੧. ਪਿਲਿਨ੍ਦਵਚ੍ਛਤ੍ਥੇਰਅਪਦਾਨਂ

੧. ‘‘ਨਗਰੇ ਹਂਸਵਤਿਯਾ, ਆਸਿਂ ਦੋਵਾਰਿਕੋ ਅਹਂ;

ਅਕ੍ਖੋਭਂ ਅਮਿਤਂ ਭੋਗਂ, ਘਰੇ ਸਨ੍ਨਿਚਿਤਂ ਮਮ.

੨. ‘‘ਰਹੋਗਤੋ ਨਿਸੀਦਿਤ੍ਵਾ, ਪਹਂਸਿਤ੍ਵਾਨ ਮਾਨਸਂ [ਸਮ੍ਪਹਂਸਿਤ੍ਵ ਮਾਨਸਂ (ਸੀ.)];

ਨਿਸਜ੍ਜ ਪਾਸਾਦਵਰੇ, ਏਵਂ ਚਿਨ੍ਤੇਸਹਂ ਤਦਾ.

(ਚਿਨ੍ਤਨਾਕਾਰੋ)

੩. ‘‘‘ਬਹੂ ਮੇਧਿਗਤਾ ਭੋਗਾ, ਫੀਤਂ ਅਨ੍ਤੇਪੁਰਂ ਮਮ;

ਰਾਜਾਪਿ [ਰਾਜਿਸਿ (ਕ.)] ਸਨ੍ਨਿਮਨ੍ਤੇਸਿ, ਆਨਨ੍ਦੋ ਪਥਵਿਸ੍ਸਰੋ.

੪. ‘‘‘ਅਯਞ੍ਚ ਬੁਦ੍ਧੋ ਉਪ੍ਪਨ੍ਨੋ, ਅਧਿਚ੍ਚੁਪ੍ਪਤ੍ਤਿਕੋ ਮੁਨਿ;

ਸਂਵਿਜ੍ਜਨ੍ਤਿ ਚ ਮੇ ਭੋਗਾ, ਦਾਨਂ ਦਸ੍ਸਾਮਿ ਸਤ੍ਥੁਨੋ.

੫. ‘‘‘ਪਦੁਮੇਨ ਰਾਜਪੁਤ੍ਤੇਨ, ਦਿਨ੍ਨਂ ਦਾਨਵਰਂ ਜਿਨੇ;

ਹਤ੍ਥਿਨਾਗੇ ਚ ਪਲ੍ਲਙ੍ਕੇ, ਅਪਸ੍ਸੇਨਞ੍ਚਨਪ੍ਪਕਂ.

੬. ‘‘‘ਅਹਮ੍ਪਿ ਦਾਨਂ ਦਸ੍ਸਾਮਿ, ਸਙ੍ਘੇ ਗਣਵਰੁਤ੍ਤਮੇ;

ਅਦਿਨ੍ਨਪੁਬ੍ਬਮਞ੍ਞੇਸਂ, ਭਵਿਸ੍ਸਂ ਆਦਿਕਮ੍ਮਿਕੋ.

੭. ‘‘‘ਚਿਨ੍ਤੇਤ੍ਵਾਹਂ ਬਹੁਵਿਧਂ, ਯਾਗੇ ਯਸ੍ਸ ਸੁਖਂਫਲਂ;

ਪਰਿਕ੍ਖਾਰਦਾਨਮਦ੍ਦਕ੍ਖਿਂ, ਮਮ ਸਙ੍ਕਪ੍ਪਪੂਰਣਂ.

੮. ‘‘‘ਪਰਿਕ੍ਖਾਰਾਨਿ ਦਸ੍ਸਾਮਿ, ਸਙ੍ਘੇ ਗਣਵਰੁਤ੍ਤਮੇ;

ਅਦਿਨ੍ਨਪੁਬ੍ਬਮਞ੍ਞੇਸਂ, ਭਵਿਸ੍ਸਂ ਆਦਿਕਮ੍ਮਿਕੋ’.

(ਦਾਨਵਤ੍ਥੁਸਮ੍ਪਾਦਨਂ)

੯. ‘‘ਨਲ਼ਕਾਰੇ ਉਪਾਗਮ੍ਮ, ਛਤ੍ਤਂ ਕਾਰੇਸਿ ਤਾਵਦੇ;

ਛਤ੍ਤਸਤਸਹਸ੍ਸਾਨਿ, ਏਕਤੋ ਸਨ੍ਨਿਪਾਤਯਿਂ.

