੪. ਏਕਦੁਸ੍ਸਦਾਯਕਤ੍ਥੇਰਅਪਦਾਨਂ

੧੯. ‘‘ਨਗਰੇ ਹਂਸਵਤਿਯਾ, ਅਹੋਸਿਂ ਤਿਣਹਾਰਕੋ;

ਤਿਣਹਾਰੇਨ ਜੀਵਾਮਿ, ਤੇਨ ਪੋਸੇਮਿ ਦਾਰਕੇ.

੨੦. ‘‘ਪਦੁਮੁਤ੍ਤਰੋ ਨਾਮ ਜਿਨੋ, ਸਬ੍ਬਧਮ੍ਮਾਨ ਪਾਰਗੂ;

ਤਮਨ੍ਧਕਾਰਂ ਨਾਸੇਤ੍ਵਾ, ਉਪ੍ਪਜ੍ਜਿ ਲੋਕਨਾਯਕੋ.

੨੧. ‘‘ਸਕੇ ਘਰੇ ਨਿਸੀਦਿਤ੍ਵਾ, ਏਵਂ ਚਿਨ੍ਤੇਸਹਂ ਤਦਾ;

‘ਬੁਦ੍ਧੋ ਲੋਕੇ ਸਮੁਪ੍ਪਨ੍ਨੋ, ਦੇਯ੍ਯਧਮ੍ਮੋ ਚ ਨਤ੍ਥਿ ਮੇ.

੨੨. ‘‘‘ਇਦਂ ਮੇ ਸਾਟਕਂ ਏਕਂ, ਨਤ੍ਥਿ ਮੇ ਕੋਚਿ ਦਾਯਕੋ;

ਦੁਕ੍ਖੋ ਨਿਰਯਸਮ੍ਫਸ੍ਸੋ, ਰੋਪਯਿਸ੍ਸਾਮਿ ਦਕ੍ਖਿਣਂ’.

੨੩. ‘‘ਏਵਾਹਂ ਚਿਨ੍ਤਯਿਤ੍ਵਾਨ, ਸਕਂ ਚਿਤ੍ਤਂ ਪਸਾਦਯਿਂ;

ਏਕਂ ਦੁਸ੍ਸਂ ਗਹੇਤ੍ਵਾਨ, ਬੁਦ੍ਧਸੇਟ੍ਠਸ੍ਸਦਾਸਹਂ.

੨੪. ‘‘ਏਕਂ ਦੁਸ੍ਸਂ ਦਦਿਤ੍ਵਾਨ, ਉਕ੍ਕੁਟ੍ਠਿਂ ਸਮ੍ਪਵਤ੍ਤਯਿਂ;

ਯਦਿ ਬੁਦ੍ਧੋ ਤੁਵਂ ਵੀਰ, ਤਾਰੇਹਿ ਮਂ ਮਹਾਮੁਨਿ.

੨੫. ‘‘ਪਦੁਮੁਤ੍ਤਰੋ ਲੋਕਵਿਦੂ, ਆਹੁਤੀਨਂ ਪਟਿਗ੍ਗਹੋ;

ਮਮ ਦਾਨਂ ਪਕਿਤ੍ਤੇਨ੍ਤੋ, ਅਕਾ ਮੇ ਅਨੁਮੋਦਨਂ.

੨੬. ‘‘‘ਇਮਿਨਾ ਏਕਦੁਸ੍ਸੇਨ, ਚੇਤਨਾਪਣਿਧੀਹਿ ਚ;

ਕਪ੍ਪਸਤਸਹਸ੍ਸਾਨਿ, ਵਿਨਿਪਾਤਂ ਨ ਗਚ੍ਛਤਿ.

੨੭. ‘‘‘ਛਤ੍ਤਿਂਸਕ੍ਖਤ੍ਤੁਂ ਦੇਵਿਨ੍ਦੋ, ਦੇਵਰਜ੍ਜਂ ਕਰਿਸ੍ਸਤਿ;

ਤੇਤ੍ਤਿਂਸਕ੍ਖਤ੍ਤੁਂ ਰਾਜਾ ਚ, ਚਕ੍ਕਵਤ੍ਤੀ ਭਵਿਸ੍ਸਤਿ;

ਪਦੇਸਰਜ੍ਜਂ ਵਿਪੁਲਂ, ਗਣਨਾਤੋ ਅਸਙ੍ਖਿਯਂ.

