੧੦. ਅਜਿਤਤ੍ਥੇਰਅਪਦਾਨਂ

੪੮੪. ‘‘ਪਦੁਮੁਤ੍ਤਰੋ ਨਾਮ ਜਿਨੋ, ਸਬ੍ਬਧਮ੍ਮਾਨ ਪਾਰਗੂ;

ਅਜ੍ਝੋਗਾਹੇਤ੍ਵਾ ਹਿਮਵਨ੍ਤਂ, ਨਿਸੀਦਿ ਲੋਕਨਾਯਕੋ.

੪੮੫. ‘‘ਨਾਹਂ ਅਦ੍ਦਕ੍ਖਿਂ [ਪਸ੍ਸਾਮਿ (?)] ਸਮ੍ਬੁਦ੍ਧਂ, ਨਪਿ ਸਦ੍ਦਂ ਸੁਣੋਮਹਂ;

ਮਮ ਭਕ੍ਖਂ ਗਵੇਸਨ੍ਤੋ, ਆਹਿਣ੍ਡਾਮਿ ਵਨੇ ਅਹਂ [ਤਦਾ (ਸੀ.)].

੪੮੬. ‘‘ਤਤ੍ਥਦ੍ਦਸ੍ਸਾਸਿਂ ਸਮ੍ਬੁਦ੍ਧਂ, ਦ੍ਵਤ੍ਤਿਂਸਵਰਲਕ੍ਖਣਂ;

ਦਿਸ੍ਵਾਨ ਵਿਤ੍ਤਿਮਾਪਜ੍ਜਿਂ [ਚਿਤ੍ਤਮਾਪਜ੍ਜਿ (ਸੀ.), ਚਿਤ੍ਤਮਾਪਜ੍ਜਿਂ (ਸ੍ਯਾ.)], ਸਤ੍ਤੋ ਕੋ ਨਾਮਯਂ ਭਵੇ.

੪੮੭. ‘‘ਲਕ੍ਖਣਾਨਿ ਵਿਲੋਕੇਤ੍ਵਾ, ਮਮ ਵਿਜ੍ਜਂ ਅਨੁਸ੍ਸਰਿਂ;

ਸੁਤਞ੍ਹਿ ਮੇਤਂ ਵੁਡ੍ਢਾਨਂ, ਪਣ੍ਡਿਤਾਨਂ ਸੁਭਾਸਿਤਂ.

੪੮੮. ‘‘ਤੇਸਂ ਯਥਾ ਤਂ ਵਚਨਂ, ਅਯਂ ਬੁਦ੍ਧੋ ਭਵਿਸ੍ਸਤਿ;

ਯਂਨੂਨਾਹਂ ਸਕ੍ਕਰੇਯ੍ਯਂ, ਗਤਿਂ ਮੇ ਸੋਧਯਿਸ੍ਸਤਿ.

੪੮੯. ‘‘ਖਿਪ੍ਪਂ ਅਸ੍ਸਮਮਾਗਨ੍ਤ੍ਵਾ, ਮਧੁਤੇਲਂ ਗਹਿਂ ਅਹਂ;

ਕੋਲਮ੍ਬਕਂ ਗਹੇਤ੍ਵਾਨ, ਉਪਗਚ੍ਛਿਂ ਵਿਨਾਯਕਂ [ਨਰਾਸਭਂ (ਸੀ.)].

੪੯੦. ‘‘ਤਿਦਣ੍ਡਕੇ ਗਹੇਤ੍ਵਾਨ, ਅਬ੍ਭੋਕਾਸੇ ਠਪੇਸਹਂ;

ਪਦੀਪਂ ਪਜ੍ਜਲਿਤ੍ਵਾਨ, ਅਟ੍ਠਕ੍ਖਤ੍ਤੁਂ ਅਵਨ੍ਦਹਂ.

੪੯੧. ‘‘ਸਤ੍ਤਰਤ੍ਤਿਨ੍ਦਿਵਂ ਬੁਦ੍ਧੋ, ਨਿਸੀਦਿ ਪੁਰਿਸੁਤ੍ਤਮੋ;

ਤਤੋ ਰਤ੍ਯਾ ਵਿਵਸਾਨੇ, ਵੁਟ੍ਠਾਸਿ ਲੋਕਨਾਯਕੋ.

੪੯੨. ‘‘ਪਸਨ੍ਨਚਿਤ੍ਤੋ ਸੁਮਨੋ, ਸਬ੍ਬਰਤ੍ਤਿਨ੍ਦਿਵਂ ਅਹਂ;

ਦੀਪਂ ਬੁਦ੍ਧਸ੍ਸ ਪਾਦਾਸਿਂ, ਪਸਨ੍ਨੋ ਸੇਹਿ ਪਾਣਿਭਿ.