੧੦. ‘‘ਦੁਸ੍ਸਸਤਸਹਸ੍ਸਾਨਿ, ਏਕਤੋ ਸਨ੍ਨਿਪਾਤਯਿਂ;

ਪਤ੍ਤਸਤਸਹਸ੍ਸਾਨਿ, ਏਕਤੋ ਸਨ੍ਨਿਪਾਤਯਿਂ.

੧੧. ‘‘ਵਾਸਿਯੋ ਸਤ੍ਥਕੇ ਚਾਪਿ, ਸੂਚਿਯੋ ਨਖਛੇਦਨੇ;

ਹੇਟ੍ਠਾਛਤ੍ਤੇ ਠਪਾਪੇਸਿਂ, ਕਾਰੇਤ੍ਵਾ ਤਦਨੁਚ੍ਛਵੇ.

੧੨. ‘‘ਵਿਧੂਪਨੇ ਤਾਲਵਣ੍ਟੇ, ਮੋਰਹਤ੍ਥੇ ਚ ਚਾਮਰੇ;

ਪਰਿਸ੍ਸਾਵਨੇ ਤੇਲਧਾਰੇ [ਤੇਲਧਰੇ (ਸੀ.)], ਕਾਰਯਿਂ ਤਦਨੁਚ੍ਛਵੇ.

੧੩. ‘‘ਸੂਚਿਘਰੇ ਅਂਸਬਦ੍ਧੇ, ਅਥੋਪਿ ਕਾਯਬਨ੍ਧਨੇ;

ਆਧਾਰਕੇ ਚ ਸੁਕਤੇ, ਕਾਰਯਿਂ ਤਦਨੁਚ੍ਛਵੇ.

੧੪. ‘‘ਪਰਿਭੋਗਭਾਜਨੇ ਚ, ਅਥੋਪਿ ਲੋਹਥਾਲਕੇ;

ਭੇਸਜ੍ਜੇ ਪੂਰਯਿਤ੍ਵਾਨ, ਹੇਟ੍ਠਾਛਤ੍ਤੇ ਠਪੇਸਹਂ.

੧੫. ‘‘ਵਚਂ ਉਸੀਰਂ ਲਟ੍ਠਿਮਧੁਂ, ਪਿਪ੍ਫਲੀ ਮਰਿਚਾਨਿ ਚ;

ਹਰੀਤਕਿਂ ਸਿਙ੍ਗੀਵੇਰਂ, ਸਬ੍ਬਂ ਪੂਰੇਸਿ ਭਾਜਨੇ.

੧੬. ‘‘ਉਪਾਹਨਾ ਪਾਦੁਕਾਯੋ, ਅਥੋ ਉਦਕਪੁਞ੍ਛਨੇ;

ਕਤ੍ਤਰਦਣ੍ਡੇ ਸੁਕਤੇ, ਕਾਰਯਿਂ ਤਦਨੁਚ੍ਛਵੇ.

੧੭. ‘‘ਓਸਧਞ੍ਜਨਨਾਲ਼ੀ ਚ [ਓਸਧਂ ਅਞ੍ਜਨਾਪਿਚ (ਸ੍ਯਾ.)], ਸਲਾਕਾ ਧਮ੍ਮਕੁਤ੍ਤਰਾ;

ਕੁਞ੍ਚਿਕਾ ਪਞ੍ਚਵਣ੍ਣੇਹਿ, ਸਿਬ੍ਬਿਤੇ ਕੁਞ੍ਚਿਕਾਘਰੇ.

੧੮. ‘‘ਆਯੋਗੇ ਧੂਮਨੇਤ੍ਤੇ ਚ, ਅਥੋਪਿ ਦੀਪਧਾਰਕੇ;

ਤੁਮ੍ਬਕੇ ਚ ਕਰਣ੍ਡੇ ਚ, ਕਾਰਯਿਂ ਤਦਨੁਚ੍ਛਵੇ.

੧੯. ‘‘ਸਣ੍ਡਾਸੇ ਪਿਪ੍ਫਲੇ ਚੇਵ, ਅਥੋਪਿ ਮਲਹਾਰਕੇ;

ਭੇਸਜ੍ਜਥਵਿਕੇ ਚੇਵ, ਕਾਰਯਿਂ ਤਦਨੁਚ੍ਛਵੇ.