੨੮. ‘‘‘ਦੇਵਲੋਕੇ ਮਨੁਸ੍ਸੇ ਵਾ, ਸਂਸਰਨ੍ਤੋ ਤੁਵਂ ਭਵੇ;

ਰੂਪਵਾ ਗੁਣਸਮ੍ਪਨ੍ਨੋ, ਅਨਵਕ੍ਕਨ੍ਤਦੇਹਵਾ;

ਅਕ੍ਖੋਭਂ ਅਮਿਤਂ ਦੁਸ੍ਸਂ, ਲਭਿਸ੍ਸਸਿ ਯਦਿਚ੍ਛਕਂ’.

੨੯. ‘‘ਇਦਂ ਵਤ੍ਵਾਨ ਸਮ੍ਬੁਦ੍ਧੋ, ਜਲਜੁਤ੍ਤਮਨਾਮਕੋ;

ਨਭਂ ਅਬ੍ਭੁਗ੍ਗਮੀ ਧੀਰੋ, ਹਂਸਰਾਜਾਵ ਅਮ੍ਬਰੇ.

੩੦. ‘‘ਯਂ ਯਂ ਯੋਨੁਪਪਜ੍ਜਾਮਿ, ਦੇਵਤ੍ਤਂ ਅਥ ਮਾਨੁਸਂ;

ਭੋਗੇ ਮੇ ਊਨਤਾ ਨਤ੍ਥਿ, ਏਕਦੁਸ੍ਸਸ੍ਸਿਦਂ ਫਲਂ.

੩੧. ‘‘ਪਦੁਦ੍ਧਾਰੇ ਪਦੁਦ੍ਧਾਰੇ, ਦੁਸ੍ਸਂ ਨਿਬ੍ਬਤ੍ਤਤੇ ਮਮਂ;

ਹੇਟ੍ਠਾ ਦੁਸ੍ਸਮ੍ਹਿ ਤਿਟ੍ਠਾਮਿ, ਉਪਰਿ ਛਦਨਂ ਮਮ.

੩੨. ‘‘ਚਕ੍ਕਵਾਲ਼ਮੁਪਾਦਾਯ, ਸਕਾਨਨਂ ਸਪਬ੍ਬਤਂ;

ਇਚ੍ਛਮਾਨੋ ਚਹਂ ਅਜ੍ਜ, ਦੁਸ੍ਸੇਹਿ ਛਾਦਯੇਯ੍ਯਹਂ.

੩੩. ‘‘ਤੇਨੇਵ ਏਕਦੁਸ੍ਸੇਨ, ਸਂਸਰਨ੍ਤੋ ਭਵਾਭਵੇ;

ਸੁਵਣ੍ਣਵਣ੍ਣੋ ਹੁਤ੍ਵਾਨ, ਸਂਸਰਾਮਿ ਭਵਾਭਵੇ.

੩੪. ‘‘ਵਿਪਾਕਂ ਏਕਦੁਸ੍ਸਸ੍ਸ, ਨਜ੍ਝਗਂ ਕਤ੍ਥਚਿਕ੍ਖਯਂ;

ਅਯਂ ਮੇ ਅਨ੍ਤਿਮਾ ਜਾਤਿ, ਵਿਪਚ੍ਚਤਿ ਇਧਾਪਿ ਮੇ.

੩੫. ‘‘ਸਤਸਹਸ੍ਸਿਤੋ ਕਪ੍ਪੇ, ਯਂ ਦੁਸ੍ਸਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਏਕਦੁਸ੍ਸਸ੍ਸਿਦਂ ਫਲਂ.

੩੬. ‘‘ਕਿਲੇਸਾ ਝਾਪਿਤਾ ਮਯ੍ਹਂ, ਭਵਾ ਸਬ੍ਬੇ ਸਮੂਹਤਾ;

ਨਾਗੋਵ ਬਨ੍ਧਨਂ ਛੇਤ੍ਵਾ, ਵਿਹਰਾਮਿ ਅਨਾਸਵੋ.

੩੭. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਏਕਦੁਸ੍ਸਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਏਕਦੁਸ੍ਸਦਾਯਕਤ੍ਥੇਰਸ੍ਸਾਪਦਾਨਂ ਚਤੁਤ੍ਥਂ.