂ, ਵੇਦਜਾਤੋ ਕਤਞ੍ਜਲੀ;

ਆਚਿਕ੍ਖਿ ਮੇ ਧਮ੍ਮਰਾਜਂ, ਸੋਕਸਲ੍ਲਵਿਨੋਦਨਂ.

੨੬੫. ‘‘‘ਉਦੇਨ੍ਤਂਵ ਮਹਾਮੇਘਂ, ਨੀਲਂ ਅਞ੍ਜਨਸਨ੍ਨਿਭਂ;

ਸਾਗਰਂ ਵਿਯ ਦਿਸ੍ਸਨ੍ਤਂ, ਪਸ੍ਸਸੇਤਂ ਮਹਾਵਨਂ.

੨੬੬. ‘‘‘ਏਤ੍ਥ ਸੋ ਵਸਤੇ ਬੁਦ੍ਧੋ, ਅਦਨ੍ਤਦਮਕੋ ਮੁਨਿ;

ਵਿਨਯਨ੍ਤੋ ਚ ਵੇਨੇਯ੍ਯੇ, ਬੋਧੇਨ੍ਤੋ ਬੋਧਿਪਕ੍ਖਿਯੇ.

੨੬੭. ‘‘‘ਪਿਪਾਸਿਤੋਵ ਉਦਕਂ, ਭੋਜਨਂਵ ਜਿਘਚ੍ਛਿਤੋ;

ਗਾਵੀ ਯਥਾ ਵਚ੍ਛਗਿਦ੍ਧਾ, ਏਵਾਹਂ ਵਿਚਿਨਿਂ ਜਿਨਂ.

੨੬੮. ‘‘‘ਆਚਾਰਉਪਚਾਰਞ੍ਞੂ, ਧਮ੍ਮਾਨੁਚ੍ਛਵਿਸਂਵਰਂ;

ਸਿਕ੍ਖਾਪੇਮਿ ਸਕੇ ਸਿਸ੍ਸੇ, ਗਚ੍ਛਨ੍ਤੇ ਜਿਨਸਨ੍ਤਿਕਂ.

੨੬੯. ‘‘‘ਦੁਰਾਸਦਾ ਭਗਵਨ੍ਤੋ, ਸੀਹਾਵ ਏਕਚਾਰਿਨੋ;

ਪਦੇ ਪਦਂ ਨਿਕ੍ਖਿਪਨ੍ਤਾ, ਆਗਚ੍ਛੇਯ੍ਯਾਥ ਮਾਣਵਾ.

੨੭੦. ‘‘‘ਆਸੀਵਿਸੋ ਯਥਾ ਘੋਰੋ, ਮਿਗਰਾਜਾਵ ਕੇਸਰੀ;

ਮਤ੍ਤੋਵ ਕੁਞ੍ਜਰੋ ਦਨ੍ਤੀ, ਏਵਂ ਬੁਦ੍ਧਾ ਦੁਰਾਸਦਾ.

੨੭੧. ‘‘‘ਉਕ੍ਕਾਸਿਤਞ੍ਚ ਖਿਪਿਤਂ, ਅਜ੍ਝੁਪੇਕ੍ਖਿਯ ਮਾਣਵਾ;

ਪਦੇ ਪਦਂ ਨਿਕ੍ਖਿਪਨ੍ਤਾ, ਉਪੇਥ ਬੁਦ੍ਧਸਨ੍ਤਿਕਂ.

੨੭੨. ‘‘‘ਪਟਿਸਲ੍ਲਾਨਗਰੁਕਾ, ਅਪ੍ਪਸਦ੍ਦਾ ਦੁਰਾਸਦਾ;

ਦੁਰੂਪਸਙ੍ਕਮਾ ਬੁਦ੍ਧਾ, ਗਰੂ ਹੋਨ੍ਤਿ ਸਦੇਵਕੇ.

੨੭੩. ‘‘‘ਯਦਾਹਂ ਪਞ੍ਹਂ ਪੁਚ੍ਛਾਮਿ, ਪਟਿਸਮ੍ਮੋਦਯਾਮਿ ਵਾ;

ਅਪ੍ਪਸਦ੍ਦਾ ਤਦਾ ਹੋਥ, ਮੁਨਿਭੂਤਾਵ ਤਿਟ੍ਠਥ.

