੭. ਲਸੁਣਦਾਯਕਤ੍ਥੇਰਅਪਦਾਨਂ

੮੯. ‘‘ਹਿਮਵਨ੍ਤਸ੍ਸਾਵਿਦੂਰੇ, ਤਾਪਸੋ ਆਸਹਂ ਤਦਾ;

ਲਸੁਣਂ ਉਪਜੀਵਾਮਿ, ਲਸੁਣਂ ਮਯ੍ਹਭੋਜਨਂ.

੯੦. ‘‘ਖਾਰਿਯੋ ਪੂਰਯਿਤ੍ਵਾਨ, ਸਙ੍ਘਾਰਾਮਮਗਚ੍ਛਹਂ;

ਹਟ੍ਠੋ ਹਟ੍ਠੇਨ ਚਿਤ੍ਤੇਨ, ਸਙ੍ਘਸ੍ਸ ਲਸੁਣਂ ਅਦਂ.

੯੧. ‘‘ਵਿਪਸ੍ਸਿਸ੍ਸ ਨਰਗ੍ਗਸ੍ਸ, ਸਾਸਨੇ ਨਿਰਤਸ੍ਸਹਂ;

ਸਙ੍ਘਸ੍ਸ ਲਸੁਣਂ ਦਤ੍ਵਾ, ਕਪ੍ਪਂ ਸਗ੍ਗਮ੍ਹਿ ਮੋਦਹਂ.

੯੨. ‘‘ਏਕਨਵੁਤਿਤੋ ਕਪ੍ਪੇ, ਲਸੁਣਂ ਯਮਦਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਲਸੁਣਸ੍ਸ ਇਦਂ ਫਲਂ.

੯੩. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਲਸੁਣਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ;

ਲਸੁਣਦਾਯਕਤ੍ਥੇਰਸ੍ਸਾਪਦਾਨਂ ਸਤ੍ਤਮਂ.