੨੦. ‘‘ਆਸਨ੍ਦਿਯੋ ਪੀਠਕੇ ਚ, ਪਲ੍ਲਙ੍ਕੇ ਚਤੁਰੋਮਯੇ;

ਤਦਨੁਚ੍ਛਵੇ ਕਾਰਯਿਤ੍ਵਾ, ਹੇਟ੍ਠਾਛਤ੍ਤੇ ਠਪੇਸਹਂ.

੨੧. ‘‘ਉਣ੍ਣਾਭਿਸੀ ਤੂਲਭਿਸੀ, ਅਥੋਪਿ ਪੀਠਿਕਾਭਿਸੀ [ਪੀਠਕਾਭਿਸੀ (ਸ੍ਯਾ. ਕ.)];

ਬਿਮ੍ਬੋਹਨੇ [ਬਿਬ੍ਬੋਹਨੇ (ਸ੍ਯਾ. ਕ.)] ਚ ਸੁਕਤੇ, ਕਾਰਯਿਂ ਤਦਨੁਚ੍ਛਵੇ.

੨੨. ‘‘ਕੁਰੁਵਿਨ੍ਦੇ ਮਧੁਸਿਤ੍ਥੇ, ਤੇਲਂ ਹਤ੍ਥਪ੍ਪਤਾਪਕਂ;

ਸਿਪਾਟਿਫਲਕੇ ਸੁਚੀ, ਮਞ੍ਚਂ ਅਤ੍ਥਰਣੇਨ ਚ.

੨੩. ‘‘ਸੇਨਾਸਨੇ ਪਾਦਪੁਞ੍ਛੇ, ਸਯਨਾਸਨਦਣ੍ਡਕੇ;

ਦਨ੍ਤਪੋਣੇ ਚ ਆਟਲੀ [ਕਥਲਿਂ (ਸ੍ਯਾ.)], ਸੀਸਾਲੇਪਨਗਨ੍ਧਕੇ.

੨੪. ‘‘ਅਰਣੀ ਫਲਪੀਠੇ [ਪਲਾਲਪੀਠੇ (ਸੀ.)] ਚ, ਪਤ੍ਤਪਿਧਾਨਥਾਲਕੇ;

ਉਦਕਸ੍ਸ ਕਟਚ੍ਛੂ ਚ, ਚੁਣ੍ਣਕਂ ਰਜਨਮ੍ਬਣਂ [ਰਜਨਮ੍ਮਣਂ (ਸੀ.)].

੨੫. ‘‘ਸਮ੍ਮਜ੍ਜਨਂ [ਸਮ੍ਮੁਞ੍ਜਨਂ (ਸ੍ਯਾ.), ਸਮ੍ਮਜ੍ਜਨਿਂ, ਸਮ੍ਮੁਞ੍ਜਨਿਂ (?)] ਉਦਪਤ੍ਤਂ, ਤਥਾ ਵਸ੍ਸਿਕਸਾਟਿਕਂ;

ਨਿਸੀਦਨਂ ਕਣ੍ਡੁਚ੍ਛਾਦਿ, ਅਥ ਅਨ੍ਤਰਵਾਸਕਂ.

੨੬. ‘‘ਉਤ੍ਤਰਾਸਙ੍ਗਸਙ੍ਘਾਟੀ, ਨਤ੍ਥੁਕਂ ਮੁਖਸੋਧਨਂ;

ਬਿਲ਼ਙ੍ਗਲੋਣਂ ਪਹੂਤਞ੍ਚ [ਲੋਣਭੂਤਞ੍ਚ (ਕ.)], ਮਧੁਞ੍ਚ ਦਧਿਪਾਨਕਂ.

੨੭. ‘‘ਧੂਪਂ [ਧੂਮਂ (ਕ.)] ਸਿਤ੍ਥਂ ਪਿਲੋਤਿਞ੍ਚ, ਮੁਖਪੁਞ੍ਛਨਸੁਤ੍ਤਕਂ;

ਦਾਤਬ੍ਬਂ ਨਾਮ ਯਂ ਅਤ੍ਥਿ, ਯਞ੍ਚ ਕਪ੍ਪਤਿ ਸਤ੍ਥੁਨੋ.

