੩. ਮਹਾਕਚ੍ਚਾਨਤ੍ਥੇਰਅਪਦਾਨਂ

੩੧. ‘‘ਪਦੁਮੁਤ੍ਤਰਨਾਥਸ੍ਸ, ਪਦੁਮਂ ਨਾਮ ਚੇਤਿਯਂ;

ਸਿਲਾਸਨਂ [ਸੀਹਾਸਨਂ (ਕ.)] ਕਾਰਯਿਤ੍ਵਾ, ਸੁਵਣ੍ਣੇਨਾਭਿਲੇਪਯਿਂ.

੩੨. ‘‘ਰਤਨਾਮਯਛਤ੍ਤਞ੍ਚ, ਪਗ੍ਗਯ੍ਹ ਵਾਲ਼ਬੀਜਨਿਂ [ਵਾਲ਼ਬੀਜਨੀ (ਸੀ. ਸ੍ਯਾ.)];

ਬੁਦ੍ਧਸ੍ਸ ਅਭਿਰੋਪੇਸਿਂ, ਲੋਕਬਨ੍ਧੁਸ੍ਸ ਤਾਦਿਨੋ.

੩੩. ‘‘ਯਾਵਤਾ ਦੇਵਤਾ ਭੁਮ੍ਮਾ [ਭੂਮਾ (ਕ.)], ਸਬ੍ਬੇ ਸਨ੍ਨਿਪਤੁਂ ਤਦਾ;

ਰਤਨਾਮਯਛਤ੍ਤਾਨਂ, ਵਿਪਾਕਂ ਕਥਯਿਸ੍ਸਤਿ.

੩੪. ‘‘ਤਞ੍ਚ ਸਬ੍ਬਂ ਸੁਣਿਸ੍ਸਾਮ, ਕਥਯਨ੍ਤਸ੍ਸ ਸਤ੍ਥੁਨੋ;

ਭਿਯ੍ਯੋ ਹਾਸਂ ਜਨੇਯ੍ਯਾਮ, ਸਮ੍ਮਾਸਮ੍ਬੁਦ੍ਧਸਾਸਨੇ.

੩੫. ‘‘ਹੇਮਾਸਨੇ ਨਿਸੀਦਿਤ੍ਵਾ, ਸਯਮ੍ਭੂ ਅਗ੍ਗਪੁਗ੍ਗਲੋ;

ਭਿਕ੍ਖੁਸਙ੍ਘਪਰਿਬ੍ਯੂਲ਼੍ਹੋ [ਪਰਿਬ੍ਬੂਲ਼੍ਹੋ (ਸੀ.)], ਇਮਾ ਗਾਥਾ ਅਭਾਸਥ.

੩੬. ‘‘‘ਯੇਨਿਦਂ ਆਸਨਂ ਦਿਨ੍ਨਂ, ਸੋਵਣ੍ਣਂ ਰਤਨਾਮਯਂ;

ਤਮਹਂ ਕਿਤ੍ਤਯਿਸ੍ਸਾਮਿ, ਸੁਣਾਥ ਮਮ ਭਾਸਤੋ.

੩੭. ‘‘‘ਤਿਂਸਕਪ੍ਪਾਨਿ ਦੇਵਿਨ੍ਦੋ, ਦੇਵਰਜ੍ਜਂ ਕਰਿਸ੍ਸਤਿ;

ਸਮਨ੍ਤਾ ਯੋਜਨਸਤਂ, ਆਭਾਯਾਭਿਭਵਿਸ੍ਸਤਿ.

੩੮. ‘‘‘ਮਨੁਸ੍ਸਲੋਕਮਾਗਨ੍ਤ੍ਵਾ, ਚਕ੍ਕਵਤ੍ਤੀ ਭਵਿਸ੍ਸਤਿ;

ਪਭਸ੍ਸਰੋਤਿ ਨਾਮੇਨ, ਉਗ੍ਗਤੇਜੋ ਭਵਿਸ੍ਸਤਿ.

