੮. ਆਯਾਗਦਾਯਕਤ੍ਥੇਰਅਪਦਾਨਂ

੯੪. ‘‘ਨਿਬ੍ਬੁਤੇ ਲੋਕਨਾਥਮ੍ਹਿ, ਸਿਖਿਮ੍ਹਿ ਵਦਤਂ ਵਰੇ;

ਹਟ੍ਠੋ ਹਟ੍ਠੇਨ ਚਿਤ੍ਤੇਨ, ਅਵਨ੍ਦਿਂ ਥੂਪਮੁਤ੍ਤਮਂ.

੯੫. ‘‘ਵਡ੍ਢਕੀਹਿ ਕਥਾਪੇਤ੍ਵਾ, ਮੂਲਂ ਦਤ੍ਵਾਨਹਂ ਤਦਾ;

ਹਟ੍ਠੋ ਹਟ੍ਠੇਨ ਚਿਤ੍ਤੇਨ, ਆਯਾਗਂ ਕਾਰਪੇਸਹਂ.

੯੬. ‘‘ਅਟ੍ਠ ਕਪ੍ਪਾਨਿ ਦੇਵੇਸੁ, ਅਬ੍ਬੋਕਿਣ੍ਣਂ [ਅਬ੍ਬੋਚ੍ਛਿਨ੍ਨਂ (ਸੀ.)] ਵਸਿਂ ਅਹਂ;

ਅਵਸੇਸੇਸੁ ਕਪ੍ਪੇਸੁ, ਵੋਕਿਣ੍ਣਂ ਸਂਸਰਿਂ ਅਹਂ.

੯੭. ‘‘ਕਾਯੇ ਵਿਸਂ ਨ ਕਮਤਿ, ਸਤ੍ਥਾਨਿ ਨ ਚ ਹਨ੍ਤਿ ਮੇ;

ਉਦਕੇਹਂ ਨ ਮਿਯ੍ਯਾਮਿ, ਆਯਾਗਸ੍ਸ ਇਦਂ ਫਲਂ.

੯੮. ‘‘ਯਦਿਚ੍ਛਾਮਿ ਅਹਂ ਵਸ੍ਸਂ, ਮਹਾਮੇਘੋ ਪਵਸ੍ਸਤਿ;

ਦੇਵਾਪਿ ਮੇ ਵਸਂ ਏਨ੍ਤਿ, ਪੁਞ੍ਞਕਮ੍ਮਸ੍ਸਿਦਂ ਫਲਂ.

੯੯. ‘‘ਸਤ੍ਤਰਤਨਸਮ੍ਪਨ੍ਨੋ, ਤਿਸਕ੍ਖਤ੍ਤੁਂ ਅਹੋਸਹਂ;

ਨ ਮਂ ਕੇਚਾਵਜਾਨਨ੍ਤਿ, ਪੁਞ੍ਞਕਮ੍ਮਸ੍ਸਿਦਂ ਫਲਂ.

੧੦੦. ‘‘ਏਕਤ੍ਤਿਂਸੇ ਇਤੋ ਕਪ੍ਪੇ, ਆਯਾਗਂ ਯਮਕਾਰਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਆਯਾਗਸ੍ਸ ਇਦਂ ਫਲਂ.

੧੦੧. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਆਯਾਗਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਆਯਾਗਦਾਯਕਤ੍ਥੇਰਸ੍ਸਾਪਦਾਨਂ ਅਟ੍ਠਮਂ.