੨੮. ‘‘ਸਬ੍ਬਮੇਤਂ ਸਮਾਨੇਤ੍ਵਾ, ਆਨਨ੍ਦਂ ਉਪਸਙ੍ਕਮਿਂ;

ਉਪਸਙ੍ਕਮ੍ਮ ਰਾਜਾਨਂ, ਜਨੇਤਾਰਂ ਮਹੇਸਿਨੋ [ਮਹੇਸਿਨਂ (ਸੀ.), ਮਹਾਯਸਂ (ਸ੍ਯਾ.), ਮਹਿਸ੍ਸਰਂ (ਕ.)];

ਸਿਰਸਾ ਅਭਿਵਾਦੇਤ੍ਵਾ, ਇਦਂ ਵਚਨਮਬ੍ਰਵਿਂ.

(ਦਾਨੋਕਾਸਯਾਚਨਾ)

੨੯. ‘‘‘ਏਕਤੋ ਜਾਤਸਂਵਦ੍ਧਾ, ਉਭਿਨ੍ਨਂ ਏਕਤੋ ਮਨਂ [ਯਸੋ (ਸ੍ਯਾ.), ਮਨੋ (?)];

ਸਾਧਾਰਣਾ ਸੁਖਦੁਕ੍ਖੇ, ਉਭੋ ਚ ਅਨੁਵਤ੍ਤਕਾ.

੩੦. ‘‘‘ਅਤ੍ਥਿ ਚੇਤਸਿਕਂ ਦੁਕ੍ਖਂ, ਤਵਾਧੇਯ੍ਯਂ ਅਰਿਨ੍ਦਮ;

ਯਦਿ ਸਕ੍ਕੋਸਿ ਤਂ ਦੁਕ੍ਖਂ, ਵਿਨੋਦੇਯ੍ਯਾਸਿ ਖਤ੍ਤਿਯ.

੩੧. ‘‘‘ਤਵ ਦੁਕ੍ਖਂ ਮਮ ਦੁਕ੍ਖਂ, ਉਭਿਨ੍ਨਂ ਏਕਤੋ ਮਨੋ [ਮਨਂ (ਸੀ. ਸ੍ਯਾ.)];

ਨਿਟ੍ਠਿਤਨ੍ਤਿ ਵਿਜਾਨਾਹਿ, ਮਮਾਧੇਯ੍ਯਂ ਸਚੇ ਤੁਵਂ.

੩੨. ‘‘‘ਜਾਨਾਹਿ ਖੋ ਮਹਾਰਾਜ, ਦੁਕ੍ਖਂ ਮੇ ਦੁਬ੍ਬਿਨੋਦਯਂ;

ਪਹੁ ਸਮਾਨੋ ਗਜ੍ਜਸੁ, ਏਕਂ ਤੇ ਦੁਚ੍ਚਜਂ ਵਰਂ.

੩੩. ‘‘‘ਯਾਵਤਾ ਵਿਜਿਤੇ ਅਤ੍ਥਿ, ਯਾਵਤਾ ਮਮ ਜੀਵਿਤਂ;

ਏਤੇਹਿ ਯਦਿ ਤੇ ਅਤ੍ਥੋ, ਦਸ੍ਸਾਮਿ ਅਵਿਕਮ੍ਪਿਤੋ.

੩੪. ‘‘‘ਗਜ੍ਜਿਤਂ ਖੋ ਤਯਾ ਦੇਵ, ਮਿਚ੍ਛਾ ਤਂ ਬਹੁ ਗਜ੍ਜਿਤਂ;

ਜਾਨਿਸ੍ਸਾਮਿ ਤੁਵਂ ਅਜ੍ਜ, ਸਬ੍ਬਧਮ੍ਮੇ [ਸਚ੍ਚਧਮ੍ਮੇ (?)] ਪਤਿਟ੍ਠਿਤਂ.

੩੫. ‘‘‘ਅਤਿਬਾਲ਼੍ਹਂ ਨਿਪੀਲ਼ੇਸਿ, ਦਦਮਾਨਸ੍ਸ ਮੇ ਸਤੋ;

ਕਿਂ ਤੇ ਮੇ ਪੀਲ਼ਿਤੇਨਤ੍ਥੋ, ਪਤ੍ਥਿਤਂ ਤੇ ਕਥੇਹਿ ਮੇ.