੪੯੩. ‘‘ਸਬ੍ਬੇ ਵਨਾ ਗਨ੍ਧਮਯਾ, ਪਬ੍ਬਤੇ ਗਨ੍ਧਮਾਦਨੇ;

ਬੁਦ੍ਧਸ੍ਸ ਆਨੁਭਾਵੇਨ, ਆਗਚ੍ਛੁਂ ਬੁਦ੍ਧਸਨ੍ਤਿਕਂ [ਉਪਗਚ੍ਛੁਂ ਤਦਾ ਜਿਨਂ (ਸੀ.)].

੪੯੪. ‘‘ਯੇ ਕੇਚਿ ਪੁਪ੍ਫਗਨ੍ਧਾਸੇ, ਪੁਪ੍ਫਿਤਾ ਧਰਣੀਰੁਹਾ;

ਬੁਦ੍ਧਸ੍ਸ ਆਨੁਭਾਵੇਨ, ਸਬ੍ਬੇ ਸਨ੍ਨਿਪਤੁਂ ਤਦਾ.

੪੯੫. ‘‘ਯਾਵਤਾ ਹਿਮਵਨ੍ਤਮ੍ਹਿ, ਨਾਗਾ ਚ ਗਰੁਲ਼ਾ ਉਭੋ;

ਧਮ੍ਮਞ੍ਚ ਸੋਤੁਕਾਮਾ ਤੇ, ਆਗਚ੍ਛੁਂ ਬੁਦ੍ਧਸਨ੍ਤਿਕਂ.

੪੯੬. ‘‘ਦੇਵਲੋ ਨਾਮ ਸਮਣੋ, ਬੁਦ੍ਧਸ੍ਸ ਅਗ੍ਗਸਾਵਕੋ;

ਵਸੀਸਤਸਹਸ੍ਸੇਹਿ, ਬੁਦ੍ਧਸਨ੍ਤਿਕੁਪਾਗਮਿ.

੪੯੭. ‘‘ਪਦੁਮੁਤ੍ਤਰੋ ਲੋਕਵਿਦੂ, ਆਹੁਤੀਨਂ ਪਟਿਗ੍ਗਹੋ;

ਭਿਕ੍ਖੁਸਙ੍ਘੇ ਨਿਸੀਦਿਤ੍ਵਾ, ਇਮਾ ਗਾਥਾ ਅਭਾਸਥ.

੪੯੮. ‘‘‘ਯੋ ਮੇ ਦੀਪਂ ਪਦੀਪੇਸਿ, ਪਸਨ੍ਨੋ ਸੇਹਿ ਪਾਣਿਭਿ;

ਤਮਹਂ ਕਿਤ੍ਤਯਿਸ੍ਸਾਮਿ, ਸੁਣਾਥ ਮਮ ਭਾਸਤੋ.

੪੯੯. ‘‘‘ਸਟ੍ਠਿ ਕਪ੍ਪਸਹਸ੍ਸਾਨਿ, ਦੇਵਲੋਕੇ ਰਮਿਸ੍ਸਤਿ;

ਸਹਸ੍ਸਕ੍ਖਤ੍ਤੁਂ ਰਾਜਾ ਚ, ਚਕ੍ਕਵਤ੍ਤੀ ਭਵਿਸ੍ਸਤਿ.

ਸੋਲ਼ਸਮਂ ਭਾਣਵਾਰਂ.

੫੦੦. ‘‘‘ਛਤ੍ਤਿਸਕ੍ਖਤ੍ਤੁਂ ਦੇਵਿਨ੍ਦੋ, ਦੇਵਰਜ੍ਜਂ ਕਰਿਸ੍ਸਤਿ;

ਪਥਵਿਯਂ ਸਤ੍ਤਸਤਂ, ਵਿਪੁਲਂ ਰਜ੍ਜਂ ਕਰਿਸ੍ਸਤਿ.

੫੦੧. ‘‘‘ਪਦੇਸਰਜ੍ਜਂ ਵਿਪੁਲਂ, ਗਣਨਾਤੋ ਅਸਙ੍ਖਿਯਂ;

ਇਮਿਨਾ ਦੀਪਦਾਨੇਨ, ਦਿਬ੍ਬਚਕ੍ਖੁ ਭਵਿਸ੍ਸਤਿ.

੫੦੨. ‘‘‘ਸਮਨ੍ਤਤੋ ਅਟ੍ਠਕੋਸਂ [ਅਡ੍ਢਕੋਸਂ (ਸੀ. ਸ੍ਯਾ.)], ਪਸ੍ਸਿਸ੍ਸਤਿ ਅਯਂ ਸਦਾ;

ਦੇਵਲੋਕਾ ਚਵਨ੍ਤਸ੍ਸ, ਨਿਬ੍ਬਤ੍ਤਨ੍ਤਸ੍ਸ ਜਨ੍ਤੁਨੋ.

