੪. ਕਾਲ਼ੁਦਾਯਿਤ੍ਥੇਰਅਪਦਾਨਂ

੪੮. ‘‘ਪਦੁਮੁਤ੍ਤਰਬੁਦ੍ਧਸ੍ਸ, ਲੋਕਜੇਟ੍ਠਸ੍ਸ ਤਾਦਿਨੋ;

ਅਦ੍ਧਾਨਂ ਪਟਿਪਨ੍ਨਸ੍ਸ, ਚਰਤੋ ਚਾਰਿਕਂ ਤਦਾ.

੪੯. ‘‘ਸੁਫੁਲ੍ਲਂ ਪਦੁਮਂ ਗਯ੍ਹ, ਉਪ੍ਪਲਂ ਮਲ੍ਲਿਕਞ੍ਚਹਂ;

ਪਰਮਨ੍ਨਂ ਗਹੇਤ੍ਵਾਨ, ਅਦਾਸਿਂ ਸਤ੍ਥੁਨੋ ਅਹਂ.

੫੦. ‘‘ਪਰਿਭੁਞ੍ਜਿ ਮਹਾਵੀਰੋ, ਪਰਮਨ੍ਨਂ ਸੁਭੋਜਨਂ;

ਤਞ੍ਚ ਪੁਪ੍ਫਂ ਗਹੇਤ੍ਵਾਨ, ਜਨਸ੍ਸ ਸਮ੍ਪਦਸ੍ਸਯਿ.

੫੧. ‘‘ਇਟ੍ਠਂ ਕਨ੍ਤਂ [ਕਨ੍ਤਯਿਦਂ (ਸ੍ਯਾ.)], ਪਿਯਂ ਲੋਕੇ, ਜਲਜਂ ਪੁਪ੍ਫਮੁਤ੍ਤਮਂ;

ਸੁਦੁਕ੍ਕਰਂ ਕਤਂ ਤੇਨ, ਯੋ ਮੇ ਪੁਪ੍ਫਂ ਅਦਾਸਿਦਂ.

੫੨. ‘‘ਯੋ ਪੁਪ੍ਫਮਭਿਰੋਪੇਸਿ, ਪਰਮਨ੍ਨਞ੍ਚਦਾਸਿ ਮੇ;

ਤਮਹਂ ਕਿਤ੍ਤਯਿਸ੍ਸਾਮਿ, ਸੁਣਾਥ ਮਮ ਭਾਸਤੋ.

੫੩. ‘‘‘ਦਸ ਅਟ੍ਠ ਚਕ੍ਖਤ੍ਤੁਂ [ਦਸ ਚਟ੍ਠਕ੍ਖਤ੍ਤੁਂ (ਸੀ.), ਦਸਮਟ੍ਠਕ੍ਖਤ੍ਤੁਂ (ਸ੍ਯਾ.)] ਸੋ, ਦੇਵਰਜ੍ਜਂ ਕਰਿਸ੍ਸਤਿ;

ਉਪ੍ਪਲਂ ਪਦੁਮਞ੍ਚਾਪਿ, ਮਲ੍ਲਿਕਞ੍ਚ ਤਦੁਤ੍ਤਰਿ.

੫੪. ‘‘‘ਅਸ੍ਸ ਪੁਞ੍ਞਵਿਪਾਕੇਨ, ਦਿਬ੍ਬਗਨ੍ਧਸਮਾਯੁਤਂ;

ਆਕਾਸੇ ਛਦਨਂ ਕਤ੍ਵਾ, ਧਾਰਯਿਸ੍ਸਤਿ ਤਾਵਦੇ.

੫੫. ‘‘‘ਪਞ੍ਚਵੀਸਤਿਕ੍ਖਤ੍ਤੁਞ੍ਚ, ਚਕ੍ਕਵਤ੍ਤੀ ਭਵਿਸ੍ਸਤਿ;

ਪਥਬ੍ਯਾ ਰਜ੍ਜਂ ਪਞ੍ਚਸਤਂ, ਵਸੁਧਂ ਆਵਸਿਸ੍ਸਤਿ.

੫੬. ‘‘‘ਕਪ੍ਪਸਤਸਹਸ੍ਸਮ੍ਹਿ, ਓਕ੍ਕਾਕਕੁਲਸਮ੍ਭਵੋ;

ਗੋਤਮੋ ਨਾਮ ਗੋਤ੍ਤੇਨ [ਨਾਮੇਨ (ਸੀ. ਸ੍ਯਾ. ਕ.)], ਸਤ੍ਥਾ ਲੋਕੇ ਭਵਿਸ੍ਸਤਿ.

੫੭. ‘‘‘ਸਕਕਮ੍ਮਾਭਿਰਦ੍ਧੋ ਸੋ, ਸੁਕ੍ਕਮੂਲੇਨ ਚੋਦਿਤੋ;

ਸਕ੍ਯਾਨਂ ਨਨ੍ਦਿਜਨਨੋ, ਞਾਤਿਬਨ੍ਧੁ ਭਵਿਸ੍ਸਤਿ.

੫੮. ‘‘‘ਸੋ ਪਚ੍ਛਾ ਪਬ੍ਬਜਿਤ੍ਵਾਨ, ਸੁਕ੍ਕਮੂਲੇਨ ਚੋਦਿਤੋ;

ਸਬ੍ਬਾਸਵੇ ਪਰਿਞ੍ਞਾਯ, ਨਿਬ੍ਬਾਯਿਸ੍ਸਤਿਨਾਸਵੋ.

੫੯. ‘‘‘ਪਟਿਸਮ੍ਭਿਦਮਨੁਪ੍ਪਤ੍ਤਂ, ਕਤਕਿਚ੍ਚਮਨਾਸਵਂ;

ਗੋਤਮੋ ਲੋਕਬਨ੍ਧੁ ਤਂ [ਸੋ (ਸੀ.)], ਏਤਦਗ੍ਗੇ ਠਪੇਸ੍ਸਤਿ.

੬੦. ‘‘‘ਪਧਾਨਪਹਿਤਤ੍ਤੋ ਸੋ, ਉਪਸਨ੍ਤੋ ਨਿਰੂਪਧਿ;

ਉਦਾਯੀ ਨਾਮ ਨਾਮੇਨ, ਹੇਸ੍ਸਤਿ ਸਤ੍ਥੁ ਸਾਵਕੋ’.

੬੧. ‘‘ਰਾਗੋ ਦੋਸੋ ਚ ਮੋਹੋ ਚ, ਮਾਨੋ ਮਕ੍ਖੋ ਚ ਧਂਸਿਤੋ;

ਸਬ੍ਬਾਸਵੇ ਪਰਿਞ੍ਞਾਯ, ਵਿਹਰਾਮਿ ਅਨਾਸਵੋ.

੬੨. ‘‘ਤੋਸਯਿਞ੍ਚਾਪਿ ਸਮ੍ਬੁਦ੍ਧਂ, ਆਤਾਪੀ ਨਿਪਕੋ ਅਹਂ;

ਪਸਾਦਿਤੋ [ਪਮੋਦਿਤੋ (ਸੀ.)] ਚ ਸਮ੍ਬੁਦ੍ਧੋ, ਏਤਦਗ੍ਗੇ ਠਪੇਸਿ ਮਂ.

੬੩. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਕਾਲ਼ੁਦਾਯੀ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ;

ਕਾਲ਼ੁਦਾਯੀਥੇਰਸ੍ਸਾਪਦਾਨਂ ਚਤੁਤ੍ਥਂ.