੩੬. ‘‘‘ਇਚ੍ਛਾਮਹਂ ਮਹਾਰਾਜ, ਬੁਦ੍ਧਸੇਟ੍ਠਂ ਅਨੁਤ੍ਤਰਂ;

ਭੋਜਯਿਸ੍ਸਾਮਿ ਸਮ੍ਬੁਦ੍ਧਂ, ਵਜ੍ਜਂ [ਵਞ੍ਚੁਂ (?)] ਮੇ ਮਾਹੁ ਜੀਵਿਤਂ.

੩੭. ‘‘‘ਅਞ੍ਞਂ ਤੇਹਂ ਵਰਂ ਦਮ੍ਮਿ, ਮਾ ਯਾਚਿਤ੍ਥੋ ਤਥਾਗਤਂ [ਅਯਾਚਿਤੋ ਤਥਾਗਤੋ (ਸ੍ਯਾ. ਕ.)];

ਅਦੇਯ੍ਯੋ ਕਸ੍ਸਚਿ ਬੁਦ੍ਧੋ, ਮਣਿ ਜੋਤਿਰਸੋ ਯਥਾ.

੩੮. ‘‘‘ਨਨੁ ਤੇ ਗਜ੍ਜਿਤਂ ਦੇਵ, ਯਾਵ ਜੀਵਿਤਮਤ੍ਤਨੋ [ਵਿਜਿਤਮਤ੍ਥਿਤਂ (ਕ.), ਜੀਵਿਤਮਤ੍ਥਿਕਂ (ਸ੍ਯਾ.)];

ਜੀਵਿਤਂ [ਵਿਜਿਤਂ (ਕ.)] ਦਦਮਾਨੇਨ, ਯੁਤ੍ਤਂ ਦਾਤੁਂ ਤਥਾਗਤਂ.

੩੯. ‘‘‘ਠਪਨੀਯੋ ਮਹਾਵੀਰੋ, ਅਦੇਯ੍ਯੋ ਕਸ੍ਸਚਿ ਜਿਨੋ;

ਨ ਮੇ ਪਟਿਸ੍ਸੁਤੋ ਬੁਦ੍ਧੋ, ਵਰਸ੍ਸੁ ਅਮਿਤਂ ਧਨਂ.

੪੦. ‘‘‘ਵਿਨਿਚ੍ਛਯਂ ਪਾਪੁਣਾਮ, ਪੁਚ੍ਛਿਸ੍ਸਾਮ ਵਿਨਿਚ੍ਛਯੇ;

ਯਥਾਸਣ੍ਠਂ [ਯਥਾਸਨ੍ਤਂ (ਸੀ.)] ਕਥੇਸ੍ਸਨ੍ਤਿ, ਪਟਿਪੁਚ੍ਛਾਮ ਤਂ ਤਥਾ.

੪੧. ‘‘‘ਰਞ੍ਞੋ ਹਤ੍ਥੇ ਗਹੇਤ੍ਵਾਨ, ਅਗਮਾਸਿਂ ਵਿਨਿਚ੍ਛਯਂ;

ਪੁਰਤੋ ਅਕ੍ਖਦਸ੍ਸਾਨਂ, ਇਦਂ ਵਚਨਮਬ੍ਰਵਿਂ.

੪੨. ‘‘‘ਸੁਣਨ੍ਤੁ ਮੇ ਅਕ੍ਖਦਸ੍ਸਾ, ਰਾਜਾ ਵਰਮਦਾਸਿ ਮੇ;

ਨ ਕਿਞ੍ਚਿ ਠਪਯਿਤ੍ਵਾਨ, ਜੀਵਿਤਮ੍ਪਿ [ਵਿਜਿਤਂਪਿ (ਕ.)] ਪਵਾਰਯਿ.

੪੩. ‘‘‘ਤਸ੍ਸ ਮੇ ਵਰਦਿਨ੍ਨਸ੍ਸ, ਬੁਦ੍ਧਸੇਟ੍ਠਂ ਵਰਿਂ ਅਹਂ;

ਸੁਦਿਨ੍ਨੋ ਹੋਤਿ ਮੇ ਬੁਦ੍ਧੋ, ਛਿਨ੍ਦਥ ਸਂਸਯਂ ਮਮ.

੪੪. ‘‘‘ਸੋਸ੍ਸਾਮ ਤਵ ਵਚਨਂ, ਭੂਮਿਪਾਲਸ੍ਸ ਰਾਜਿਨੋ;

ਉਭਿਨ੍ਨਂ ਵਚਨਂ ਸੁਤ੍ਵਾ, ਛਿਨ੍ਦਿਸ੍ਸਾਮੇਤ੍ਥ ਸਂਸਯਂ.