੫੦੩. ‘‘‘ਦਿਵਾ ਵਾ ਯਦਿ ਵਾ ਰਤ੍ਤਿਂ, ਪਦੀਪਂ ਧਾਰਯਿਸ੍ਸਤਿ;

ਜਾਯਮਾਨਸ੍ਸ ਸਤ੍ਤਸ੍ਸ, ਪੁਞ੍ਞਕਮ੍ਮਸਮਙ੍ਗਿਨੋ.

੫੦੪. ‘‘‘ਯਾਵਤਾ ਨਗਰਂ ਆਸਿ, ਤਾਵਤਾ ਜੋਤਯਿਸ੍ਸਤਿ;

ਉਪਪਜ੍ਜਤਿ ਯਂ ਯੋਨਿਂ, ਦੇਵਤ੍ਤਂ ਅਥ ਮਾਨੁਸਂ.

੫੦੫. ‘‘‘ਅਸ੍ਸੇਵ ਦੀਪਦਾਨਸ੍ਸ, [ਅਟ੍ਠਦੀਪਫਲੇਨ ਹਿ; ਉਪਟ੍ਠਿਸ੍ਸਨ੍ਤਿਮਂ ਜਨ੍ਤੁਂ (ਸ੍ਯਾ.), ਅਟ੍ਠ ਦੀਪਾ ਫਲੇਨ ਹਿ; ਨ ਜਹਿਸ੍ਸਨ੍ਤਿ’ਮਂ ਜਨ੍ਤੁਂ (?)] ਅਟ੍ਠਦੀਪਫਲੇਨ ਹਿ;

ਨ ਜਯਿਸ੍ਸਨ੍ਤਿਮਂ ਜਨ੍ਤੂ [ਅਟ੍ਠਦੀਪਫਲੇਨ ਹਿ; ਉਪਟ੍ਠਿਸ੍ਸਨ੍ਤਿਮਂ ਜਨ੍ਤੁਂ (ਸ੍ਯਾ.), ਅਟ੍ਠ ਦੀਪਾ ਫਲੇਨ ਹਿ; ਨ ਜਹਿਸ੍ਸਨ੍ਤਿ’ਮਂ ਜਨ੍ਤੁਂ (?)], ਦੀਪਦਾਨਸ੍ਸਿਦਂ ਫਲਂ.

੫੦੬. ‘‘‘ਕਪ੍ਪਸਤਸਹਸ੍ਸਮ੍ਹਿ, ਓਕ੍ਕਾਕਕੁਲਸਮ੍ਭਵੋ;

ਗੋਤਮੋ ਨਾਮ ਗੋਤ੍ਤੇਨ, ਸਤ੍ਥਾ ਲੋਕੇ ਭਵਿਸ੍ਸਤਿ.

੫੦੭. ‘‘‘ਤਸ੍ਸ ਧਮ੍ਮੇਸੁ ਦਾਯਾਦੋ, ਓਰਸੋ ਧਮ੍ਮਨਿਮ੍ਮਿਤੋ;

ਸਬ੍ਬਾਸਵੇ ਪਰਿਞ੍ਞਾਯ, ਨਿਬ੍ਬਾਯਿਸ੍ਸਤਿਨਾਸਵੋ.

੫੦੮. ‘‘‘ਤੋਸਯਿਤ੍ਵਾਨ ਸਮ੍ਬੁਦ੍ਧਂ, ਗੋਤਮਂ ਸਕ੍ਯਪੁਙ੍ਗਵਂ;

ਅਜਿਤੋ ਨਾਮ ਨਾਮੇਨ, ਹੇਸ੍ਸਤਿ ਸਤ੍ਥੁ ਸਾਵਕੋ’.

੫੦੯. ‘‘ਸਟ੍ਠਿ ਕਪ੍ਪਸਹਸ੍ਸਾਨਿ, ਦੇਵਲੋਕੇ ਰਮਿਂ ਅਹਂ;

ਤਤ੍ਰਾਪਿ ਮੇ ਦੀਪਸਤਂ, ਜੋਤਤੇ ਨਿਚ੍ਚਕਾਲਿਕਂ [ਸਬ੍ਬਕਾਲਿਕਂ (ਸੀ.)].

੫੧੦. ‘‘ਦੇਵਲੋਕੇ ਮਨੁਸ੍ਸੇ ਵਾ, ਨਿਦ੍ਧਾਵਨ੍ਤਿ ਪਭਾ ਮਮ;

ਬੁਦ੍ਧਸੇਟ੍ਠਂ ਸਰਿਤ੍ਵਾਨ, ਭਿਯ੍ਯੋ ਹਾਸਂ ਜਨੇਸਹਂ.

