੮. ਸੁਮਨਾਵੇਲ਼ਿਯਤ੍ਥੇਰਅਪਦਾਨਂ

੬੪. ‘‘ਵੇਸ੍ਸਭੁਸ੍ਸ ਭਗਵਤੋ, ਲੋਕਜੇਟ੍ਠਸ੍ਸ ਤਾਦਿਨੋ;

ਸਬ੍ਬੇ ਜਨਾ ਸਮਾਗਮ੍ਮ, ਮਹਾਪੂਜਂ ਕਰੋਨ੍ਤਿ ਤੇ.

੬੫. ‘‘ਸੁਧਾਯ ਪਿਣ੍ਡਂ ਕਤ੍ਵਾਨ, ਆਵੇਲ਼ਂ ਸੁਮਨਾਯਹਂ;

ਸੀਹਾਸਨਸ੍ਸ ਪੁਰਤੋ, ਅਭਿਰੋਪੇਸਹਂ ਤਦਾ.

੬੬. ‘‘ਸਬ੍ਬੇ ਜਨਾ ਸਮਾਗਮ੍ਮ, ਪੇਕ੍ਖਨ੍ਤਿ ਪੁਪ੍ਫਮੁਤ੍ਤਮਂ;

ਕੇਨਿਦਂ ਪੂਜਿਤਂ ਪੁਪ੍ਫਂ, ਬੁਦ੍ਧਸੇਟ੍ਠਸ੍ਸ ਤਾਦਿਨੋ.

੬੭. ‘‘ਤੇਨ ਚਿਤ੍ਤਪ੍ਪਸਾਦੇਨ, ਨਿਮ੍ਮਾਨਂ ਉਪਪਜ੍ਜਹਂ;

ਅਨੁਭੋਮਿ [ਅਨੁਭੋਸਿਂ (ਸੀ.)] ਸਕਂ ਕਮ੍ਮਂ, ਪੁਬ੍ਬੇ ਸੁਕਤਮਤ੍ਤਨੋ.

੬੮. ‘‘ਯਂ ਯਂ ਯੋਨੁਪਪਜ੍ਜਾਮਿ, ਦੇਵਤ੍ਤਂ ਅਥ ਮਾਨੁਸਂ;

ਸਬ੍ਬੇਸਾਨਂ ਪਿਯੋ ਹੋਮਿ, ਪੁਪ੍ਫਪੂਜਾਯਿਦਂ ਫਲਂ.

੬੯. ‘‘ਨਾਭਿਜਾਨਾਮਿ ਕਾਯੇਨ, ਵਾਚਾਯ ਉਦ ਚੇਤਸਾ;

ਸਂਯਤਾਨਂ ਤਪਸ੍ਸੀਨਂ, ਕਤਂ ਅਕ੍ਕੋਸਿਤਂ ਮਯਾ.

੭੦. ‘‘ਤੇਨ ਸੁਚਰਿਤੇਨਾਹਂ, ਚਿਤ੍ਤਸ੍ਸ ਪਣਿਧੀਹਿ ਚ;

ਸਬ੍ਬੇਸਂ ਪੂਜਿਤੋ ਹੋਮਿ, ਅਨਕ੍ਕੋਸਸ੍ਸਿਦਂ ਫਲਂ.

੭੧. ‘‘ਇਤੋ ਏਕਾਦਸੇ ਕਪ੍ਪੇ, ਸਹਸ੍ਸਾਰੋਸਿ ਖਤ੍ਤਿਯੋ;

ਸਤ੍ਤਰਤਨਸਮ੍ਪਨ੍ਨੋ, ਚਕ੍ਕਵਤ੍ਤੀ ਮਹਬ੍ਬਲੋ.

੭੨. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਸੁਮਨਾਵੇਲ਼ਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਸੁਮਨਾਵੇਲ਼ਿਯਤ੍ਥੇਰਸ੍ਸਾਪਦਾਨਂ ਅਟ੍ਠਮਂ.