੪੫. ‘‘‘ਸਬ੍ਬਂ ਦੇਵ ਤਯਾ ਦਿਨ੍ਨਂ, ਇਮਸ੍ਸ ਸਬ੍ਬਗਾਹਿਕਂ [ਸਬ੍ਬਗਾਹਿਤਂ (ਸ੍ਯਾ. ਕ.)];

ਨ ਕਿਞ੍ਚਿ ਠਪਯਿਤ੍ਵਾਨ, ਜੀਵਿਤਮ੍ਪਿ ਪਵਾਰਯਿ.

੪੬. ‘‘‘ਕਿਚ੍ਛਪ੍ਪਤ੍ਤੋਵ ਹੁਤ੍ਵਾਨ, ਯਾਚੀ ਵਰਮਨੁਤ੍ਤਰਂ [ਯਾਵਜੀਵਮਨੁਤ੍ਤਰਂ (ਸ੍ਯਾ. ਕ.)];

ਇਮਂ ਸੁਦੁਕ੍ਖਿਤਂ ਞਤ੍ਵਾ, ਅਦਾਸਿਂ ਸਬ੍ਬਗਾਹਿਕਂ.

੪੭. ‘‘‘ਪਰਾਜਯੋ ਤੁਵਂ [ਤਵਂ (ਸੀ.)] ਦੇਵ, ਅਸ੍ਸ ਦੇਯ੍ਯੋ ਤਥਾਗਤੋ;

ਉਭਿਨ੍ਨਂ ਸਂਸਯੋ ਛਿਨ੍ਨੋ, ਯਥਾਸਣ੍ਠਮ੍ਹਿ [ਯਥਾਸਨ੍ਤਮ੍ਹਿ (ਸੀ.)] ਤਿਟ੍ਠਥ.

੪੮. ‘‘‘ਰਾਜਾ ਤਤ੍ਥੇਵ ਠਤ੍ਵਾਨ, ਅਕ੍ਖਦਸ੍ਸੇਤਦਬ੍ਰਵਿ;

ਸਮ੍ਮਾ ਮਯ੍ਹਮ੍ਪਿ ਦੇਯ੍ਯਾਥ, ਪੁਨ ਬੁਦ੍ਧਂ ਲਭਾਮਹਂ.

੪੯. ‘‘‘ਪੂਰੇਤ੍ਵਾ ਤਵ ਸਙ੍ਕਪ੍ਪਂ, ਭੋਜਯਿਤ੍ਵਾ ਤਥਾਗਤਂ;

ਪੁਨ ਦੇਯ੍ਯਾਸਿ [ਦੇਯ੍ਯਾਥ (ਕ.)] ਸਮ੍ਬੁਦ੍ਧਂ, ਆਨਨ੍ਦਸ੍ਸ ਯਸਸ੍ਸਿਨੋ’.

(ਨਿਮਨ੍ਤਨਕਥਾ)

੫੦. ‘‘ਅਕ੍ਖਦਸ੍ਸੇਭਿਵਾਦੇਤ੍ਵਾ, ਆਨਨ੍ਦਞ੍ਚਾਪਿ ਖਤ੍ਤਿਯਂ;

ਤੁਟ੍ਠੋ ਪਮੁਦਿਤੋ ਹੁਤ੍ਵਾ, ਸਮ੍ਬੁਦ੍ਧਮੁਪਸਙ੍ਕਮਿਂ.

੫੧. ‘‘ਉਪਸਙ੍ਕਮ੍ਮ ਸਮ੍ਬੁਦ੍ਧਂ, ਓਘਤਿਣ੍ਣਮਨਾਸਵਂ;

ਸਿਰਸਾ ਅਭਿਵਾਦੇਤ੍ਵਾ, ਇਦਂ ਵਚਨਮਬ੍ਰਵਿਂ.

੫੨. ‘ਵਸੀਸਤਸਹਸ੍ਸੇਹਿ, ਅਧਿਵਾਸੇਹਿ ਚਕ੍ਖੁਮ;

ਹਾਸਯਨ੍ਤੋ ਮਮ ਚਿਤ੍ਤਂ, ਨਿਵੇਸਨਮੁਪੇਹਿ ਮੇ’.