੩੯. ‘‘‘ਦਿਵਾ ਵਾ ਯਦਿ ਵਾ ਰਤ੍ਤਿਂ, ਸਤਰਂਸੀਵ ਉਗ੍ਗਤੋ;

ਸਮਨ੍ਤਾ ਅਟ੍ਠਰਤਨਂ, ਉਜ੍ਜੋਤਿਸ੍ਸਤਿ ਖਤ੍ਤਿਯੋ.

੪੦. ‘‘‘ਕਪ੍ਪਸਤਸਹਸ੍ਸਮ੍ਹਿ, ਓਕ੍ਕਾਕਕੁਲਸਮ੍ਭਵੋ;

ਗੋਤਮੋ ਨਾਮ ਗੋਤ੍ਤੇਨ, ਸਤ੍ਥਾ ਲੋਕੇ ਭਵਿਸ੍ਸਤਿ.

੪੧. ‘‘‘ਤੁਸਿਤਾ ਹਿ ਚਵਿਤ੍ਵਾਨ, ਸੁਕ੍ਕਮੂਲੇਨ ਚੋਦਿਤੋ;

ਕਚ੍ਚਾਨੋ ਨਾਮ ਨਾਮੇਨ, ਬ੍ਰਹ੍ਮਬਨ੍ਧੁ ਭਵਿਸ੍ਸਤਿ.

੪੨. ‘‘‘ਸੋ ਪਚ੍ਛਾ ਪਬ੍ਬਜਿਤ੍ਵਾਨ, ਅਰਹਾ ਹੇਸ੍ਸਤਿਨਾਸਵੋ;

ਗੋਤਮੋ ਲੋਕਪਜ੍ਜੋਤੋ, ਅਗ੍ਗਟ੍ਠਾਨੇ ਠਪੇਸ੍ਸਤਿ.

੪੩. ‘‘‘ਸਂਖਿਤ੍ਤਪੁਚ੍ਛਿਤਂ [ਸਂਖਿਤ੍ਤਂ ਪੁਚ੍ਛਿਤਂ (ਸ੍ਯਾ. ਕ.)] ਪਞ੍ਹਂ, ਵਿਤ੍ਥਾਰੇਨ ਕਥੇਸ੍ਸਤਿ;

ਕਥਯਨ੍ਤੋ ਚ ਤਂ ਪਞ੍ਹਂ, ਅਜ੍ਝਾਸਯਂ [ਅਜ੍ਝਾਸਂ (ਸੀ.), ਅਬ੍ਭਾਸਂ (ਕ.)] ਪੂਰਯਿਸ੍ਸਤਿ’.

੪੪. ‘‘ਅਡ੍ਢੇ ਕੁਲੇ ਅਭਿਜਾਤੋ, ਬ੍ਰਾਹ੍ਮਣੋ ਮਨ੍ਤਪਾਰਗੂ;

ਓਹਾਯ ਧਨਧਞ੍ਞਾਨਿ, ਪਬ੍ਬਜਿਂ ਅਨਗਾਰਿਯਂ.

੪੫. ‘‘ਸਂਖਿਤ੍ਤੇਨਪਿ ਪੁਚ੍ਛਨ੍ਤੇ, ਵਿਤ੍ਥਾਰੇਨ ਕਥੇਮਹਂ;

ਅਜ੍ਝਾਸਯਂ ਤੇਸਂ ਪੂਰੇਮਿ, ਤੋਸੇਮਿ ਦ੍ਵਿਪਦੁਤ੍ਤਮਂ.

੪੬. ‘‘ਤੋਸਿਤੋ ਮੇ ਮਹਾਵੀਰੋ, ਸਯਮ੍ਭੂ ਅਗ੍ਗਪੁਗ੍ਗਲੋ;

ਭਿਕ੍ਖੁਸਙ੍ਘੇ ਨਿਸੀਦਿਤ੍ਵਾ, ਏਤਦਗ੍ਗੇ ਠਪੇਸਿ ਮਂ.

੪੭. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਮਹਾਕਚ੍ਚਾਨੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਮਹਾਕਚ੍ਚਾਨਤ੍ਥੇਰਸ੍ਸਾਪਦਾਨਂ ਤਤਿਯਂ.