੨੭੪. ‘‘‘ਯਂ ਸੋ ਦੇਸੇਤਿ ਸਮ੍ਬੁਦ੍ਧੋ [ਸਦ੍ਧਮ੍ਮਂ (ਸੀ. ਸ੍ਯਾ.)], ਖੇਮਂ ਨਿਬ੍ਬਾਨਪਤ੍ਤਿਯਾ;

ਤਮੇਵਤ੍ਥਂ ਨਿਸਾਮੇਥ, ਸਦ੍ਧਮ੍ਮਸਵਨਂ ਸੁਖਂ’.

੨੭੫. ‘‘ਉਪਸਙ੍ਕਮ੍ਮ ਸਮ੍ਬੁਦ੍ਧਂ, ਸਮ੍ਮੋਦਿਂ ਮੁਨਿਨਾ ਅਹਂ;

ਤਂ ਕਥਂ ਵੀਤਿਸਾਰੇਤ੍ਵਾ, ਲਕ੍ਖਣੇ ਉਪਧਾਰਯਿਂ.

੨੭੬. ‘‘ਲਕ੍ਖਣੇ ਦ੍ਵੇ ਚ ਕਙ੍ਖਾਮਿ, ਪਸ੍ਸਾਮਿ ਤਿਂਸਲਕ੍ਖਣੇ;

ਕੋਸੋਹਿਤਵਤ੍ਥਗੁਯ੍ਹਂ, ਇਦ੍ਧਿਯਾ ਦਸ੍ਸਯੀ ਮੁਨਿ.

੨੭੭. ‘‘ਜਿਵ੍ਹਂ ਨਿਨ੍ਨਾਮਯਿਤ੍ਵਾਨ, ਕਣ੍ਣਸੋਤੇ ਚ ਨਾਸਿਕੇ;

ਪਟਿਮਸਿ ਨਲਾਟਨ੍ਤਂ, ਕੇਵਲਂ ਛਾਦਯੀ ਜਿਨੋ.

੨੭੮. ‘‘ਤਸ੍ਸਾਹਂ ਲਕ੍ਖਣੇ ਦਿਸ੍ਵਾ, ਪਰਿਪੁਣ੍ਣੇ ਸਬ੍ਯਞ੍ਜਨੇ;

ਬੁਦ੍ਧੋਤਿ ਨਿਟ੍ਠਂ ਗਨ੍ਤ੍ਵਾਨ, ਸਹ ਸਿਸ੍ਸੇਹਿ ਪਬ੍ਬਜਿਂ.

੨੭੯. ‘‘ਸਤੇਹਿ ਤੀਹਿ ਸਹਿਤੋ, ਪਬ੍ਬਜਿਂ ਅਨਗਾਰਿਯਂ;

ਅਦ੍ਧਮਾਸੇ ਅਸਮ੍ਪਤ੍ਤੇ, ਸਬ੍ਬੇ ਪਤ੍ਤਾਮ੍ਹ ਨਿਬ੍ਬੁਤਿਂ.

੨੮੦. ‘‘ਏਕਤੋ ਕਮ੍ਮਂ ਕਤ੍ਵਾਨ, ਪੁਞ੍ਞਕ੍ਖੇਤ੍ਤੇ ਅਨੁਤ੍ਤਰੇ;

ਏਕਤੋ ਸਂਸਰਿਤ੍ਵਾਨ, ਏਕਤੋ ਵਿਨਿਵਤ੍ਤਯੁਂ.

੨੮੧. ‘‘ਗੋਪਾਨਸਿਯੋ ਦਤ੍ਵਾਨ, ਪੂਗਧਮ੍ਮੇ ਵਸਿਂ ਅਹਂ;

ਤੇਨ ਕਮ੍ਮੇਨ ਸੁਕਤੇਨ, ਅਟ੍ਠ ਹੇਤੂ ਲਭਾਮਹਂ.