੫੩. ‘‘ਪਦੁਮੁਤ੍ਤਰੋ ਲੋਕਵਿਦੂ, ਆਹੁਤੀਨਂ ਪਟਿਗ੍ਗਹੋ;

ਮਮ ਸਙ੍ਕਪ੍ਪਮਞ੍ਞਾਯ, ਅਧਿਵਾਸੇਸਿ ਚਕ੍ਖੁਮਾ.

੫੪. ‘‘ਅਧਿਵਾਸਨਮਞ੍ਞਾਯ, ਅਭਿਵਾਦਿਯ ਸਤ੍ਥੁਨੋ;

ਹਟ੍ਠੋ ਉਦਗ੍ਗਚਿਤ੍ਤੋਹਂ, ਨਿਵੇਸਨਮੁਪਾਗਮਿਂ.

(ਦਾਨਪਟਿਯਾਦਨਂ)

੫੫. ‘‘ਮਿਤ੍ਤਾਮਚ੍ਚੇ ਸਮਾਨੇਤ੍ਵਾ, ਇਦਂ ਵਚਨਮਬ੍ਰਵਿਂ;

‘ਸੁਦੁਲ੍ਲਭੋ ਮਯਾ ਲਦ੍ਧੋ, ਮਣਿ ਜੋਤਿਰਸੋ ਯਥਾ.

੫੬. ‘‘‘ਕੇਨ ਤਂ ਪੂਜਯਿਸ੍ਸਾਮ, ਅਪ੍ਪਮੇਯ੍ਯੋ ਅਨੂਪਮੋ;

ਅਤੁਲੋ ਅਸਮੋ ਧੀਰੋ, ਜਿਨੋ ਅਪ੍ਪਟਿਪੁਗ੍ਗਲੋ.

੫੭. ‘‘‘ਤਥਾਸਮਸਮੋ ਚੇਵ, ਅਦੁਤਿਯੋ ਨਰਾਸਭੋ;

ਦੁਕ੍ਕਰਂ ਅਧਿਕਾਰਞ੍ਹਿ, ਬੁਦ੍ਧਾਨੁਚ੍ਛਵਿਕਂ ਮਯਾ.

੫੮. ‘‘‘ਨਾਨਾਪੁਪ੍ਫੇ ਸਮਾਨੇਤ੍ਵਾ, ਕਰੋਮ ਪੁਪ੍ਫਮਣ੍ਡਪਂ;

ਬੁਦ੍ਧਾਨੁਚ੍ਛਵਿਕਂ ਏਤਂ, ਸਬ੍ਬਪੂਜਾ ਭਵਿਸ੍ਸਤਿ’.

੫੯. ‘‘ਉਪ੍ਪਲਂ ਪਦੁਮਂ ਵਾਪਿ, ਵਸ੍ਸਿਕਂ ਅਧਿਮੁਤ੍ਤਕਂ [ਅਤਿਮੁਤ੍ਤਕਂ (?)];

ਚਮ੍ਪਕਂ [ਚਨ੍ਦਨਂ (ਕ.)] ਨਾਗਪੁਪ੍ਫਞ੍ਚ, ਮਣ੍ਡਪਂ ਕਾਰਯਿਂ ਅਹਂ.

੬੦. ‘‘ਸਤਾਸਨਸਹਸ੍ਸਾਨਿ, ਛਤ੍ਤਚ੍ਛਾਯਾਯ ਪਞ੍ਞਪਿਂ;

ਪਚ੍ਛਿਮਂ ਆਸਨਂ ਮਯ੍ਹਂ, ਅਧਿਕਂ ਸਤਮਗ੍ਘਤਿ.

੬੧. ‘‘ਸਤਾਸਨਸਹਸ੍ਸਾਨਿ, ਛਤ੍ਤਚ੍ਛਾਯਾਯ ਪਞ੍ਞਪਿਂ;

ਪਟਿਯਾਦੇਤ੍ਵਾ ਅਨ੍ਨਪਾਨਂ, ਕਾਲਂ ਆਰੋਚਯਿਂ ਅਹਂ.

੬੨. ‘‘ਆਰੋਚਿਤਮ੍ਹਿ ਕਾਲਮ੍ਹਿ, ਪਦੁਮੁਤ੍ਤਰੋ ਮਹਾਮੁਨਿ;

ਵਸੀਸਤਸਹਸ੍ਸੇਹਿ, ਨਿਵੇਸਨਮੁਪੇਸਿ ਮੇ.

