੧. ਸਦ੍ਦਸਞ੍ਞਕਤ੍ਥੇਰਅਪਦਾਨਂ

੧. ‘‘ਮਿਗਲੁਦ੍ਦੋ ਪੁਰੇ ਆਸਿਂ, ਅਰਞ੍ਞੇ ਕਾਨਨੇ ਅਹਂ;

ਤਤ੍ਥਦ੍ਦਸਾਸਿਂ ਸਮ੍ਬੁਦ੍ਧਂ, ਦੇਵਸਙ੍ਘਪੁਰਕ੍ਖਤਂ.

੨. ‘‘ਚਤੁਸਚ੍ਚਂ ਪਕਾਸੇਨ੍ਤਂ, ਉਦ੍ਧਰਨ੍ਤਂ ਮਹਾਜਨਂ;

ਅਸ੍ਸੋਸਿਂ ਮਧੁਰਂ ਵਾਚਂ, ਕਰਵੀਕਰੁਦੋਪਮਂ [ਰੁਤੋਪਮਂ (?)].

੩. ‘‘ਬ੍ਰਹ੍ਮਸਰਸ੍ਸ ਮੁਨਿਨੋ, ਸਿਖਿਨੋ ਲੋਕਬਨ੍ਧੁਨੋ;

ਘੋਸੇ ਚਿਤ੍ਤਂ ਪਸਾਦੇਤ੍ਵਾ, ਪਤ੍ਤੋਮ੍ਹਿ ਆਸਵਕ੍ਖਯਂ.

੪. ‘‘ਏਕਤ੍ਤਿਂਸੇ ਇਤੋ ਕਪ੍ਪੇ, ਯਂ ਕਮ੍ਮਮਕਰਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਪਸਾਦਸ੍ਸ ਇਦਂ ਫਲਂ.

੫. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;

ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਸਦ੍ਦਸਞ੍ਞਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਸਦ੍ਦਸਞ੍ਞਕਤ੍ਥੇਰਸ੍ਸਾਪਦਾਨਂ ਪਠਮਂ.