੫੧੧. ‘‘ਤੁਸਿਤਾਹਂ ਚਵਿਤ੍ਵਾਨ, ਓਕ੍ਕਮਿਂ ਮਾਤੁਕੁਚ੍ਛਿਯਂ;

ਜਾਯਮਾਨਸ੍ਸ ਸਨ੍ਤਸ੍ਸ, ਆਲੋਕੋ ਵਿਪੁਲੋ ਅਹੁ.

੫੧੨. ‘‘ਅਗਾਰਾ ਅਭਿਨਿਕ੍ਖਮ੍ਮ, ਪਬ੍ਬਜਿਂ ਅਨਗਾਰਿਯਂ;

ਬਾਵਰਿਂ ਉਪਸਙ੍ਕਮ੍ਮ, ਸਿਸ੍ਸਤ੍ਤਂ ਅਜ੍ਝੁਪਾਗਮਿਂ.

੫੧੩. ‘‘ਹਿਮਵਨ੍ਤੇ ਵਸਨ੍ਤੋਹਂ, ਅਸ੍ਸੋਸਿਂ ਲੋਕਨਾਯਕਂ;

ਉਤ੍ਤਮਤ੍ਥਂ ਗਵੇਸਨ੍ਤੋ, ਉਪਗਚ੍ਛਿਂ ਵਿਨਾਯਕਂ.

੫੧੪. ‘‘ਦਨ੍ਤੋ ਬੁਦ੍ਧੋ ਦਮੇਤਾਵੀ, ਓਘਤਿਣ੍ਣੋ ਨਿਰੂਪਧਿ;

ਨਿਬ੍ਬਾਨਂ ਕਥਯੀ ਬੁਦ੍ਧੋ, ਸਬ੍ਬਦੁਕ੍ਖਪ੍ਪਮੋਚਨਂ.

੫੧੫. ‘‘ਤਂ ਮੇ ਆਗਮਨਂ ਸਿਦ੍ਧਂ, ਤੋਸਿਤੋਹਂ ਮਹਾਮੁਨਿਂ;

ਤਿਸ੍ਸੋ ਵਿਜ੍ਜਾ ਅਨੁਪ੍ਪਤ੍ਤਾ, ਕਤਂ ਬੁਦ੍ਧਸ੍ਸ ਸਾਸਨਂ.

੫੧੬. ‘‘ਸਤਸਹਸ੍ਸਿਤੋ ਕਪ੍ਪੇ, ਯਂ ਦੀਪਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਦੀਪਦਾਨਸ੍ਸਿਦਂ ਫਲਂ.

੫੧੭. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੫੧੮. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੫੧੯. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਅਜਿਤੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਅਜਿਤਤ੍ਥੇਰਸ੍ਸਾਪਦਾਨਂ ਦਸਮਂ.

ਪਿਲਿਨ੍ਦਵਚ੍ਛਵਗ੍ਗੋ ਚਤ੍ਤਾਲੀਸਮੋ.

ਤਸ੍ਸੁਦ੍ਦਾਨਂ –

ਪਿਲਿਨ੍ਦਵਚ੍ਛੋ ਸੇਲੋ ਚ, ਸਬ੍ਬਕਿਤ੍ਤੀ ਮਧੁਂਦਦੋ;

ਕੂਟਾਗਾਰੀ ਬਾਕੁਲੋ ਚ, ਗਿਰਿ ਸਲ਼ਲਸਵ੍ਹਯੋ.

ਸਬ੍ਬਦੋ ਅਜਿਤੋ ਚੇਵ, ਗਾਥਾਯੋ ਗਣਿਤਾ ਇਹ;

ਸਤਾਨਿ ਪਞ੍ਚ ਗਾਥਾਨਂ, ਵੀਸਤਿ ਚ ਤਦੁਤ੍ਤਰੀਤਿ.

ਅਥ ਵਗ੍ਗੁਦ੍ਦਾਨਂ –

ਪਦੁਮਾਰਕ੍ਖਦੋ ਚੇਵ, ਉਮਾ ਗਨ੍ਧੋਦਕੇਨ ਚ;

ਏਕਪਦ੍ਮ ਸਦ੍ਦਸਞ੍ਞੀ, ਮਨ੍ਦਾਰਂ ਬੋਧਿਵਨ੍ਦਕੋ.

ਅਵਟਞ੍ਚ ਪਿਲਿਨ੍ਦਿ [ਏਵਮੇਵ ਦਿਸ੍ਸਤਿ] ਚ, ਗਾਥਾਯੋ ਗਣਿਤਾ ਇਹ;

ਚਤੁਸਤ੍ਤਤਿ ਗਾਥਾਯੋ, ਏਕਾਦਸ ਸਤਾਨਿ ਚ.

ਪਦੁਮਵਗ੍ਗਦਸਕਂ.