੬੩. ‘‘ਧਾਰੇਨ੍ਤਂ ਉਪਰਿਚ੍ਛਤ੍ਤਂ [ਧਾਰੇਨ੍ਤਮੁਪਰਿਚ੍ਛਤ੍ਤੇ (ਸੀ.)], ਸੁਫੁਲ੍ਲਪੁਪ੍ਫਮਣ੍ਡਪੇ;

ਵਸੀਸਤਸਹਸ੍ਸੇਹਿ, ਨਿਸੀਦਿ ਪੁਰਿਸੁਤ੍ਤਮੋ.

੬੪. ‘‘‘ਛਤ੍ਤਸਤਸਹਸ੍ਸਾਨਿ, ਸਤਸਹਸ੍ਸਮਾਸਨਂ;

ਕਪ੍ਪਿਯਂ ਅਨਵਜ੍ਜਞ੍ਚ, ਪਟਿਗਣ੍ਹਾਹਿ ਚਕ੍ਖੁਮ’.

੬੫. ‘‘ਪਦੁਮੁਤ੍ਤਰੋ ਲੋਕਵਿਦੂ, ਆਹੁਤੀਨਂ ਪਟਿਗ੍ਗਹੋ;

ਮਮਂ ਤਾਰੇਤੁਕਾਮੋ ਸੋ, ਸਮ੍ਪਟਿਚ੍ਛਿ ਮਹਾਮੁਨਿ.

(ਦਾਨਕਥਾ)

੬੬. ‘‘ਭਿਕ੍ਖੁਨੋ ਏਕਮੇਕਸ੍ਸ, ਪਚ੍ਚੇਕਂ ਪਤ੍ਤਮਦਾਸਹਂ;

ਜਹਿਂਸੁ ਸੁਮ੍ਭਕਂ [ਪੁਬ੍ਬਕਂ (ਸੀ.), ਸਮ੍ਭਤਂ (ਸ੍ਯਾ.), ਮਤ੍ਤਿਕਂ (?)] ਪਤ੍ਤਂ, ਲੋਹਪਤ੍ਤਂ ਅਧਾਰਯੁਂ.

੬੭. ‘‘ਸਤ੍ਤਰਤ੍ਤਿਨ੍ਦਿਵਂ ਬੁਦ੍ਧੋ, ਨਿਸੀਦਿ ਪੁਪ੍ਫਮਣ੍ਡਪੇ;

ਬੋਧਯਨ੍ਤੋ ਬਹੂ ਸਤ੍ਤੇ, ਧਮ੍ਮਚਕ੍ਕਂ ਪਵਤ੍ਤਯਿ.

੬੮. ‘‘ਧਮ੍ਮਚਕ੍ਕਂ ਪਵਤ੍ਤੇਨ੍ਤੋ, ਹੇਟ੍ਠਤੋ ਪੁਪ੍ਫਮਣ੍ਡਪੇ;

ਚੁਲ੍ਲਾਸੀਤਿਸਹਸ੍ਸਾਨਂ, ਧਮ੍ਮਾਭਿਸਮਯੋ ਅਹੁ.

੬੯. ‘‘ਸਤ੍ਤਮੇ ਦਿਵਸੇ ਪਤ੍ਤੇ, ਪਦੁਮੁਤ੍ਤਰੋ ਮਹਾਮੁਨਿ;

ਛਤ੍ਤਚ੍ਛਾਯਾਯਮਾਸੀਨੋ, ਇਮਾ ਗਾਥਾ ਅਭਾਸਥ.

(ਬ੍ਯਾਕਰਣਂ)

੭੦. ‘‘‘ਅਨੂਨਕਂ ਦਾਨਵਰਂ, ਯੋ ਮੇ ਪਾਦਾਸਿ ਮਾਣਵੋ;

ਤਮਹਂ ਕਿਤ੍ਤਯਿਸ੍ਸਾਮਿ, ਸੁਣਾਥ ਮਮ ਭਾਸਤੋ.

੭੧. ‘‘‘ਹਤ੍ਥੀ ਅਸ੍ਸਾ ਰਥਾ ਪਤ੍ਤੀ, ਸੇਨਾ ਚ ਚਤੁਰਙ੍ਗਿਨੀ;