੧੦. ਕਪ੍ਪਰੁਕ੍ਖਿਯਤ੍ਥੇਰਅਪਦਾਨਂ

੧੦੮. ‘‘ਸਿਦ੍ਧਤ੍ਥਸ੍ਸ ਭਗਵਤੋ, ਥੂਪਸੇਟ੍ਠਸ੍ਸ ਸਮ੍ਮੁਖਾ;

ਵਿਚਿਤ੍ਤਦੁਸ੍ਸੇ ਲਗੇਤ੍ਵਾ [ਲਗ੍ਗੇਤ੍ਵਾ (ਸੀ. ਸ੍ਯਾ.)], ਕਪ੍ਪਰੁਕ੍ਖਂ ਠਪੇਸਹਂ.

੧੦੯. ‘‘ਯਂ ਯਂ ਯੋਨੁਪਪਜ੍ਜਾਮਿ, ਦੇਵਤ੍ਤਂ ਅਥ ਮਾਨੁਸਂ;

ਸੋਭਯਨ੍ਤੋ ਮਮ ਦ੍ਵਾਰਂ, ਕਪ੍ਪਰੁਕ੍ਖੋ ਪਤਿਟ੍ਠਤਿ.

੧੧੦. ‘‘ਅਹਞ੍ਚ ਪਰਿਸਾ ਚੇਵ, ਯੇ ਕੇਚਿ ਮਮ ਵਸ੍ਸਿਤਾ [ਨਿਸ੍ਸਿਤਾ (ਸੀ.)];

ਤਮ੍ਹਾ ਦੁਸ੍ਸਂ ਗਹੇਤ੍ਵਾਨ, ਨਿਵਾਸੇਮ ਮਯਂ ਸਦਾ [ਤਦਾ (ਸ੍ਯਾ.)].

੧੧੧. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਰੁਕ੍ਖਂ ਠਪਯਿਂ ਅਹਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਕਪ੍ਪਰੁਕ੍ਖਸ੍ਸਿਦਂ ਫਲਂ.

੧੧੨. ‘‘ਇਤੋ ਚ ਸਤ੍ਤਮੇ ਕਪ੍ਪੇ, ਸੁਚੇਲ਼ਾ ਅਟ੍ਠ ਖਤ੍ਤਿਯਾ;

ਸਤ੍ਤਰਤਨਸਮ੍ਪਨ੍ਨਾ, ਚਕ੍ਕਵਤ੍ਤੀ ਮਹਬ੍ਬਲਾ.

੧੧੩. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਕਪ੍ਪਰੁਕ੍ਖਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਕਪ੍ਪਰੁਕ੍ਖਿਯਤ੍ਥੇਰਸ੍ਸਾਪਦਾਨਂ ਦਸਮਂ.

ਕੁਣ੍ਡਧਾਨਵਗ੍ਗੋ ਚਤੁਤ੍ਥੋ.